Leftemap Nem Blong God i No Nem Blong Man

LONG ol manis we i pas, ol man we oli laekem stret fasin long ful wol oli lanem olsem wanem blong leftemap nem blong God, taem oli kam wanples long Distrik Asembli ya blong ol Witnes blong Jeova we nem blong hem “Leftemap Nem Blong God.” I gud yumi tingtingbak long ol samting we program ya i bin tijim long ol man.

Program ya we i stanap long Baebol, oli holem blong tri dei long bighaf blong ol asembli mo blong fo dei long ol intenasnal asembli. Ol man we oli hivap oli lesin gud long bitim 30 tok we i stanap long Baebol. I gat sam tok we oli pusum ol man blong tinghae long samting long saed blong spirit, i gat ol ekspiriens we i mekem bilif i strong moa, ol pleplei we oli soemaot olsem wanem blong folem ol rul blong Baebol, mo wan drama we i soemaot ol traem we ol Kristin long faswan handred yia oli fesem. Sipos yu yu go long wan long ol asembli ya, maet i gud blong lukluk bakegen long ol not blong yu, taem yu rid long haf ya. Mifala i sua se taem yu mekem olsem, bambae yu kasem gudfala tijing mo kasem plante moa kakae long saed blong spirit.

Stamba Tok Blong Faswan Dei: ‘Jeova, i Stret Nomo Blong Ol Man Oli Leftemap Nem Blong Yu’

Afta long faswan singsing mo prea, brata we i mekem faswan tok i welkamem ol man blong tingbaot from wanem i gat wan asembli, taem hem i givim tok ya: “Yumi Joen Wanples Blong Leftemap Nem Blong God.” Taem hem i yusum vas ya long Revelesen 4:​11, hem i tokbaot stamba tok long ful asembli. Blong smoltaem nomo hem i tokbaot poen ya se i minim wanem blong leftemap nem blong God. Hem i yusum buk blong Ol Sam blong makem poen ya se blong leftemap God, i minim blong mekem “wosip,” “talem tangkiu,” mo “presem hem.”​—Ol Sam 95:6; 100:​4, 5; 111:​1, 2.

Nekiswan tok hemia “Olgeta We Oli Leftemap Nem Blong God Oli Kasem Blesing.” I gat wan impoten poen we brata i talemaot. From we i gat bitim sikis milian Witnes blong Jeova long 234 kantri long ful wol, mekem se oli givim ona long Jeova long dei mo long naet, we neva oli spel. (Revelesen 7:15) Sam brata mo sista we oli stap long fultaem wok tu, oli talemaot ekspiriens blong olgeta we i tajem hat blong ol man.

“Ol Samting We God i Wokem Oli Soemaot Paoa Blong Hem” hemia nekiswan tok. Nating we ol samting we oli stap long heven oli no save toktok, oli leftemap paoa blong God mo oli givhan long yumi blong tinghae long lav mo fasin kea we God i gat. Brata we i givim tok ya i eksplenem gud ol poen ya.​—Aesea 40:26.

I gat plante samting we oli traem fasin blong ol Kristin blong stap tru long God, olsem fasin agens, man i ronem olgeta, ol fasin blong wol, mo ol slak  fasin we oli kamaot from sin. Taswe, tok ya “Wokbaot Long Rod Blong Stret Fasin” i rili wekemap tingting blong ol man we oli lesin. Brata i tokbaot ol wanwan vas long Sam namba 26, mo hem i askem kwestin long sam yangfala we oli stap go long skul, wan i talem olsem wanem hem i stanap strong long gudfala fasin mo narawan i talem olsem wanem fastaem hem i bin spenem tumas taem long sam pleplei we i no gud tumas, be afta hem i mekem sam samting blong winim problem ya.

Stamba tok ya se, “!Ol Vison Blong Paoa Blong God Oli Givim Paoa Long Yumi!” i laswan tok long program long moning. Brata we i givim tok ya i talemaot ol eksampol blong profet Daniel, mo aposol Jon mo Pita we bilif blong olgeta i kam strong moa taem oli luk sam vison blong ol profet tok we Baebol i givim long saed blong Kingdom blong Mesaea. Long saed blong olgeta we maet oli no moa lukluk klia long ol pruf se yumi laef long ol las dei, brata i talem se: “Yumi hop we olgeta ya oli lukluk klia bakegen se Kraes i kasem paoa finis long Kingdom, mo yumi hop se oli kam strong bakegen long saed blong spirit.”

