?Olsem Wanem Blong Mekem Mared Blong Yu i Kam Strong Moa?

TINGBAOT wan haos we man i no lukaot nating long hem gogo i gat plante samting long hem we i nidim blong fiksimap. Kala blong hem i lus, ruf i nogud, mo garen tu i stap gru olsem bus nomo. Taem yu luk haos ya, yu save se ol hariken oli bin spolemgud hem be i no gat man i bin traem fiksimap hem. ?Olsem wanem? ?Yu ting se i moa gud yu brebrekem haos ya fulwan? No, maet i no nidim blong mekem samting ya. Sipos fandesen blong haos i strong mo ol stamba pos blong hem oli gud yet, yu save fiksimap haos ya blong i kam gud bakegen.

?Maet pijatok blong haos ya i mekem yu yu tingbaot mared blong yu? Taem ol yia oli pas, maet sam trabol we oli olsem ol bigfala hariken oli bin afektem fasin frengud blong yutufala. Maet wan long yutufala, no yutufala tugeta, i no bin tektaem blong mekem se mared i stap strong. Maet yu gat ol semfala filing olsem Sandy. Taem hem i talem tok we i kam biaen, Sandy i mared 15 yia finis, hem i se: “I no moa gat wan samting we i joenem mitufala. Wan samting nomo we i joenem mitufala, hemia pepa blong mared. Be samting ya i no naf.”

Nating se mared blong yu i olsem mared blong Sandy, yu no mas hareap blong ting se i moagud yu finisim mared ya. Yu save mekem mared blong yu i kam gud bakegen. Samting ya bambae i dipen bigwan long strong tingting we yu, wetem patna blong yu, yutufala i gat blong wantem stretem problem long mared blong yutufala mo blong wantem stap yet tugeta. Strong tingting ya blong wantem stap tugeta i save halpem mared blong i no kafsaed hareap tumas taem i gat trabol i kamaot. ?Olsem wanem Baebol i save givhan long yu blong gat strong tingting blong holem promes ya blong stap tugeta?

Strong Promes Long Mared i Min Se Wanwan i Mas Mekem Wok Blong Hem

Wan man we i mekem wan strong promes, hem i harem se i mas holem promes ya, mo filing blong hem tu i pusum hem blong wantem holem promes ya. Long saed blong bisnes tu, ol man oli stap mekem ol strong promes. Eksampol, taem wan man i saenem wan kontrak blong bildim wan haos, hem i harem se hem i mas mekem stret olsem we hem i promes blong mekem. Maet man blong bildim haos i no gud fren wetem man ya we i askem hem blong mekem wok ya. Be, nating se i olsem, hem i harem se i mas holem promes we hem i mekem taem hem i saenem kontrak.

I tru se, mared i no jes wan kontrak we tu bisnesman i saenem, from we i gat ol dip filing tu i stap insaed long wan mared. Be, mared i olsem wan kontrak from we taem yu mared i gat sam promes we yu mas holem. Yu wetem patna blong yu, yutufala i mekem wan strong promes long fored blong man mo long fored blong God, se bambae yutufala i stap tugeta oltaem, nomata wanem i hapen. Jisas i talem se: “God we i mekem  olgeta samting, fastaem, hem i mekem tu man nomo, wan we i man, wetem wan we i woman. Nao hem i talem se, ‘From samting ya, bambae man i mas aot long papa mo mama blong hem, i mas go joen wetem woman blong hem.’ ” Jisas i ademap se: “Mo from we God i joenem tufala olsem, man i no mas brekem mared blong tufala.” (Matiu 19:​4-6) Taswe taem wan trabol i kamaot, yu wetem patna blong yu, yutufala i mas gat strong tingting blong holem strong promes ya we yutufala i mekem taem yutufala i mared. * Wan waef i talem se: “Taem mitufala i stop blong tingbaot divos olsem wan rod blong stretem ol problem blong mitufala, nao fasin fren blong mitufala i stat blong kam gud moa.”

Be sipos man i wantem holem strong promes we hem i mekem taem i mared, hem i mas mekem sam narafala samting bakegen. ?Wanem samting?

Fasin Blong Wokgud Tugeta i Givhan Blong Holem Strong Promes Long Mared

Strong promes long mared i no min se bambae i neva gat rao bitwin hasban mo waef. Be, taem wan rao i kamaot, tufala i mas traehad blong stretem problem ya, i no jes from we tufala i bin mekem wan promes, be antap moa from we tufala i joen long filing. Jisas i tokbaot hasban mo waef i se: “Tufala i no moa tu, tufala i olsem wan bodi nomo.”

