Laef Stori

Man We Jeova i God Blong Hem, Hem i Save Haremgud

TOM DIDUR I TALEM STORI YA

Mifala i rentem komuniti haos finis, mo mifala i ting se samwe 300 man bambae oli kam long asembli ya long Porcupine Plain, Saskatchewan, Kanada. Long Wenesde, sno i stat blong foldaon, mo long Fraede win i blu strong mo fulap sno i foldaon gogo mifala i no save luk wan samting. Tempraja i godaon kasem 40 digri aninit long siro. Twanti eit man i stap long asembli, we sam blong olgeta oli pikinini. Long taem ya mi gat 25 yia blong mi, mo mi fraet tumas from we asembli ya hem i faswan wok blong mi olsem seket elda. Be, bifo we mi talem long yu wanem i hapen long asembli ya, ating i gud sipos mi eksplenem olsem wanem mi kasem spesel janis ya blong wok olsem seket elda.

MI MI namba seven blong eit pikinini, we olgeta evriwan oli boe. Fasbon blong ol boe, nem blong hem Bill, afta i gat Metro, John, Fred, Mike, mo Alex. Mi mi bon long 1925, mo Wally i lasbon blong famle. Mifala i laef klosap long taon ya Ukraina, long provins blong Manitoba. Papa mama blong mi we nem blong tufala Michael mo Anna Didur, tufala i gat wan smol fam long ples ya. Papa blong mi i wok long wan tren stesen mo wok blong hem i blong lukaot long wan haf blong rod blong tren. Papa i stap long wan smol haos long tren stesen ya, be haos ya i longwe tumas long taon mo papa i harem se i no stret blong bigfala famle blong hem i go laef long wan ples olsem. Taswe mifala i laef long fam. Papa i no save stap wetem mifala oltaem long fam, taswe Mama nao i lukaot long mifala. Wanwan taem, Mama i go stap wetem Papa blong wan wik no moa, be hem i meksua se mifala i save olsem wanem blong rerem kakae, kukum bred, mo mekem wok long haos. Mo from  we mifala i memba blong Grik Katolik Jos, Mama i tijim mifala long ol prea mo long sam narafala wok blong jos taem mifala i yang yet.

Mi Faenem Trutok Blong Baebol

Mi mi yang yet taem wan samting i pulum mi blong wantem save moa long Baebol. Wan Witnes blong Jeova we i laef klosap long haos blong mifala i stap visitim mifala oltaem, mo hem i ridim sam haf blong Baebol we oli tokbaot Kingdom blong God, Amageden, mo ol blesing we bambae oli kamaot long niufala wol. Mama i no intres nating long ol storian blong man ya, be tufala brata blong mi Mike wetem Alex, tufala i laekem ol toktok blong hem. Ol samting we tufala i lanem i pulum tufala blong no joen long ami long taem blong seken wol wo. Taswe Mike i kasem panis blong kalabus blong smol taem, mo oli sanem Alex i go long wan kamp blong wok long Ontario. Biaen, Fred mo Wally, tufala tu i folem trutok. Be ol trifala fasbon brata blong mi, trifala i no akseptem trutok. Blong plante yia Mama i agensem trutok, be biaen mifala evriwan i sapraes taem hem i tekem disisen blong mekem wok blong Jeova. Mama i gat 83 yia blong hem taem hem i baptaes. Mo hem i gat 96 yia taem hem i ded. Bifo we Papa i ded, hem tu i soem intres long trutok.

