Yumi Kasem Trening Blong Talemaot Gud Nius

“Bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.”​—OL WOK 1:8.

1, 2. ?Wanem wok we Pita i mas mekem? ?Hu i givim wok ya long hem?

 “JISAS, man Nasaret ya, . . . hem i talem long mifala, se mifala i mas talemaot gud nius blong hem long ol man. Mo mifala i mas talemaot we God i putumap hem finis blong hem bambae i jajem olgeta man, olgeta we oli stap laef wetem olgeta we oli ded finis.” (Ol Wok 10:38, 42) Tok ya we aposol Pita i talem long Konilias mo famle blong hem, i soemaot wok we i stap long han blong hem, hemia blong talemaot gud nius.

² ?Wetaem Jisas i givim wok ya long Pita? Ating Pita i stap tingtingbak long tok we Jisas i bin talem taem hem i laef bakegen, jes bifo we hem i go antap long heven. Long taem ya, Jisas i talem long ol disaepol we oli stap tru long hem se: “Bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Ol Wok 1:8) Be Pita i save finis se hem i mas talemaot bilif blong hem long Jisas, from we olgeta man we oli kam disaepol blong Jisas oli mas mekem wok ya.

Oli Kasem Trening Blong Tri Yia

3. ?Wanem merikel we Jisas i mekem? ?Jisas i singaot Pita mo Andru blong tufala i mekem wanem?

³ Jisas i tekem baptaes long yia 29 K.T., * nao afta we sam manis  i pas, hem i go prij klosap long Lugun blong Galili. Pita mo brata blong hem Andru, tufala i stap mekem wok blong pulum fis long ples ya. Long fulnaet tufala i bin sakem net, be tufala i no kasem wan fis nating. Nating se i olsem, Jisas i talem long tufala se: “Saemon. Yufala i pul i go afsaed long dip wota, yufala i sakem net blong yufala, blong pulum sam fis.” Oli obei long Jisas nao “oli kasem fis long net blong olgeta, we i plante we plante. Mo from we i gat plante fis tumas, net blong olgeta klosap i brok.” Taem Pita i luk merikel ya, hem i fraet we i fraet. Be Jisas i mekem tingting blong hem i kwaet, i se: “Yu no fraet. Yu yu man blong pulum fis, be i stat naoia, bambae yu yu man blong pulum man.”​—Luk 5:​4-​10.

4. (a) ?Olsem wanem Jisas i rerem ol disaepol blong hem from wok blong prij? (b) ?Jisas i talem se wok we ol disaepol blong hem oli mekem bambae i defren olsem wanem long wok we hem i mekem?

⁴ Wantaem nomo, Pita mo Andru, wetem Jemes mo Jon we papa blong tufala Sebedi, fofala i livim bot i stap, nao fofala i biaen long Jisas. Blong tri yia, ol disaepol blong Jisas oli folem hem long wok blong prij, mo hem i trenem olgeta blong oli talemaot gud nius long ol man. (Matiu 10:7; Mak 1:​16, 18, 20, 38; Luk 4:​43; 10:9) Long en blong trening ya, long Naesan 14, 33 K.T., Jisas i talem long olgeta se: “Man we i bilif long mi, hem bambae i save mekem ol wok ya we mi mi stap mekem. Yes, hem bambae i save mekem plante wok moa i winim ol wok ya we mi mi mekem.” (Jon 14:12) Jisas i stap talem long ol disaepol blong hem se bambae oli prij olsem hem, be bambae oli mekem wok we i bigwan moa long wok we hem i bin mekem. Smoltaem biaen, oli kasem save se olgeta wetem ol narafala man we oli kam disaepol blong Jisas bambae oli mas go prij long “olgeta ples long wol,” gogo kasem taem we “wol ya i finis.”​—Matiu 28:19, 20.

5. ?Olsem wanem yumi save lanem plante samting from trening we Jisas i givim long ol man blong hem?

⁵ Yumi stap laef long taem we klosap “wol ya i finis.” (Matiu 24:3) I tru se yumi no save wokbaot wetem Jisas olsem ol faswan disaepol blong hem, blong yumi luk olsem wanem Jisas i prij long ol man. Be yumi save lanem plante samting from trening we Jisas i givim long ol man blong hem, taem yumi ridim Baebol. Yumi save luk olsem wanem Jisas i prij long ol man mo wanem advaes hem i bin givim long ol man blong hem. (Luk 10:​1-​11) Be stadi ya bambae i tokbaot wan narafala impoten samting we Jisas i tijim ol disaepol long hem mo we yumi nidim tu​—hemia stret tingting long saed blong wok blong prij.

