Ol Olfala—Wan Impoten Haf Blong Kristin Kongregesen

“[Ol man we] oli stap oltaem long haos blong [Jeova] . . . oli gru gud olsem pamtri. . . . Oli strong olsem olgeta olfala tri we lif blong hem i stap grin oltaem mo i stap karem plante frut yet.”​—OL SAM 92:​13, 14.

1. ?Wanem tingting blong plante man long saed blong ol olfala?

 JEOVA i lavem ol gudfala man blong hem, wetem olgeta tu we oli olfala finis. Be ol man blong wol ya oli no gat semfala fasin ya. Evri yia long Yunaeted Stet, ol man oli mekem i nogud long samwe haf milian olfala, no oli livim olgeta we oli no lukaot nating long olgeta. Ol ripot we oli kam long ol narafala kantri tu oli soem se long evri ples blong wol ol man oli ting nating long ol olfala. ?From wanem? Wan grup i talem se samting ya i kamaot from “wan tingting we plante man oli gat . . . hemia se, ol olfala oli gud blong nating nomo, oli no moa save wok, mo oli dipen tumas long ol narafala.”

2. (a) ?Wanem tingting blong Jeova long saed blong ol olfala we oli stap tru long hem? (b) ?Wanem tok long Ol Sam 92:​12-15 we i mekem yumi haremgud tumas?

² Jeova God i lavem ol olfala we oli stap tru long hem. Hem i stap lukluk “ol fasin we oli stap insaed long yumi,” hemia ol samting long saed blong spirit. Hem i no tingbaot ol samting we yumi no moa naf blong mekem from we yumi sik no bodi blong yumi i no moa strong. (2 Korin 4:​16, NW ) Long Tok blong God, Baebol, yumi faenem wan promes we i mekem yumi haremgud tumas. Hem i se: “Ol man we fasin blong olgeta i stret oli stap oltaem long haos blong [Jeova]. Bambae oli gru gud olsem pamtri, bambae oli gru olsem ol sida ya long Lebanon. Oltaem oli stap kam strong moa, olsem ol tri we man i planem long gudfala graon, mo oli stap gru gud oltaem. Olgeta oli strong olsem olgeta olfala tri we lif blong hem i stap grin oltaem mo i stap karem plante frut yet. Hemia i soemaot we Hae God, fasin blong hem i stret gud olgeta.” (Ol Sam 92:​12-15) Sipos yumi stadi long ol vas ya, bambae yumi faenemaot sam impoten samting we ol olfala oli save mekem blong givhan long ol Kristin brata sista blong olgeta.

‘Ol Olfala Tri We i Karem Plante Frut Yet’

3. (a) ?Olsem wanem ol stret man oli olsem ol pamtri? (b) ?Olsem wanem ol olfala oli save stap olsem ‘ol olfala tri we i stap karem plante frut yet’?

³ Man we i raetem Sam 92, i talem se ol stret man oli olsem ol pamtri we ol man oli planem long “gudfala graon” long yad blong haos blong God. Ol stret man ya oli “strong olsem olgeta olfala tri we lif blong hem i stap grin oltaem mo i stap karem plante frut yet.” ?Vas ya i leftemap tingting blong yu? Long taem bifo, long ol ples we Baebol i tokbaot, long yad blong ol haos, i gat plante naesfala pamtri we oli gru stret i go antap. Oli luk naes, mo oli sas tu from we oli stap givim fulap frut. Sam tri oli karem frut blong bitim wan handred yia. * Sipos yu yu fasgud long trufala wosip, yu tu yu save gohed blong karem gudfala frut mo ‘mekem ol gudgudfala wok.’​—Kolosi 1:10.

4, 5. (a) ?Wanem impoten frut we ol Kristin oli mas karem? (b) Tokbaot sam olfala long Baebol we oli karem ‘frut blong maot blong olgeta.’

⁴ Jeova i wantem se ol Kristin oli karem ‘frut  blong maot blong olgeta,’ hemia se, yumi mas toktok blong presem hem mo blong talemaot ol stamba tingting blong hem. (Hibrus 13:​15, NW ) ?Tok ya i go long yufala ol olfala tu? Yes, i stretgud long yufala.

