Alexander 6 Wan Pop We Rom Bambae i No Save Fogetem

“LONG lukluk blong ol man Katolik, i no gat tok we i strong i naf blong givim panis long Alexander 6, stret folem ol rong blong hem.” (Geschichte der Päpste seit dem Ausgang des Mittelalters [Histri Blong Ol Pop Stat Long Lashaf Blong Ol Medel Ejes] ) “I no gat wan eskius nating we i save kavremap ol samting we hem i mekem long praevet laef blong hem . . . Tru tumas, pop ya i no givim ona nating long Jos. Ol man we oli laef long taem blong famle blong Borgia oli luk finis plante rabis fasin, be rabis fasin we famle ya i mekem i bitim mak olgeta. Fo handred yia i pas nao, be frut blong ol rabis fasin ya oli stap yet, oli no lus fulwan.”​— L’Église et la Renaissance (1449-​1517) (Jos Mo Taem We Ol Niufala Save i Kam Antap).

?From wanem plante buk we oli tokbaot histri blong Roman Katolik Jos oli talem ol strong tok ya long saed blong wan pop mo famle blong hem? ?Wanem samting nao we oli bin mekem blong ol man oli tok nogud long olgeta? I no longtaem, oli holem wan eksibisen long Rom (Oktoba 2002-Februari 2003), we nem blong eksibisen ya I Borgia​—l’arte del potere (Famle Borgia​—Oli Waes Blong Yusum Paoa). Eksibisen ya i givim janis long ol man blong oli tingting gud long paoa we ol pop oli talem se oli gat raet long hem, be antap moa long fasin we Rodrigo Borgia i yusum paoa blong hem taem oli putumap hem olsem pop Alexander 6 (hem i holem wok ya stat long 1492 i go kasem 1503).

Olsem Wanem Hem i Kasem Paoa

Rodrigo Borgia i bon long yia 1431. Famle blong hem oli ol hae man long Jativa, hemia long kantri blong Aragon, we tede hem i wan pat blong Spen. Angkel blong Rodrigo, we nem blong hem Alfonso de Borgia, hem i wan bisop long Valencia. Angkel ya i pem edukesen blong Rodrigo, mo hem nao i mekem we taem Rodrigo i yangfala yet, hem i kasem wok long jos we oli pem hem from. Taem Rodrigo i kasem 18 yia blong hem, angkel blong hem Alfonso, we naoia hem i wan kadinol blong jos, i sanem Rodrigo i go long Itali blong stadi long saed blong loa. Ale, taem angkel ya i kam Pop Calixtus 3, hem i putumap Rodrigo mo wan narafala nefiu blong hem, tufala i kam kadinol. Mo hem i putumap wan narafala famle blong hem we oli kolem Pere Lluís Borgia, olsem hedgavman blong sam taon. I no longtaem biaen, oli putumap Rodrigo bakegen, blong i mekem plan blong ol wok blong Jos mo ol tija blong hem. Hemia wan posisen we hem i holem long taem we plante defdefren pop oli rul. Wok ya i mekem we Rodrigo i gat rod blong kasem plante samting, hem i kam rij bitim mak, i gat bigbigfala paoa antap long ol man, mo i mekem laef blong hem i kam gud olsem we hem i pikinini blong king stret.

Rodrigo i wan man we i gat hed. Hem i save toktok gud, hem i givim mane blong sapotem ol man we oli dro ol pija, mo hem i naf blong mekem ol samting we hem i wantem mekem. Hem i gat plante woman blong hem tu. Hem i givim fo pikinini long woman we i stap wetem hem blong ful laef blong hem. Be hem i gat plante moa pikinini tu wetem sam narafala woman. Pop Pius 2 i tok strong long Rodrigo from fasin blong hem blong pleplei “long saed blong seks” mo “fasin  blong gat gud taem we i no gat mak long hem.” Be Rodrigo i no jenisim fasin blong hem.

Long 1492, Pop Innocent 8 i ded, nao ol kadinol blong jos oli sidaon wanples blong vot long wan niufala pop. Plante samting i pruvum se Rodrigo Borgia i pem ol kadinol blong oli vot long hem. From samting ya nao, hem i kasem posisen ya olsem Pop Alexander 6. ?Hem i pem ol man ya wetem wanem? Long sam blong olgeta hem i givim posisen insaed long jos, long sam narafala hem i givim ol bigbigfala haos blong king mo rijman, mo long samfala hem i givim ol taon mo ol haos blong pris, mo samfala oli kasem wok blong bisop wetem bigfala pei blong hem. Hemia nao from wanem wan man blong raetem histri blong jos i talem se long taem we Alexander 6 i rul, “fasin nogud i fulap mo hem i sakem doti long Roman Katolik Jos.”

