Lodsprea Hem i Gat Mining Long Laef Blong Yu

LODSPREA we Jisas i talem long Bigfala Toktok blong hem antap long Hil, i stap long buk blong Matiu japta 6, vas 9 kasem 13. Jes bifo we Jisas i talem prea ya, hem i talem se: “Taem yufala i prea, i nogud yufala i stap talem plante toktok olsem we ol hiten man oli stap mekem. Ol man ya oli ting se ol god blong olgeta oli save harem olgeta from we oli talem plante toktok.”​—Matiu 6:7.

Taswe i klia we Jisas i no wantem se ol disaepol blong hem oli stap talem evri toktok blong Lodsprea baehat. I tru se biaen, hem i talem prea ya bakegen long sam narafala man we oli kam lesin long hem. (Luk 11:​2-4) Be sipos yu skelem tufala buk blong Matiu mo Luk, yu luk se ol toktok blong prea ya oli defren lelebet. Mo tu, ol prea we Jisas mo ol disaepol blong hem oli mekem biaen oli no yusum stret ol wanwan tok blong prea ya we Jisas i givim olsem wan eksampol.

?From wanem oli raetemdaon Lodsprea long Baebol? Lodsprea ya hem i wan eksampol we Jisas i givim blong tijim yumi blong mekem prea we God i glad blong harem. Mo long prea ya, yumi faenem sam ansa long ol stamba kwestin we yumi gat long saed blong laef blong yumi. Taswe, i gud yumi lukluk gud long ol wanwan haf blong Lodsprea.

?Wanem Nem Blong God?

“Papa blong mifala. Yu yu stap long heven. Nem blong yu i tabu.” (Matiu 6:9) Fastok blong Lodsprea ya i halpem yumi blong kam klosap long God, taem yumi singaot hem se ‘Papa blong yumi.’ Sem mak olsem wan pikinini we i laekem blong kam klosap long wan papa we i lavem hem mo i kasem save ol filing blong hem, yumi sua se taem yumi wantem toktok wetem Papa blong yumi long heven, hem i glad blong lesin long yumi. King Deved i singsing se: “Oltaem, yu yu stap ansa long ol prea blong mifala. Olgeta man long evri ples bambae oli mas kam long yu.”​—Ol Sam 65:2.

Jisas i tijim yumi se taem yumi prea, yumi wantem leftemap nem blong God from we nem blong hem i tabu. ?Be wanem nem blong God? Baebol i talem se: “Plis yu mekem olgeta oli save se yu, we nem blong yu Jeova, yu nomo yu Hae God long olgeta ples long wol.” (Ol Sam 83:​18, NW ) ?Yu yu luk finis nem ya Jeova long Baebol blong yu? Long Baebol  long Bislama, nem ya i stap long wan futnot long Eksodas 3:14.

Nem blong God, Jeova, i kamaot klosap 7,000 taem long ol olfala hanraet blong Baebol. Be sam man we oli tanem Baebol long narafala lanwis oli karemaot nem blong God long Baebol blong olgeta. Taswe, i stret nomo we yumi prea blong leftemap tabu nem blong God we i wokem yumi. (Esikel 36:23) Wan rod blong mekem ol tok blong prea ya i wok long laef blong yumi, hemia blong talem nem ya Jeova taem yumi prea long God.

Wan woman we nem blong hem Patricia, i gruap olsem wan Katolik, mo hem i savegud Lodsprea. ?Hem i mekem wanem taem wan Witnes blong Jeova i soem long hem, nem blong God long Baebol? Patricia i talem se: “!Mi mi sapraes bigwan! Taswe mi jekemap samting ya long prapa Baebol blong mi, mo mi luk se nem ya i stap tu. Afta, Witnes ya i tekem vas blong Matiu 6:​9, 10 mo i eksplenem long mi se Lodsprea i tokbaot nem blong God. Mi glad tumas mo mi askem hem blong stadi long Baebol wetem mi.”

Ol Samting We God i Wantem Oli Kamaot Long Wol

“Mifala i wantem we . . . yu yu kam King blong olgeta man, mo we olgeta man long wol oli mekem ol samting we yu yu wantem, olsem we olgeta long heven oli stap mekem.” (Matiu 6:​9, 10) ?Haf ya blong prea blong Jisas i mas kamtru olsem wanem? Plante man oli tingbaot heven olsem wan ples we i kwaet mo i gat pis long hem. Baebol i talem se Jeova i ‘stap long heven, ples ya we i tabu we i tabu mo we i hae we i hae.’ (Aesea 63:15) !Taswe yumi no sapraes we long Lodsprea, yumi askem God blong hem i mekem ol samting we hem i wantem oli kamaot long wol, olsem we oli kamaot finis “long heven”! ?Be samting ya bambae i save kamtru?

