Hem i Laekem Kaen Fasin

BRATA MILTON G. HENSCHEL, we i memba blong Hed Kampani blong ol Witnes blong Jeova longtaem finis, i finisim wok blong hem long wol ya long Sarede, Maj 22, 2003. Hem i gat 82 yia blong hem taem hem i ded.

Taem Milton Henschel i yang yet, hem i joenem ol Witnes blong Jeova we oli stap wok long hedkwota mo i holemstrong long wok blong hem bitim 60 yia. Kwiktaem nomo ol brata oli savegud hem, from we hem i gat fasin blong skelgud mo i rili laekem wok blong talemaot Kingdom. Long 1939 hem i wok olsem sekretari blong Brata N. H. Knorr, we long taem ya hem i stap lukaot long wok blong prentem buk long Brooklyn. Long 1942, Brata Knorr i stat blong lukaot long wok blong ol Witnes long fulwol mo hem i kipim Brata Henschel i stap wok wetem hem, olsem man blong givhan blong hem. Brata Henschel i maredem Lucille Bennett long 1956, mo tufala i stap tugeta blong serem ol glad mo ol traehad blong laef.

Brata Henschel i wokgud wetem Brata Knorr go kasem taem we Brata Knorr i ded, long 1977. Plante taem Brata Henschel i stap wetem Brata Knorr, mo hem i wokbaot i go long bitim 150 kantri blong visitim mo leftemap tingting blong ol Witnes blong Jeova raon long wol, speseli ol misinari mo ol brata sista we oli wok long ol branj ofis. Samtaem ol brata oli taed tumas from ol trip ya, mo samtaem ol trip ya oli denja tu. Long 1963, taem Brata Henschel i visitim ol brata blong Laeberia long wan asembli, hem i kasem bigfala trabol wetem ol narafala brata long ples ya from we oli no wantem tekpat long wan seremoni blong leftemap kantri. * Nating se i olsem, Brata Henschel i gobak long Laeberia sam manis biaen blong toktok wetem presiden blong kantri ya mo traem faenem wan rod blong oli letem ol Witnes blong Jeova oli fri moa blong mekem wosip blong olgeta.

Taem i gat wan problem no wan traem blong stretem, ol man oli savegud ol fasin blong Brata Henschel se hem i givim ol advaes we i wokgud, hem i rere blong folem tingting blong narafala, mo hem i no mekem i strong tumas long narafala. Olgeta we oli stap wok wetem hem oli laekem ol fasin ya blong hem se hem i gat oda, i gat tingting daon, mo hem i laekem blong tokplei. Brata Henschel i gat wan nambawan memori, mo ol misinari raon long wol oli glad blong luk hem from we oltaem, hem i rimemba nem blong olgeta, i save talem wan toktok long lanwis blong kantri blong olgeta, mo i tokplei wetem olgeta.

Maeka 6:8 (NW ) i talem bakegen long yumi se yumi mas “laekem kaen fasin.” Bambae ol man oli rimemba Milton Henschel from we hem i givim wan nambawan eksampol long saed blong fasin ya. Nating se hem i gat plante we plante wok blong mekem, be hem i letem ol man oli kam long hem, hem i kaengud wetem olgeta. Oltaem hem i talem se: “Taem yu mas tekem wan disisen, rimemba se sipos yu jus blong mekem samting we i kaengud, bambae aksin blong yu i stret nomo.” Yumi harem nogud from we brata ya we yumi laekem tumas i ded, be yumi glad tu we hem i stanap strong go kasem en blong laef blong hem, mo hem i sua blong kasem blesing blong hem, hemia “praes we oli givim long man we i win long resis.”​—Revelesen 2:10.

[Futnot]

[Tok blong pija long pej 31]

M. G. Henschel wetem N. H. Knorr

[Tok blong pija long pej 31]

Wetem waef blong hem, Lucille