Sore Long Ol Man

6, 7. ?Wanem fasin blong Jisas we i mekem se hem i karem frut long wok blong prij? ?Olsem wanem yumi save folem fasin ya blong hem?

⁶ ?From wanem Jisas i karem frut long wok blong prij? Wan risen se hem i tingbaot ol man we hem i prij long olgeta mo hem i gat sore long olgeta. Man blong raetem Ol Sam i tokbaot Jisas se “bambae i gat sore long ol puaman, mo long olgeta we oli no strong.” (Ol Sam 72:13) Tru ya, Jisas i mekem profet tok ya i kamtru. Baebol i storian long saed blong wan dei we Jisas i stap prij, i se: “Taem hem i luk ol man we oli plante tumas, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:​36) Ol man we oli mekem ol bigfala sin, olgeta tu oli haremsave we hem i sore long olgeta, taswe oli no fraet blong kam long hem.​—Matiu 9:​9-​13; Luk 7:​36-​38; 19:​1-​10.

⁷ Tede tu, yumi save karem frut long wok blong prij sipos yumi gat sore long ol man. Bifo we yumi aot long haos blong yumi blong go prij, i gud yumi tekem smoltaem blong tingbaot ol man we bambae yumi toktok wetem olgeta. Tingbaot olsem wanem oli nidim tumas ol save we bambae yumi karem i go long olgeta. Tingbaot ol trabol we maet oli gat, we Kingdom nomo bambae i naf blong stretem. Holem gudfala tingting long saed blong ol man, from we yu yu no save hu bambae i lesin long gud nius. !Maet nekiswan man we yu yu toktok wetem hem i bin prea long God blong i sanem wan man olsem yu blong givhan long hem!

Lav i Mas Pulum Yumi

8. ?Wanem samting we i pulum Jisas mo ol man blong hem blong oli talemaot gud nius?

⁸ Gud nius we Jisas i talemaot, hemia se, ol samting we Jeova i wantem bambae oli kamtru, mo nem blong hem bambae i kam tabu, mo hae rul blong hem bambae i win. Hemia nao ol bigfala samting we ol man oli mas tekem disisen long olgeta. (Matiu 6:​9, 10) Jisas i lavem Papa blong hem. From samting ya, hem i holemstrong long God go kasem en blong laef blong hem, mo hem i talemaot Kingdom ya we bambae i mekem ol bigfala samting ya i kamtru. (Jon 14:31) Tede tu, ol man blong Jisas oli lavem God. Samting ya i pulum olgeta blong traehad long wok blong prij. Aposol Jon i talem se: “Sipos yumi  lavem God, hemia i min se yumi stap folem ol tok blong hem.” Wan long ol tok ya, hemia oda blong talemaot gud nius mo blong pulum ol man oli kam disaepol.​—1 Jon 5:3; Matiu 28:19, 20.

9, 10. ?Antap long lav we yumi gat long God, yumi mas gat lav long hu bakegen we bambae i pulum yumi blong mekem bes blong yumi long wok blong prij?

⁹ Jisas i talem long ol man blong hem se: “Sipos yufala i lavem mi, bambae yufala i save obei long ol tok blong mi. Man we i kasemgud ol tok blong mi, mo i stap obei long olgeta, man ya nao i lavem mi.” (Jon 14:15, 21) Taswe, lav we yumi gat long Jisas i mas pulum yumi blong talemaot trutok mo blong obei long ol narafala tok blong hem. Afta we Jisas i laef bakegen, hem i kamtru long ol disaepol blong hem, nao hem i talem long Pita se: “Yu givim kakae long ol smol sipsip blong mi. . . . Yu lukaot gud long ol sipsip blong mi. . . . Yu givim kakae long ol sipsip blong mi.” ?Wanem nao i mas pulum Pita blong mekem samting ya? Jisas i talem ansa blong kwestin ya taem hem i askem bakegen mo bakegen long Pita se: “?Yu yu lavem mi? . . . ?Yu yu lavem mi? . . . ?Yu yu lavem mi?” Yes, lav we Pita i gat long Jisas, hemia nao samting we i mas pulum hem blong talemaot gud nius, faenem “ol smol sipsip” blong Jisas, mo lukaotgud long olgeta long saed blong spirit.​—Jon 21:15-​17.