⁵ Baebol i tokbaot sam olfala we oli gat strong tingting blong talemaot nem blong Jeova mo ol stamba tingting blong hem. Tingbaot Moses. Taem Jeova i singaot Moses blong i kam wan profet mo talemaot ol tok blong Hem, Moses i bitim ‘seventi yia’ finis. (Ol Sam 90:10; Eksodas 4:​10-17) Profet Daniel tu i olfala, be samting ya i no blokem hem. Hem i givim wan gudfala witnes we i leftemap Jeova olsem king. Ating Daniel i bitim 90 yia taem Belsasa i singaot hem blong talemaot mining blong ol tok we wan han i raetem long wol blong haos blong hem. (Daniel, japta 5) ?Mo olsem wanem long olfala aposol Jon? Afta we hem i mekem wok blong Jeova blong plante yia, oli putum hem long kalabus long aelan blong Patmos, ‘from we hem i stap talemaot tok we God i talem, mo we Jisas i talemaot se i tru.’ (Revelesen 1:9) Ating yu save tingbaot plante moa olfala long Baebol we oli karem ‘frut blong maot blong olgeta.’​—1 Samuel 8:​1, 10; 12:2; 1 King 14:​4, 5; Luk 1:​7, 67-79; 2:​22-32.

6. ?Olsem wanem Jeova i stap yusum “ol olfala” blong talemaot ol tok blong hem long ol las dei ya?

⁶ Aposol Pita i talem tok blong Hibru profet ya Joel, i se: “God i talem se, ‘Long taem ya we Lasdei blong wol i kam klosap, mi bambae mi givim Spirit blong mi long olgeta man [wetem “ol olfala” tu], . . . nao bambae oli save talemaot ol tok we mi bambae mi givim long olgeta.’ ” (Ol Wok 2:​17, 18; Joel 2:28) Folem profet tok ya, long ol las dei ya, Jeova i stap yusum ol olfala we oli blong grup ya blong ol tabu man, mo ol olfala we oli blong grup ya blong “ol narafala sipsip,” blong oli talemaot ol tingting blong hem. (Jon 10:16) Sam long olgeta ya oli bin karem frut long wok blong Kingdom blong plante plante yia finis.

7. Givim wan eksampol blong soem se ol olfala oli save gohed blong karem frut long wok blong Kingdom nating se oli stap siksik.

⁷ Traem tingbaot Kristin woman ya Sonia, we long yia 1941, hem i stat talemaot Kingdom fultaem. Taem hem i kam olfala hem i stap siksik, be hem i gohed nomo blong mekem Baebol stadi long samfala we oli glad blong kam long haos blong hem. Sonia i talem se: “Wok blong talemaot gud nius, hem i haf blong laef blong mi. No, hem i laef blong mi. Mi mi no wantem ritae long wok ya.” I no longtaem i pas, Sonia mo sista blong hem Olive, tufala i stap wet blong luk dokta long hospital, nao oli mitim Janet. Janet i gat wan bigfala sik we hem i mas ded from, ale tufala i serem tok blong Baebol wetem hem long saed blong gudfala fiuja we God i promes blong givim long ol man. Mama blong Janet we hem i wan strong Katolik, hem i glad tumas long lav mo kaen fasin we tufala i soem long gel blong hem, nao hem i agri blong stadi Baebol. Woman ya i stap gohed gud long stadi blong hem. ?Olsem wanem long yu? ?Yu save tekem ol janis olsem blong karem frut long wok blong Kingdom?

8. ?Olsem wanem olfala Keleb i soem se hem i trastem Jeova, mo olsem wanem ol olfala Kristin tede oli save folem fasin blong hem?

⁸ Tru, ol olfala Kristin oli no save mekem plante wok olsem oli bin mekem taem oli yangfala. Be sipos oli gohed wetem strong tingting blong talemaot Kingdom, oli stap soemaot semfala fasin olsem gudfala man Isrel ya Keleb, we i stap 40 yia long draeples wetem Moses. Taem ol man Isrel oli krosem Jodan Reva blong go long Promes Lan, Keleb i gat 79 yia blong hem. Hem i bin faet wetem ol ami blong Isrel blong sikis yia, mo oli bin winim plante enemi blong olgeta. Hem i no gat tingting ya se hem i mekem naf wok finis, naoia i save spel. Nogat. Wetem strong tingting, hem i askem sipos hem i save go winim ‘ol bigfala taon we oli gat ol bigbigfala stonwol i goraon long olgeta.’ Ol taon ya oli stap antap long ol hil blong Juda, long ol ples we i gat ol bigbigfala larikenman i stap we oli laen blong Anak. Hemia i no wan isi wok we Keleb i wantem mekem. Be wetem  help blong Jeova, hem i “ronemaot olgeta, olsem we [Jeova] i talem.” (Josua 14:​9-14; 15:​13, 14) Yu, we yu olfala mo yu gohed yet blong karem frut long wok blong Kingdom, yu mas save se Jeova i stap wetem yu olsem we i bin stap wetem Keleb bifo. Mo sipos yu stap tru olwe long Jeova, bambae hem i givim wan ples long yu long niufala wol we hem i promes blong mekem.​—Aesea 40:​29-31; 2 Pita 3:13.

