Laef Stori

!Wan Glad We i Bitim Ol Narafala Glad!

REGINALD WALLWORK I TALEM STORI YA

“!I no gat wan samting long wol ya we i moa gud i bitim ol glad we mifala i kasem taem mifala i mekem wok blong Jeova olsem misinari!” Mi faenem smol toktok ya long ol pepa blong waef blong mi, smoltaem afta we hem i ded long Mei 1994.

TAEM mi tingbaot ol tok ya blong Irene, mi rimemba ol 37 hapi mo gudfala yia we mitufala i spenem olsem misinari long Peru. Mitufala i wokgud tugeta olsem tu Kristin patna, stat long taem we mitufala i mared long Disemba 1944​—mo ating i stret nomo we mi statem stori blong mi long taem ya nao.

Irene i gruap olsem wan Witnes blong Jeova long Liverpool, Inglan. Hem i gat tu sista blong hem, mo papa blong hem i ded long taem blong Wol Wo Wan. Biaen, mama blong hem i maredem Winton Fraser, mo tufala i gat wan boe, nem blong hem Sidney. Jes bifo Wol Wo Tu i stat, ful famle i muv i go long Bangor, North Wales. Irene i baptaes long ples ya long 1939. Sidney i baptaes wan yia bifo, taswe hem wetem Irene, tufala i wok olsem paenia​—minim se oli prij fultaem. Oli kavremap teritori long not kos blong Wales, i stat long Bangor go kasem Caernarvon, wetem aelan blong Anglesey tu.

Long taem ya, mi mi stap long Kongregesen blong Runcorn, samwe 20 kilometa longwe long saot is blong Liverpool. Mi wok long kongregesen ya olsem presiden elda, olsem yumi talem tede. Long taem blong wan seket asembli, Irene i kam luk mi blong askem sipos mi save givim sam teritori we hem i save prij long hem from we bambae hem i muv i kam long Runcorn blong stap wetem Vera, wan sista blong hem we i mared finis. Mi wetem Irene, mitufala i joengud tugeta long tufala wik ya we hem i spenem wetem mifala, mo biaen mi go visitim hem plante taem long Bangor. Long wan wiken, mi askem Irene blong mared wetem mi. !Mi glad we mi glad tumas taem hem i ansa se ‘yes’!

 Mi gobak long haos long Sande, mo kwiktaem nomo mi stat mekem plan from mared blong mitufala. Be long Tusde, mi kasem wan telegram. Telegram ya i rid olsem: “Sore tumas, bambae yu harem nogud from telegram ya. Mi kanselem mared blong yumitu. Wan leta bambae i kam biaen.” Mi sek mo mi harem nogud. ?From wanem Irene i kanselem mared blong mitufala?

Leta blong Irene i kam wan dei biaen. Long leta ya hem i talem long mi se hem i mas go long Horsforth long Yorkshire, blong paenia wetem Hilda Padgett. * Hem i eksplenem long mi se 12 manis bifo, hem i bin agri blong go prij long eni ples we i gat nid long hem, sipos oli askem long hem. Hem i raetem se: “Hemia i olsem wan strong promes we mi mekem finis long Jeova, mo mi mekem promes ya bifo we mi mitim yu. Taswe mi harem se mi mas holem promes ya.” Nating se mi sore, be mi tinghae long fasin blong Irene blong no lego promes blong hem. Mi sanem wan telegram i gobak long hem i se: “Yu go. Bambae mi wet long yu.”

Taem Irene i stap long Yorkshire, oli jajem hem se hem i mas kalabus tri manis, from we hem i no wantem sapotem faet. Nating se i olsem, 18 manis i pas, nao long Disemba 1944 mitufala i mared.

Yangtaem Blong Mi

Long 1919, mama blong mi i pem ol buk ya Studies in the Scriptures. * Papa blong mi i talem tru se mama i neva bin ridim wan buk bifo. Be nating se i olsem, Mama i gat strong tingting blong stadigud long olgeta buk ya mo long Baebol tu. Hem i mekem olsem we hem i bin talem, mo hem i baptaes long 1920.