?Tok ya se yu wetem patna blong yu, yutufala i “olsem wan bodi nomo,” hem i minim wanem? Aposol Pol i raetem se “man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo.” (Efesas 5:​28,29) Taswe bambae yu soem we yutufala i “olsem wan bodi nomo” sipos yu wari long patna blong yu, olsem we yu wari long yu wan. Olgeta we oli mared oli mas jenisim fasin blong tingting blong olgeta. Oli no moa tingbaot samting olsem we olgeta wan i wantem, min se i no moa gat toktok olsem se “olting blong mi” be naoia i gat ol tok olsem “olting blong mitufala,” from we naoia tufala i tingbaot mo mekem samting tugeta. Wan woman we i givim advaes long saed blong mared i talem se: “Tufala [hasban mo waef] i mas stop blong tingting olsem se tufala i yangfala yet long hat blong tufala, mo tufala i mas tingting olsem we tufala i mared long hat blong tufala.”

?Yu wetem patna blong yu, yutufala i harem “long hat” blong yutufala se yutufala i mared? Sam oli mared blong plante yia, be oli no joen yet “olsem wan bodi nomo.” Yes, samting ya i save hapen, be buk ya Giving Time a Chance i talem se: “Mared i minim se tu man i serem wan laef, nao long laef ya sipos tufala i serem evri samting tugeta, bambae mared i gat plante moa risen blong kam strong.”

Sam hasban mo waef we oli no hapi long mared blong tufala, maet oli stap tugeta nomo from ol pikinini, no from mane. Sam narafala oli holem mared yet from we tingting blong olgeta i stikim olgeta, nao oli no save divos no from we oli no wantem we ol man oli tingting nogud long olgeta sipos oli seraot no oli  divos. I stret blong traem holem wan mared i stap, be rimemba se mak blong yu i no jes blong holem mared blong yutufala i stap longtaem. Mak blong yu i blong holemtaet fasin fren blong yutufala wetem lav.

Fasin Blong No Tingbaot Yu Wan Nomo i Givhan Blong Holem Promes Long Mared

Baebol i talem finis se long taem blong ol “lasdei” bambae ol man oli “tingbaot olgeta nomo.” (2 Timoti 3:​1, 2) Folem profet tok ya, yumi luk we tede ol man oli tingting tumas long olgeta wan i olsem se oli wosipim olgeta wan bakegen. Long plante mared, hasban mo waef i ting se i sem nomo blong mekem i gud long patna blong olgeta sipos i luk olsem se patna ya bambae i no mekem i gud long olgeta tu. Be, long wan gudfala mared, hasban mo waef, wanwan i rere blong lego ol samting we hem nomo i wantem. ?Olsem wanem yu save soem semfala fasin?

I nogud yu stap tingting tumas long olkaen kwestin olsem se, ‘?Mared ya i givim wanem long mi?’ I moagud yu askem kwestin ya se ‘?Mi mi stap mekem wanem blong mekem mared blong mitufala i kam strong moa?’ Baebol i talem se ol Kristin oli “no mas stap lukaot long ol bisnes blong [olgeta] nomo, be [oli] mas stap lukaotgud long ol bisnes blong ol narafala man tu.” (Filipae 2:4) Tingbaot stamba trutok ya blong Baebol, nao luklukbak long samting we yu bin mekem long wik we i jes pas. ?Hamas taem yu bin soem kaen fasin long patna blong yu, jes blong mekem hem i haremgud? ?Taem hem i wantem toktok, yu bin lesin long hem​—nating se maet yu no wantem tumas blong lesin? ?Hamas wok no pleplei we yu yu bin agri blong mekem, jes from we patna blong yu i intres long hem?

Taem yu tingbaot ol kwestin ya, yu no mas wari se patna blong yu bambae i luksave traehad blong yu no bambae yu kasem pei from ol gudfala fasin ya, no nogat. Wan buk we i tokbaot mared i talem se “plante taem, taem wan man mo wan woman tufala i fren tugeta, sipos wan i mekem i gud long narafala bambae narafala i mekem i sem mak long hem, taswe sipos yu wantem we patna blong yu i mekem i gud long yu, mekem i gud long hem fastaem.” Sipos yu rere blong lego ol samting we yu nomo yu wantem, bambae yu mekem mared blong yu i kam strong moa, from we fasin ya i soem se yu tinghae long mared blong yu mo yu wantem holem hem i stap.

Tingbaot Mared Olsem Wan Samting We i Mas Stap Olwe

Jeova God i tinghae long fasin blong stap tru. Baebol i talem se: “Man we i stap tru long yu, bambae yu [Jeova] yu stap tru long hem.” (2 Samuel 22:​26, NW ) Wan fasin blong stap tru long God i blong stap tru long mared ya we God hem wan i stanemap.​—Jenesis 2:​24.

Sipos yu yu stap tru long patna blong yu, mo hem i stap tru long yu, bambae yu harem se mared blong yutufala i no save finis samtaem. Taem yu tingbaot ol dei, ol manis, no ol yia we bambae oli kam, yu pijarem yutufala tugeta. Neva yu gat tingting ya se ‘bambae i olsem wanem sipos mitufala i no mared,’ mo gudfala tingting olsem nao i mekem we fiuja blong mared blong yutufala i sef. Wan waef i talem se: “Taem mi kros tumas long [hasban blong mi] mo mi harem nogud from samting we i stap hapen long mitufala, mi no wari se maet mared blong mitufala bambae i finis. Mi wari se olsem wanem bambae mitufala i save joengud bakegen olsem bifo. Mi save finis se bambae mitufala i frengud bakegen​—be stret long taem ya, mi no save rod yet blong mekem fasin fren i kambak wantaem bitwin mitufala.”

