Jeova​—Strong Wajhaos Blong Yumi Long Taem Blong Trabol

“Oltaem Hae God i stap sevem ol stret man, i stap lukaot gud long olgeta long taem blong trabol.”​—OL SAM 37:39.

1, 2. (a) ?Taem Jisas i prea from ol disaepol blong hem, hem i askem wanem? (b) ?God i wantem wanem long saed blong ol man blong hem?

 JEOVA i gat olgeta paoa. Hem i gat paoa blong protektem ol man blong hem long eni rod we hem i wantem. Sipos hem i wantem, hem i save karemaot ol man blong hem long wol ya mo putum olgeta long wan ples we i sef mo we i gat pis long hem. Nating se i olsem, taem Jisas i prea from ol disaepol blong hem, hem i talem long Papa blong hem long heven se: “Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef.”​—Jon 17:15.

² Jeova i jus blong no ‘tekemaot yumi long wol ya.’ Hem i wantem we yumi laef wetem ol narafala man long wol ya blong bambae yumi save talemaot mesej blong hem we i givim hop mo we i mekem man i harem gud. (Rom 10:​13-15) Be, olsem Jisas i talem long prea blong hem, taem yumi laef long wol ya, yumi stap kasem trabol from “man nogud ya, Setan.” Ol man we oli no wantem obei long God, mo ol rabis enjel oli mekem wol ya i fulap long trabol mo soa, mo ol Kristin tu oli stap harem nogud from ol trabol ya.​—1 Pita 5:9.

3. ?Nating se man i stap tru long Jeova be hem i save fesem wanem? ?Wanem tok blong Baebol we i save leftemap tingting blong yumi?

³ Taem yumi kasem ol traem olsem, yumi no sapraes sipos tingting blong yumi i foldaon. (Ol Proveb 24:10) Long Baebol i gat plante stori blong ol gudfala man we oli kasem trabol. Man ya blong raetem Sam i talem se: “Man we i stret i save harem nogud long plante trabol, be Hae God i save tekemaot hem long olgeta trabol ya.” (Ol Sam 34:19) Yes, ol samting nogud oli stap kasem “man we i stret.” Samtaem maet yumi harem olsem Deved we i raetem Sam ya se, “Mi mi slak we mi slak we mi flat olgeta, tingting blong mi i trabol.” (Ol Sam 38:8) Nating se i olsem, yumi save harem gud sipos yumi tingbaot se “[Jeova] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.”​—Ol Sam 34:18; 94:19.

4, 5. (a) ?Folem ol tok blong Ol Proveb 18:​10, yumi mas mekem wanem sipos yumi wantem we God i protektem yumi? (b) ?Wanem trifala rod we yumi save folem blong kasem help blong God?

 ⁴ Yumi mas bilif fulwan se Jeova i stap rere oltaem blong givhan long yumi, olsem we Jisas i talem long prea blong hem. Yes, Jeova i ‘stap lukaot gud long yumi long taem blong trabol.’ (Ol Sam 37:39) Buk blong Ol Proveb i talem samting we i klosap sem mak taem i se: “Hae God i olsem wan strong wajhaos, we ol stret man oli stap go haed long hem.” (Ol Proveb 18:10) Vas ya i soemaot wan stamba trutok long saed blong filing we Jeova i gat long ol man we hem i wokem. God i rere blong protektem ol stret man ya we oli lukaot hem, i olsem we oli save ron i go haed long wan wajhaos.

⁵ ?Taem yumi kasem trabol, olsem wanem yumi save ron i go long Jeova blong hem i protektem yumi? I gud yumi tingbaot tri impoten rod we yumi save folem blong kasem help blong Jeova. Fastaem, yumi mas prea long Papa blong yumi long heven. Seken samting, yumi mas wok folem wanem we tabu spirit i soem. Mo namba tri samting, yumi mas folem ol plan we Jeova i stanemap finis olsem, taem yumi joen wetem ol Kristin brata sista we oli save givhan long yumi long trabol we yumi fesem.

Paoa Blong Prea

6. ?Wanem tingting we ol Kristin oli gat long saed blong prea?