Papa blong mi i no wan had man mo i no blokem mama blong mi blong hem i mekem samting we hem i wantem. Taswe papa i letem mama i tijim ol fofala pikinini long ol trutok blong Baebol​—ol fofala pikinini hemia mi, wetem tufala sista blong mi, Gwen mo Ivy, mo brata blong mi, Alec. Brata Stanley Rogers wetem sam narafala Witnes blong Liverpool we oli stap tru long God, oli stap kam long Runcorn blong givim ol tok we oli stanap long Baebol. I no longtaem i pas ale wan niufala kongregesen i stat long Runcorn. Famle blong mifala i gohedgud long saed blong spirit, wetem kongregesen tu.

Gwen i stap tekem sam lesen wetem Jos blong Inglan blong mekem komunion blong hem. Be taem hem i stat blong stadi long Baebol wetem Mama, wantaem nomo hem i no moa joen long ol lesen ya. Ale, pris i kam visitim mifala blong save from wanem Gwen i no moa tekem ol lesen blong hem. Be taem hem i kam, hem i fesem plante tumas kwestin we hem i no rere nating blong ansa long olgeta. Gwen i askem long hem wanem mining blong Prea blong Masta. !Be biaen, Gwen hem wan i eksplenem long pris mining blong prea ya! Blong finisim toktok blong tufala, Gwen i tokbaot vas blong 1 Korin 10:​21, mo i talem klia long pris se hem i no moa save ‘kakae long tu tebol.’ Taem pris i aot long haos blong mifala, hem i talem se bambae i prea from Gwen mo bambae hem i kambak blong ansa long ol kwestin blong hem. Be hem i neva kambak. Ale Gwen i baptaes, mo smoltaem biaen hem i kam wan fultaem paenia.

Kongregesen blong mifala i soem wan gudfala eksampol long fasin blong lukaot long ol yangfala. Mi rimemba we taem mi gat seven yia blong mi, mi lesin long tok blong wan elda. Afta long tok, elda ya i kam toktok wetem mi. Mi talem long hem we mi bin ridim stori blong Ebraham, mo olsem wanem hem i traem blong givim laef blong boe blong hem, Aesak, olsem wan sakrefaes. Elda ya i talem long mi se: “Plis, yu go long kona blong platfom ya mo yu talem stori ya long mi.” !Mi glad we mi glad tumas blong stanap long ples ya mo givim faswan “pablik tok” blong mi!

Mi baptaes taem mi gat 15 yia blong mi long 1931, long sem yia we mama blong mi i ded. Mo long yia ya, mi lego skul blong lanem wok blong lektrik. Long 1936, mifala i stap yusum ol rikod blong pleplei ol tok blong Baebol long wan fonograf. Wan olfala sista i leftemap tingting blong mi mo brata blong mi, blong mitufala i joen long fasin ya blong talemaot gud nius. Taswe, mi wetem Alec, mitufala i go long Liverpool blong pem wan baskel. Long ples ya, mifala i askem wan man blong wokem wan samting olsem bokis we i gat wil mo fasem long saed blong baskel ya. Bokis ya i blong putum fonograf long hem. Long baksaed blong bokis ya, i gat wan samting olsem wan paep we taem mifala i pulum, hem i save hae olsem tu mita. Nao antap long paep ya, mifala i fasem wan spika. Man blong mekanik we i givhan  long mifala blong wokem samting ya, i talem se hem i neva wokem wan samting olsem bifo. !Be samting ya i wokgud! Mitufala i glad tumas blong kavremap teritori blong mitufala. Mo mitufala i tangkiu long ol gudfala tok blong olfala sista ya, mo long bigfala janis we mitufala i gat blong mekem wok ya.

Wol Wo Tu​—Wan Taem Blong Traem

Plante moa saen oli soem we bambae wo i mas kamaot. Nating se i olsem, mi wetem Stanley Rogers, mitufala i bisi blong talemaot tok ya “Face the Facts,” we bambae oli givim long London’s Royal Albert Hall long Septemba 11, 1938. Biaen mi joen long wok blong seremaot wan smol buk we oli prentem tok ya long hem, wetem narafala buk ya Fascism or Freedom, we oli prentem wan yia biaen. Tufala buk ya oli soem klia we Jemani blong Hitler i wantem stanemap wan totalitarian gavman. Long taem ya, olgeta man long Runcorn oli savegud mi mo oli respektem mi from wok blong prij we mi mekem. Yes, fasin blong stap bisi oltaem long wok blong God i givhan bigwan long mi biaen.