Fasin Blong Hem i No Gud Moa i Winim Ol Pikinini Blong King

From we Alexander 6 i hed blong Jos hem i gat paoa blong stretem raorao we i stap seraotem Spen mo Potugal. Hem nao i makemaot se wanem haf blong niufala kantri ya Amerika i mas stap aninit long gavman blong Spen mo wanem haf i go long Potugal. From we hem i gat paoa blong rul, hem i kam olsem hed blong ol eria we Jos i bos long olgeta, we sam long ol teritori blong hem i stap long sentrol Itali. Hem i rulum ol teritori ya olsem ol narafala king we oli rulum kingdom blong olgeta long taem ya. Rul blong Alexander 6, i sem mak long rul blong ol pop bifo mo afta long hem. Oli pasem mane aninit long tebol, oli mekem i gud moa long ol famle blong olgeta i bitim ol narafala man, mo oli pem man blong kilim i ded ol enemi blong olgeta long fasin haed.

Long ol yia ya, ol man we oli gat bigfala paoa oli stap faet blong traem karem ol teritori blong Itali. Pop Alexander 6 i joen fulwan long bisnes ya. Hem i yusum politik, i mekem kontrak wetem ol man, no i brekem kontrak wetem olgeta, from we hem i wantem mekem we paoa blong hem i kam antap, i wantem leftemap ol pikinini blong hem blong oli kasem hae posisen, mo i wantem se nem blong famle Borgia i antap long ol narafala famle. Boe blong hem, Juan, i mared wetem kasen sista blong King blong Castile. Ale from samting ya, Juan i kam olsem rula blong eria blong Gandia, long Spen. Narafala boe blong pop, nem blong hem Jofré, i mared wetem wan woman we hem i smol bubu blong king blong Naples.

Taem pop i nidim blong mekem fasin fren blong hem wetem Franis i strong moa, hem i brekem promes blong hem se gel blong hem, Lucrezia, we i gat 13 yia nomo, bambae i mared wetem wan rijman long Aragon. Ale, hem i givim gel ya blong i mared wetem rula blong eria blong Milan. Be taem hem i luk se mared ya bambae i no moa givhan long hem long saed blong politik, hem i faenem wan eskius blong finisim mared blong tufala ya, mo i mekem plan blong bambae Lucrezia i mared long Alfonso blong Aragon, hem i pikinini boe blong wan laen we i enemi blong pop. Long semtaem ya, brata blong Lucrezia, nem blong hem Cesare Borgia, i mekem wan kontrak wetem King Louis 12 blong Franis. Cesare i wan man we i hanggri from paoa mo i rabis man stret. Hem i sem bigwan taem i harem se sista blong hem i mared i go long wan man Aragon. ?Hem i mekem wanem? Wan buk i stori se: “Sam man oli faenem hasban blong Lucrezia, hemia Alfonso, i hafded i stap long ol step blong jos blong Sen Peter, we fo man oli bin givim bigfala kil long hem blong traem kilim hem i ded. Taem hem i stap kamgud sloslo, wan wokman blong Cesare i kam jokem hem gogo i ded.” Nao pop i traem faenem sam narafala rod blong mekem paoa blong hem i strong i stap. Taswe hem i wokem rod blong bambae Lucrezia, we naoia i gat 21 yia, i mared long boe blong wan rula we i gat bigfala paoa long eria blong Ferrara.

Ol man oli tokbaot ol wok blong Cesare olsem “wan stori we i fulap long ol doti mo nogud fasin, mo blad nao i kavremap stori ya.” Nating se Pop i putumap boe blong hem, Cesare, long wok blong kadinol taem hem i gat 17 yia, be boe ya i stret moa blong mekem faet i bitim we i lukaot long ol wok insaed long jos. Hem i gat gudhan blong wokem ol trik, hem i hanggri from paoa, mo i fulap long kruked fasin. Afta we hem i finis long ol wok blong jos, hem i mared wetem wan woman Franis we hem i pikinini blong king. Long rod ya, oli putumap hem i kam rula blong eria blong Valentinois.  Ale, hem i yusum ol ami blong Franis, mo i stat blong tekova long ol teritori long not blong Itali. Hem i kilim plante man i ded blong kasem mak ya.

Biaen, Pop i agri long ol giaman risen we Louis 12 blong Franis i givim blong mekem divos wetem woman blong hem. Louis 12 i mekem divos ya from we hem i wantem mared wetem Anne blong Brittany blong mekem se ol eria we oli stap long paoa blong woman ya, oli kam aninit long rul blong hem. Pop i glad nomo blong mekem divos we Louis 12 i askem from we hem i wantem meksua se ol ami blong Franis bambae oli sapotem Cesare long ol fiuja faet we bambae hem i mekem. Wan buk i talem se, i olsem we pop “i salem gudnem blong Jos mo ol stret rul blong hem, jes blong givim paoa long ol man long famle blong hem.”

