Ol Bigfala Poen Long Buk Blong Josua
Tok Blong Jeova i Wan Samting We i Laef
Ol Bigfala Poen Long Buk Blong Josua
LONG 1473 B.K.T., ol man Isrel we oli stap long ol levelples blong Moab oli mas glad blong harem ol tok ya se: “Hae God i God blong yumi, mo long namba tri dei, bambae yumi gokros long Jodan Reva, blong go tekem graon ya we hem i promes finis blong givim long yumi. Yufala i mas mekemrere kakae blong yufala, blong wokbaot.” (Josua 1:11) Oli wokbaot 40 yia finis long draeples mo klosap oli finisim wokbaot blong olgeta.
Samwe long 20 yia biaen, lida blong olgeta Josua, i stanap long medel blong kantri blong Kenan mo i talemaot long ol olfala blong Isrel se: “Ol graon we olgeta ya oli stap yet long hem, mi mi makemaot finis long ol laen blong yufala, blong yufala i holem i blong yufala. Mo mi makemaot tu, ol graon ya we mi mi winim olgeta finis, i stat long Jodan Reva long is, i go kasem Mediterenian Si long wes. Hae God bambae i mekem olgeta ya oli ronwe long fes blong yufala. Sipos yufala i go blong mekem faet long olgeta, long semtaem ya hem bambae i ronemaot olgeta oli gowe long fes blong yufala. Bambae yufala i holem graon ya we oli stap long hem i blong yufala, stret olsem we hem i bin promes long yufala.”—Josua 23:4, 5.
Josua i raetem buk blong hem long 1450 B.K.T. mo buk ya blong hem i nambawan tumas from i tokbaot stori blong ol samting we oli hapen long ol 22 yia ya. Tede i olsem we yumi stap stanap long fored blong doa blong niufala wol we God i promes blong givim long yumi. Hemia i sem mak long ol man Isrel we oli rere blong tekem graon long Promes Lan i blong olgeta. Ale, wetem bigfala intres, i gud yumi lukluk gud long buk blong Josua.—Hibrus 4:12.
LONG “LEVELPLES YA KLOSAP LONG JERIKO”
Josua i kasem wan impoten wok taem Jeova i talem long hem se: “[Moses] man blong wok blong mi i lus, be naoia, yu wetem olgeta ya, yufala i mas mekemrere blong gokros long Jodan Reva, blong go long kantri ya we mi mi wantem givim long yufala.” (Josua 1:2) Wok blong Josua i blong lidim wan nesen we i gat plante milian man long hem blong go insaed long Promes Lan. Be bifo long samting ya, hem i sanem tu man i go spae long Jeriko—faswan taon ya we oli mas winim. I gat wan woman blong rod i stap laef long taon ya, nem blong hem Rehab, mo hem i harem nius long saed blong ol bigbigfala wok we Jeova i bin mekem blong halpem ol man blong hem. Woman ya i haedem tufala spae ya mo i halpem tufala. Biaen, tufala spae ya i promes long woman ya se bambae oli no kilim hem mo famle blong hem i ded.
Taem tufala spae ya i gobak, Josua mo ol man Isrel oli rere nao blong gokros long Jodan Reva. Nating se long taem ya reva ya i stap ron bigwan, olgeta oli no wari nating from we Jeova i blokem haf blong reva antap, mekem se wota i stap fulap long wanples nomo, mo ol wota we i stap daon oli ron i godaon long Ded Si. Nao ples we ol man Isrel oli stap stanap long hem i kam drae. Taem oli krosem Jodan Reva finis, oli go kamp long Gilgal klosap long Jeriko. Fo dei biaen, long naet blong namba 14 dei blong manis ya Abib, oli mekem lafet blong Pasova long levelples ya klosap long Jeriko. (Josua 5:10) Long nekis dei, oli stat blong kakae sam kakae we oli gru long kantri ya, mo mana i no moa folfoldaon i kamdaon long heven. Long taem ya Josua i mekem sakomsaes long evri boe no man we oli bin bon long draeples.
Ansa Blong Sam Kwestin Long Saed Blong Baebol:
2:4, 5—?From wanem Rehab i trikim ol man blong king we oli stap lukaot tufala spae? Rehab i putum laef blong hem long denja blong haedem tufala man ya from we hem i stat blong gat bilif long Jeova. I no gat wan rul we i talem se hem i mas talemaot tufala spae ya long ol man we oli stap lukaot rod blong kilim i ded ol man blong God. (Matiu 7:6; 21:23-27; Jon 7:3-10) Yes, Rehab i kam ‘olsem stret man from ol wok we hem i mekem’ hemia taem hem i sanem ol man blong king i go long narafala rod.—Jemes 2:24-26.