⁶ Sam man we oli givim advaes long saed blong helt oli talem se prea i save givhan long man we tingting blong hem i foldaon no we i tingting tumas. I tru se taem man i tingting tumas, prea i wan kwaet taem we tingting i save spel mo haremgud. Hemia i sem mak olsem sipos man i go long wan kwaet ples klosap long reva, no nara ples olsem blong mekem tingting blong hem i spel smol. Be, ol trufala Kristin oli no tingbaot prea olsem wan tul no wan meresin we oli yusum nomo blong mekem oli harem gud. Nogat. Yumi mas tingbaot prea olsem wan rod blong toktok wetem bigfala respek long God ya we i Wokem yumi. Prea i soem se yumi fasgud long God mo yumi trastem hem. Yes, prea hemia wan pat blong wosip blong yumi.

7. ?I minim wanem se yumi mas trastem Jeova taem yumi prea, mo olsem wanem ol prea oli halpem yumi long taem blong trabol?

⁷ Taem yumi prea yumi mas trastem Jeova tu. Aposol Jon i raetem se: “Yumi save trastem hem, se nomata wanem samting yumi askem long hem, i stret long ol samting we hem i wantem, be hem i save harem yumi.” (1 Jon 5:​14, NW ) Jeova i Hae Olgeta, hem nomo i trufala God ya we i gat olgeta paoa, be hem i lesingud long ol prea we oli kamaot long hat blong ol man blong hem. Taem yumi save se God we i lavem yumi i stap lesin long ol wari mo trabol blong yumi, hemia nomo i naf blong mekem yumi harem gud.​—Filipae 4:6.

8. ?From wanem ol Kristin we oli holem bilif oli neva mas sem no ting se oli nogud taem oli prea long Jeova?

⁸ Ol Kristin we oli holem bilif oli no mas sem mo ting se oli nogud, no harem se maet Jeova bambae i no lesin taem oli prea long hem. Tru ya, taem yumi harem nogud from wan mastik we yumi bin mekem, no taem ol trabol oli mekem yumi slak, maet yumi harem se i had blong prea long Jeova. Long ol taem olsemia yumi mas tingbaot se Jeova ‘i gat sore long olgeta we oli stap harem nogud tumas’ mo i stap “leftemap tingting blong man we i stap harem  nogud.” (Aesea 49:13; 2 Korin 7:6) Taem yumi gat ol wari mo trabol, long taem ya nao i impoten tumas blong prea long Papa blong yumi long heven mo trastem hem olsem wan wajhaos we yumi save go haed long hem.

9. ?Olsem wanem bilif i impoten tumas taem yumi prea long God?

⁹ Blong kasem blesing from janis ya we yumi gat blong toktok wetem God, yumi mas gat bilif. Baebol i talem se “sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) Bilif i no minim nomo se yumi save se “God i stap” samples. Trufala bilif i minim se yumi sua fulwan se God i naf mo i wantem tu blong blesem traehad we yumi mekem blong obei long hem. “[Jeova] i stap lukluk long ol stret man, mo i stap lesin blong harem ol prea blong olgeta.” (1 Pita 3:12) Sipos yumi tingbaot oltaem se Jeova i lavem yumi mo i kea long yumi, samting ya i save mekem yumi harem se ol prea blong yumi oli no blong nating.

10. ?Ol prea blong yumi oli mas olsem wanem sipos yumi wantem we Jeova i givhan long yumi?

¹⁰ Jeova i lesin long ol prea blong yumi taem oli kamaot long hat blong yumi. Man blong raetem Sam i talem se: “Hae God. Mi mi stap krae long yu long olgeta tingting blong mi. Plis yu harem krae blong mi.” (Ol Sam 119:145) Ol prea blong yumi oli no mas olsem prea blong plante skul we oli lanem baehat, yumi no mas ripitim sem samting oltaem mo yumi no mas mekem prea wetem tu tingting. Taem yumi prea long Jeova wetem “olgeta tingting” no hat blong yumi, ol toktok blong yumi oli gat mining mo i gat risen biaen long olgeta. Taem yumi prea olsem, yumi harem we tingting blong yumi i kam kwaet from we yumi putum ‘ol trabol blong yumi long Jeova.’ Nao, olsem Baebol i promes, ‘hem bambae i blokem yumi, i sevem yumi.’​—Ol Sam 55:22; 1 Pita 5:​6, 7.

Spirit Blong God i Givhan Long Yumi

11. ?Olsem wanem Jeova i ansa long yumi taem yumi “gohed blong askem” hem blong halpem yumi?

