Wokem Fasin Blong Givim Presen Wetem Gladhat

I NO gat man we i bon wetem fasin ya blong givim presen wetem gladhat. Wan bebi i gat tingting nomo blong kasem samting we hem i wantem mo i nidim. Hem i no tingbaot man we i stap lukaot hem. Be, sloslo, pikinini ya i lanem se i no hem nomo we i gat nid. Hem i mas tingbaot nid blong narafala tu. Hem i lan blong serem olting blong hem mo blong givim presen i go, i no blong kasem presen nomo. Fasin blong givim presen i go, i wan fasin we man i mas wokem.

Plante man oli givim presen​—sam oli givim plante samting​—be i no olgeta man we oli gat fasin blong givim presen wetem gladhat. Sam man oli givim presen long ol puaman, be blong kasem samting blong olgeta wan nomo. Sam narafala oli givim presen blong pulum ol man blong tinghae long olgeta. Be, fasin blong givim presen we ol trufala Kristin oli folem i defren. ?Ale, Tok blong God i leftemap wanem kaen fasin blong givim presen? Blong kasem ansa long kwestin ya, bambae yumi lukluk smol long eksampol blong ol Kristin blong faswan handred yia.

 Kristin Fasin Blong Givim Presen

Kristin fasin blong givim presen, olsem we Baebol i tokbaot, i ‘blong serem olting wetem ol man’ we oli rili gat nid. (Hibrus 13:16, NW ; Rom 15:26) Hemia i no wan samting we oli mekem from we man i fosem olgeta. Aposol Pol i raet se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9:7) Oli no mas givim presen blong pulum ol man oli luk wok blong olgeta. Ananaeas mo Safaera i gat fasin olsem mo tufala i lusum laef blong tufala from.​—Ol Wok 5:1-10.

I gat wan bigfala nid blong givim presen long taem blong lafet blong Pentekos long yia 33 K.T. Plante man Jiu mo proselaet oli aot long ol kantri farawe blong hivap long Jerusalem blong mekem lafet ya. Long taem ya ol man blong Jisas oli kam ‘fulap long tabu spirit mo oli stat toktok long ol lanwis blong ol narafala man.’ Wan bigfala hif blong man i hivap raonabaot long olgeta mo Pita i toktok long olgeta long saed blong Jisas Kraes. Toktok ya i rili leftemap tingting blong olgeta. Biaen, ol man oli luk we Pita mo Jon i mekem wan man we leg blong hem i nogud i girap i wokbaot, mo Pita i toktok bakegen long saed blong Jisas mo fasin blong tanem tingting from sin. Plante man oli tanem tingting from sin blong olgeta mo oli tekem baptaes olsem ol man we oli folem Kraes.​—Ol Wok, japta 2 mo 3.

Ol man we oli jes baptaes oli wantem gohed blong stap long Jerusalem mo kasem moa tijing long ol aposol blong Jisas. ?Be olsem wanem bambae ol aposol oli lukaot long ol nid blong olgeta? Baebol i talem se: “Ol man we oli gat graon blong olgeta no haos blong olgeta, oli stap salemaot ol samting ya, nao oli stap tekem ol mane blong olgeta, oli kam givim long ol aposol. Nao biaen, ol aposol oli stap seraot ol mane ya long ol man ya we oli bilif long Jisas, we oli sot long sam samting.” (Ol Wok 4:33-35) !Tru, niufala kongregesen long Jerusalem i gat fasin blong givim presen wetem gladhat!

Biaen, ol narafala kongregesen tu oli soemaot semfala fasin. Eksampol, nating se ol Kristin long Masedonia oli puaman tru, oli sakem kleksin we i bigwan tumas i bitim mak olgeta, blong givhan long ol brata blong olgeta long Judia. (Rom 15:26; 2 Korin 8:1-7) Kongregesen blong Filipae i givhan bigwan long Pol long minista wok blong hem. (Filipae 4:15, 16) Kongregesen blong Jerusalem i stap seraot ol kakae evri dei long ol wido we oli pua, mo ol aposol oli putumap seven man blong lukaot long wok ya mo blong meksua se oli no mestem wan long ol wido ya.​—Ol Wok 6:1-6.