Taem mi gat 17 yia blong mi, mi go long Winnipeg blong faenem wan wok mo joen wetem ol man we oli save halpem mi blong stadi long Baebol. Long taem ya, gavman i putum tabu long wok blong ol Witnes blong Jeova, be nating se i olsem ol Witnes oli stap holem ol miting blong olgeta oltaem. Faswan miting we mi go long hem, i stap long haos blong wan man. Mi mi gruap long bilif blong Grik Katolik Jos we Mama blong mi i tijim mi long hem, taswe ol faswan tok we mi harem long miting ya oli narakaen long tingting blong mi. Sloslo mi kasem save from wanem fasin blong seraotem ol lida blong skul long ol narafala man i no stanap long Baebol, mo tu mi lanem from wanem God i no save agri wetem fasin ya blong ol lida blong jos we oli stap blesem ol faet. (Aesea 2:4; Matiu 23:​8-10; Rom 12:​17, 18) Hop we yumi gat blong laef long wan Paradaes long wol, hem i moagud mo i moa stret i bitim bilif ya se ol man bambae oli go long wan ples farawe blong kasem laef foreva.

Mi save se mi faenem trutok ya, taswe mi givim laef blong mi i go long Jeova mo mi baptaes long 1942, long Winnipeg. Long 1943 oli karemaot tabu we oli bin putum long wok blong ol Witnes blong Jeova long Kanada, mo wok blong prij i kam antap bigwan. Long taem ya trutok blong Baebol i go dip moa long hat blong mi. Mi kasem nambawan janis ya blong wok olsem elda long wan kongregesen, mi stap givim ol pablik tok, mo oli sanem mi mi go wok long sam teritori we ol Witnes oli no bin go long hem yet. Mi gat janis blong go long ol bigfala asembli long Yunaeted Stet, mo samting ya i halpem mi bigwan blong mi gohedgud long saed blong spirit.

Mi Mekem Moa Long Wok Blong Jeova

Long 1950 mi statem wok blong paenia, mo long Disemba long semfala yia ya, oli singaot mi blong wok olsem seket elda. Klosap long Toronto, mi gat bigfala janis blong kasem trening blong mi wetem Charlie Hepworth, wan brata we hem i bigman long saed blong spirit mo i wok longtaem finis olsem seket elda. Mo mi glad tumas blong spenem laswan wik blong trening blong mi wetem brata blong mi Alex, we i wok finis olsem seket elda long Winnipeg.

Olsem mi talem antap, bambae mi no save fogetem faswan seket asembli blong mi olsem seket elda. Mi mi wari long samting we bambae i hapen. Distrik elda blong mifala, Brata Jack Nathan, i mekem mifala evriwan i stap bisi mo hapi. Mifala i sotem program blong asembli from we i no gat plante brata i stap blong mekem ol tok. Mifala i talemaot ol ekspiriens, mekem ol pleplei long fasin blong prij long ol haos wanwan mo fasin blong visitim bakegen ol man we oli intres, mo mifala i soemaot tu olsem wanem blong mekem wan stadi long Baebol. Mifala i singsing ol sing blong Kingdom. I gat fulap kakae i stap. Klosap evri tu aoa mifala i dring wan kofe mo kakae kek. Sam man oli slip long ol jea antap long platfom, mo sam narafala oli slip long floa nomo. Long Sande, bigfala  win i stat blong godaon smol, mekem se mifala 96 man i stap long pablik tok. Ekspiriens ya i tijim mi long fasin blong gohed blong wok nating se wok i no gohedgud folem plan we yumi mekem fastaem.

Nekis teritori blong mi olsem seket elda, hemia long not blong Alberta, British Columbia, mo long Yukon Territory, long kantri ya we ol man oli talem se san i no stap godaon. Taem mi prij long ol man folem rod ya we oli kolem Alaska Highway, we i stat long Dawson Creek, British Columbia, i go kasem Whitehorse, Yukon (we rod ya i longfala olsem 1,477 kilometa), mi nidim strong tingting mo mi mas lukaotgud. ?From wanem? Ples ya i denja from we sno i stap foldaon oltaem mo i mekem bigbigfala sno i kamdaon long ol hil, ale ples i glis mo mifala i no save luk wan samting.