Program long aftenun i stat wetem tok ya se “Jeova i Soemaot Paoa Blong Hem Long Ol Man We Oli Gat Tingtingdaon.” Brata i tokbaot olsem wanem Jeova nomo i soemaot nambawan eksampol long tingtingdaon, nating we Hem nomo i hae olgeta long heven mo wol. (Ol Sam 18:35) Jeova i laekem ol man we oli rili gat tingtingdaon, be hem i agens long ol man we oli mekem i nogud long olgeta we oli daon moa long olgeta.​—Ol Sam 138:6.

Afta, i gat tok ya: “Profet Tok Blong Amos​—Mesej Blong Hem We i Stret Long Taem Blong Yumi.” Hem i wan tok we i gat tri haf blong hem long saed blong wan profet tok blong Baebol. Faswan long trifala tok ya se “No Fraet Blong Talemaot Tok Blong God,” i soemaot eksampol blong Amos, we i pulum tingting blong yumi blong tingbaot wok we yumi gat blong wonem ol man long jajmen blong Jeova we bambae i kam. Namba tu tok “Jajmen Blong God Agensem Ol Rabis Man,” i stanemap wan kwestin se: “?Bambae Jeova i finisim raf fasin mo fasin safa long wol ya?” mo tok ya i soemaot se jajmen blong God bambae i kam long stret taem blong hem, man i no save blokem, mo bambae i spolem ol nogud man. Laswan long trifala tok ya, hemia “Jeova i Stap Lukluk Hat Blong Man.” Ol man we oli wantem mekem Jeova i glad oli folem ol tok long Amos 5:15 (NW ) we i se: “Yu mas no laekem nating samting we i nogud, be yu mas laekem samting we i gud.”

Dring i save mekem we man i harem gud, be ol man oli stap yusum long wan rod we i no stret. Long tok ya “Lukaot Blong No Foldaon Long Trap Ya Blong Dring Bitim Mak,” brata i talemaot ol denja we man i save kasem long saed blong bodi mo spirit sipos man i no yusum alkol long stret rod, nating sipos man ya i no kam drong. Hem i tokbaot wan rul we i save givhan long man taem hem i dring alkol, se: From we olgeta man i no sem mak taem oli dring alkol, taswe sipos yu dring be yu harem se yu ‘lusum waes blong yu, mo fasin blong yu we yu save luksave mining blong ol samting we i had’ hemia i soem se yu dring bitim mak finis.​—Ol Proveb 3:​21, 22.

From we yumi laef long wan wol we i strong, nekis tok i leftemap tingting blong olgeta we oli lesin i se, “Jeova i Olsem ‘Wan Strong Haos We Yumi Save Haed Long Hem Long Taem Blong Trabol.’ ” Prea, tabu spirit, mo ol Kristin brata mo sista tu oli save halpem yumi blong win.

Laswan tok long dei ya se, “ ‘Gudfala Kantri Ya’​—Wan Smol Pija Blong Paradaes,” mo evriwan oli glad blong kasem wan niufala buk we i gat plante map blong Baebol. Nem blong buk ya See the Good Land.

Stamba Tok Blong Namba Tu Dei: “Talemaot Paoa Blong Hem Long Ol Man Blong Ol Narafala Kantri”

Afta we oli tokbaot vas blong dei, i gat wan narafala tok we i gat tri haf long hem, we stamba tok blong hem se, “Soemaot Paoa Blong God Olsem Bigfala Laet We i Stap Saenaot Long Fes Blong Yumi.” Brata we i mekem faswan haf i givim tok ya se, “Talemaot Gud Nius Long Evri Ples” mo hem i tokbaot sam ekspiriens long wok blong prij. Brata we i givim narafala haf ya “Tekemaot Kaliko We i Blaenem Ae Blong Plante man” hem i askem sam pablisa blong oli mekem pleplei we i soemaot olsem wanem oli bin prij long narafala. Long laswan haf ya “Mekem Samting Ya Moa Long Minista Wok Blong Yu,” brata i askem kwestin long samfala blong oli talemaot ol ekspiriens we oli kasem long wok blong prij.

 Nekis tok long program hemia “Oli No Mekem Rong, Be Ol Man Oli No Laekem Olgeta.” Brata we i givim tok ya i askem sam kwestin long ol brata mo sista we oli kasem paoa blong God mekem se oli naf blong stap tru long God, nating se oli kasem traem.