¹⁰ Tede, yumi no save toktok stret long Jisas olsem Pita i bin mekem. Be nating, yumi savegud bigfala samting we Jisas i mekem blong givhan long yumi. Bigfala lav i pulum hem blong “ded blong tekem ples blong olgeta man,” mo samting ya i mas tajem hat blong yumi. (Hibrus 2:9; Jon 15:13) Yumi gat sem tingting olsem Pol taem hem i raetem se: “Kraes i lavem mifala tumas, nao fasin ya blong hem i stap holemtaet mifala. . . . Hem i ded blong sevem olgeta man, blong bambae ol man we oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem ol wok blong hem.” (2 Korin 5:​14, 15) Taem yumi tinghevi long oda blong Jisas blong talemaot gud nius mo taem yumi mekem bes blong yumi long wok ya, yumi stap soemaot se yumi tinghae long lav blong hem, mo se yumi lavem hem tu. (1 Jon 2:​3-5) Yumi neva mas mekem olsem we wok blong prij i wan wok olbaot nomo. Sipos yumi mekem olsem, yumi stap soemaot se long tingting blong yumi sakrefaes blong Jisas i no sas nating.​—Hibrus 10:29.

No Letem Samting i Pulum Yumi Blong Gowe Long Rod Ya

11, 12. ?Jisas i kam long wol ya blong mekem wanem? ?Olsem wanem hem i soemaot se tingting blong hem i stap nomo long wok ya?

¹¹ Taem Jisas i stanap fored long Ponjes Paelat, hem i se: “Mi mi bon, mi kam long wol ya blong wan samting nomo, blong mi talemaot ol tok we i tru.” (Jon 18:37) Jisas i no letem wan samting nating i pulum hem i gowe long wok ya blong talemaot trutok. Hemia nao wok we God i wantem hem blong mekem.

¹² Setan i traem Jisas bigwan long saed ya. Smoltaem afta we Jisas i baptaes, Setan i wantem mekem hem i kam wan bigman long wol ya, i wantem givim long hem “olgeta kantri long wol ya wetem ol gudgudfala samting we oli gat.” (Matiu 4:​8, 9) Biaen bakegen, ol man Jiu oli wantem putumap Jisas i kam king blong olgeta. (Jon 6:​15) Maet samfala tede oli ting se i moagud sipos Jisas i bin akseptem ol samting ya. Maet oli talem se sipos Jisas i bin kam king, hem i save mekem plante gudfala samting long ol man. Be Jisas i sakemaot ol tingting ya. Hem i putum tingting blong hem i stap nomo long wok ya blong talemaot trutok.

13, 14. (a) ?Jisas i no letem wanem samting i pulum hem i gowe long wok blong God? (b) ?Nating se Jisas i wan puaman, hem i mekem wanem bigfala samting?

¹³ Jisas i no letem ol sas samting blong wol ya oli pulum ae blong hem. Taswe, hem i no wan rijman. Hem i no gat wan haos blong hem. Hem i talem se: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi, mi Pikinini blong Man, mi no gat ples blong mi, blong go slip long hem.” (Matiu 8:​20) Baebol i talem se taem Jisas i ded, hem i gat wan samting nomo we i sas, hemia wan kot blong hem. Ol soldia blong Rom oli sakem daes blong luk hu nao bambae i karem kot ya. (Jon 19:23, 24) ?Hemia i min se Jisas i westem taem blong hem long wol ya? !Nogat!

¹⁴ Wan rijman i save mekem plante samting blong halpem ol man. Be Jisas i mekem plante moa samting  i bitim ol rijman. Pol i talem se: “Yufala i save finis we Jisas Kraes, Masta blong yumi, hem i gat gladhat blong givhan. Hem i rij, be from yufala, hem i kam pua. Mo from we hem i kam pua, taswe yufala i save kam rij.” (2 Korin 8:9; Filipae 2:​5-8) Jisas i no gat plante samting, be hem i openem rod blong ol man we oli gat tingting daon oli save kasem laef we i no save finis. !Yumi talem bigfala tangkiu long hem from! !Mo yumi glad tumas we hem i kasem bigfala blesing from we hem i no letem wan samting i pulum hem i gowe long wok ya we God i wantem hem blong mekem!​—Ol Sam 40:8; Ol Wok 2:​32, 33, 36.

15. ?Wanem samting i sas moa i winim mane?

¹⁵ Ol Kristin tede we oli traehad blong folem eksampol blong Jisas, olgeta tu oli no letem tingting ya blong wantem kam rijman i pulum olgeta. (1 Timoti 6:​9, 10) Oli luksave se mane i save mekem laef blong olgeta i isi moa. Be oli save tu se mane i no save givim laef blong olwe long olgeta. Taem wan Kristin i ded, ol sas samting blong hem oli no save givhan long hem, olsem we kot blong Jisas i no givhan long hem. (Prija 2:​10, 11, 17-​19; 7:​12) Taem wan Kristin i ded, hem i gat wan samting nomo we i rili sas, hemia fasin fren blong hem wetem Jeova mo Jisas Kraes.​—Matiu 6:​19-​21; Luk 16:9.

