Olsem Wanem Yumi Soem Se Yumi Lavem God

JES from we wan man i stadi long saed blong God, hemia i no min se man ya i lavem God. Ol man blong God raonabaot long wol oli save talem se, trufala lav long God i gru sloslo taem man i lan blong savegud ol fasin blong God. Lav ya i kam strong moa taem man i savegud ol samting we God i laekem, ol samting we hem i no laekem nating, ol samting we long lukluk blong hem i gud moa, mo ol samting we hem i wantem yumi blong mekem.

Wetem lav, Jeova i givim Tok blong hem, Baebol, long yumi, mo tru long Baebol, Jeova i soemaot hem long yumi. Baebol i tokbaot ol samting we Jeova i mekem blong givhan long ol man we oli fesem ol defdefren traem. Baebol i olsem wan leta we i kam long wan man we i laekem yumi tumas. Yes yumi kasem bigfala glad taem yumi lanem sam niufala samting long saed blong ol fasin blong Jeova long Baebol.

Be, olsem we yumi luk long wok blong prij samtaem, jes from we man i kasem save long God, hemia i no min se hem i lavem God. Sam man Jiu long taem blong Jisas, oli no gat fasin tangkiu nating long God, taswe Jisas i talem long olgeta se: ‘Yufala i stap luklukgud long ol tok blong Baebol, mo yufala i bilif se long ol tok blong hem, yufala i gat laef we i no save finis. Be . . . mi mi savegud yufala, mo mi save we yufala i no lavem God nating.’ (Jon 5:​39, 42) Sam man oli spenem plante yia blong stadi long saed blong Jeova mo ol samting we hem i mekem wetem lav, be oli no lavem hem tumas. ?From wanem? From we oli no tingting dip long ol samting we oli lanem mo mining blong hem. Defren nao, plante milian gudfala man we yumi stadi Baebol wetem olgeta, oli faenem se lav we oli gat long God i gohed blong gru moa. ?From wanem? Olsem yumi, olgeta ya oli folem eksampol blong Asaf. ?Olsem wanem oli folem eksampol blong hem?

Tingting Dip Wetem Fasin Tangkiu

Asaf i gat strong tingting blong wokem fasin ya blong lavem Jeova. Hem i raet se: “Mi stap tingting longtaem long ol samting ya . . . Hae God. Bambae mi mi stap tingbaot ol bigbigfala wok blong yu, mo  ol merikel ya we yu yu mekem bifo. Bambae mi stap tingting gud long olgeta bigbigfala wok ya blong yu.” (Ol Sam 77:​6, 11, 12) Lav we yumi gat long God i save gru moa, taem yumi tingting dip long ol wok blong Jeova, olsem man we i raetem Sam ya i mekem.

Antap long samting ya, i gud blong tingtingbak long ol gudfala ekspiriens we yumi kasem taem yumi mekem wok blong Jeova. Fasin ya i save mekem fasin fren we yumi gat wetem Jeova i kam strong moa. Aposol Pol i talem se yumi “stap joen wetem God blong mekem wok blong hem,” mo fasin fren we yumi save gat wetem ol narafala we oli mekem wok blong God i gud tumas. (1 Korin 3:9) Taem yumi soemaot se yumi lavem Jeova, yumi mekem hem i glad we i glad. (Ol Proveb 27:11) Biaen, taem yumi fesem sam traem, mo yumi askem Jeova blong halpem yumi mo lidim yumi, yumi save se hem i stap wetem yumi, mo lav ya we yumi gat long Jeova i kam dip moa.

Fasin fren bitwin tu man i save kam strong moa taem tufala i lan blong talemaot filing long tufala. Long sem fasin, taem yumi talem long Jeova from wanem yumi stap tru long hem, lav we yumi gat long Jeova i kam strong moa. Bambae yumi tingbaot ol tok blong Jisas se: “Yufala i mas lavem Hae God ya we i God blong yufala long olgeta hat blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala.” (Mak 12:30) ?Yumi save mekem wanem blong meksua se bambae yumi gohed blong lavem Jeova long olgeta hat blong yumi, long olgeta laef blong yumi, long olgeta tingting blong yumi, mo long olgeta paoa blong yumi?

Lavem Jeova Long Olgeta Hat Blong Yumi

Baebol i tokbaot hat, we samtaem i save minim ol fasin we oli stap dip insaed long yumi​—olsem ol samting we yumi wantem, ol tingting, mo ol filing blong yumi. Taswe, blong lavem Jeova long olgeta hat blong yumi i min se yumi wantem moa blong mekem God i glad i bitim eni narafala samting. (Ol Sam 86:11) Taem yumi wokem ol fasin we God i glad long olgeta, yumi soem se yumi lavem Hem. Yumi traehad blong folem eksampol blong God taem yumi ‘agens long ol rabis fasin mo yumi holemstrong ol gudfala fasin.’​—Rom 12:9.

Lav we yumi gat long God i gat paoa long ol filing we yumi gat long saed blong evri samting. Eksampol, tingbaot wok blong yumi blong winim mane. Maet yumi intres long wok blong yumi mo maet yumi bisi long hem, ?Be hemia i min se hat blong yumi i stap fulwan long wok ya? Nogat. From we yumi lavem Jeova wetem olgeta hat blong yumi, taswe wok olsem minista blong God hem i faswan wok long laef blong yumi. Yumi wantem mekem papa mama, hasban no waef, mo bos blong yumi i glad, be antap long samting ya, yumi soem se yumi lavem Jeova wetem olgeta hat blong yumi taem yumi traem moa blong mekem hem i glad. Yes, i stret we hem i stap fasples long hat blong yumi.​—Matiu 6:24; 10:37.