“Stap Karem Plante Frut Yet”

9, 10. ?Olsem wanem ol olfala Kristin oli save stap strong long bilif mo gat paoa long saed blong spirit? (Lukluk bokis long pej 13.)

⁹ Man blong raetem Sam 92 i makemgud se ol olfala man blong Jeova oli save karem frut long laef blong olgeta, hem i singsing se: “[Ol man we fasin blong olgeta i stret] bambae oli gru gud olsem pamtri, bambae oli gru olsem ol sida ya long Lebanon. Oltaem oli stap kam strong moa, olsem ol tri we man i planem long gudfala graon, mo oli stap gru gud oltaem. Olgeta oli strong olsem olgeta olfala tri we lif blong hem i stap grin oltaem mo i stap karem plante frut yet.”​—Ol Sam 92:​12, 14.

¹⁰ ?Olsem wanem yu save gat paoa yet long saed blong spirit, nating se yu stap kam olfala? Pamtri i stap naes oltaem sipos hem i stap klosap long wota. Yu tu yu save kasem paoa from ol trutok blong Baebol we oli olsem wota, taem yu stadi long Tok blong God mo taem yu joen wetem ol man blong hem. (Ol Sam 1:​1-3; Jeremaea 17:​7, 8) Ol wok we yu yu mekem yet long saed blong spirit i givhan bigwan long ol Kristin brata sista blong yu. Tingbaot olsem wanem samting ya i tru long saed blong olfala Hae Pris Jehoeada.

11, 12. (a) ?Wanem impoten wok we Jehoeada i mekem long kingdom blong Juda? (b) ?Olsem wanem Jehoeada i yusum paoa we hem i gat long Joas blong givhan long trufala wosip?

¹¹ Rabis Kwin Atalia i kilim i ded ol smol bubu blong hem, blong mekem se hem nao i save kam rula blong kantri ya Juda. Long taem ya, ating Jehoeada i gat bitim wan handred yia finis. ?Wanem samting we olfala Jehoeada i save mekem? Hem wetem woman blong hem tufala i haedem smol boe ya Joas, blong sikis yia long haos blong God. Boe ya i wan nomo long ol smol bubu blong kwin ya we i laef i stap, mo we i gat raet blong tekem jea blong king. Taem Joas i gat seven yia blong hem, Jehoeada i mekem wan bigfala samting. Hem i talemaot long fored blong olgeta man se Joas nao i king, mo hem i givim oda long ol man blong oli kilim Atalia i ded.​—2 Kronikel 22:​10-12; 23:​1-3, 15, 21.

¹² Jehoeada i stap lukaot long yangfala king ya, mo from samting ya, Jehoeada i gat paoa long hem. Ale, hem i yusum paoa ya blong givhan long trufala wosip. Hem i “mekem we King Joas mo olgeta man oli joen wetem hem blong mekem wan promes wetem Hae God, se hem bambae i God blong olgeta mo olgeta bambae oli man blong hem nomo.” Nao Jehoeada i givim oda long ol man blong oli brebrekemdaon haos wosip blong giaman god ya Bal, mo blong oli smasem ol olta mo ol aedol long ples ya, mo blong oli kilim pris blong god ya i ded. Mo tu, Jehoeada i pulum Joas blong putumap ol pris mo Livaet bakegen long wok blong olgeta, mo blong putum sam man blong mekem wok blong fiksimap haos blong God. “Mo oltaem long laef blong king ya [Joas], gogo hem i ded, hem i stap mekem ol samting we Hae God i glad long hem, from we Hae Pris ya Jehoeada i stap tijim hem.” (2 Kronikel 23:​11, 16-19; 24:​11-14; 2 King 12:2) Taem Jehoeada i gat 130 yia, hem i ded. Ol man oli soem bigfala ona long hem, oli berem hem long beregraon blong ol king, from we “hem i mekem ol gudgudfala wok long ol laen blong Isrel, mo long God mo long haos blong hem.”​—2 Kronikel 24:​15, 16.

