Olgeta We Oli Stap Safa Oli Save Haremgud

LONG taem bifo, ol man mo woman we oli bilif long God, oli safa from sam trabol, be oli prea plante long God blong i lidim olgeta. Mo oli traem faenem rod tu blong mekem se samting ya we i stap mekem oli safa, i no spolem olgeta tumas. Blong mekem olsem, sam long olgeta oli yusum waes blong mekem trik blong oli save ronwe long man we i stap givim hadtaem long olgeta. Wan long olgeta ya hemia Deved. Hem i dipen long Jeova mo i wokhad tu, taswe hem i naf blong stanap strong gogo kasem we samting ya we i mekem hem i safa, i finis. ?Olsem wanem long yumi tede?

Taem wan samting i mekem yu yu safa, ating yu traem faenem rod kwiktaem blong stretem trabol ya. Eksampol, sipos yu no gat wok, ating yu traehad blong faenem wan wok we bambae i save givim samting we yu mo famle blong yu i nidim. (1 Timoti 5:8) Sipos sik i stap mekem yu yu safa, ating yu traem bes blong yu blong faenem meresin no dokta we i save givhan long yu. Makem poen ya se, nating se Jisas i gat paoa we God i givim long hem blong hilim olkaen sik, be hem i talem tu se ‘man we i sik, hem i nidim dokta.’ (Matiu 9:12) I tru se i no oltaem we bambae yu naf blong karemaot fulwan, samting ya we i stap mekem yu yu safa. Maet yu mas gohed blong stap harem samting ya blong longtaem lelebet.

I gud blong tokbaot bisnes ya long Jeova God taem yu prea long hem. Eksampol, taem yu stap traehad blong faenem wok, sipos yu dipen long God tru long prea bambae hem i halpem yu blong yu no hareap blong tekem wan wok we maet i no laenap wetem ol rul blong Baebol. Mo tu, samting ya bambae i blokem yu blong yu no letem fasin griri no fasin blong lavem mane i lidim yu yu ‘gowe long fasin blong bilif.’ (1 Timoti 6:10) Yes, taem yumi mas tekem sam impoten disisen long saed blong wok, famle, no helt blong yumi, yumi save folem tok blong Deved we i se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.”​—Ol Sam 55:22.

Prea we i kamaot long hat bambae i halpem yumi blong holem klia tingting, mekem se samting ya we i stap mekem yumi safa bambae i no hevi tumas long yumi. Aposol Pol, we hem i wan trufala Kristin, i raetem se: “I gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.” ?Prea i save mekem yumi harem gud olsem wanem? “Pis we [God] i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:​6, 7) Yes, pis blong God i “bitim  save blong yumi.” Taswe, nating sipos ol filing blong yumi oli trabol tumas, pis ya i save mekem yumi naf blong skelem gud ol samting. Pis ya bambae i ‘lukaot gud long yumi,’ no olsem Baebol ya New World Translation i talem, bambae i lukaot gud long ‘hat mo tingting blong yumi.’ Ale, samting ya bambae i halpem yumi blong no mekem samting hareap we yumi no tingting gud fastaem. Fasin ya blong mekem samting hareap tumas, i save mekem moa trabol long yumi.

Prea i save jenisim sam samting tu long laef blong yumi. Taem aposol Pol i presina long Rom, hem i askem wetem tingting daon long ol Kristin brata blong hem blong oli prea from hem. ?From wanem Pol i askem samting ya? Hem i raet i go long olgeta i se: “Mi mi wantem tumas se yufala i mas askem long God, blong mi save kambak bakegen long yufala kwiktaem.” (Hibrus 13:19) Pol i save se sipos Jeova i harem we ol Kristin brata oli prea bakegen mo bakegen, maet hem i save jenisim taem we Pol i mas fri long kalabus.​—Filimon 22.

?Prea i save mekem we trabol blong yumi i finis? Yes i save hapen olsem. Be yumi mas tingbaot se samtaem ansa we Jeova God i givim long prea blong yumi i defren olgeta long samting we yumi bin wantem. Pol i prea plante taem blong God i tekemaot ‘nil aranis’ ya we i stap stikim hem, maet hem i wan sik long bodi blong hem. Be God i no karemaot sik ya, hem i talem nomo long Pol se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.”​—2 Korin 12:​7-9.

Taswe, maet trabol we i stap mekem yumi safa, i no save finis kwiktaem. Long taem olsem, yumi gat janis blong pruvum se yumi dipen fulwan long Papa blong yumi long heven. (Jemes 1:​2-4) Yu mas sua se nating sipos Jeova God i no karemaot samting we i mekem yumi safa, be hem i save “mekem rod blong yumi, blong yumi winim samting ya.” (1 Korin 10:13) I gud blong makem se Baebol i singaot Jeova se “Hem i God we i stamba blong fasin blong givhan. Hem i stap givhan long mifala long olgeta trabol blong mifala, blong mekem mifala i harem gud.” (2 Korin 1:​3, 4) God i save givim samting we yumi nidim blong stanap strong, mo tu, yumi gat hop ya blong laef foreva.

Tok blong God, Baebol, i promes se Jeova “bambae i ravemaot wota blong ae blong [yumi]. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:​3, 4) ?I had long yu blong bilif se wan dei ol man bambae oli no moa safa? Maet i had long yu blong bilif long samting ya sipos yu yu wan we i bin safa plante long laef blong yu. Nating se i olsem, God nao i mekem promes se fasin fraet mo trabol bambae oli finis, mo stamba tingting ya blong hem i mas kamtru fulwan.​—Aesea 55:​10, 11.

[Tok blong pija long pej 9]

Naoia yumi safa be bambae yumi harem gud yet