5:14, 15—?Hu i “Komanda Blong Ol Soldia Blong Hae God”? Komanda ya we i kam blong givim paoa long Josua long taem we oli stat blong faet blong winim Promes Lan, hem i semfala man ya we Baebol i kolem se “Tok ya”—hemia Jisas Kraes bifo we hem i kam long wol ya. (Jon 1:1; Daniel 10:13) !Ol man blong God tede oli stanap strong taem oli save se Jisas Kraes we i kam king finis i stap givhan long olgeta long faet blong olgeta long saed blong spirit!
Ol Lesen Blong Yumi:
1:7-9. Wan impoten samting we i mekem se yumi gohed gud long saed blong spirit hemia blong ridim Baebol evri dei, tingting dip oltaem long wanem we Baebol i talem mo mekem wanem we yumi lanem i wok long laef blong yumi.
1:11. Josua i talem long ol man blong hem blong oli mekemrere ol kakae blong olgeta blong wokbaot, be oli no mas les mo wet se God nao bambae i givim kakae long olgeta. Jisas i givim woning se yumi mas stop blong tingting tumas long ol samting we yumi nidim long laef. Hem i promes tu se ‘[God] i save givim ol narafala samting ya tu long yumi.’ Be, hemia i no min se yumi no nid blong traehad blong lukaot long ol nid blong yumi.—Matiu 6:25, 33.
2:4-13. Taem Rehab i harem nius long saed blong ol bigbigfala wok blong Jeova mo hem i luksave se hem i stap long taem blong trabol, hem i mekem disisen blong tekem saed blong tufala man ya we oli wosip long Jeova. Sipos yu stap stadi Baebol longtaem finis, ating yu tu bambae yu tekem disisen blong mekem wok blong God from we yu luksave se yumi stap laef long ‘ol las dei.’—2 Timoti 3:1.
3:15. Taem tufala man blong spae long Jeriko i karem mesej i kambak long Josua se ol man blong Jeriko oli stap seksek finis long olgeta, Josua i tekem aksin kwiktaem. Hem i no wet se Jodan Reva i godaon fastaem. Taem i gat sam wok blong mekem we oli laenap wetem trufala wosip, yumi mas gat strong tingting blong mekem ol wok ya hareap i bitim we yumi wet nomo kasem taem we i luk olsem se ol samting long laef oli rongud.
4:4-8, 20-24. Ol 12 ston ya we oli tekem long medel blong Jodan Reva oli olsem wan saen blong mekem ol man Isrel oli no fogetem taem ya. Tede ol wok we Jeova i stap mekem blong protektem ol man blong hem long ol enemi blong olgeta, oli olsem wan saen se hem i stap wetem olgeta.
OLI GOHED BLONG FAET
Oli “satemgud ol doa blong ol stonwol blong taon ya [Jeriko], . . . i no gat man i save go insaed, mo i no gat man i save go afsaed tu.” (Josua 6:1) ?Olsem wanem ol man Isrel oli save winim taon ya? Jeova i givim plan long Josua blong oli folem. I no longtaem ol stonwol oli folfoldaon mo taon ya i lus. Rehab mo ol famle blong hem we oli stap long haos blong hem, olgeta nomo oli sef.
Oli go mekem nekiswan faet long taon ya Eae we i gat king blong hem. Sam man we oli go blong spae long taon ya oli karem mesej i kambak long Josua mo oli talem se i gat smol man nomo i stap long taon ya, taswe i no nid blong plante man oli go blong spolem taon ya. Ale, oli sanem samwe long 3,000 soldia oli go mekem faet long ol man long taon ya. Be taem oli faet, ol man blong Eae oli winim olgeta mo oli ronem olgeta i kambak. ?From wanem ol man ya oli winim ol man Isrel? From we Jeova i no stap wetem ol man Isrel. Taem oli bin winim taon blong Jeriko, Akan we i kamaot long laen blong Juda, i mekem sin. Afta we oli stretem problem ya finis, Josua i go mekem faet agens long taon ya Eae bakegen. King blong Eae i wantem tumas blong go mekem faet long ol man Isrel from we long tingting blong hem olgeta oli bin winim ol man Isrel ya wan taem finis. Be Josua i yusum wan plan we i mekem se ol man Eae oli konfius mo biaen hem i winim taon blong olgeta.