 Blong holem promes we yu mekem taem yu mared, yu mas tingbaot mared olsem wan samting we i blong olwe. Sore tumas, plante oli no lukluk mared blong olgeta olsemia. Taem i gat wan bigfala rao, maet wan long tufala i sakem tok olsem se, “!Mbae mi lego yu!” no, “!Bambae mi go faenem wan we i rili kea long mi!” I tru se, plante taem, hasban no waef i no rili minim samting we hem i talem. Be, nating se i olsem, Baebol i talem se samtaem ol tok ya oli “olsem posen we i save kilim man i ded.” (Jemes 3:8) Sipos yu talem samting olsem blong meksave patna blong yu no blong mekem hem i fraet nomo se bambae yu lego hem, i olsem we yu stap talem long hem se: ‘Mi no luk mared blong yumitu olsem wan samting we i save stap blong olwe. Mi save lego yu enitaem nomo.’ Tingting ya i save spolem wan mared.

Taem yu tingbaot mared blong yu olsem wan samting we i blong olwe, yu gat strong tingting blong stap wetem patna blong yu nomata wanem hadtaem we yutufala i fesem. Tingting ya i save karem narafala gudfala frut. Hem i save givhan long yu blong akseptem ol slak fasin mo ol mastik blong patna blong yu, mo i halpem yu blong yutufala i stap haremgud tugeta mo rere blong fofogivim yutufala. (Kolosi 3:​13) Wan buk we i givim advaes long saed blong mared i talem se, “long wan gudfala mared, hasban mo waef tugeta i luksave se tufala i save mestem, be nating se i olsem, mared bambae i stap strong.”

Taem yu mared, yu no mekem strong promes i go long wan jos no long wan gavman​—yu mekem strong promes i go long patna blong yu. Mo promes ya i mas gat bigfala paoa long ol tingting mo fasin blong yu, olsem man no woman we i mared. Ating yu agri se, sipos yu holemstrong long mared blong yu, i no jes from we yu tinghae long mared hem wan, be hemia from we yu lavem patna blong yu. ?I tru no?

[Futnot]

[Bokis/Foto blong pija long pej 5]

Samting We Yu Save Mekem Naoia

?Yu yu rili wantem se mared blong yu i stap strong? Maet yu luk se yu nidim blong wok moa long sam samting. Blong mekem tingting blong yu i strong moa blong holem promes long mared, traem folem ol advaes ya:

● Jekemap fasin mo tingting blong yu wan. Askem long yu wan se: ‘?Mi mi rili mared wetem fulhat blong mi no mi stap tingting yet, mo mekem samting yet, olsem we mi yangfala?’ Askem patna blong yu sipos hem i luk se yu yu stap mekem samting olsem se yu no mared yet, no olsem wanem.

● Ridim ol haf blong Wajtaoa ya wetem hasban no waef blong yu. Ale, wetem kwaet fasin, i gud yutufala i storebaot ol samting we yutufala i nidim blong wok long hem blong mekem we promes long mared blong yutufala i strong moa.

● Joen wetem patna blong yu blong mekem samting tugeta. Fasin ya i save mekem mared blong yutufala i strong moa. Maet sam samtaem yutufala i save lukluk ol foto blong mared blong yutufala no tingtingbak long sam spesel samting we i bin hapen long laef blong yutufala. I gud yutufala i mekem ol samting ya we yutufala i bin laekem blong mekem taem yutufala i stap fren yet bifo mared, no maet sam samting we yutufala i bin laekem blong mekem tugeta, afta we yutufala i mared. Stadi tugeta long ol atikol blong ol Wajtaoa mo Wekap! we oli tokbaot mared.

[Bokis/Foto blong pija long pej 6]

Strong Tingting Blong Holem Mared i Min Se . . .

● Yu Mas Holem Promes “Bambae yu mas mekem samting ya we yu promes blong mekem . . . I moa gud yu no mekem wan promes nating, i winim we yu mekem promes be yu no holem.”​—Prija 5:​4, 5.

● Yu Mas Wok Tugeta Olsem Wan Tim “Fasin ya we tu man i stap joen wanples blong mekem wan wok, hem i moa gud, i winim we wan man nomo i stap wok . . . Sipos wan long tufala i foldaon, narawan i save givhan long hem blong i girap bakegen.”​—Prija 4:​9, 10.

● Yu Mas Rere Blong Lego Ol Samting We Yu Nomo Yu Wantem “Man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35.

● Yu Mas Tingbaot Mared Se Hem i Blong Olwe “Man we i stap lavem man . . . maet bigfala trabol i save kasem hem, be tingting blong hem i no save foldaon.”​—1 Korin 13:​4, 7.

[Tok blong pija long pej 7]

?Taem patna blong yu i wantem toktok, yu yu lesin long hem?