Ol Man Blong Jeova Oli Gat Wan Hop We i Tru

‘Ol laen blong Isrel, we bambae oli stap laef yet long ol kantri ya, bambae oli olsem wota blong naet, we Hae God i stap sanem i kam. Ol man ya, oltaem nomo bambae oli stap luk long God blong i givhan long olgeta, oli no save luk long man.’​—MAEKA 5:7.

1. ?Olsem wanem Isrel long saed blong spirit i wan blesing long ol man?

 JEOVA i Bigfala Man ya we i Wokem ren mo wota blong naet. Yumi westem taem nomo sipos yumi luk long wan man long wol ya blong i givim wota blong naet no ren long yumi. Profet Maeka i raetem se: “Ol laen blong Isrel . . . we bambae oli stap laef yet long ol kantri ya, bambae oli stap givhan gud long ol man raonabaot long olgeta. Bambae oli olsem wota blong naet, no smosmol ren, we Hae God i stap sanem i kam blong mekem kakae i gru gud. Mo ol man ya, oltaem nomo bambae oli stap luk long God blong i givhan long olgeta, oli no save luk long man.” (Maeka 5:7) ?Hu olgeta we tede oli ‘ol laen blong Isrel we oli stap laef yet long kantri ya’? Hemia ol man Isrel long saed blong spirit, no lashaf blong “Isrel blong God” we oli stap yet long wol ya. (Galesia 6:​16, NW ) Olgeta ya oli stap mekem i gud long “ol man raonabaot long olgeta” taswe oli olsem “wota blong naet” mo “smosmol ren we Hae God i stap sanem i kam blong mekem kakae i gru gud.” Yes, ol tabu Kristin we oli laef yet long wol ya, oli olsem wan blesing we God i givim long ol man blong hem. Olgeta ya oli man blong talemaot Kingdom, mo Jeova i stap yusum olgeta blong talemaot wan nius we i givim trufala hop long olgeta man.

2. ?From wanem yumi gat wan hop we i tru nating se yumi laef long wol ya we i fulap long trabol?

² Ol man long wol ya oli no gat hop we i tru. Politik i jenis oltaem, gudfala fasin i stap lus, fasin blong brekem loa i kam antap, ekonomi i nogud, ol teroris, ol faet​—hemia ol samting we oli mas hapen, yumi no sapraes long olgeta, from we wol ya i stap long paoa blong Devel Setan. (1 Jon 5:19) Plante man oli fraet long fiuja, oli wari long wanem samting we bambae i hapen. Be yumi, we yumi wosipim Jeova yumi no fraet from we yumi gat wan hop we i tru. Hop ya i tru from we hem i stanap long Tok blong God. Yumi bilif long Jeova mo long Tok blong hem from we oltaem nomo, ol samting we hem i talem oli kamtru.

3. (a) ?From wanem Jeova i wantem panisim ol man Isrel mo ol man Juda? (b) ?From wanem ol tok blong Maeka oli stret tu long yumi tede?

³ Profet tok blong Maeka we i kamaot long God, i mekem yumi strong blong wokbaot long nem blong Jeova mo i givim wan risen blong yumi gat trufala hop. Long ol yia 700 B.K.T., * long taem ya we Maeka i wok olsem profet blong God, ol man we God i bin mekem kontrak wetem olgeta, oli seraot long tu haf. Wan haf hemia ol man Isrel mo narafala haf hemia ol man Juda. Mo tufala tugeta i no moa holem kontrak ya we oli bin mekem wetem God. Frut blong samting ya se oli no moa gat ol fasin we oli klingud, oli lego trufala wosip, mo oli ronem ol sas samting nomo. Taswe, Jeova i givim woning long olgeta se bambae hem i panisim olgeta. I tru, ol woning blong God we Maeka i stap talemaot oli blong ol man long taem blong hem. Be ol tok ya oli stret gud tu long taem blong yumi, from we plante samting long laef tede i sem mak nomo long ol samting long taem blong Maeka. Bambae yumi luksave samting ya taem yumi tokbaot sam stamba poen long ol seven japta blong buk blong Maeka.

 Wanem We Buk Ya i Soemaot

4. ?Wanem save i stap long Maeka japta 1 kasem japta 3?