Mi sapraes tumas blong luk olsem wanem trutok i kasem Not blong Kanada. Wan dei, mi wetem Walter Lewkowicz mitufala i go long wan smol haos klosap long Lower Post, British Columbia, long rod ya Alaska Highway, klosap long boda blong Yukon Territory. Mitufala i save se wan man i mas stap long smol haos ya, from we mitufala i luk wan laet tru long wan smol windo. Ating i klosap naen klok long naet taem mitufala i noknok long doa. Wan voes i singaot mitufala blong kam insaed long haos, ale, mitufala i go insaed. !Mitufala i sek blong luk wan olfala man i ledaon long wan smol bed mo i stap ridim wan Wajtaoa! Magasin ya i niuwan moa long ol magasin blong mitufala. Man ya i eksplenem long mitufala se hem i stap kasem ol magasin blong hem long plen. Mitufala i bin aot long kongregesen blong mifala bitim eit dei finis, taswe mitufala i no kasem yet ol niufala magasin. Man ya i talem se nem blong hem Fred Berg, mo nating se hem i stap kasem ol magasin blong plante yia finis be hemia fastaem we ol Witnes blong Jeova oli kam visitim hem. Fred i invaetem mitufala blong stap long haos blong hem long naet. Mitufala i storebaot plante vas blong Baebol wetem hem mo mitufala i mekem plan wetem sam narafala Witnes we oli stap kam oltaem long ples ya, blong oli kam visitim Fred.

Blong plante yia mi wok olsem seket elda long trifala smol teritori. Ol teritori ya oli stat long Grande Prairie, Alberta, long Is, i go kasem Kodiak, Alaska, long wes, we i longfala olsem 3,500 kilometa.

Long wan naesfala fasin, mi lanem se long olgeta ples long wol, wetem ol ples we oli stap longwe tumas long  taon tu, God i soem gladhat blong hem long evri man, mo spirit blong Hem i pulum tingting mo hat blong olgeta man we oli stret blong kasem laef blong olwe. Wan man we hat blong hem i stret olsem, hemia Henry Lepine, long Dawson City, Yukon, we tede oli kolem taon ya Dawson. Henry i laef long wan ples we i stap longwe long taon, wan ples we ol man oli stap digim graon blong faenem gol. Henry i no aot long ples ya blong 60 yia. Nating se i olsem, spirit blong Jeova i pulum man ya we i gat 84 yia finis, blong wokbaot 1,600 kilometa go kasem Anchorage blong stap long wan seket asembli, nating se hem i neva go long wan miting bifo. Hem i glad tumas blong lesin long program blong asembli mo hem i haremgud taem i joen wetem ol brata sista. Henry i gobak long Dawson City, mo i stap tru long Jeova go kasem en blong laef blong hem. Plante man we oli save Henry oli stap askem long olgeta wan se wanem samting nao i pusum olfala man ya blong mekem wan longfala trip olsem. Ol kwestin ya oli pusum sam moa olfala, blong olgeta tu oli akseptem trutok. Taswe, nating se Henry i no prij long olgeta stret, be hem i givim wan gudfala witnes.

Jeova i Soem Gladhat Blong Hem Long Mi

Long 1955, mi glad tumas taem oli invaetem mi blong go long namba 26 klas blong Wajtaoa Baebol Skul blong Gilead. Trening ya i mekem bilif blong mi i strong moa mo i halpem mi blong kam klosap moa long Jeova. Mi kasem setifiket blong mi, mo oli sanem mi mi gobak long wok blong seket long Kanada.

Blong klosap wan yia, mi wok long provins blong Ontario. Biaen, oli sanem mi mi gobak bakegen long naesfala teritori ya long Not. Mi rimemba yet ol longfala rod we oli pas klosap long ol bigfala lagun blong klia wota, mo ol haefala hil we sno i kavremap top blong olgeta. Long hot taem, ol flaoa we oli kalakala oli kavremap ol flat ples olsem wan naesfala blangket. Win i fres mo wota i klin. Ol bea, ol wael dog, ol bigfala dia ya moose mo caribou wetem sam narafala wael anamol tu oli stap wokbaot long ples blong olgeta.