Daniel, wan profet blong Jeova, i mekem profet tok ya se: “Nao long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.” (Daniel 2:44) I no longtaem nao, bambae Kingdom no gavman ya we i stap long heven, i tekem aksin blong karem pis i kam long fulwol mo i rul wetem stret fasin.​—2 Pita 3:13.

Taem yumi prea long God se Kingdom blong hem i kam mo ol samting we hem i wantem oli kamtru long wol, yumi soemaot se yumi bilif mo yumi sua se Kingdom ya bambae i rul. Kristin aposol Jon i raetem se: “Mi harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i  ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’ ” Afta hem i ademap se: “Nao Man ya we i stap sidaon long bigfala jea blong hem i talem se, . . . ‘Yu raetem tok ya, from we tok blong mi i tru, mo ol man oli save bilif long hem.’ ”​—Revelesen 21:​3-5.

Ol Prea Mo Ol Nid Blong Yumi Long Saed Blong Bodi

Long Lodsprea, Jisas i soem long yumi se yumi mas tingbaot nem blong God mo wil blong hem fastaem long eni narafala samting. Nating se i olsem, narafala haf blong Lodsprea i soemaot se i stret tu blong askem Jeova blong i givim samting we yumi nidim long saed blong bodi.

Faswan nid hemia se: “Plis yu givim kakae long mifala, i naf blong tede.” (Matiu 6:11) Tok ya i no blong kam rijman. Jisas i pulum yumi blong prea long God blong hem i ‘givim kakae long yumi we i naf blong wan dei.’ (Luk 11:3) Olsem Lodsprea i talem, bilif blong yumi i strong se bambae God i ansa long prea blong yumi mo i givim olting we yumi nidim evri dei, sipos yumi lavem hem mo yumi obei long hem.

Fasin blong wari tumas long saed blong mane i save pulum yumi blong fogetem ol nid blong yumi long saed blong spirit, nao yumi no moa mekem samting we God i wantem. Be sipos yumi putum wosip blong God i stap fasples long laef blong yumi, yumi sua se bambae Jeova i ansa long ol prea blong yumi blong kasem ol samting we yumi nidim long saed blong bodi, olsem kakae mo klos. Jisas i talem se: “Yufala i mas gohed blong lukaot kingdom mo stret fasin blong hem fastaem. Nao bambae [God] i givim olgeta narafala samting ya tu long yufala.” (Matiu 6:​26-33, NW ) I no isi blong lukaot stret fasin blong God, from we yumi evriwan yumi sinman mo yumi nidim we God i fogivim ol sin blong yumi. (Rom 5:12) Lodsprea i tokbaot samting ya tu.

Ol Prea Mo Fasin Fogif Blong God

“Yu fogivim mifala from ol sin blong mifala, olsem we mifala i stap fogivim ol man we oli mekem i nogud long mifala.” (Matiu 6:12; Luk 11:4) ?Olsem wanem? ?Bambae Jeova i rili fogivim ol sin blong yumi?

King Deved blong Isrel bifo i mekem sam bigfala sin, be nating se i olsem, hem i tanem tingting blong hem mo hem i prea se: “Yu yu gud tumas long mifala, yu stap fogivim mifala, yu stap tekemaot ol sin blong mifala. Ol man we oli stap mekem prea long yu, oltaem yu yu lavem olgeta tumas.” (Ol Sam 86:5) !Tingting ya i rili mekem yumi haremgud! Papa blong yumi long heven i save “fogivim” sin blong ol man we oli tanem tingting blong olgeta mo oli prea long hem. Yes, Jeova God i save fogivim fulwan ol sin blong yumi, i olsem we hem i stap tekemaot ol sin ya.

Be Jisas i talem se sipos yumi wantem se God i fogivim yumi, yumi mas fogivim ol narafala. (Matiu 6:​14, 15) Ol trifala fren blong Job oli mekem i nogud long hem, be nating se i olsem, Job i fogivim olgeta mo hem i prea from olgeta tu. (Job 42:10) Sipos yumi fogivim ol man we oli sin agens long yumi, bambae yumi mekem God i glad long yumi mo hem bambae i soem sore long yumi.