No Letem Fasin Agens i Slakem Yumi

16. ?Wanem fasin blong Jisas taem ol man oli agensem hem?

¹⁶ Taem ol man oli agensem Jisas, hem i no letem samting ya i slakem hem long wok ya blong talemaot trutok. Hem i save finis se hem i mas ded olsem wan sakrefaes, be samting ya tu i no slakem tingting blong hem. Pol i tokbaot Jisas i se: “Taem hem i go blong i ded long [“pos,” NW ], hem i luksave finis we bambae i save harem gud. Nao from samting ya, hem i no moa tingbaot se [pos] ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i King, i stap sidaon long bigfala jea blong hem long heven.” (Hibrus 12:2) Makemgud se Jisas ‘i no tingbaot bigfala sem’ we bambae i kasem hem. Hem i no wari long tingting blong ol man we oli agensem hem. Hem i tingbaot nomo blong mekem samting we God i wantem.

17. ?Fasin blong Jisas blong stanap strong i tijim yumi long wanem samting?

¹⁷ Pol i leftemap tingting blong ol Kristin blong oli stanap strong olsem Jisas, i se: “I gud yufala i stap tingbaot ol hadtaem ya we hem i kasem, we ol man nogud oli girap oli agensem hem tumas. Sipos yufala i stap mekem olsem, bambae yufala i no save lego bilif blong yufala, mo oltaem tingting blong yufala i save stap strong.” (Hibrus 12:3) Tru ya, yumi save kam taed long ol man we oli agensem yumi mo oli jikim yumi oltaem. Yumi save kam taed blong blokem ol fasin blong wol we oli save pulum yumi evri dei. Maet ol famle blong yumi oli no glad long yumi taem yumi mekem olsem, maet olgeta tu oli traem pulum yumi blong “kam antap moa” long wol ya. Be yumi mekem olsem Jisas we i lukluk i go long Jeova blong givhan long hem. Mo yumi holem strong tingting blong lukaot Kingdom fastaem long laef blong yumi.​—Matiu 6:​33; Rom 15:13; 1 Korin 2:4.

18. ?Yumi save lanem wanem gudfala samting from ol tok we Jisas i talem long Pita?

¹⁸ Taem Jisas i storian long ol disaepol blong hem long saed blong ded blong hem, hem i soemaot klia  se i no gat wan samting nating we i save pulum hem i gowe long wok blong God. Long taem ya, Pita i talem long Jisas se; ‘God i mas blokem samting ya blong i no kamtru long yu olsem.’ Be Jisas i no wantem lesin nating long ol tok ya we i save spolem strong tingting blong hem blong mekem samting we Jeova i wantem. Taswe, hem i tanem baksaed long Pita mo i talem long hem se: “Setan. Yu gowe long mi. Yu yu stap traem blong blokem mi nomo. Tingting blong yu i no tingting blong God, i tingting blong man nomo.” (Matiu 16:21-​23) I gud yumi tu yumi strong oltaem blong sakemaot ol tingting blong man. Oltaem yumi mas letem tingting blong God i lidim yumi.

Ol Blesing Blong Olwe

19. ?Nating se Jisas i mekem plante merikel, wanem wok blong hem we i moa impoten?

¹⁹ Jisas i mekem plante merikel blong soemaot se hem i Mesaea. Hem i mekem dedman i laef bakegen tu. Ol bigbigfala wok ya oli pulum plante man oli kam long Jisas. Be Jisas i no kam long wol blong mekem ol wok ya nomo. Hem i kam blong talemaot trutok. Hem i save se ol wok we hem i mekem blong halpem ol man long saed blong bodi, oli save givhan long olgeta blong smoltaem nomo. Taem hem i mekem man i laef bakegen tu, hem i save se ol man ya bambae oli ded bakegen. Wan rod nomo blong givhan long olgeta blong kasem laef we i no save finis, hemia blong talemaot trutok.​—Luk 18:28-​30.

20, 21. ?Wanem stret tingting we ol trufala Kristin oli holem long saed blong wok we oli mekem blong halpem ol man long saed blong bodi?

²⁰ Tede, samfala oli traem mekem ol gudfala wok olsem Jisas, taem oli bildim ol hospital mo mekem plante narafala samting blong halpem ol puaman. Samfala oli givim bigfala mane blong mekem ol wok ya, mo yumi presem olgeta from gudfala fasin blong olgeta blong wantem halpem narafala. Be wok we oli mekem i save givhan long ol man blong smoltaem nomo. Kingdom nomo i save stretem trabol blong ol man blong olwe. Taswe, ol Witnes blong Jeova oli mekem olsem Jisas, oli spenem bighaf blong taem blong olgeta blong talemaot trutok long saed blong Kingdom.