Nating se i olsem, laef long Alaska i no isi oltaem​—weta i stap jenis oltaem, mo tu ples ya i bigwan we i bigwan. Teritori blong mi i kavremap 3,200 kilometa stat long is go kasem wes. Long taem ya, sosaeti i no givim wan trak long ol seket elda. Ol lokol brata oli glad nomo blong karem mi mi go long nekis kongregesen. Be samtaem, mi mas stopem ol bigfala kameong long rod no ol trak blong turis.

Wan dei mi mekem samting ya long wan haf blong rod ya Alaska Highway, bitwin long Tok Junction, Alaska, mo Mile 1202, we nara nem blong hem se Scotty Creek. I gat samwe 160 kilometa i stap bitwin ofis blong kastom we i stap long tufala ples ya. Mi pastru long ofis blong kastom blong Yunaeted Stet long ples ya Tok, mo mi stopem wan trak we i karem mi mi go 50 kilometa. Afta long hemia, i no moa gat trak i pas, ale mi wokbaot blong bitim 40 kilometa blong klosap ten aoa. Biaen, mi lanem se sot taem nomo afta we mi bin pastru long ofis blong kastom, oli blokem rod blong ol trak oli no save go long haf ya blong rod from we bigfala sno i bin kamdaon long hil klosap long ples blong ofis ya. Long medel naet, tempraja i godaon kasem 23 digri aninit long siro, be mi mi stap 80 kilometa longwe yet long ol haos we mi save haed long hem. Mi nidim tumas blong faenem wan ples we mi save spel long hem.

Mi stap wokbaot sloslo, nao mi luk wan trak i stap long saed blong rod, we sno i kavremap wan haf blong hem. Mi ting se sipos mi save go insaed long trak ya mo slip long ol jea blong hem, bambae mi laef nating se naet ya i kolkol tumas. Ale, mi karemaot naf sno blong openem doa, be taem mi lukluk  insaed long trak, ol aean nomo i stap be i no moa gat jea. Laki se klosap nomo, daon long rod, mi faenem wan smosmol haos we i emti. Mi traehad blong kasem ples ya mo laetem wan faea, ale, mi spel blong sam aoa. Long moning, mi stopem wan trak we i putum mi long wan hotel, mo long ples ya mi glad tumas blong kakae mo hotem ol fingga blong mi we kolkol i kakaegud olgeta.

Jeova i Blesem Wok Long Not

Faswan visit we mi mekem long Fairbanks i rili leftemap tingting blong mi. Taem mifala i prij, plante man oli lesingud long mifala, mo 50 man oli kam long pablik tok long Sande. Mifala i hivap tugeta long smol misinari haos blong Vernor mo Lorraine Davis. Ol man oli stap long evri ples, long kijin, long bedrum, mo long evri kona blong haos, mo oli stap lesin long pablik tok. Taem mifala i luk we plante man oli kam long pablik tok ya, mifala i luksave se sipos i gat wan Haos Kingdom long Fairbanks samting ya bambae i givhan blong mekem wok blong prij i gohedgud. Ale, wetem help blong Jeova, mifala i naf blong pem wan bigfala bilding, we bifo hem i wan ples blong danis, mo mifala i muvum hem i go long wan gudfala pis graon. Mifala i digim wan wel, mo mifala i ademap ol ples blong swim wetem wan mesin blong mekem ples i hot. Bifo we wan yia i pas, i gat wan Haos Kingdom i stap long Fairbanks. Mifala i ademap wan kijin long bilding ya, ale long 1958 oli yusum hem blong holem wan distrik asembli, mo 330 man oli hivap long ples ya.