Lavem Jeova Wetem Olgeta Laef Blong Yumi

Taem Baebol i yusum tok ya “olgeta laef” hem i minim fulwan man, bodi blong hem wetem laef tu we i stap long hem. Taswe, blong lavem  Jeova wetem olgeta laef blong yumi, i min se yumi yusum laef blong yumi blong presem hem mo blong pruvum se yumi lavem hem.

I tru se, i gat plante narafala samting we yumi intres long hem, olsem blong lanem wan wok, blong wokem wan bisnes, no blong lukaot prapa famle blong yumi. Be nating se i olsem, yumi pruvum se yumi lavem Jeova wetem olgeta laef blong yumi, taem yumi mekem ol samting olsem we hem i wantem. Ol narafala samting oli mas stap long stret ples long laef blong yumi, olsem nao yumi save “lukaot kingdom mo stret fasin blong hem fastaem.” (Matiu 6:​33, NW ) Blong givim wosip long Jeova wetem olgeta laef i min se yumi mas gat strong tingting blong mekem wok blong hem. Yumi soem long Jeova se yumi lavem hem taem yumi gat strong tingting blong talemaot mesej blong Kingdom, taem yumi givim ol ansa long miting blong leftemap tingting blong narafala, no taem yumi halpem ol Kristin brata sista blong yumi. Long olgeta samting, yumi gohed blong “mekem ol samting we God i wantem.”​—Efesas 6:6.

Jisas i soemaot we hem i lavem God wetem olgeta laef blong hem taem hem i blokem ol samting we hem nomo i wantem. Hem i putum samting we God i wantem long fasples long laef blong hem mo samting we hem i wantem long seken ples. Jisas i singaot yumi blong folem eksampol blong hem. Hem i talem se: “Man we i wantem kam biaen long mi, hem i mas blokem ol samting we hem nomo i wantem, nao i mas karem [“pos,” NW ] blong hem, i biaen long mi.” (Matiu 16:​24, 25) Blong blokem ol samting we yumi nomo i wantem i min se yumi mas givim laef blong yumi i go long God. Yumi lavem God tumas, taswe yumi wantem se God i bos long laef blong yumi. Yumi olsem man Isrel ya, long taem blong Baebol, we i lavem masta blong hem tumas, i wantem wok slef blong hem oltaem long laef blong hem. (Dutronome 15:​16, 17) Taem yumi givim laef blong yumi i go long Jeova, yumi pruvum se yumi rili lavem hem.

Lavem Jeova Wetem Olgeta Tingting Blong Yumi

Blong lavem Jeova wetem olgeta tingting blong yumi i min se yumi traehad fulwan blong kasem save long ol fasin blong Jeova, ol stamba tingting blong hem, mo ol samting we hem i wantem yumi blong mekem. (Jon 17:3; Ol Wok 17:11) Yumi soemaot se yumi lavem Jeova taem yumi yusumgud tingting blong yumi blong halpem ol narafala blong lavem Jeova mo taem yumi traem kam gud moa long fasin blong tij. Aposol Pita i pulum yumi blong ‘mekem tingting blong yumi i rere blong yumi mekem wok.’ (1 Pita 1:13) Mo tu, yumi traehad blong intres long ol narafala, antap moa ol brata sista blong yumi we oli mekem wok blong God. Yumi save se olgeta oli gat ol problem, mo, taem i stret, yumi talem sam gudfala tok blong presem olgeta, mo, taem i gat nid, yumi talem sam tok blong leftemap tingting.

Yumi soem long Jeova se yumi lavem hem wetem olgeta tingting blong yumi taem yumi letem hem i lidim tingting blong yumi. Yumi traem mekem se tingting blong yumi i laenap wetem tingting blong Jeova. Taem yumi mekem disisen yumi tingbaot hem, mo yumi trastem se ol rod blong hem oli beswan blong folem. (Ol Proveb 3:​5, 6; Aesea 55:9; Filipae 2:​3-7) ?Be, taem yumi gohed blong soem se yumi lavem God, olsem wanem yumi save yusum paoa blong yumi?

Lavem Jeova Wetem Olgeta Paoa Blong Yumi

Plante yangfala long Kristin kongregesen oli yusum paoa blong olgeta blong presem Jeova. (Ol Proveb 20:29; Prija 12:1) Wan rod we plante oli yusum blong soem se oli lavem Jeova wetem olgeta paoa blong olgeta, i blong joen fultaem long wok blong prij, olsem ol paenia. Plante mama oli joen long wok blong prij taem ol pikinini oli stap long skul. Ol gudfala elda oli soem se oli lavem Jeova wetem olgeta paoa blong olgeta, taem oli lukaotgud long famle blong olgeta, be taem oli visitim ol brata sista tu. (2 Korin 12:15) Jeova i givim paoa long ol man we oli putum tingting blong olgeta i stap strong long hem. Nao oli save yusum paoa ya we oli gat blong presem hem, mo long rod ya oli soem se oli lavem hem.​—Aesea 40:29; Hibrus 6:​11, 12.

Sipos yumi gohed blong tekem taem blong tingting dip, lav we yumi gat long Jeova i save kam strong moa. Yumi tingbaot ol samting we Jeova i mekem finis blong givhan long yumi mo yumi tingbaot from wanem i stret nomo we yumi stap tru long hem. From we yumi kamaot long Adam, yumi sinman mo yumi no naf nating blong kasem ‘ol samting we God i rerem finis blong ol man we oli lavem hem.’ !Be yumi save soem se yumi lavem Jeova wetem olgeta hat, laef, tingting, mo paoa blong yumi! !I gud yumi gohed blong mekem olsemia!​—1 Korin 2:9.

[Tok blong pija long pej 20]

Yumi soemaot se yumi lavem God long ol samting we yumi mekem