Ol faswan Kristin kongregesen oli save se bambae i gat hadtaem. Nating se i olsem, oli kwik blong givhan long olgeta we oli gat nid. Eksampol, taem profet Agabus i talemaot se bambae i gat hadtaem blong kasem kakae, ol man blong Jisas long kongregesen blong Antiok “oli tingbaot se bambae olgeta evriwan oli mas sanem sam mane olsem we oli save mekem, blong givhan long ol brata blong yumi, we oli stap long Judia.” (Ol Wok 11:28, 29) !Hemia wan nambawan fasin we olgeta oli soemaot! Oli tingrere finis long ol samting we maet ol narafala bambae oli nidim.

?Wanem i pusum ol faswan Kristin blong givim presen wetem gladhat mo blong lavem ol narafala? ?Mo, olsem wanem man i wokem fasin ya blong givim presen wetem gladhat? Yumi save lanem plante samting taem yumi lukluk eksampol blong King Deved.

Deved i Givim Plante Presen i Go Long Trufala Wosip

Blong klosap 500 yia, bokis blong kontrak​—wan tabu bokis we i olsem saen se Jeova i stap wetem ol man Isrel—i no gat prapa ples blong hem i stap long hem oltaem. Ol man Isrel oli putum bokis ya i stap long wan haos tapolen, no haos wosip, we oli save karem i go wetem olgeta taem oli wokbaot long draeples, mo taem oli go long Promes Lan. King Deved i wantem tumas blong tekem bokis ya aot long haos tapolen mo wokem wan gudfala haos blong Jeova we bokis blong kontrak i save stap long hem. Taem Deved i stap toktok long profet Natan, hem i talem se: “?Olsem wanem? Naoia mi mi stap long wan gudfala haos we oli wokem long wud ya sida, be Bokis ya we i saen blong Promes blong Hae God, hem i stap long wan haos tapolen nomo.”​—1 Kronikel 17:1.

Be, Deved i bin wan man blong faet. Taswe Jeova i talem long hem se, taem pikinini boe blong hem, Solomon, bambae i rul mo pis i stap long kantri,  hem nao bambae i wokem haos blong God blong putum bokis blong kontrak i stap long hem. (1 Kronikel 22:7-10) Be, samting ya i no blokem Deved blong givim presen wetem gladhat. Hem i ogenaesem ol man blong wok, mo i hivimap ol samting we bambae oli yusum blong wokem haos ya. Biaen, hem i talem long Solomon se: “I gat moa long tri taosen fo handred tan gol i stap, wetem moa long toti fo taosen tan silva, mo i gat ol bras mo aean tu i stap we oli plante we plante. Mo i gat ol wud tu wetem ol ston we oli rere finis i stap.” (1 Kronikel 22:14) Nating se Deved i hivimap plante samting finis, hem i wantem givim moa. Taswe hem i givim silva mo gol we i blong hem nomo i go wetem ol samting ya, we praes blong hem tede i bitim 150 bilian vatu. Mo, ol lida blong ol famle mo ol jif blong ol laen oli givim plante samting tu. (1 Kronikel 29:3-9) !Tru ya, Deved i soem fasin blong givim presen wetem gladhat!

?Wanem samting i pusum Deved blong givim ol presen ya long gladhat blong hem? Deved i luksave se olgeta samting we hem i gat mo olgeta wok we hem i mekem oli kamaot from blesing blong Jeova. Long wan prea hem i talem se: “Hae God, yu yu God blong mifala. Mifala i karem ol gudgudfala samting ya i kam blong wokem haos blong yu blong ona long yu, be ol samting ya, oli blong yu  nomo, mo yu nomo yu givim long mifala. Mi mi save we yu yu stap skelem tingting blong olgeta man, mo yu stap glad long ol man we oli stret gud. Long stret fasin nomo, mi givim olgeta samting ya long yu long gladhat blong mi. Mo mi luk finis we ol man ya blong yu we oli stap wanples naoia, oli glad tumas blong givim ol samting ya long yu.” (1 Kronikel 29:16, 17) Deved i tinghae long fasin fren we hem i gat wetem Jeova. Hem i luksave se hem i mas mekem wok blong Jeova ‘wetem fulhat blong hem mo wetem wan laef we i glad.’ Mo hem i faenem glad long wok ya. (1 Kronikel 28:9, NW ) Ol semfala fasin nao oli pusum ol faswan Kristin blong givim presen wetem gladhat.