Kampani ya we mi wok long hem i kasem wan kontrak. Mifala i mas mekem ol lektrik long wan niufala faktri we i stap afsaed long taon. Be taem mi harem se faktri ya i wokem ol tul blong faet, mi talem klia long olgeta se bambae mi no save mekem wok ya. Nating se ol big bos oli no glad long mi, be bos blong mi i sapotem mi, ale oli givim wan narafala wok long mi. Biaen, mi lanem we bos ya hem i gat wan anti blong hem we i wan Witnes blong Jeova tu.

Wan man we i wok wetem mi i leftemap tingting blong mi bigwan taem i talem long mi se: “Mifala i save finis we bambae yu no save mekem wok ya, Reg, from we yu yu stap mekem wok blong God blong plante yia finis.” Nating se i olsem, mi mas lukaotgud yet from we plante man we oli wok wetem mi oli wantem mekem trabol long mi.

Long Jun 1940, kot blong Liverpool i agri blong rejistarem mi olsem man we i no joen long wo from bilif blong hem. Be wan samting nomo, oli talem long mi se mi mas holem wok blong mi olsem man blong lektrik. Samting ya i mekem se mi mi save gohed long Kristin wok blong mi.

Mi Wok Olsem Paenia

Taem wo klosap i finis, mi tekem disisen blong lego wok blong mi mo joen wetem Irene long fultaem wok blong prij. Long 1946, mi wokem wan smol haos wetem wil we trak i save pulum, mo haos ya nao i kam haos blong mitufala. Wan yia biaen, oli askem mitufala sipos mitufala i wantem go prij long Alveston, wan vilej long Gloucestershire. Biaen, mitufala i paenia long olfala taon blong Cirencester mo long Bath. Long 1951, oli singaot mi blong mi go visitim ol kongregesen long saot blong Wales, olsem wan seket elda. Ale, tu yia nomo afta we mi statem wok ya, mi wetem Irene mitufala i go long Wajtaoa Baebol Skul blong Gilead, blong kasem trening long wok blong misinari.

Oli holem namba 21 skul blong Gilead long South Lansing, long not blong New York. Mifala i kasem ol setifiket blong mifala long asembli ya New World Society (Ol Man We Bambae Oli Laef Long Niufala  Wol), we oli holem long New York City. Mi wetem Irene, mitufala i no save weples bambae mitufala i go prij long hem, go kasem dei we mitufala i kasem ol setifiket. Mitufala i glad we i glad tumas blong save we bambae mitufala i go long Peru. ?From wanem? !From we Sidney Fraser, hemia haf brata blong Irene, wetem waef blong hem, Margaret, tufala i wok bitim wan yia finis long branj ofis blong Lima, afta we tufala i kasem setifiket blong tufala long namba 19 klas blong Gilead!

Taem mitufala i wet blong kasem visa blong mitufala, mitufala i stap wok smoltaem long Betel long Brooklyn. Be i no longtaem, mitufala i aot blong go long Lima. Faswan long ol ten ples we oli sanem mitufala i go long hem olsem misinari, hemia Callao, stamba taon long Peru we ol sip oli stap pas long hem. Taon ya i stap long wes blong Lima. Nating se mitufala i bin lanem ol stamba toktok blong lanwis ya Spanis, be long taem ya mi wetem Irene, mitufala i no naf yet blong storian wetem ol man long lanwis ya. ?Olsem wanem bambae mitufala i save prij?

Ol Traem Mo Ol Blesing Long Wok Blong Prij

Long Gilead, oli talem long mifala se i no mama we i tijim lanwis long bebi blong hem. Be bebi nao i lanem lanwis taem hem i harem mama blong hem i toktok. Taswe oli givim advaes ya long mifala se: “I gud yufala i go prij kwiktaem nomo, mo yufala i lanem lanwis wetem ol man we bambae yufala i prij long olgeta. Olgeta ya nao bambae oli halpem yufala blong toktokgud.” !Traem tingbaot filing blong mi; mi jes stat nomo blong kasem save mo traehad blong toktok long niufala lanwis ya, nao tu wik nomo afta we mifala i kasem Callao, oli putumap mi olsem presiden elda long kongregesen! Ale mi go luk Sidney Fraser, be advaes we hem i givim long mi i sem mak long advaes we mi kasem long Gilead​—joengud wetem kongregesen mo wetem ol man long teritori blong yu. Mi gat strong tingting blong folem advaes ya.

