Wan Kwestin

?Afta we Jisas i laef bakegen, from wanem hem i talem long Meri blong Magdala blong no tajem hem, be biaen hem i talem long Tomas blong tajem bodi blong hem?

Long sam olfala translesen blong Baebol, i luk olsem se Jisas i blokem Meri blong Magdala blong i no tajem hem. Eksampol, King James Version i talem se: “No tajem mi; from we mi no go antap long Papa blong mi yet.” (Jon 20:17) Nating se i olsem, Grik veb we plante taem oli tanem i kam “tajem,” hem i minim “holemtaet, holembak, blokem, putum han i goraon long [narafala].” I stret blong ting se long vas ya, Jisas i no talem long Meri blong Magdala se hem i no gat raet blong tajem hem, from we Jisas i letem sam narafala woman we oli stap long beregraon oli “holem leg blong hem.”​—Matiu 28:9.

Plante niufala translesen, olsem New World Translation of the Holy Scriptures, The New Jerusalem Bible, The New English Bible, mo Baebol long Bislama, oli halpem yumi blong kasem save stret mining blong tok blong Jisas. Oli tanem vas ya se: “Yu no holem mi.” ?From wanem Jisas i talem samting ya long Meri blong Magdala, wan woman we i stap folem Jisas oltaem?​—Luk 8:1-3.

I luk olsem se Meri blong Magdala i fraet se bambae Jisas i lego olgeta mo i gobak long heven. Meri i wantem tumas blong stap wetem Masta, taswe hem i holem Jisas, i no wantem letem hem i go. Be Jisas i no rere blong go yet, taswe hem i talem long Meri blong no holemtaet hem, be i moagud hem i go talem nius ya long ol disaepol se Jisas i laef bakegen.​—Jon 20:17.

Be toktok we Jisas i talem long Tomas i defren. Taem Jisas i kamtru long ol disaepol, Tomas i no stap wetem olgeta. Biaen, Tomas i talem se hem i no bilif we Jisas i rili laef bakegen, mo i talem se bambae hem i bilif nomo sipos hem i luk ol hol blong nil long han blong Jisas, mo i pusum han blong hem i go insaed long saed blong Jisas. Eit dei biaen, Jisas i kamtru long ol disaepol bakegen. Naoia Tomas i stap, mo Jisas i singaot hem blong i tajem bodi blong hem.​—Jon 20:24-27.

Taswe, taem Jisas i talem long Meri blong Magdala blong no holem hem, hemia from we Meri i rong, i ting se bambae Jisas i lego olgeta. Be taem Jisas i singaot Tomas blong i tajem hem, hem i wantem halpem Tomas from we bilif blong hem i slak lelebet. Long tufala stori ya, Jisas i gat ol gudfala risen blong mekem samting we hem i bin mekem.