Tok blong baptaes we taetel blong hem se: “Leftemap Nem Blong God Taem Yu Holem Promes Blong Givim Laef Blong Yu i Go Long Hem.” Hemia wan haf blong asembli we yumi laekem tumas, from we afta long tok ya samfala oli tekem baptaes long wota. Baptaes long wota i wan saen blong soem se ol man ya oli givim laef blong olgeta i go long Jeova, mo taetel blong tok ya i laenap gud nomo wetem samting ya.

Program blong aftenun i stat wetem wan tok we i pulum yumi blong lukluk gud long laef blong yumi wanwan. Stamba blong tok ya se, “Kasem Tingting Blong Kraes Long Saed Blong Haenem.”  Brata i talemaot wan poen we i impoten se, blong kam haeman, man i mas folem gud fasin blong Kraes blong gat tingtingdaon. Be wan Kristin bambae i no mekem ol spesel wok from we hem i wantem kasem haenem. Taswe hem i mas askem hem wan se, ‘?Mi mi rere blong mekem sam smosmol wok we narafala bambae i no luksave, no mi laekem moa blong mekem ol wok we olgeta man oli save luk?’

?Yu yu bin taed samtaem? Yes, olgeta man oli save taed. Plante long yumi oli laekem tok ya we i se, “Oli Taed, Be Oli No Kam Slak.” Ol kwestin we oli askem long sam witnes we oli wosip long Jeova blong longtaem finis, i soemaot se Jeova i save ‘yusum spirit blong hem blong mekem yumi strong.’​—Efesas 3:16.

Fasin blong givim presen wetem gladhat i no wan fasin we yumi bon wetem, be i wan fasin we yumi mas lanem. Mo poen ya i kamaot klia moa long tok ya: “Gladhat Blong Givhan Long Ol Man, Mo Blong Seraot Ol Samting Blong Yumi Long Olgeta.” Oli askem kwestin ya we i mekem man i tingting se: “?Yumi rere blong givim smol taem blong yumi blong givhan long ol brata mo sista we oli olfala, oli sik, tingting blong olgeta foldaon, mo maet oli stap olgeta wan?”

“Lukaot Long ‘Voes Blong Man We Yumi No Save Hem’ ” hem i nekiswan tok we i pulum tingting blong olgeta we oli lesin. Tok ya i tokbaot ol man blong Jisas olsem sipsip we i stap lesin long voes blong “gudfala man ya blong lukaot long sipsip.” Ol sipsip ya oli no lesin long voes blong “man we oli no save hem,” hemia i minim ol samting we man i wokem blong givim save mo we Devel Setan nao i stamba blong hem.​—Jon 10:​5, 14, 27.

Ol man blong singsing oli mas sing long wan tiun we i joengud sipos oli wantem we singsing blong olgeta i naes. Blong givim ona long God, ol man blong mekem trufala wosip long fulwol oli mas gat wan tingting nomo. Taswe haf ya, “Leftemap Nem Blong God ‘Wetem Wan Tingting Nomo’ ” i givim plante advaes olsem wanem yumi save toktok long “klin lanwis” mo wosip long Jeova we “solda blong wan i joen long solda blong narawan.”​—Sefanaea 3:​9, NW.

Ol papa mo mama, we oli gat ol yangfala oli glad blong lesin long laswan tok blong dei ya se, “Ol Pikinini Blong Yumi​—Wan Sas Presen We Yumi Kasem.” Wan niufala buk we i gat 256 pej long hem, i kamaot we i mekem ol man we oli lesin oli glad. Buk ya Learn From the Great Teacher, i wan buk we bambae i halpem ol papa mo mama blong spenem moa taem wetem ol pikinini blong olgeta, we God i givim olsem ol presen.

Stamba Tok Blong Namba Tri Dei: “Oltaem Yufala i Mas Leftemap Nem Blong God”

Vas blong dei i mekem yumi tingbaot ol samting long saed blong spirit blong statem laswan dei blong asembli. Faswan haf long program i tok plante long saed blong ol famle. Faswan tok, “Ol Papa Mama, Mekem Famle Blong Yufala i Harem  Gud,” i rerem tingting blong olgeta we oli lesin. Afta we brata i talem bakegen wok we papa mama i mas mekem blong givhan long famle long saed blong bodi, hem i soemaot se faswan wok blong papa mama i blong lukaot long ol pikinini blong olgeta long saed blong spirit.