Long hot taem blong 1960, mi mekem wan longfala trip go kasem hedkwota blong ol Witnes blong Jeova long New York. Mi go long ples ya blong folem wan nambawan kos we oli givim long ol seket elda blong Yunaeted Stet mo Kanada. Taem mi stap longwe, Brata Nathan Knorr wetem sam narafala brata we oli lukaot long wok blong prij oli askem sam kwestin long mi, from we oli gat tingting blong openem wan branj ofis long Alaska. Sam manis biaen, mifala i glad blong harem se stat long Septemba 1, 1961, Alaska bambae i gat prapa branj ofis blong hem. Oli putumap Brata Andrew K. Wagner olsem brata we i lukaot long wok long branj ofis ya. Hem wetem waef blong hem, Vera, tufala i bin wok long Betel long Brooklyn blong 20 yia finis mo brata ya i bin wok olsem seket elda tu. I gud tumas we oli stanemap wan branj ofis long Alaska, from we olsemia seket elda i no nid blong wokbaot plante tumas, mo hem i gat moa taem blong tingbaot ol nid blong ol kongregesen mo blong wok long ol teritori we oli stap longwe long taon.

Mifala long Not i haremgud tumas long hot taem blong 1962. Long taem ya nao mifala i dediketem branj ofis blong Alaska, mo mifala i holem wan distrik asembli long Juneau, Alaska. Mifala i bildim sam niufala Haos Kingdom long Juneau mo Whitehorse, hemia long Yukon, mo mifala i stanemap plante niufala grup long ol ples we oli stap longwe long taon.

Mi Gobak Long Kanada

Blong plante yia, mi bin raetem leta i go long Margareta Petras, wan sista blong Kanada. Reta, hemia smol nem blong Margareta, i stat paenia long 1947, hem i kasem setifiket blong hem long Gilead long 1955, mo i stap paenia long is blong Kanada. Mi askem sipos hem i wantem maredem mi, mo hem i talem yes. Mitufala i mared long Whitehorse long Februari 1963. Sam manis biaen, long semfala yia ya, oli sanem mi olsem seket elda long wes blong Kanada, mo mi wetem Reta mitufala i bin wok long ples ya blong 25 yia.

Be mitufala i stat blong gat sam smosmol problem long helt, taswe long 1988 oli sanem mitufala i go wok olsem spesel paenia long Winnipeg, Manitoba. Long taem ya tu mitufala i stap lukaot long wan Haos Asembli blong faef yia. Tede, mitufala i stap traem bes blong mitufala blong joen long gudfala wok ya blong pulum man i kam disaepol. Taem mi wok olsem seket elda, mi wetem Reta mitufala i statem plante Baebol stadi we sam narafala brata oli gohed blong mekem. Tede, from kaen fasin blong Jeova, mitufala i statem ol Baebol stadi mo mitufala i glad blong lukaot long ol studen ya gogo kasem taem we oli givim laef blong olgeta i go long Jeova, mo oli baptaes.

Mi sua se beswan rod blong laef, hemia taem yu wok blong Jeova. Wok ya i givim mining long laef mo i mekem man i haremgud, mo i mekem lav we yu gat long God i gru moa evri dei. Yes, wan laef olsem i givim trufala glad. Nomata wanem kaen wok we yumi mekem blong God, mo nomata weples yumi stap long wol ya, yumi evriwan yumi agri wetem ol tok ya blong man we i raetem Sam se: “!Ol man we Jeova i God blong olgeta, oli save haremgud!”​—Ol Sam 144:​15, NW.

[Tok blong pija long pej 24]

Taem mi stap wok olsem seket elda

[Tok blong pija long pej 25]

Mifala i visitim Henry Lepine long Dawson City. Mi stap long lefsaed

[Tok blong pija long pej 26]

Faswan Haos Kingdom long Anchorage

[Tok blong pija long pej 26]

Mi wetem Reta, 1998