¹¹ Jeova i stap Harem ol prea mo hem i stap Ansa tu long ol prea blong yumi. (Ol Sam 65:2) Deved i raetem se: “Oltaem, taem mi mi stap long trabol, mi stap singaot long yu, from we mi save se yu yu stap ansa long ol prea blong mi.” (Ol Sam 86:7) Taswe, Jisas i pulum ol disaepol blong hem blong oli “gohed blong askem” Jeova blong i halpem olgeta from we ‘Papa blong yumi long heven’ bambae i ‘givim tabu spirit long ol man we oli askem long hem.’ (Luk 11:​9-13) Yes, paoa blong God i save givhan mo leftemap tingting blong ol man blong God.​—Jon 14:16.

12. ?Olsem wanem spirit blong God i save halpem yumi taem yumi harem se trabol blong yumi i bigwan tumas?

¹² Taem yumi kasem traem tu, spirit blong God i save givim ‘paoa we i bigwan tumas’ i bitim paoa blong yumi. (2 Korin 4:7) Aposol Pol, we i stanap strong tru long plante hadtaem, i talem se: “Mi mi naf blong mekem evri samting long paoa blong Hemia we i stap givim paoa long mi.” (Filipae 4:​13, NW ) Tede, plante Kristin oli harem se long tingting mo filing blong olgeta oli kam strong bakegen afta we oli bin askem help long God tru long prea. Plante taem, ol trabol we oli mekem yumi harem nogud oli no moa bigwan tumas afta we yumi kasem tabu spirit blong God. From we yumi kasem paoa ya long God yumi save talem sem toktok ya we aposol Pol i talem se: “Plante taem, mifala i gat trabol, be neva tingting blong mifala i foldaon. Sam taem, mifala i no save rod, be neva mifala i lus olgeta. Nating we ol man oli stap ronem mifala, be oltaem mifala i gat ol fren we oli stap givhan long mifala. Ol man oli stap kilim mifala, be neva mifala i ded olgeta.”​—2 Korin 4:​8, 9.

13, 14. (a) ?Olsem wanem Jeova i yusum Tok blong hem blong stap olsem wan wajhaos? (b) ?Olsem wanem ol rul blong Baebol oli bin halpem yu long laef blong yu?

¹³ Tabu spirit nao i pulum ol man blong raetem Baebol mo i mekem we toktok blong Baebol i stap gud kasem tede blong givhan long yumi. ?Olsem wanem Jeova i yusum Tok blong hem blong stap olsem wan wajhaos long taem blong trabol? Wan rod hemia taem hem i givim waes long yumi mo i givhan long yumi blong luksave mining blong ol samting we oli had. (Ol Proveb 3:​21-24) Baebol i trenem tingting blong yumi mo i mekem yumi naf blong skelem ol samting. (Rom 12:​1, NW ) Taem yumi ridim mo stadi long Tok blong God oltaem, mo yumi yusum samting we yumi lanem, yumi save kam “naf blong jusumaot wanem fasin i gud mo wanem fasin i nogud.” (Hibrus 5:14) Ating yu yu harem save finis long laef blong yu, se ol rul blong Baebol oli givhan long yu blong mekem disisen we i waes taem yu fesem sam hadtaem long laef. Baebol i save mekem yumi naf blong skelem samting kwiktaem mo i save halpem yumi blong faenem rod blong dil wetem ol trabol we oli mekem yumi harem nogud.​—Ol Proveb 1:4.

 ¹⁴ Tok blong God i givim paoa long yumi long wan narafala rod, hemia taem hem i givim hop long yumi se yumi save kasem laef. (Rom 15:​4, NW ) Baebol i talem se ol trabol bambae oli no save stap olwe. Nomata wanem trabol we i stap mekem yumi harem nogud, be trabol ya i blong smoltaem nomo. (2 Korin 4:​16-18) Yumi save ‘putum tingting blong yumi i stap long laef ya we i no save finis, we bifo olgeta, taem we wol ya i no stap yet, God ya we i no save giaman, hem i promes finis blong givim.’ (Taetas 1:2) Sipos yumi stap harem gud long hop ya, mo yumi tingbaot oltaem nambawan fiuja we Jeova i promes blong givim, ale bambae yumi save stanap strong long taem blong trabol.​—Rom 12:12; 1 Tesalonaeka 1:3.