Nekis brata i tok stret long ol yangfala blong tingting dip long poen ya, “Ol Samting We Ol Yangfala Oli Mekem Blong Presem Jeova.” Hem i talem se ol yangfala oli olsem “wota blong naet” from we oli plante, mo from we oli yang mo oli gat paoa. Ol bigman oli glad blong wok wetem olgeta long wok blong Jeova. (Ol Sam 110:3) Haf ya i finis taem oli askem kwestin long sam yangfala we oli soemaot ol gud eksampol.

Wan spesel haf long evri distrik asembli, hemia drama we ol man we oli plei long hem oli putum ol klos olsem ol man bifo. Long asembli ya tu, i gat wan drama. Nem blong drama ya “No Fraet Blong Prij Nating Se i Gat Fasin Agens,” i soem ol man blong Jisas long faswan handred yia. Drama i tijim yumi long plante samting mo yumi harem gud from. Afta long drama i gat wan tok we i se, “ ‘No Stop’ Blong Talemaot Gud Nius,” we i tokbaot ol stamba poen blong drama ya.

Evriwan we oli kam long asembli oli wantem tumas blong lesin long wan impoten haf long program long Sande, hemia pablik tok ya, “?Hu Olgeta We Oli Stap Leftemap Nem Blong God Tede?” Brata i talemaot ol pruf, olsem wanem ol tingting blong sayens mo ol skul oli no givim ona nating long God. Ol man we oli karem nem blong Jeova nomo, we oli stap prij mo tijim trutok long saed blong Hem, olgeta nao oli rili stap leftemap nem blong hem tede.

Afta long pablik tok i gat Wajtaoa stadi long wik ya. Biaen i gat laswan tok ya “Gohed Blong ‘Karem Plante Frut’ Mo Leftemap Nem Blong Jeova.” Brata i talemaot ten impoten disisen we ol man long asembli ya oli save agri long hem. Disisen ya i soemaot plante defren rod we man i save folem blong leftemap nem blong Jeova, Man ya we i Wokem yumi. Olgeta man we oli stap long asembli ya raon long wol oli ansa ‘yes’ long disisen ya.

Afta we asembli i finis, ol man we oli kam long asembli ya oli tingbaot stamba tok ya se “Leftemap Nem Blong God.” Mo, wetem help blong spirit blong Jeova mo ogenaesesen blong hem long wol ya, yumi save lukaot rod oltaem blong leftemap nem blong God, i no nem blong man.

[Bokis/Foto blong pija long pej 23]

Ol Intenasnal Asembli

Ol intenasnal asembli blong fo dei oli holem long Afrika, Esia, Ostrelia, Yurop, mo long Not mo Saot Amerika. I gat sam Witnes we oli jusum olgeta olsem ol deleget long ful wol blong go long ol asembli ya. Taem oli hivap wetem ol narafala i ‘olsem we bilif blong wan i givhan long narawan.’ (Rom 1:12) Yu save luk ol olfala fren, mo yu save mekem sam niu fren bakegen. Wan spesel haf long ol intenasnal asembli ya i stap long program we i gat haf blong hem se “Ol Ripot We Oli Kamaot Long Narafala Kantri.”

[Bokis/Foto blong pija long pej 25]

Ol Niufala Buk We Oli Leftemap Nem Blong God

I gat tu niufala buk we i kamaot long Distrik Asembli ya “Leftemap Nem Blong God.” Smol buk ya See the Good Land, i wan buk we i save stap longtaem, mo i gat 36 pej blong ol map mo ol bigfala kantri olsem Asiria, Babilon, Medo-Pesia, Gris mo Rom. Mo i gat sam map we i soem ol ples we Jisas i wokbaot long hem, mo ol ples we trufala skul i kasem.

Buk ya Learn From the Great Teacher i gat 256 pej long hem mo i gat 230 pija. Yu save spenem plante gudfala taem wetem ol pikinini blong soem ol pija mo ansa long ol kwestin we i pulum tingting long buk ya. Oli wokem niufala buk ya blong halpem ol yangfala blong winim ol traem blong Setan, we i wantem spolem gudfala fasin blong ol yangfala.

[Tok blong pija long pej 23]

Ol misinari oli talemaot ol ekspiriens we i leftemap bilif

[Tok blong pija long pej 24]

Baptaes i wan impoten haf long ol asembli ya “Leftemap Nem Blong God”

[Tok blong pija long pej 24]

Ol yangfala mo ol olfala tu oli laekem tumas ol drama we oli kamaot long Baebol