⁴ I gud yumi lukluk kwiktaem long wanem we i stap long buk blong Maeka. Long japta 1, Jeova i talemaot klia se ol man Isrel mo ol man Juda oli girap agensem hem. From stronghed fasin blong olgeta, God bambae i spolemgud Isrel mo bambae i panisim Juda go kasem doa blong bigfala taon ya Jerusalem. Japta 2 i soemaot se ol rijman mo ol man we oli gat paoa oli stap spolem ol puaman mo ol man we oli no gat paoa. Be God i putum wan promes i stap. Bambae hem i mas tekem olgeta man blong hem oli kam wanples bakegen. Long japta 3, yumi ridim ol jajmen we Jeova i talem agensem ol lida blong nesen ya mo ol profet we oli no wantem obei long hem. Ol lida oli stap tanem baksaed long stret fasin, mo ol profet oli stap giaman nomo. Nomata se i gat ol rabis fasin ya, tabu spirit i givim paoa long Maeka blong i talemaot ol jajmen we Jeova bambae i mekem.

5. ?Wanem bigfala tingting we i stap long Maeka japta 4 mo japta 5?

⁵ Japta 4 i talem se i gat taem i stap kam, we olgeta nesen bambae oli mas kam long hil ya we haos blong Jeova i stap long hem, nao God bambae i tijim olgeta. Be bifo long taem ya, ol man Juda bambae oli go kalabus long Babilon, mo biaen Jeova bambae i mekem olgeta oli kamfri bakegen. Japta 5 i talemaot se Mesaea bambae i bon long Betlehem we i stap long Juda. Mesaea ya bambae i lukaotgud long ol man blong hem mo bambae i karemaot olgeta long han blong ol nesen ya we oli stap givim hadtaem long olgeta.

6, 7. ?Wanem poen i stap long japta 6 mo japta 7 long profet tok blong Maeka?

⁶ Maeka japta 6 i talemaot ol poen we Jeova i gat agens long ol man blong hem, olsem we olgeta oli stap long kot. ?Wanem samting we Jeova i mekem blong oli rebel? Jeova i no mekem wan samting nogud. Tru ya, ol samting we hem i askem olgeta blong mekem oli stret nomo, oli no strong tumas. Hem i wantem we ol man blong hem oli wokem stret fasin, hem i wantem se oli gat kaen fasin mo oli gat tingting daon taem oli stap wokbaot wetem hem. Be ol man Isrel mo ol man Juda oli no mekem olsem. Defren olgeta, oli girap agens long God ale bambae oli mas kakae frut blong fasin ya blong olgeta.

⁷ Long laswan japta blong profet tok blong Maeka, Maeka i talemaot ol rabis fasin blong ol man we oli laef long taem blong hem. Be, hem i no letem ol fasin ya oli daonem tingting blong hem from we hem i wantem “soemaot fasin blong stap wet” long Jeova. (Maeka 7:​7, NW ) Lashaf blong buk ya i tokbaot strong bilif we Maeka i gat se bambae Jeova i soem sore long ol man blong hem. Histri i pruvum se hop ya we Maeka i gat, i kamtru. Long 537 B.K.T., afta we Jeova i stretem ol man blong hem finis, hem i karem olgeta oli kambak bakegen long kantri blong olgeta mo i fogivim olgeta.

8. Long sotfala tok nomo, talem samting we buk blong Maeka i tokbaot.

 ⁸ !Jeova i tijim yumi long wan nambawan samting tru long Maeka! Buk ya we i kamaot long tabu spirit blong God i olsem wan woning long ol man from we hem i soemaot wanem we God i mekem long olgeta we oli talem se oli man blong hem be oli no stap tru long hem. Buk ya i talemaot stret ol samting we bambae oli hapen long taem blong yumi. Mo hem i talem woning blong God long saed blong fasin we yumi mas gat naoia we laef i had, blong bambae yumi mekem tingting blong yumi i strong long saed blong fiuja.

Haefala Masta Jeova i Toktok

9. ?Folem ol tok blong Maeka 1:​2, Jeova bambae i mekem wanem?

⁹ Naoia bambae yumi lukluk i go dip moa long buk blong Maeka. Long Maeka 1:​2, yumi ridim se: “Olgeta man long evri ples. Yufala i lesin gud. Olgeta man long wol. Yufala i harem tok blong mi. Hae God i Masta blong yumi, mo hem bambae i talemaot ol poen blong hem agens long yufala. !Yufala i lesin! Hem i stap long haos blong hem long heven, i stap toktok i kam.” Sipos yu bin laef long taem blong Maeka ating ol tok ya bambae oli pulum tingting blong yu. Tru ya, ating oli pulum tingting blong yu naoia tu, from we Jeova i stap long tabu haos blong hem long heven i stap toktok i kam long olgeta man long wol, i no long ol man Isrel mo ol man Juda nomo. Long taem blong Maeka, ol man oli fogetem Haefala Masta Jeova longtaem finis. Be i no longtaem samting ya bambae i jenis. Tingting blong Jeova i strong se bambae hem i mas tekem aksin.