13. ?Olsem wanem ol olfala Kristin oli save ‘mekem gudfala wok long God mo long haos blong hem’?

¹³ Maet yu no save mekem plante wok blong givhan long trufala wosip, from we yu sik tumas no from sam narafala samting long laef blong yu we oli stap blokem yu. Nating se i olsem, yu yu naf yet blong ‘mekem gudfala wok long God mo long haos blong hem.’ Yu save soemaot strong tingting long saed blong haos blong Jeova sipos yu go oltaem long ol miting mo givim ansa, mo sipos yu joen long wok blong prij olsem we yu naf blong mekem. Taem yu soem se yu glad blong folem ol advaes blong Baebol mo sapotem fulwan “slef ya we i stret mo waes” mo kongregesen, yu yu givhan blong mekem bilif blong ol Kristin brata sista i kam strong moa. (Matiu 24:​45-47, NW ) Mo tu, yu save givhan long ol brata sista ya blong oli kam strong “blong lavem ol man, mo blong mekem ol gudfala fasin.” (Hibrus 10:​24, 25; Filimon 8, 9) Bambae yu yu kam wan blesing long ol narafala sipos yu folem advaes ya blong aposol Pol se: “[Ol olfala] oli no mas dring tumas. Fasin blong olgeta i mas stret, mo oli  mas strong blong oli save blokem ol samting we olgeta nomo oli wantem. Bilif blong olgeta i mas stret gud [“laef,” An American Translation], mo oli mas lavem ol man, mo oli mas man blong holem wok gogo kasem en blong hem. Mo long sem fasin, . . . [ol olfala woman] oli mas mekem ol fasin we i stret, we i fasin blong ol woman we oli tabu, oli blong God. Bambae oli no mas tok nogud long nem blong narafala man, mo oli no mas woman blong drong. Oli mas soemaot ol stret fasin.”​—Taetas 2:​2-4.

14. ?Ol brata we oli wok longtaem finis olsem elda long kongregesen, oli save mekem wanem blong givhan long trufala wosip?

¹⁴ ?Yu yu bin wok olsem wan elda long kongregesen blong plante yia finis? Wan brata we hem i elda longtaem finis, hem i givim advaes ya: “Yu no mas holemtaet waes we yu kasem long ol yia we oli pas finis, yu mas serem waes ya wetem ol narafala. Yu no mas traem mekem evri wok, yu mas givim sam wok long ol narafala, mo serem ol save mo ekspiriens blong yu wetem olgeta we oli wantem lanem moa . . . Traem luksave wanem mak we narafala i naf blong kasem, ale givhan long hem blong kasem mak ya. Tingbaot fiuja, mo wok from.” (Dutronome 3:​27, 28) Taem yu yu rili intres long wok blong talemaot Kingdom we i stap kam antap oltaem, samting ya i stap givhangud long ol narafala Kristin raonabaot long yu.

Talemaot We ‘Fasin Blong Jeova i Stret Gud’

15. ?Olsem wanem ol olfala Kristin oli save talemaot “we Hae God, fasin blong hem i stret gud olgeta”?

¹⁵ Ol olfala man blong God oli glad blong mekem wok ya blong talemaot “we Hae God, fasin blong hem i stret gud olgeta.” Sipos yu yu wan olfala Kristin, ol tok blong yu mo ol samting we yu yu mekem, oli save soemaot long ol narafala se ‘i no gat wan samting nating long Jeova we i no stret. Oltaem hem i stap lukaot gud long yu.’ (Ol Sam 92:15) Pamtri i stap soemaot se Man we i Wokem hem i gat ol nambawan fasin, be wan tri i no save toktok. Jeova i givim blesing ya long yu blong tokbaot hem long ol man we oli stap kamkam naoia blong joen long trufala wosip. (Dutronome 32:7; Ol Sam 71:​17, 18; Joel 1:​2, 3) ?From wanem i impoten blong tokbaot Jeova?