Gibeon i ‘wan bigfala taon, mo ol man blong hem oli plante moa, i winim ol man Eae, mo oli ol gudfala man blong faet tu.’ (Josua 10:2) Taem ol man blong Gibeon oli harem se ol man Isrel oli bin winim Jeriko mo Eae, oli trikim Josua se oli wantem mekem wan kontrak blong pis wetem nesen blong Isrel. Ol nesen raonabaot oli luk kontrak ya we ol man Gibeon oli mekem, olsem wan denja long olgeta from we i minim se ol man Isrel oli stat blong gat ol sapota blong olgeta. Ale, 5 king long ol nesen ya oli mekem wan promes tugeta mo oli go mekem faet long ol man Gibeon. Ol man Isrel oli protektem ol man Gibeon mo oli winim ol man we oli wantem kilim olgeta. Ol narafala faet we Josua i lidim ol man Isrel long hem hemia faet agensem ol taon long saed i go long saot mo long saed i go long wes blong Jodan Reva, mo tu hem i winim ol king long saed i go long not. I gat samwe 31 king evriwan we Josua i winim long saed i go long wes blong Jodan Reva.
Ansa Blong Sam Kwestin Long Saed Blong Baebol:
10:13—?Olsem wanem wan samting olsem i save hapen? ?Olsem wanem? ?‘I gat wan samting we i strong tumas long Jeova,’ God ya we i Wokem heven mo wol? (Jenesis 18:14) Sipos Jeova i wantem, hem i save stopem wol ya blong i no moa tanem, mo mekem se san mo mun tufala i saen nomo long sem ples. No hem i save letem wol mo mun oli gohed blong tanem nomo, we long semtaem hem i pulum laet blong san wetem mun tugeta, blong tufala i gohed blong saen long wol mekem se i gat dei oltaem. Nating se i olsem wanem, “neva yumi luk wan samting olsem” long histri blong man.—Josua 10:14.
10:13—?Wanem ya buk blong Jasara? Long 2 Samuel 1:18 oli talem nem blong buk ya bakegen tugeta wetem wan sing—hemia wan singsing long saed blong ded blong King Sol blong Isrel mo pikinini blong hem Jonatan. Ating buk ya i wan buk blong singsing mo naesfala toktok long saed blong histri blong ol man Isrel mo ol man Isrel oli save gud buk ya.
Ol Lesen Blong Yumi:
6:26; 9:22, 23. Strong tok we Josua i talem long taem we oli spolem Jeriko i kamtru fulwan 500 yia biaen. (1 King 16:34) Strong tok we Noa i talem long saed blong smol bubu blong hem Kenan, i kamtru taem ol man Gibeon oli kam slef blong Isrel. (Jenesis 9:25, 26) Oltaem ol tok blong Jeova oli kamtru.
7:20-25. Samfala maet oli luk olsem se fasin stil blong Akan i wan smol sin nomo, i no spolem wan man. Maet oli ting se fasin blong stilim ol smosmol samting mo maet fasin blong brekem loa blong Baebol wanwan taem, hemia i oraet nomo. Be, tingting blong yumi i mas olsem Josua we i stanap strong long disisen blong hem blong agensem ol traem we oli save pulum yumi blong brekem loa blong God no mekem sam fasin we oli nogud.
9:15, 26, 27. Yumi mas tinghevi long ol promes we yumi mekem mo yumi mas holem ol promes ya.
JOSUA I MEKEM OL LASWAN IMPOTEN WOK BLONG HEM
Naoia Josua i stap kam olfala—klosap hem i kasem 90 yia blong hem—hem i stat blong serem ol graon long ol man Isrel. !Hemia wan bigfala wok! Ol laen blong Ruben mo Gad mo laen blong Manase oli gat graon blong olgeta finis, long is saed blong Jodan Reva. Ale, oli sakem ol spesel ston blong faenemaot se wanem graon long wes saed blong reva ya bambae i go long wanem laen blong Isrel.
Oli putumap haos tapolen blong Jeova long Silo, hemia long teritori blong Efrem. Oli givim taon ya Hebron long Keleb mo Josua i tekem taon blong Timnatsera. Oli givim 48 taon long ol man Livaet wetem 6 taon we ol man oli save go haed long hem. Taem oli stap long ol graon blong olgeta long is saed blong Jodan Reva, ol soldia blong laen blong Ruben, Gad mo laen blong Manase, oli putumap wan olta we i “bigwan we i bigwan.” (Josua 22:10) Long lukluk blong ol laen we oli stap long wes saed blong Jodan Reva, olta ya i wan saen se ol man ya oli lego skul blong olgeta finis. Ale klosap faet i kamaot bitwin ol laen blong olgeta. Be samting ya i no hapen afta we oli toktok gud tugeta blong stretem rong ya.