Jeova i Givim Moa Presen i Bitim Eni Man

Jeova i soem beswan eksampol long fasin blong givim presen. From we hem i lavem ol man tumas mo i kea long olgeta, “hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Matiu 5:45) Hem i stap mekem olgeta man oli ‘laef mo hem i stap givim olgeta samting long olgeta.’ (Ol Wok 17:25) Tru, olsem disaepol Jemes i poenemaot se, “evri samting we oli gud mo evri presen we oli nambawan we yumi kasem, oli  kamaot long heven nomo. God i mekem olgeta laet blong skae, mo hem i stap mekem ol gudgudfala samting ya long yumi.”​—Jemes 1:17.

Presen we Jeova i givim long yumi we i bigwan moa hemia taem hem i sanem ‘stret Pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) I no gat man we i save talem se i stret blong hem i kasem presen ya, from we ‘olgeta man oli mekem nogud finis, mo oli stap afsaed olgeta long ol gudgudfala fasin blong God.’ (Rom 3:23, 24; 1 Jon 4:9, 10) Tru long ransom sakrefaes blong Kraes, God i givim “presen ya blong hem we i gud tumas, i bitim mak olgeta, yumi no save makem,” hemia se, ‘God i stap givhan bigwan long yumi long gladhat blong hem.’ (2 Korin 9:14, 15) Pol i gat tangkiu from presen blong God, taswe wok we i impoten moa long laef blong hem, hemia ‘wok blong talemaot gud nius ya we God i lavem yumi tumas, mo i stap mekem i gud tumas long yumi.’ (Ol Wok 20:24) Pol i luksave se God i wantem “sevem olgeta man, mo i wantem we olgeta man bambae oli save trutok blong hem.”​—1 Timoti 2:4.

Tede, wan bigfala wok blong prij mo tij we naoia i kasem 234 kantri blong wol i givhan long ol man blong kasem save long trutok. Jisas i bin talemaot we wok ya bambae i kam bigwan, hem i se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:14, NW ) Yes, “gud nius ya i mas go long olgeta man long wol fastaem.” (Mak 13:10) Las yia bitim sikis milian man blong talemaot gud nius oli spenem 1,202,381,302 aoa long wok ya mo oli mekem bitim 5,300,000 Baebol stadi. Laef blong plante man i stap long denja, taswe mesej ya blong gud nius i impoten tumas.​—Rom 10:13-15; 1 Korin 1:21.

Evri yia oli wokem plante milian buk​—olsem ol Baebol, buk, mo buklet​—we oli givhan long ol man we oli hanggri from trutok blong Baebol. Antap long samting ya, oli wokem bitim wan bilian Wajtaoa mo Wekap! Long ol ples we plante man oli lesin long gud nius, oli bildim plante moa Haos Kingdom mo Haos Asembli blong ol Witnes blong Jeova, we oli stamba ples blong tijim Baebol. Evri yia oli mekem ol seket asembli mo spesel dei asembli, mo tu ol distrik asembli. Wok blong trenem ol misinari, seket elda, distrik elda, elda blong kongregesen, mo man blong givhan i stap gohed oltaem. Yumi tangkiu long Jeova from olgeta presen ya we hem i givim tru long “slef we i stret mo waes.” (Matiu 24:45-47, NW ) !Yumi wantem tumas blong soem tangkiu long Jeova!

Soem Tangkiu Long Jeova

Ol samting we ol man oli givim blong bildim haos blong God mo blong lukaot long nid blong olgeta long faswan Kristin kongregesen oli presen nomo. Be, i gud blong tingbaot se, olgeta presen we yumi givim long Jeova oli no save mekem hem i rij, from we olgeta samting oli blong Hem finis. (1 Kronikel 29:14; Hagae 2:8) Taswe, ol presen mane oli soemaot se yumi lavem Jeova mo yumi wantem sapotem trufala wosip. Pol i talem se ol samting we yumi givim long gladhat blong yumi, oli olsem ol tok blong ‘talem tangkiu long God.’ (2 Korin 9:8-13) Jeova i wantem se yumi gat fasin ya blong givim presen, from we hemia i soem se yumi gat stret tingting long fasin ya blong givim wetem gladhat mo hat blong yumi i fulap wetem lav long God. Jeova bambae i blesem ol man we oli givim presen wetem gladhat mo we oli trastem hem. Bambae hem i mekem we oli rij long saed blong spirit. (Dutronome 11:13-15; Ol Proveb 3:9, 10; 11:25) Jisas i mekem yumi sua se fasin ya bambae i mekem yumi harem gud, hem i se: “Man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35.