16. ?Eksampol blong wanem man long Baebol i soem se i impoten blong talemaot ‘we fasin blong Jeova i stret gud’?

¹⁶ Taem Josua, we i lida blong Isrel, “i stap kam olfala tumas,” hem i “singaot olgeta man ya [blong Isrel] wetem ol elda, mo ol lida, mo ol jaj, mo ol haeman blong olgeta oli kam wanples,” nao hem i mekem olgeta oli tingbaot se Jeova i stret gud long ol fasin blong hem. Hem i se: “Olgeta promes ya blong [Jeova], hem i mekem oli kamtru evriwan, i no gat wan promes nating i stap we i no kamtru.” (Josua  23:​1, 2, 14) Ol tok ya i mekem tingting blong ol man Isrel i strong blong stap tru long God blong smoltaem. Be afta we Josua i ded, “olgeta we oli gruap biaen long [ol lida ya] . . . oli fogetemgud ol bigbigfala samting ya we [Jeova] i mekem long ol olfala blong olgeta bifo. Nao long taem ya, ol laen blong Isrel oli stat mekem ol samting nogud long fes blong Hae God, mo oli stat mekem wosip long ol pija blong god ya Bal.”​—Jajes 2:​8-11.

17. ?Jeova i mekem wanem long ol man blong hem long taem blong yumi?

¹⁷ I tru se ol man long Kristin kongregesen tede oli no dipen long toktok blong ol olfala man blong God blong pruvum se bilif blong olgeta i tru, no gat. Be bilif blong yumi long Jeova mo long ol promes blong hem i save kam strong moa, taem yumi harem ol storian blong ol olfala long saed blong “ol bigbigfala wok” we Jeova i mekem finis blong givhan long ol man blong hem long ol las dei ya. (Jajes 2:7; 2 Pita 1:​16-19) Sipos yu yu stap plante yia finis insaed long ogenaesesen blong Jeova, ating yu save tingtingbak long taem ya we i gat smol man nomo oli talemaot Kingdom long ples blong yu. Ating yu save rimemba wan taem we plante man oli agensem wok blong prij we yumi bin mekem. Long ol yia we i pas, yu yu luk finis olsem wanem Jeova i tekemaot plante trabol we ol man oli mekem blong blokem wok blong Kingdom, mo olsem wanem hem i mekem plante man oli joen long ogenaesesen blong hem “kwiktaem nomo.” (Aesea 54:17; 60:22) Yu yu luk finis olsem wanem trutok blong Baebol i kam klia moa, mo olsem wanem God i stretem sam samting blong mekem we ogenaesesen blong hem long wol i kamgud moa. (Ol Proveb 4:18; Aesea 60:17) ?Olsem wanem? ?Yu yu stap storian long ol narafala blong leftemap tingting blong olgeta long saed blong ol fasin ya blong Jeova we oli stretgud? !Sipos yu mekem olsem, yu save givim gudfala tingting long ol Kristin brata blong yu, mo halpem olgeta blong gat strong tingting blong gohed!

18. (a) Givim eksampol olsem wanem ol tok blong soem se ‘fasin blong Jeova i stret gud’ i save gohed blong givhan long narafala blong longtaem. (b) ?Yu save storian long samting we Jeova i mekem long yu wan we i soemaot se fasin blong hem i stret gud?

¹⁸ ?Olsem wanem long ol samting we Jeova i mekem finis long yu wan, blong soem se hem i lavem yu, i tingbaot yu, mo i lidim yu? (Ol Sam 37:25; Matiu 6:33; 1 Pita 5:7) Wan olfala sista we nem blong hem Martha, oltaem hem i talem tok ya blong leftemap tingting blong ol narafala: “Nomata wanem samting bambae i hapen, yu neva mas lego Jeova. Bambae hem i givhan long yu.” Advaes ya i gat bigfala paoa long Tolmina, wan Baebol stadi blong Martha we i tekem baptaes jes afta long yia 1960. Tolmina i talem se: “Taem man blong mi i ded, tingting blong mi i foldaon bigwan. Be tok blong Martha i mekem tingting blong mi i strong blong neva mestem wan miting. Mo i tru se Jeova i rili givhan long mi.” Tolmina i givim semfala advaes ya long plante Baebol stadi blong hem long ol yia we i pas. Yes, sipos yu talem ol tok we i leftemap tingting mo i talemaot ol fasin blong Jeova we oli stretgud, yu save bildimap bilif blong ol narafala Kristin.