God i wantem tumas blong lesin long ol prea blong yumi, mo samting ya i sud pusum yumi blong wantem mekem hem i glad long yumi, nating se yumi no stret gud olgeta. (Matiu 26:41) Long rod ya tu Jeova i save givhan long yumi, mo samting ya i kamaot klia long lastok blong prea blong Jisas, we i askem wan samting we i impoten tumas.

Prea Long God Blong i Halpem Yumi Blong Gohed Long Stret Rod

“Yu no letem ol samting oli kam traem mifala tumas, mo yu blokem Setan i no kam spolem mifala.” (Matiu 6:13) Jeova i no lego yumi taem yumi fesem ol traem, mo hem i no pulum yumi blong foldaon long sin. Tok blong God i talem se: “I no gat samting nogud we i save pulum God blong mekem hem i gorong. Mo i no fasin blong God blong pulum man blong mekem hem i foldaon long sin.” (Jemes 1:13) God i letem Setan i traem yumi, be hem i save mekem yumi fri long Bigfala Man blong Traem man, hemia Devel Setan.

Aposol Pita i givim woning ya long ol Kristin long taem blong hem se: “Yufala i mas lukaotgud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap  lukaot man blong i kakae.” (1 Pita 5:8) !Tingbaot, Setan i traem pulum Jisas Kraes we hem i stretgud olgeta, blong i mekem rong! ?From wanem? From we hem i wantem se Jisas i lego klin wosip blong Jeova God. (Matiu 4:​1-11) !Sipos yu yu wantem wosipim God, Setan bambae i traem yu blong yu lego klin wosip blong God!

Setan i bos long wol ya, mo i save yusum wol ya blong pulum yumi blong mekem ol samting we God i no laekem nating. (1 Jon 5:19) Taswe i impoten tumas we oltaem, yumi askem Jeova blong i halpem yumi, speseli taem wan samting i stap traem yumi oltaem. Nao sipos yumi wosipim Jeova olsem Baebol i talem, bambae hem i mekem yumi fri, i halpem yumi blong agensem Setan. Baebol i talem se: “God i stap holem promes blong hem, mo hem i no save letem wan samting i traem yumi, we i strong tumas long yumi.”​—1 Korin 10:13.

I Impoten Tumas Blong Bilif Long God

!Yumi haremgud tumas taem yumi save se Papa blong yumi long heven i rili intres long yumi wanwan! Hem i sanem Pikinini blong hem, Jisas Kraes, blong tijim yumi olsem wanem blong prea. Ating samting ya i pulum yumi blong wantem mekem Jeova God i glad long yumi. ?Olsem wanem yumi save mekem God i glad long yumi?

Baebol i talem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) ?Olsem wanem yumi save gat bilif olsem? Baebol i talem se: “Ol man oli stap bilif long God, taem oli harem gud nius ya.” (Rom 10:17) Ol Witnes blong Jeova oli glad tumas blong tokbaot gud nius ya blong Baebol long olgeta man we oli wantem wosipim God wetem trufala bilif.

Mifala i hop se ol save ya long saed blong Lodsprea i halpem yu blong kasem gud mining blong prea ya. Sipos yu stadi blong kasem moa save long saed blong Jeova mo ol blesing we hem i promes blong givim long “olgeta we oli stap traem faenem hem,“ bambae bilif blong yu i save kam strong moa. Mifala i leftemap tingting blong yu, blong yu traehad blong kasem moa save long saed blong Jeova mo stamba tingting blong hem, nao bambae yu save frengud blong olwe wetem Papa blong yu we i stap long heven.​—Jon 17:3.

[Tok blong makem poen pija long pej 5]

“Papa blong mifala. Yu yu stap long heven. Nem blong yu i tabu. Mifala i wantem we olgeta man oli ona long yu, mo we yu yu kam King blong olgeta man, mo we olgeta man long wol oli mekem ol samting we yu yu wantem, olsem we olgeta long heven oli stap mekem. Plis yu givim kakae long mifala, i naf blong tede. Yu fogivim mifala from ol sin blong mifala, olsem we mifala i stap fogivim ol man we oli mekem i nogud long mifala. Yu no letem ol samting oli kam traem mifala tumas, mo yu blokem Setan i no kam spolem mifala.”​—Matiu 6:​9-13

[Tok blong pija long pej 7]

Jeova i givim samting we ol man we oli lavem hem oli nidim

[Tok blong pija long pej 7]

God i halpem yumi blong agensem Setan

[Tok blong pija long pej 7]

Olsem Job, sipos yumi stap fogivim ol man we oli sin agensem yumi, bambae God i gat sore long yumi