Kongregesen​—Wan Pruf Blong Lav We God i Gat Long Yumi

15. ?Olsem wanem ol Kristin oli save givgivhan long olgeta?

¹⁵ Wan narafala samting we Jeova i givim long yumi blong halpem yumi long taem blong trabol, hemia ol brata sista blong yumi insaed long Kristin kongregesen. Baebol i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Ol Proveb 17:​17, NW ) Tok blong God i leftemap tingting blong evriwan insaed long kongregesen blong oli soem ona mo oli lavlavem olgeta. (Rom 12:10) Aposol Pol i raetem se: “I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu we oli stap raonabaot long yumi.” (1 Korin 10:24) Sipos yumi gat tingting olsem, bambae yumi save lukaot nid blong narafala i bitim we yumi stap tingting tumas long trabol blong yumi wan. Taem yumi rere blong givhan long ol narafala, yumi mekem i gud long olgeta be tu, samting ya i mekem yumi glad mo yumi haremgud, ale i save mekem we trabol blong yumi wan i no hevi tumas.​—Ol Wok 20:35.

16. ?Olsem wanem olgeta Kristin wanwan oli save leftemap tingting blong narafala?

¹⁶ Ol man mo woman we oli strong long saed blong spirit oli ol faswan we oli gat wok ya blong mekem ol narafala oli strong. Blong mekem samting ya, oli mas gat fasin we i mekem se ol narafala oli no fraet blong kam askem help long olgeta mo oli mas rere oltaem tu blong givhan. (2 Korin 6:​11-13) Kongregesen i kasem blesing taem evriwan oli tektaem blong givim gudfala toktok blong leftemap tingting blong ol yangfala, taem evriwan oli traem givhan long ol niuwan, mo taem evriwan oli traem leftemap tingting blong olgeta we oli stap long trabol. (Rom 15:7) Lav we yumi gat bitwin long yumi bambae i halpem yumi blong no gat rong tingting long narafala. Taem yumi luk se sam long yumi oli fesem hadtaem no trabol, yumi no mas hareap blong talem se oli kasem trabol ya from we oli slak long saed blong spirit. Pol i talem long ol Kristin se oli mas “toktok gud blong leftemap tingting blong olgeta we oli harem nogud oltaem from we tingting blong olgeta i foldaon.” (1 Tesalonaeka 5:​14, NW ) Baebol i soem se ol Kristin we oli bin stanap strong longtaem, olgeta tu oli stap kasem trabol.​—Ol Wok 14:15.

17. ?Yumi gat wanem janis blong frengud mo joengud moa wetem ol Kristin brata sista blong yumi?

¹⁷ Ol Kristin miting blong yumi oli givim nambawan janis long yumi blong mekem yumi harem gud  mo blong lefleftemap tingting blong yumi. (Hibrus 10:​24, 25) Be i no long ol miting blong kongregesen nomo we yumi save harem gud long kampani blong ol brata sista blong yumi. Ol man blong God oli lukaot rod tu blong kam tugeta long ol narafala taem, maet blong kakae tugeta no storian tugeta. Sipos yumi stat naoia blong gat ol fren insaed long kongregesen mo blong joengud wanples, ale bambae yumi rere moa blong givgivhan long yumi taem trabol i kamaot. Aposol Pol i raetem se: “Ol haf blong bodi blong yumi oli no save seraot. Evri haf blong bodi oli mas lukaot gud blong givhan long ol narafala haf blong hem. Sipos wan haf blong bodi blong mi i harem nogud, be bambae olgeta bodi blong mi i mas harem nogud. Sipos man i presem wan haf blong bodi blong mi, be bambae olgeta bodi blong mi i mas haremgud.”​—1 Korin 12:​25, 26.

18. ?Wanem samting we yumi mas lukaot long hem taem yumi harem nogud?