 Jeova i Lavem Ol Olfala We Oli Stap Tru Long Hem

19, 20. (a) ?Wanem tingting blong Jeova long ol olfala man blong hem? (b) ?Bambae yumi tokbaot wanem long nekis stadi?

¹⁹ Tede, ol man blong wol ya oli no gat tangkiu, taswe oli no tinghae nating long ol olfala. (2 Timoti 3:​1, 2) Maet oli tingbaot ol olfala nomo from samting we oli bin mekem long ol yia we i pas. Yes, oli tingbaot samting we ol olfala oli mekem bifo, i no samting we oli stap mekem naoia. Be Baebol i defren olgeta, hem i se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.” (Hibrus 6:10) Tru ya, Jeova God i stap tingbaot ol wok we yu mekem finis from bilif blong yu. Be hem i tinghae long yu tu from ol samting we yu stap mekem yet long wok blong hem. Yes, hem i luk ol olfala we oli stap tru long hem olsem ol Kristin we oli stap karem frut, mo we oli strong long saed blong spirit, mo we oli gat paoa. Laef blong olgeta ya i soemaot gud we paoa blong Hem i stap mekem olgeta oli strong.​—Filipae 4:13.

²⁰ ?Wanem tingting blong yu long ol olfala Kristin brata sista blong yumi? ?Yu yu gat tingting olsem Jeova long saed blong olgeta ya? Sipos yes, bambae yu glad blong soem lav long olgeta. (1 Jon 3:18) Nekis stadi bambae i tokbaot sam samting we yumi save mekem blong soem lav long ol olfala mo givim samting we oli nidim.

[Futnot]

?Wanem Ansa Blong Yu?

• ?Olsem wanem ol olfala oli “karem plante frut”?

• ?Olsem wanem wok we ol olfala Kristin oli mekem long saed blong spirit i givhan bigwan long ol narafala?

• ?Olsem wanem ol olfala oli save talemaot ‘we fasin blong Hae God i stret gud olgeta’?

• ?From wanem Jeova i lavem ol man mo woman we oli mekem wok blong hem longtaem finis i kam?

[Kwestin]

[Bokis blong pija long pej 13]

?Olsem Wanem Bilif Blong Olgeta i Stap Strong?

?Wanem samting i givhan long ol olfala Kristin ya blong stap strong long saed blong bilif mo blong gat paoa long saed blong spirit? Hemia toktok blong sam long olgeta:

“Mi luk se i impoten tumas blong ridim ol vas long saed blong fasin fren blong yumi wetem Jeova. Klosap evri naet, mi talem baehat Sam 23 mo Sam 91.”​—Olive we i baptaes long 1930.

“Mi meksua se mi harem tok blong baptaes long evri asembli, mi lesingud long hem olsem we mi tu bambae mi baptaes. Samting ya i halpem mi bigwan blong stap tru long Jeova, from we i mekem se promes blong mi blong givim laef blong mi long Jeova i stap strong oltaem long tingting blong mi.”​—Harry we i baptaes long 1946.

“Mi faenem se i impoten blong prea evri dei. Oltaem mi askem long Jeova blong i givhan long mi, lukaotgud long mi, mo blesem mi. ‘Long olgeta samting we mi mi mekem, mi tingbaot hem oltaem.’ ” (Ol Proveb 3:​5, 6)​—Antônio we i baptaes long 1951.

“Taem mi lesin long olgeta we oli mekem wok blong Jeova plante yia finis mo oli stap gohed strong yet, samting ya i mekem tingting blong mi i strong blong stap tru long Jeova mo holemtaet bilif long hem.”​—Joan we i baptaes long 1954.

“Mi luk se i impoten blong no tinghae tumas long mi wan. Evri samting we mi mi gat i kamaot long God nomo. Tingting ya i mekem se mi lukluk i go long hem nomo blong kasem kakae long saed blong spirit we mi nidim blong stanap strong go kasem en.”​—Arlene we i baptaes long 1954.

[Tok blong pija long pej 11]

Ol olfala oli karem plante frut long wok blong Kingdom

[Tok blong pija long pej 14]

Wok we ol olfala oli mekem long saed blong spirit i givhan bigwan long ol narafala