Ol Man Oli Stat Toktok From Nogud Fasin Blong Pop

Ol nogud fasin blong famle Borgia i mekem se oli gat plante enemi mo fulap man i tok nogud long saed blong olgeta. Pop i no kea long ol man olsem, be i gat wan man nomo we pop i no laekem nating. Man ya hemia Girolamo Savonarola, wan pris long haf blong jos we oli kolem Dominika. Hem i wan prija we hem i no fraet blong tok, mo hem i wan lida blong politik long Florence. Man ya i tok strong agensem ol rabis fasin long famle blong pop mo i daonem pop hem wan wetem ol wok blong hem long politik. Hem i talem se pop i mas aot long wok blong hem mo jos i mas jenisim sam samting. Savonarola i singaot strong i se: “Yufala, ol lida blong Jos . . . long naet, yufala i go slip wetem ol woman olbaot, be long moning yufala i go mekem ol kastom blong jos.” Biaen hem i se: “[Ol lida ya] we oli olsem ol woman blong rod, hae nem blong olgeta i sakem doti nomo i go long gudnem blong Jos. Mi talem long yufala, olgeta ya oli no bilif long Kristin skul.”

Pop i wantem satem maot blong Savonarola, ale hem i talem se bambae i putumap Savonarola olsem kadinol blong Jos. Be Savonarola i no wantem. Yumi no sua se wanem samting stret i mekem se Savonarola i lus. Maet hemia from we hem i agensem ol pop no from ol tok we hem i stap prijimaot. Be Jos i sakemaot hem, ale oli putum hem long kalabus, oli mekem hem i harem nogud long bodi blong hem gogo hem i talemaot se hem i mekem sin, nao oli hangem nek blong hem, mo oli bonem bodi blong hem long faea.

Sam Impoten Kwestin Blong Tingbaot

Ol samting ya we oli hapen long histri oli stanemap sam impoten kwestin. ?Yumi save faenem sam risen we oli mekem se fasin blong pop ya i stret? ?Ol man blong stadi histri oli talem wanem long saed ya? Oli gat ol defdefren tingting long saed ya.

Plante man oli talem se, taem yumi tingbaot Alexander 6 yumi no mas fogetem ol samting we i stap hapen long wol long taem blong hem. Oli se, ol disisen mo wok we hem i mekem long politik mo long jos oli blong leftemap pis, mo blong mekem se tufala kantri we tufala i enemi, tufala i gat sem paoa nomo, wan i no strong moa long narawan, mo i blong mekem fren wetem ol narafala kantri we oli save givhan long pop taem hem i stap long trabol. Mo tu, hem i wok blong joenem ol lida blong Krisendom * wanples agensem ol man Turkey we oli wantem kam agensem olgeta.

?Be olsem wanem long fasin blong hem? Wan man we i stadi long saed ya i talem se: “Long histri blong Jos, oltaem nomo i bin gat ol nogud Kristin mo ol pris we oli no stret blong mekem wok blong pris. Yumi no mas sek long samting ya from we Kraes hem wan i talem se bambae i mas olsem. Kraes i talem se Jos blong hem i olsem wan garen we i gat gudfala wit mo rabis gras i gru wanples, mo hem i talem se Jos i olsem wan net we i kasem ol gudfala fis wetem ol nogud fis tu. Mo tu, [Jisas hem wan] i letem Judas i stap olsem wan aposol blong hem.” *

Semfala man ya we i stadi long saed ya i gohed i se: “Wan sas ston hem i sas yet, nating sipos aean we i holemtaet hem i nogud. Long sem fasin, sin we wan pris i mekem i no save spolem . . . ol tijing we hem i stap prijimaot. . . . Gol hem i stap olsem gol nomo, nating sipos  man we i holem long han blong hem i stret man no i rabis man.” Wan man we i stadi long histri blong Katolik Jos i agiu long saed ya se rul we ol gudfala Katolik oli mas folem long taem blong Alexander 6 hemia advaes ya we Jisas i givim long ol disaepol blong hem long saed blong ol tija blong loa mo ol Farisi i se: “Yufala i mas mekem olgeta samting we oli talem. Be i nogud yufala i folem fasin blong olgeta.” (Matiu 23:​2, 3) ?Be, sipos yumi rili tingting gud long samting ya, mo yumi no giaman long yumi wan, yumi save talem se ol tingting ya oli stret?

?Hemia Nao Trufala Kristin Skul?