10. ?From wanem ol tok blong Maeka 1:2 oli impoten long yumi?

¹⁰ Samting ya i tru tu tede. Revelesen 14:​18-20 i soem se Jeova we i stap long tabu haos blong hem i toktok bakegen long ol man. I no longtaem bambae hem i tekem aksin, mo bakegen bambae hem i mas seksekem ol nesen. Mo long taem ya, bambae hem i tekem “frut blong rop ya grep” i sakem i go long bigfala ples we ol man oli purumpurumbut long hem blong mekem wota blong hem i kamaot, hemia i minim kros blong Jeova taem hem i spolem rabis wol ya blong Setan fulwan.

11. ?Wanem mining blong Maeka 1:​3, 4?

¹¹ Lesin long samting we Jeova bambae i mekem. Maeka 1:​3, 4 i talem se: “Bambae [Jeova] i aot long haos ya blong hem, i kamdaon, i wokbaot long top blong ol hil. Nao ol hil ya bambae oli ronaot, olsem kandel we i stap klosap long faea, [“mo graon blong ol flatples bambae i brobrok olbaot,” NW ]. Bambae oli ron bigwan olsem wota, oli folem ol krik i kamdaon, olsem wota we i aot long hil, i ron bigwan i kam.” ?Jeova bambae i rili aot long ples blong hem long heven blong wokbaot long ol hil mo flatples blong Promes Lan long wol ya? Nogat. Hem i no nid blong kamdaon. Bambae hem i jes tanem tingting blong hem i kam long wol ya blong mekem stamba tingting blong hem i kamtru. Mo tu, i no prapa graon we Maeka i talem bambae i kasem panis, be hem i ol man blong wol ya. Taem Jeova i tekem aksin, bambae hem i no gat sore long ol man nogud. Bambae oli lus olsem ol hil we oli ronaot olsem kandel mo graon blong ol flatples we i brobrok olsem taem graon i seksek bigwan.

12, 13. ?Folem 2 Pita 3:​10-12, wanem i mekem se tingting blong yumi i sua long saed blong fiuja?

¹² Ating profet tok blong Maeka 1:​3, 4 i mekem yu yu tingbaot wan narafala profet tok we i talemaot jajmen blong wol ya. Hemia tok we aposol Pita i raetem long 2 Pita 3:​10, se: “Dei blong Masta blong yumi bambae i kam olsem we man blong stil i kam, we i kam long taem we man i no save. Mo long Dei ya, bambae i gat bigfala noes, nao skae bambae i lus. Bigfala faea we i hot we i hot bambae i bonem ol sta gogo oli ronaot, mo wol tu, wetem evri samting blong hem bambae i lus.” Ol tok ya blong Pita oli sem mak long profet tok blong Maeka. Oli no tokbaot prapa heven mo wol. Be oli tokbaot bigfala trabol we bambae i kam agensem ol man we oli no obei long God.

¹³ Nating se bigfala trabol ya i stap kam, ol Kristin oli olsem Maeka. Oli no fraet long fiuja. ?From wanem? From we oli folem advaes we i stap long ol narafala vas we oli stap long leta blong Pita. Aposol ya i talem se: “Yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik.” (2 Pita 3:​11, 12) Bambae yumi sua long wan gudfala fiuja sipos yumi wokem fasin ya we yumi rere oltaem blong obei, mo sipos yumi meksua se ol fasin blong yumi oli tabu mo laef blong yumi i fulap long ol wok we God i wantem. Mo sipos yumi wantem se tingting blong yumi i sua oltaem long fiuja ya, yumi mas rimemba tu se dei blong Jeova bambae i mas kam.

14. ?From wanem i stret nomo we Isrel mo Juda i kasem panis?

¹⁴ Jeova i talemaot from wanem i stret we hem i  panisim ol man blong hem bifo. Maeka 1:5 i talem se: “Ol samting ya bambae i kamtru olsem, from we yumi ol laen blong Isrel, yumi evriwan i mekem sin, mo yumi stap girap agens long God. Ol man Isrel. ?Yufala i stap girap agens long hem, be stamba blong hem hu? Yufala long Sameria nomo i stamba blong hem. Ol man Juda. ?Yufala i stap mekem wosip long ol narafala god, be hu i stamba blong hem? !Yufala long Jerusalem nomo i stamba blong hem!” Jeova nao i mekem we Isrel mo Juda i kam wan nesen. Be olgeta ya oli rebel agensem hem, mo fasin ya blong olgeta i kamaot klia nomo long tufala kaptel blong tufala, hemia Sameria mo Jerusalem.

