Ol Nambawan Samting We Jeova i Wokem

“!Ol Reva, Yufala i Klaphan!”

SIPOS yu luk wan map blong wol, klosap evri ples bambae yu luk sam laen oli gokros long ol kantri. Ol laen ya oli gokros long ol flat ples, ol draeples, mo ol ples we i gat gras. Oli pastru long ol vali, ol bigbigfala hil, mo ol bus. (Habakuk 3:9) Ol laen ya, hemia ol reva, we oli olsem string blong laef blong wol blong yumi. Ol reva ya oli soemaot waes mo paoa blong Jeova, Man ya we i wokem evri samting. Taem yumi luklukgud long ol reva, yumi agri wetem ol tok blong man blong raetem Sam we i se: “!Ol reva, yufala i klaphan! !Ol hil, yufala i glad! . . . Yufala i kam long fes blong [Hae God], yufala i joen blong singsing.”​—Ol Sam 98:​8, 9. *

Ol reva oli gat wan impoten ples long histri blong man. Baebol i tokbaot fo bigfala reva we oli kamaot long wan reva we i stat long Iden. (Jenesis 2:​10-14) Wan long ol faswan nesen i stat long ol rij vali blong tufala reva ya Tigris mo Yufretes, long Medel Is. Populesen blong sam kantri i kam bigwan from we oli stap klosap long ol reva, olsem Hwang Reva long Jaena, tufala reva ya Ganges mo Indus long saot blong Esia, mo Nael Reva long Ijip.

Taswe oltaem yumi ol man yumi stap sapraes blong luk ol reva we oli gat paoa, oli givim laef, mo oli naes tumas. Nael reva long Ijip i longfala olsem klosap 6,670 kilometa. Reva we i bigwan moa long fulwol hemia Amason Reva long Saot Amerika. Sam reva oli mekem man i sapraes from we oli bigbigwan, be sam narafala reva oli naes tumas, olsem Tone Reva, wan smol reva blong Japan we i ron kwik.

?Wanem i mekem se ol reva oli ron? Paoa ya graviti. * Graviti nao i pulum wota long ol haeples i kamdaon. Samtaem, paoa ya i wokem ol bigbigfala wotafol we oli mekem fulap noes. Baebol i tokbaot nambawan wok ya i se: “Jeova. Ol reva oli kam antap, oli mekem bigfala noes, noes blong wota we i ron strong.”​—Ol Sam 93:​3, NW.

Jeova i askem long man ya Job se: “?Hu i mekem rod, blong ren i folem blong i kam folfoldaon long wol ya?” (Job 38:25) ?Yes, wota ya i kamaot long wea? Blong ansarem kwestin ya, yumi mas save long wan nambawan plan ya we wota i stap folem. Paoa blong san mo graviti, tufala i mekem wota i muf raon oltaem long wol. Taem wota i hot hem i stap kam antap olsem smok, nao hem i go long skae. Ale, smok ya i kam kolkol mo hem i hivap blong mekem ol klaod. Biaen, smok ya i foldaon i kambak long graon olsem sno no ren. Bighaf blong wota i stap long ol dipsi, ol lek, ol reva, ol sno mo aes antap long ol bigfala hil, mo aninit long graon.

Baebol i tokbaot nambawan plan ya blong wota i se: “Oltaem ol reva oli stap ron i godaon long solwota, be solwota i stap sem mak nomo, i no kam fulap we i bitim mak. Oltaem nomo, wota i stap gobak long ples we i kamaot long  hem fastaem, nao i folem rod blong hem, i stap ron i godaon bakegen.” (Prija 1:7) Jeova, God ya we i waes mo i gat lav, Hem nomo i save wokem wan plan olsemia. ?Nao nambawan plan ya i tijim yumi wanem samting long saed blong God? God i waes tumas mo hem i gat lav mo i keagud long yumi.​—Ol Sam 104:​13-15, 24, 25; Ol Proveb 3:​19, 20.

Nating se ol reva oli bigwan mo oli plante olsem wanem, be oli karem smol haf nomo blong olgeta freswota long wol. Nating se i olsem, ol reva oli impoten tumas blong mekem evri samting i laef. Buk ya Water i talem se: “Sipos ol man oli no gat wota mo oli no save bos long hem smol, ating plante samting we man i nidim long laef, nating se oli smol no bigwan, be bambae oli no save kasem. Ol reva oli impoten long laef blong ol man, taswe long histri, laef blong ol man i kamgud moa from traehad we oli mekem blong kasem wota mo bos long hem.”

Blong plante taosen yia, ol reva oli givim wota blong dring mo oli wotarem ol garen blong man. Graon we i stap klosap long ol reva i gud tumas blong mekem garen i gru. Baebol i tokbaot samting ya long wan blesing we i go long ol man blong wok blong Jeova, i se: “!Ol laen blong Isrel! . . . Ol haos tapolen blong yufala oli naes we i naes. Oli laenap gud, olsem ol longlongfala laen blong pamtri. Oli olsem ol garen we oli stap klosap long reva. Oli olsem ol tri ya alos we Hae God i planem olgeta. Oli olsem ol bigbigfala tri ya sida, we oli stap gru long saed blong wota.” (Namba 24:​5, 6) Ol reva oli givim laef long ol anamol olsem ol dakdak mo ol wael dog we yu luk long foto ya. Yes, moa yumi stadi long ol reva, moa yumi wantem talem tangkiu long Jeova from.

[Ol Futnot]

[Bokis/Foto blong pija long pej 8]

Iguaçú Falls, we i stap long boda bitwin Ajentina mo Brasil, hem i wan long ol wotafol we i bigwan moa long ol narafala wotafol long wol. Hem i bigwan olsem tri kilometa, stat long wan saed i go kasem narasaed. Hem i stap long wan bus we i hot oltaem, mo hem i kamaot long raonabaot 300 narafala smol wotafol. Long taem blong bigfala ren, samting olsem 10,000 tan blong wota i foldaon long wotafol ya evri seken.

[Tok blong pija long pej 9]

Tone Reva, Japan