Jisas i talem wan isi rul nomo blong givhan long man blong luksave ol trufala Kristin. Hem i se: “Bambae yufala i save makem olgeta long frut blong laef blong olgeta. Man i no save go tekem frut we i swit long rabis rop we i gat nil, mo i no save tekem gudfala frut long ol rabis rop olbaot. Gudfala tri, hem i save karem gudfala frut nomo, mo rabis tri, hem i save karem rabis frut nomo. Be gudfala tri i no save karem rabis frut, mo rabis tri i no save karem gudfala frut. From samting ya, bambae yufala i save makem ol man ya long frut blong laef blong olgeta.”​—Matiu 7:​16-18, 20.

?Long ol handred yia we i pas, bighaf blong ol lida blong skul oli kasem ol mak ya blong trufala Kristin skul we Jisas i stanemap mo ol fasin we ol trufala man blong hem oli bin folem? Bambae yumi tingbaot tu poen nomo long saed ya. Faswan hemia fasin blong joen long politik mo seken wan hemia fasin blong laef.

Jisas i no wan hae man blong wol ya. Laef blong hem i olsem ol narafala man nomo. Hem wan i talem se hem i no gat wan ‘ples blong go slip long hem.’ Kingdom blong hem i no “blong wol ya,” mo ol disaepol blong hem tu oli ‘no man blong wol ya, long sem fasin we hem tu i no man blong wol ya.’ Taswe, Jisas i no joen nating long ol bisnes blong politik long taem blong hem.​—Matiu 8:20; Jon 6:15; 17:16; 18:36.

?Be olsem wanem long ol skul blong wol ya? Blong plante handred yia ol skul oli wokgud tugeta wetem ol bigman blong politik blong kasem paoa mo ol sas samting, nating se fasin blong olgeta i spolem ol puaman. Mo tu, tingbaot ol lida blong skul we oli laef wetem bigfala mane be ol man we ol lida ya oli mas givhan long olgeta oli pua tumas.

Haf brata blong Jisas, hemia Jemes, i talem se: “Yufala i olsem woman we i stap livim man blong hem, i stap go wetem narafala man. ?Weswe? ?Yufala i no save se man we i wantem tumas ol fasin blong wol, hem i kam enemi blong God? Taem yufala i wantem tumas ol fasin blong wol, be semtaem nomo yufala i kam enemi blong God.” (Jemes 4:4) ?From wanem oli kam “enemi blong God”? Fas Jon 5:19 i talem se: “Olgeta man blong wol ya oli stap long paoa blong Setan.”

Wan man blong raetem histri, we i laef long taem blong famle Borgia, i tokbaot fasin blong Alexander 6 i se: “I no gat samting we i blokem hem blong folem ol rabis fasin long laef blong hem. Hem i no gat sem nating, hem i no traehad nating blong mekem samting we i stret. Hem i olsem wan man we i no gat bilif mo skul tu. Hem i wan man we i wantem plante tumas samting, hem i griri from paoa, hem i kilim mo spolem ol man olsem we oli nating nomo, mo wan samting nomo we hem i rili wantem, hemia se olgeta pikinini blong hem oli mas kam bigman.” I tru, i no Alexander 6 nomo we i mekem ol fasin ya. Plante narafala lida blong skul tu oli mekem sem mak.

?Baebol i talem wanem long olkaen fasin olsem? Aposol Pol i talem se: “Yufala i save finis. Ol man we oli stap mekem i no stret, bambae oli no save go insaed long niufala wol ya we God i king long hem. Yufala i mas tingting gud long samting ya. Yufala i mas save se man we i stap ronem woman, . . . man we i stap slip wetem woman blong narafala man, . . . mo man we i wantem plante samting tumas . . . bambae oli no save go insaed samtaem long niufala wol ya we God i king long hem.”​—1 Korin 6:​9, 10.

Eksibisen ya we oli mekem i no longtaem long Rom blong soemaot laef blong famle blong Borgia, hem i blong “kasem save long ol bigfala man ya folem taem we oli laef long hem . . . , i no blong yumi talem se oli no mekem rong mo i no blong yumi jajem olgeta, be i blong kasem save long olgeta.” Ol man blong eksibisen ya oli talem long ol visita se olgeta wanwan oli mas mekemap tingting blong olgeta folem samting we oli luk. ?Ale olsem wanem long yu? ?Yu tingbaot samting ya olsem wanem?

[Ol Futnot]

[Tok blong pija long pej 26]

Rodrigo Borgia, Pop Alexander 6

[Tok blong pija long pej 27]

Papa blong Lucrezia Borgia i yusum hem blong mekem rul blong hem i kam strong moa

[Tok blong pija long pej 28]

Cesare Borgia i wantem nomo blong kasem hae nem mo i fulap long kruked fasin

[Tok blong pija long pej 29]

Oli no save satem maot blong Girolamo Savonarola, taswe oli hangem hem mo oli bonem bodi blong hem