Ol Kristin we oli gat fasin blong givim presen wetem gladhat oli no wet go kasem taem blong trabol nomo. Defren olgeta, oli rere oltaem blong ‘mekem i gud long olgeta man, antap moa, long olgeta ya we oli brata mo sista blong [olgeta] from we olgeta tu oli bilif long Kraes.’ (Galesia 6:10) Pol i leftemap tingting blong ol man blong oli folem eksampol blong Jeova long fasin blong givim presen, hem i raet se: “Oltaem yufala i mas mekem ol gudfala fasin, mo yufala i mas givgivhan long yufala, from we ol fasin ya tu i olsem we yufala i stap kilim anamol blong mekem sakrefaes i go long God, we hem i glad tumas long olgeta.” (Hibrus 13:16) Jeova God i glad tumas, taem yumi yusum olting blong yumi​—olsem taem, paoa, mane—blong givhan long ol narafala mo blong sapotem trufala wosip. Tru ya, hem i lavem ol man we oli givim presen wetem gladhat.

[Bokis/Foto blong pija long pej 28, 29]

Ol Rod We Samfala Oli Folem Blong Givim Presen Mane

BLONG SAPOTEM WOK LONG OLGETA PLES LONG WOL

Plante man oli makemaot, no mekem plan, blong hamas mane we bambae oli putum long bokis blong presen mane, we oli raetem long hem se “Presen Mane Blong Sapotem Wok Blong Prij Long Ful Wol​—Matiu 24:14.”

Evri manis, ol kongregesen oli sanem mane ya i go long ofis blong ol Witnes blong Jeova we i lukaot long wok long kantri blong olgeta. Yu yu save sanem presen mane i go long branj ofis we i lukaot long kantri blong yu. Sipos yu saenem wan jek, yu raetem se mane ya i go long “Watch Tower.” Ol gol jen, sas ston mo ol narafala sas samting yu save givim tu olsem presen. Yu mas sanem wan sotfala leta i go wetem ol presen ya blong talemaot se yu givim samting ya olsem wan presen nomo.

PRESEN MANE WE MAN I SAVE KASEMBAK SIPOS I NIDIM

Man i save givim presen mane we i folem wan spesel rod, mekem se sipos man ya i wantem askem bak mane ya, bambae sosaeti i givimbak long hem. Blong kasem moa save long saed ya, plis yu raet i go long branj ofis we i lukaot long kantri blong yu.

PLAN WE MAN I FOLEM BLONG GIVIM PRESEN MANE

Antap long ol presen we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples long wol. Sam long olgeta ya hemia:

Insurens: Man i save mekem se Watch Tower Sosaeti i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala.

Ol Bang Kaon: Folem ol rul blong bang long ples blong hem, man i save mekem we mane we bang i holem long kaon blong hem, mane we hem i putum long wan spesel kaon go kasem wan stret taem, no mane we hem i kasem taem hem i ritae, i go long han blong Watch Tower Sosaeti no i givim long olgeta taem hem i ded.

Ol Stok Mo Bon: Man i save givim stok mo bon oli go fulwan long Watch Tower Sosaeti olsem presen nomo.

Graon Mo Haos: Man i save givim graon no haos blong hem i go long Watch Tower Sosaeti, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Yu mas toktok wetem branj ofis we i lukaot long kantri blong yu bifo we yu givim graon no haos long sosaeti.

Lastok Blong Man Bifo We Hem i Ded Mo Plan Blong Holem Mane i Stap Kasem Ded: Man i save givim graon no haos no mane blong hem long Watch Tower Sosaeti taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem mane blong man ya i stap, blong i go long Watch Tower Sosaeti taem man ya i ded. Mane we bang i holem blong givhan long wan skul, maet man i no nidim blong pem takis long hem. Ol man we oli intres long eniwan long olgeta plan ya blong givim presen, oli mas raetem leta i go long ofis blong Sosaeti we i lukaot long kantri blong olgeta.

[Tok blong pija long pej 26]

?Wanem samting i pusum ol faswan Kristin blong givim presen wetem gladhat?