Afta we Josua i laef blong smol taem long Timnatsera, hem i singaotem ol olfala, ol lida, ol jaj mo ol haeman blong ol man Isrel oli kam wanples mo i talem long olgeta se oli mas gat strong tingting mo oli mas stap tru oltaem long Jeova. Biaen Josua i tekem olgeta laen blong Isrel i kam wanples long Sekem. Long ples ya Josua i talem bakegen ol samting we Jeova i mekem long taem blong Ebraham kasem long taem blong olgeta. Mo bakegen, hem i leftemap tingting blong olgeta blong oli ‘ona long Hae God long olgeta laef blong olgeta, mo oli mas stap tru long hem, mo tingting blong olgeta i mas stap strong long hem oltaem.’ Nao ol man oli talem long hem se: “Yes, Hae God i God blong yumi. Oltaem bambae mifala i biaen long hem, mo bambae mifala i stap obei long ol tok blong hem nomo.” (Josua 24:14, 15, 24) Afta long ol samting ya Josua i ded we i gat 110 yia blong hem.
Ansa Blong Sam Kwestin Long Saed Blong Baebol:
13:1—?Olsem wanem? ?Vas ya i agensem tok we i stap long Josua 11:23? No gat. Faet we oli mekem blong winim Promes Lan i gat tu haf long hem: Faswan haf hemia taem oli winim ol 31 king blong ol man Kenan long faet we i mekem ol man Kenan oli no moa gat paoa. Mo seken haf hemia taem oli spolem ol laen blong ol man Kenan mo oli tekem olgeta graon blong olgeta. (Josua 17:14-18; 18:3) Ol man Isrel oli no ronemaot evri man Kenan, i gat sam long olgeta we oli laef i stap mo ol man Isrel oli no rili luk ol man ya olsem wan denja long olgeta, nogat. (Josua 16:10; 17:12) Josua 21:44 i talem se: ‘Hae God i mekem olgeta oli gat pis, mo oli stap gud oltaem long olgeta ples ya we oli stap long hem.’
24:2—?Papa blong Ebraham we nem blong hem Tera hem i wan man we i stap wosip long ol aedol? Fastaem Tera i no wan man we i wosip long Jeova God. Hem i stap wosip long god blong mun we nem blong hem Sin. Hemia god blong ol man Uru. Folem ol kastom stori blong ol man Jiu, Tera i wan man we i stap wokem ol aedol. Nating se i olsem, taem Ebraham i aot long Uru blong go long Haran olsem we God i bin talem long hem, be Tera tu i go wetem hem.—Jenesis 11:31.
Ol Lesen Blong Yumi:
14:10-13. Taem Keleb i gat 85 yia blong hem, hem i askem sipos hem i save mekem wan bigfala wok, hemia blong ronemaot olgeta man long ol ples blong kantri ya Hebron. Ol man Anak nao oli stap long ples ya. Olgeta ya oli ol bigbigfala man. Wetem help blong Jeova, Keleb i winim faet mo Hebron i kam wan taon we ol man Isrel oli save haed long hem. (Josua 15:13-19; 21:11-13) Eksampol blong Keleb i leftemap tingting blong yumi blong no ronwe long ol tiokratik wok nating se samtaem ol wok ya oli bigwan.
22:9-12, 21-33. Yumi mas lukaotgud blong no jajem narafala folem rong tingting blong yumi nomo.
‘I No Gat Wan Tok We i Mestem’
Taem Josua i olfala, hem i talem long ol haeman blong ol man Isrel se: “Olgeta promes ya blong [Jeova], hem i mekem oli kamtru evriwan, i no gat wan promes nating i stap we i no kamtru.” (Josua 23:14) !Ol tok ya blong Josua long saed blong ol promes blong Jeova i rili leftemap tingting blong yumi!
Aposol Pol i raetem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Yumi save sua se hop blong yumi long saed blong ol promes blong God i no save mestem. I no gat wan promes nating we i save mestem, evriwan i mas kamtru.
[Mape blong pija long pej 10]
Ol taon we ol man Isrel oli winim taem Josua i lida blong olgeta
BASAN
GILEAD
ARABA
NEGEB
Jodan Reva
Ded Si
Jabok Reva
Anon Reva
Hajoro
Madon
Lasaron
Simron
Jokneam
Doro
Megido
Kedes
Tahanak
Hefa
Tijaha
Afek
Tapua
Betel
Eai
Gilgal
Jeriko
Gesa
Jerusalem
Makeda
Jamut
Adulam
Libnaha
Lakis
Eglon
Hebron
Debiri
Arad
[Tok blong pija long pej 9]
?Yu yu save from wanem Baebol i talem se Rehab ya we i wan woman blong rod hem i wan stret woman?
[Tok blong pija long pej 10]
Josua i talem long ol man Isrel blong ‘oli ona long Jeova mo stap tru long hem’
[Tok blong pija long pej 12]
Fasin stil blong Akan i no wan smol samting nomo. Fasin ya i lidim hem long wan bigfala trabol
[Tok blong pija long pej 12]
‘From ol laen blong Isrel oli stap bilif strong long God, bigfala stonwol blong taon ya Jeriko i foldaon.’—Hibrus 11:30