Ol Nambawan Samting We Jeova i Wokem

‘Taem Blong Kolkol Mo Taem Blong Hot Bambae Oli No Save Lus’

LONG draeples, bigfala san i kilim ol man. Long sam narafala ples blong wol, san i mekem ol man oli womgud, afta we ples i kolkol blong longtaem. Yes, hot blong san i mekem se weta i no sem mak long evri ples blong wol, mo i mekem tu se i gat kol taem mo hot taem.

Taem blong kolkol mo taem blong hot oli no sem mak long evri ples blong wol. ?Be ol defdefren taem ya oli mekem wanem long yu? ?Yu yu glad taem yu luk ol tri we oli stat putum flaoa bakegen afta we kol taem i finis? ?Yu yu haremgud long ol naet blong hot taem we smosmol win i blu long skin blong yu? ?Yu yu laekem taem ya we ol lif oli folfoldaon mo kala blong olgeta i stap jenis?

?Wanem i mekem se i gat ol defdefren taem ya? Blong talem stret, fasin blong wol blong lei smol i mekem samting ya. Taem wol i tantanem hem i goraon long san, hem i no stanap stret, be i lei i go 23.5 digri long wan saed. Sipos wol i stanap stret nomo, bambae i no save gat hot taem mo kol taem. Weta bambae i sem mak oltaem nomo. Sipos i olsem, bambae garen i gru long defren fasin mo bambae i no gat stret taem blong ol defdefren kakae i gru.

Yumi luksave se God nao i mekem plan blong hot taem mo kol taem. Wan man blong raetem Ol Sam i toktok i go long Jeova God i se: “Yu makem ol ples we wol i go finis long hem, mo yu mekem kol taem mo hot taem.”​—Ol Sam 74:17. *

Yumi ol man long wol ya, yumi lukluk i go long san, mun mo ol sta blong makem ol defdefren taem. Taem God i wokem heven mo wol, hem i talem se: “I mas gat ol laet i stap long skae . . . Ol samting ya bambae oli blong makem ol dei, mo ol yia, mo ol taem blong [“kolkol mo hot,” NW ].” (Jenesis 1:14) Wol i tantanem hem i go long rod blong hem, gogo tu taem evri yia long 12 klok medel dei, san i stap stret antap long ekweta. Tufala taem ya oli kolem equinox. Long plante kantri, tufala dei ya i makem stat blong taem we ol tri oli putum flaoa mo stat blong taem we ol lif oli folfoldaon. Long tufala dei ya, ol aoa blong delaet mo ol aoa blong tudak klosap oli sem mak long olgeta ples blong wol.

Be ol defdefren taem oli no kamaot nomo from we ol planet oli mufmuv. Ol taem ya oli joen tu wetem win, ren, mo ol narafala samting long saed blong weta. Ol samting ya oli joengud long wan fasin we i givhan long ol laef samting long wol. Kristin aposol Pol wetem fren blong hem Banabas, tufala i toktok long ol man Esia Maena we plante long olgeta oli man blong wokem garen, ale tufala i talem se God nao i “stap mekem ren i foldaon, mo i stap mekem ol garen oli gat kakae long stret taem blong olgeta. Hem i stap givim kakae long yufala, mo hem i stap mekem yufala i harem gud.”​—Ol Wok 14:​14-17.

Nambawan fasin we oli kolem photosynthesis, hem nao i mekem se ol kakae i gru long graon mo ol smosmol gras i gru long solwota. Fasin ya i mekem se ren mo san i givhan long olgeta samting we oli wok tugeta blong mekem kakae i gru. Pol i talem se Jeova nomo i stamba blong samting ya i se: “Sipos i gat wan pis graon we i stap kasemgud ren, bambae hem i gat ol gudfala kakae i gru long hem, we i save givhan gud long ol man we graon ya i blong olgeta. Hemia i olsem we God i stap mekem i gud long graon ya.”​—Hibrus 6:7.

Tok ya “mekem i gud” i gat bigfala mining sipos yumi tingting smoltaem long samting we i stap hapen afta we koltaem i finis, ale ples i kam womgud, ol dei oli kam longfala moa, san i kam strong lelebet, mo i ren plante. Long taem olsem, ol tri oli putum flaoa, mo ol bebet we oli haed long koltaem oli kamkamaot, nao oli rere blong mekem wok ya blong maredem ol flaoa. Ol pijin olsem blue jay we yu luk long  pija ya, oli mekem se bus i fulap long ol defdefren kala mo singsing, olsem we ples i laef bakegen. Ol laef samting oli wok hareap, nao ol smosmol flaoa oli kamkamaot, ol tri oli putum ol niufala lif, mo evri samting i grugud. (Sing blong Solomon 2:​12, 13) Oli mekem wok blong olgeta, nao klosap long en blong hot taem no long taem we ol lif oli folfoldaon, kakae i rere.​—Eksodas 23:16.

Yumi luk olsem wanem ol wok blong Jeova oli nambawan taem yumi tingting gud long fasin blong wol ya blong lei i go long wan saed, we i mekem dei mo naet, i mekem hot taem mo kol taem, mo i makem stret taem blong planem kakae mo karem kakae long garen. Yumi save se evri yia hot taem bambae i kam biaen long kol taem. God nao i promes se: “Long wol ya, i gat taem blong planem garen, mo i gat taem blong tekemaot kakae long hem. I gat taem blong kolkol, mo i gat taem blong hot. I gat taem blong lif i folfoldaon, mo i gat taem blong lif i gru bakegen. I gat taem blong dei, mo i gat taem blong naet. Mo ol samting ya, bambae oli no save lus.”​—Jenesis 8:22.

[Futnot]

[Bokis blong pija long pej 9]

Satelaet We Ol Laef Samting Oli Nidim

Long ol yia we oli pas, mun i pulum tingting blong ol man mo i mekem olgeta oli sapraes. ?Be yu yu save se mun i stap givhan blong jenisim ol taem tu? Mun i givhan blong mekem se wol i no lei tumas. Wan man blong raetem ol buk blong sayens, Andrew Hill, i talem se wok ya we mun i mekem “i impoten tumas blong mekem se Wol ya i stret blong sapotem ol laef samting.” Sipos bigfala satelaet ya mun i no stap blong mekem se wol i lei long fasin we i stretgud, wol bambae i kam hot tumas mo ating bambae i no save gat ol laef samting long wol. Taswe, wan grup blong ol man blong stadi long ol sta oli talem se: “Yumi save talem se Mun i mekem we weta i no jenis bitim mak long Wol.”​—Ol Sam 104:19.

[Credit Line]

Moon: U.S. Fish & Wildlife Service, Washington, D.C./Bart O’Gara

[Tok blong pija long pej 9]

Ol kamel, Not Afrika, mo Poen blong Arebia