Rabis Fasin i Fulap

15, 16. ?Ol man we oli laef long taem blong Maeka oli mekem wanem rabis wok?

¹⁵ Wan haf blong profet tok we i soemaot klia se ol man long taem blong Maeka oli gat rabis fasin, hemia i stap long Maeka 2:​1, 2: “!Sore tumas long yufala ya we yufala i no save slip long naet, yufala i stap tingbaot ol rabis plan blong yufala gogo kasem delaet! Long moning, taem yufala i gat janis, be oltaem yufala i stap gohed blong wokem ol plan ya blong yufala. Taem yufala i wantem graon blong narafala man, yufala i girap, yufala i go tekem isi nomo, mo taem yufala i wantem haos blong narafala man, yufala i girap, yufala i go tekemaot. I no gat man we i naf blong blokem yufala, blong holemtaet graon blong hem, mo haos blong hem, mo ol samting we bambae ol pikinini blong hem oli holem biaen long hem.”

¹⁶ Ol man we oli wantem plante samting tumas, oli no stap slip long naet. Oli stap wokem ol plan blong stilim graon mo haos blong ol narafala man klosap long olgeta. Ale, long moning oli hareap i go blong folem ol plan ya. Sipos ol man ya oli tingbaot nomo se oli gat wan kontrak wetem God, bambae oli no save mekem ol nogud wok ya. Loa blong Moses i pulum ol man blong tingbaot olgeta we oli pua. Taem ol man oli folemgud loa ya, i no gat wan famle we i save lusum olting blong hem we hem i kasem long ol olfala blong hem. Be, ol man ya we oli griri, oli no wantem save long loa ya. Oli no tingbaot ol tok blong Levitikas 19:18 we i talem se: “Yufala i mas mekem i gud long olgeta, olsem we yufala i stap mekem i gud long yufala nomo.”

17. ?Wanem i save hapen taem wan man blong God i putum mane long fasples long laef blong hem?

¹⁷ Samting we yumi jes tokbaot i soemaot wanem we i save hapen long ol man we oli talem se oli mekem wok blong God, be oli no moa traehad blong kasem ol hae mak long saed blong spirit nao oli lukaot ol samting blong laef fastaem. Pol i givim woning ya long ol Kristin long taem blong hem i se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.” (1 Timoti 6:9) Taem wan man i traehad blong winim mane, nao samting ya i kam olsem stamba samting long laef blong hem, i olsem we hem i stap wosip long wan giaman god​—god ya Mane, no Mamon. Giaman god ya i no save mekem fiuja blong yu i sua gud mo i sef.​—Matiu 6:​24, futnot long NW.

18. ?Wanem bambae i hapen long ol man long taem blong Maeka we oli wantem mane tumas?

¹⁸ Plante man long taem blong Maeka oli kasem trabol nao oli luksave se fasin blong trastem mane i no givhan long olgeta nating. Long Maeka 2:​4, Jeova i talem se: “Biaen long taem ya, ol man bambae oli stap jikim yufala from bigfala trabol ya we bambae i kam kasem yufala. Mo bambae oli wokem wan singsing blong talemaot trabol ya we yufala i foldaon long hem. Bambae oli save singsing se, ‘!Naoia yumi kam nogud olgeta! Olgeta graon blong yumi, Hae God i tekemaot finis i gowe long yumi. Hem i givim long olgeta ya we oli holem yumi blong yumi go wok slef blong olgeta.’ ” Yes, ol man ya we oli bin stilim haos mo graon blong narafala, i taem blong olgeta nao blong lusum evri samting we oli kasem long ol olfala blong olgeta. Bambae oli go kalabus long narafala kantri, mo ol graon blong olgeta bambae oli go long han blong ol man ya ‘we oli holem olgeta blong oli go wok slef blong olgeta.’ Long taem ya, fiuja blong ol man ya we oli bin wantem plante samting, bambae i nogud, oli no gat hop.

19, 20. ?Wanem i hapen long ol man Jiu we oli trastem Jeova?

¹⁹ Be, ol man we oli trastem Jeova bambae oli no sore we oli putum hop blong olgeta long Hem. Jeova i no lego kontrak we hem i mekem wetem Ebraham mo Deved, mo hem i gat sore long ol man olsem Maeka, we oli lavem hem mo oli harem nogud long fasin blong ol manples blong olgeta we oli gowe long God. God i tingbaot ol stret man ya nao, taswe hem i putum wan taem i stap blong tekem olgeta oli kambak long ples blong olgeta.

