Jusum Laef We i No Save Finis

TEDE i gat plante defren samting we yumi save jusum. Yumi save jusum wanem ol klos we yumi putum, kakae blong yumi, ples blong wok mo ples we bambae yumi laef long hem. Long plante kantri long wol, man i save jusum hu bambae i maredem. Nating se i olsem, Baebol i tokbaot wan samting we yumi save jusum we i impoten moa i bitim ol narafala samting​—samting ya, olgeta man oli save jusum.

Baebol i talem se: “Man we oltaem tingting blong hem i stap strong blong mekem ol stret fasin, hem bambae i gat gudfala laef, be man we i stap mekemhed, nao i stap mekem ol samting nogud, bambae hem i ded from.” (Ol Proveb 11:19) Mo Jisas Kraes i talem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”​—Jon 17:3.

!Yes, Man we i Wokem yumi i givim janis long yumi blong jusum wan rod we i save lidim yumi i go long laef we i no save finis! ?Yumi mas mekem wanem blong kasem laef ya we i no save finis?

Baebol i talem se: “Fasin we i stret, hem i rod blong laef.” (Ol Proveb 12:28) Yumi save stap wetem ol stret man ya we oli stap folem rod blong kasem laef we i no save finis. ?Olsem wanem yumi save stap wetem olgeta ya? Yumi mas meksua we laef blong yumi i laenap wetem samting we God i wantem mo wetem ol loa blong hem. (Matiu 7:​13, 14) I gud yumi jusum rod we i stret mo kasem presen ya we i kamaot long God, hemia laef we i no save finis.​—Rom 6:23.