Wan Sarede long moning, mi mitim wan kapenta long woksap blong hem. Hem i talem long mi se: “Mi no save stopem wok blong mi, be plis, yu sidaon, mo yu toktok long mi.” Mi agri blong mekem olsem, be wan samting nomo, mi askem long hem se: “Sipos mi mestem taem mi toktok, plis, yu stretem mi. Bambae mi no harem nogud from.” Hem i laf mo i agri blong mekem samting ya. Mi stap visitim hem tu taem long wan wik, mo mi harem se hemia wan nambawan rod blong lanem blong toktok gud lanwis ya, olsem oli talem long mi finis.

Long Ica, hemia seken taon we mitufala i go prij long hem olsem misinari, mi mitim wan narafala kapenta, mo mi eksplenem long hem wanem plan we mi gat taem mi stap long Callao yet. Man ya i agri se bambae i save halpem mi long semfala fasin. Taswe, sloslo Spanis blong mi i kam moagud, nating se i tekem tri yia bifo we mi kam naf blong toktok gud Spanis. Kapenta ya i bisi oltaem be nating se i olsem, mi save stadi long Baebol wetem hem. Mi ridim Baebol, mo biaen mi eksplenem mining blong samting we mi jes ridim. Wan wik, taem mi go luk hem, bos blong hem i talem long mi se hem i go long Lima from wan niufala wok. Samtaem biaen, mi wetem Irene mitufala i go long wan asembli long Lima, ale mi mitim man ya bakegen. Mi glad tumas taem mi harem se afta we man ya i kasem Lima, hem i singaot ol Witnes blong ples ya blong oli gohed long stadi blong hem. !Mo hem wetem famle blong hem, olgeta evriwan oli givim laef blong olgeta i go long Jeova!

Long wan kongregesen, mifala i faenem se wan man wetem gelfren blong hem, tufala i no mared yet, be tufala i baptaes finis. Ale mifala i luk wetem tufala wanem samting we Baebol i talem long saed blong mared. Nao tufala i gat strong tingting blong mared from we long rod ya nomo bambae oli naf blong kam ol trufala Witnes we oli baptaes. Ale mi plan blong tekem tufala i go long taon hol, blong rejistarem mared blong tufala. Be naoia wan narafala problem i kamaot. Tufala i gat fo pikinini finis, we oli no bin rejistarem olgeta folem loa tu. Mifala i no save se mea bambae i mekem wanem. Be mea ya i talem se: “From we ol gudfala man ya, ol fren blong yufala we oli Witnes blong Jeova, oli luksave we yutufala i mas mared folem loa, bambae mi mi no mekem we yutufala i pem ol faen from ol fofala pikinini we yutufala i mas rejistarem. Bambae mi rejistarem olgeta fri nomo.” !Mifala i tangkiu tumas long samting ya, from we famle ya i pua tumas, mo bambae oli fesem bigfala trabol sipos oli mas pem wan faen!

Biaen, Albert D. Schroeder blong hedkwota blong ol Witnes blong Jeova, i kam visitim mifala. Hem i talem se i gud blong stanemap wan niufala misinari haos long wan narafala ples long Lima. Taswe mi wetem Irene, mo tu sista blong Yunaeted Stet, nem blong tufala Frances mo Elizabeth Good, wetem wan brata blong Kanada mo waef blong hem, mifala i muv i go long distrik blong San Borja. Bifo tri yia i pas, mifala i stanemap wan niufala kongregesen we i gruap gud long ples ya.

 Biaen mifala i prij long Huancayo, wan taon we i stap 3,000 mita antap long ol hil long sentrol Peru. Mifala i joen wetem kongregesen blong ples ya, we i gat 80 Witnes long hem. Mi tekpat long wok blong bildim namba tu Haos Kingdom we oli wokem long kantri ya. Oli putumap mi olsem man we i wok long nem blong ol Witnes blong Jeova, from we mifala i mas pas long kot tri taem blong loa i stanemap raet blong mifala long graon we mifala i bin pem. Ol wok olsem, wetem bigfala wok blong prij we plante misinari oli mekem long ol faswan yia we trutok i kasem Peru, oli openem rod long bigfala namba blong ol man we oli stap kam long trutok long Peru tede​—long 1953 i gat 283 Witnes long Peru, tede i gat bitim 83,000 man.