²⁰ Samting ya i hapen long 537 B.K.T., afta we Babilon i foldaon mo wan smol kampani blong ol man Jiu oli gohom. Long taem ya, hemia faswan taem we ol  tok blong Maeka 2:12 oli kamtru. Jeova i talem se: “Nao profet i talemaot we Hae God i talem se, ‘Ol laen blong Isrel. I gat taem i stap kam, we mi bambae mi kam lukaot olgeta ya we oli kamaot biaen long yufala we i no ded long ol trabol ya. Nao bambae mi tekem olgeta evriwan oli kam wanples bakegen. Bambae mi mekem olsem man blong lukaot long sipsip, we i tekem ol sipsip blong hem oli kambak long fenis blong olgeta. Bambae ples blong yufala i stap fulap bakegen long man, olsem ples blong gudfala gras, we oltaem i gat fulap sipsip i stap long hem.” !Tru, Jeova i gat bigfala lav! Afta we hem i stretem ol man blong hem, hem i letem smol kampani blong olgeta ya oli gobak mo oli wosipim hem bakegen long kantri ya we hem i bin givim long ol bubu blong olgeta bifo.

Plante Samting i Sem Mak Tede

21. ?Olsem wanem ol samting we oli hapen tede oli sem mak long taem blong Maeka?

²¹ ?Taem yumi storebaot tufala japta ya blong Maeka, yu yu sapraes blong luk olsem wanem we plante samting i sem mak tede? Tede, plante man oli talem se oli man blong God, olsem ol man long taem blong Maeka oli talem. Be oli sem mak nomo long ol man Juda mo ol man Isrel. Oli seraot mo oli faetfaetem olgeta bakegen. Plante long ol rijman long Krisendom * oli givim hadtaem long ol puaman. Long ol taem we oli pas, ol lida blong skul oli no moa strong blong agensem ol fasin we Baebol i talem klia se oli rabis. Taswe, i no longtaem bambae Krisendom i kasem en blong hem, bambae hem i go lus wetem Bigfala Babilon, olgeta giaman skul blong wol! (Revelesen 18:​1-5) Be, olsem long taem blong Maeka, Jeova i gat sam man blong hem yet we oli stap long wol ya.

22. ?Wanem tufala grup we oli putum hop blong olgeta i stap long Kingdom blong God?

²² Long 1919, ol tabu Kristin we oli stanap strong long bilif, oli aot fulwan long Krisendom mo oli statem wok blong talemaot gud nius blong Kingdom long olgeta nesen. (Matiu 24:14) Fastaem, oli hivimap ol laswan memba blong Isrel long saed blong spirit. Biaen, oli stat hivimap olgeta we oli “ol narafala sipsip” ya. Ale, tufala grup ya tugeta oli “kam wan kampani nomo, wetem wan man nomo blong lukaot long olgeta.” (Jon 10:16) Nating se tede, ol man long tufala grup ya oli stap mekem wok blong God long 234 kantri, olgeta “oli kam wanples bakegen.” Tede, fenis blong ol sipsip i “fulap bakegen long man,” mo ol woman mo pikinini tu. Hop blong olgeta i no stap long ol man, be i stap long Kingdom blong God, we i no longtaem bambae i mekem paradaes long wol.

23. ?From wanem yu yu sua se fiuja blong yu bambae i gud?

²³ Laswan vas blong Maeka japta 2 i tokbaot ol man blong Jeova we oli stanap strong long wosip blong olgeta, se: “Hae God nomo bambae i king blong olgeta, mo hem bambae i stap lidim olgeta oli aot long ples ya, oli kam.” ?Yu yu luk yu wan insaed long grup ya we oli wokbaot biaenem King blong yumi ya Jisas Kraes, we Jeova nao i lidim olgeta? Sipos yes, ale yu save sua fulwan se bambae yu win mo bambae yu gat wan gudfala fiuja. Samting ya bambae i kam klia moa taem yumi lukluk i go moa long profet tok blong Maeka.

[Ol Futnot]

?Bambae Yu Yu Ansa Olsem Wanem?

• ?From wanem Jeova i tekem aksin agensem Juda mo Isrel long taem blong Maeka?

• ?Wanem i save hapen taem ol man we oli talem se oli wok blong God oli ronem mane?

• ?Afta we yumi tokbaot Maeka japta 1 mo 2, from wanem yu sua fulwan long fiuja blong yu?

[Kwestin]

[Tok blong pija long pej 9]

Profet tok blong Maeka i save mekem yumi strong long saed blong spirit

[Tok blong pija long pej 10]

Isrel long spirit mo bigfala kampani oli stap leftemap trufala wosip olsem smol grup blong ol man Jiu ya oli mekem long 537 B.K.T.