¹⁸ Samtaem maet tingting blong yumi i foldaon ale yumi no glad blong kampani wetem ol Kristin brata sista blong yumi. Yumi mas faet strong agensem ol filing olsem, from we oli save blokem yumi blong no kasem help we yumi nidim blong harem gud bakegen, we help ya yumi save kasem long ol brata mo sista blong yumi. Baebol i givim woning ya se: “Hemia we i stap hem wan oltaem bambae i tingbaot hem wan nomo; bambae hem i agens long ol waes ya we i save wok.” (Ol Proveb 18:​1, NW ) Ol brata mo sista oli wan pruf se God i kea long yumi. Sipos yumi luksave se God i givim olgeta ya from we hem i lavem yumi, ale bambae yumi save faenem rod blong haremgud long taem blong trabol.

Holem Tingting i Stap Long Samting We i Gud Oltaem

19, 20. ?Olsem wanem Baebol i halpem yumi blong holem tingting i stap long samting we i gud oltaem?

¹⁹ Taem tingting i foldaon mo yumi no hapi, i isi nomo blong tingbaot ol trabol nomo. Sam long yumi oli kasem trabol, ale, oli stat tingting se maet oli slak long saed blong spirit mo oli kasem trabol ya from we God i no moa glad long olgeta. Be tingbaot se Jeova i neva traem man wetem “samting nogud.” (Jemes 1:13) Baebol i talem se: “[Jeova] i no glad nating . . . we yumi stap long trabol, yumi stap harem nogud.” (Ol Krae 3:33) Defren olgeta, Jeova i sore bigwan taem hem i luk we ol man blong hem oli stap safa.​—Aesea 63:​8, 9; Sekaraea 2:8.

²⁰ Jeova hem i “Papa blong yumi we i gat sore, hem i God we i stamba blong fasin blong givhan.” (2 Korin 1:3) Hem i tingbaot yumi, mo long stret taem blong hem bambae hem i leftemap yumi. (1 Pita 5:​6, 7) Sipos yumi tingbaot oltaem se God i laekem yumi, samting ya i save halpem yumi blong holem tingting i stap long samting we i gud oltaem, mo blong glad tu. Jemes i raetem se: “Ol brata mo sista. Taem plante samting oli stap kam blong traem yufala, bambae yufala i save luk olgeta olsem samting blong harem gud.” (Jemes 1:2) ?From wanem? Hem i ansa se: “From we taem hem i winim ol samting ya we oli kam blong traem hem, God bambae i flasem hem olsem we oli flasem man we i win long faet. Mo praes we God bambae i givim long hem, hemia laef ya we hem i promes finis blong givim long olgeta we oli lavem hem.”​—Jemes 1:12.

21. ?Nomata wanem trabol i kasem yumi, yumi sua se God bambae i mekem wanem long olgeta we oli stap tru long hem?

²¹ Jisas i talemaot finis se long wol ya bambae yumi stap kasem trabol. (Jon 16:33) Be Baebol i mekem promes se nating sipos yumi gat “trabol, no yumi gat hadtaem, no ol man oli stap spolem yumi, oli stap mekem i nogud tumas long yumi, . . . maet yumi hanggri, no yumi puaman, no klosap yumi lusum laef blong yumi,” be ol samting ya bambae oli no save tekemaot yumi long lav we Jeova mo Pikinini blong hem, tufala i gat long yumi. (Rom 8:​35, 39) !I gud tumas blong save se enikaen hadtaem we yumi kasem tede i blong smoltaem nomo! Be bifo long taem ya we bambae man i no moa safa, gudfala Papa blong yumi, Jeova, bambae i stap lukaot long yumi. Sipos yumi ron i go long hem blong haed, bambae hem i ‘sefples blong yumi taem ol man oli stap spolem yumi mo i ples blong haed blong yumi long taem blong trabol.’​—Ol Sam 9:9.

?Yumi Lanem Wanem?

• ?Ol Kristin we oli laef long rabis wol blong naoia oli no mas sapraes long wanem samting?

• ?Olsem wanem ol prea we oli kamaot long hat blong yumi oli save mekem yumi strong taem yumi kasem trabol?

• ?Olsem wanem tabu spirit blong God i save givhan long yumi?

• ?Yumi save mekem wanem blong yumi givgivhan long yumi?

[Kwestin]

[Tok blong pija long pej 18]

Yumi mas lukaotem Jeova olsem we yumi ron i go haed long wan wajhaos

[Tok blong pija long pej 20]

Olgeta we oli bigman long saed blong spirit oli mas yusum evri janis we oli gat blong talem gudfala toktok mo leftemap tingting blong narafala