Mitufala i Sore Tumas Blong Go

Mitufala i gat gudfala taem wetem ol narafala misinari, long olgeta misinari haos we mitufala i stap long hem. Plante taem, mi gat janis blong wok olsem brata we i lukaot long wok insaed long haos. Evri Mande moning, mifala i joen tugeta blong tokbaot wok we bambae mifala i mekem long wik we i kam, mo blong serem ol defdefren wok blong lukaot long haos blong mifala. Mifala evriwan i luksave se stamba wok blong mifala, hemia wok blong prij. Mo blong mekemgud wok ya, mifala evriwan i joengud tugeta blong mekem ol defren wok insaed long haos. Mi glad blong tingbaot se mifala i neva gat wan bigfala rao long ol defdefren misinari haos we mifala i stap long olgeta.

Laswan ples we oli sanem mifala i go prij long hem, hemia Breña, wan ples afsaed long taon blong Lima. Naesfala kongregesen blong Breña we i gat 70 Witnes long hem i gru kwiktaem, gogo i gat bitim 100 Witnes long hem. Taswe mifala i stanemap wan narafala kongregesen long Palominia. Hemia long taem ya nao we Irene i stat blong kam sik. Fastaem, mi luk we sam samtaem, hem i no save rimemba samting we hem i bin talem, mo samtaem hem i no save rimemba olsem wanem blong gobak long haos. Nating se ol dokta blong ples ya oli lukaot gud long helt blong Irene, be sloslo helt blong hem i kam moa nogud.

Sore tumas, long 1990, mi mas mekem plan blong mitufala i gobak long Inglan. Nao long ples ya, gudfala sista blong mi Ivy, hem i welkamem mitufala long haos blong hem. Fo yia biaen, Irene i ded. Hem i gat 81 yia blong hem. Mi mi gohed long fultaem wok blong prij, mi wok olsem wan elda long wan long ol trifala kongregesen blong Runcorn. Mo tu, sam samtaem mi go long Manchester blong sapotem Spanis grup we i stap longwe.

I no longtaem i pas, mi kasem wan gudfala ekspiriens, we i bin stat plante yia bifo, long taem ya we mi stap yusum fonograf blong plei ol faef menet tok long ol man long ol haos wanwan. Mi rimemba wan yangfala gel we i stap skul yet, i stanap biaen long mama blong hem, klosap long doa, mo i stap lesin long rikod blong mifala.

Biaen gel ya i muv i go stap long Kanada. Ale wan fren blong mi we i wan Witnes mo i stap yet long Runcorn, hem i stap raetem leta i go long gel ya. I no longtaem biaen, gel ya i raetem wan leta blong talem se tu Witnes oli prij long hem, mo oli yusum sam toktok we oli mekem hem i tingtingbak long wan tok we hem i bin harem bifo, long wan rikod blong faef menet. Hem i luksave se hemia trutok. !Naoia, hem i givim laef blong hem i go finis long Jeova mo hem i wantem pasem tangkiu blong hem i go long yangfala man ya we i bin visitim mama blong hem samwe long 60 yia bifo! Tru ya, yumi neva save olsem wanem ol sid blong trutok bambae oli gru mo karem frut.​—Prija 11:6.

Yes taem mi luklukbak, mi tangkiu tumas long laef ya we mi spenem blong mekem wok blong Jeova. Stat long taem ya we mi baptaes long 1931 kam kasem naoia, mi neva mestem wan asembli blong ol Witnes blong Jeova. Nating se mi wetem Irene mitufala i no gat prapa pikinini blong mitufala, be mi glad blong gat bitim 150 boe mo gel long saed blong spirit, we olgeta evriwan oli stap mekem wok blong Papa blong yumi long heven, Jeova. Yes, tok ya we waef blong mi i raetem long smol pepa ya, i tru nomo se glad we mitufala i kasem long wok blong misinari i bigwan moa i bitim ol narafala glad.

[Ol Futnot]

[Tok blong pija long pej 24]

Mama long stat blong ol yia 1900

[Tok blong pija long pej 25]

Antap: Mi wetem Irene long fran blong smol haos blong mitufala we trak i pulum

[Tok blong pija long pej 25]

Lefsaed: Hilda Padgett, mi, Irene, mo Joyce Rowley long Leeds, Inglan, 1940

[Tok blong pija long pej 27]

Talemaot wan pablik tok long Cardiff, Wales, 1952