²¹ Be ol trufala Kristin oli mekem plante gudfala wok blong halpem ol man long saed blong bodi tu. Pol i raetem se: “Oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:​10) Taem wan bigfala trabol i kasem ol Kristin brata blong yumi no sam narafala man, no taem oli sot long sam samting, yumi glad blong “mekem i gud” long olgeta. Be wok we oltaem yumi putum long fasples long laef blong yumi​—hemia wok ya blong talemaot trutok.

Lanem Samting From Eksampol Blong Jisas

22. ?From wanem ol Kristin oli prij long ol man?

²² Pol i raetem se: “Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.” (1 Korin 9:​16) Hem i  no slak blong talemaot gud nius, hem i save se samting ya i save sevem laef blong hem mo laef blong ol man we oli lesin long hem. (1 Timoti 4:​16) Yumi mas gat sem tingting olsem Pol long saed blong wok blong prij. Yumi wantem givhan long ol narafala man. Yumi wantem soemaot lav long Jeova. Yumi wantem soemaot lav long Jisas mo talem tangkiu long hem from bigfala lav we hem i soem long yumi. Taswe yumi talemaot gud nius, mo long rod ya, yumi ‘no moa letem ol rabis samting we tingting blong yumi nomo i wantem, oli bos long yumi, be yumi letem ol samting we God i wantem, oli bos long yumi.’​—1 Pita 4:​1, 2.

23, 24. (a) ?Merikel ya long saed blong ol fis i tijim yumi long wanem samting? (b) ?Hu ol man tede we oli strong blong talemaot gud nius?

²³ Taem ol man oli jikim yumi no oli kros we oli no wantem lesin long yumi, yumi mas mekem olsem Jisas, yumi no mas fogetem faswan bigfala wok blong yumi. Wan merikel we Jisas i mekem taem hem i singaot Pita mo Andru blong tufala i biaen long hem, i save tijim yumi long wan samting. Yumi lanem se sipos yumi obei long Jisas nao yumi sakem net blong yumi bakegen, nating we i luk olsem se wota i no gat fis long hem be maet bambae yumi kasem sam fis. Plante Kristin we oli mekem wok ya blong pulum man, oli jes luk frut blong wok blong olgeta afta we oli sakem net blong olgeta blong plante yia long wota we i luk olsem se i no gat fis long hem. Samfala oli muf i go long narafala ples nao oli faenem plante man we oli intres long trutok mo oli pulum plante fis long ol ples ya. Nating se yumi mekem olsem wanem, be bambae yumi gohed nomo blong sakem net blong yumi. Jisas i no talem yet se wok blong prij long wol ya i finis.​—Matiu 24:14.

²⁴ Moa long sikis milian Witnes blong Jeova oli bisi blong mekem wok ya long bitim 230 kantri. Long Wajtaoa blong Februari 1, 2005, yu save luk ripot blong wok we oli mekem long yia 2004. Ripot ya i soemaot se Jeova i stap blesem bigwan wok blong prij. Long smoltaem we i stap yet, i gud yumi gohed blong obei long tok blong Pol se: “Oltaem yu yu mas strong blong talemaot” tok blong God. (2 Timoti 4:2) I gud yumi gohed nomo blong prij gogo Jeova i talem se wok ya i finis.

[Futnot]

?Yu Yu Save Ansa?

• ?Olsem wanem trening we Jisas i givim long ol disaepol blong hem i save givhan long yumi?

• ?Wanem tingting blong Jisas long saed blong ol man we hem i prij long olgeta?

• ?Wanem fasin i mas pulum yumi blong traehad blong prij long olgeta man?

• ?Olsem wanem yumi save putum tingting blong yumi i stap oltaem long samting we God i wantem, olsem Jisas i bin mekem?

[Kwestin]

[Tok blong pija long pej 14]

Stat long yia ya, Ripot Blong Ol Witnes Blong Jeova Long Fulwol Long Seves Yia bambae i no moa stap long Wajtaoa blong Jenuware 1, be bambae i stap long Wajtaoa blong Februari 1.

[Tok blong pija long pej 15]

Yumi save karem frut long wok blong prij sipos yumi soemaot se yumi tingbaot ol man olsem Jisas i bin soem

[Tok blong pija long pej 16]

Jisas i kam long wol ya blong talemaot trutok

[Tok blong pija long pej 17]

Ol Witnes blong Jeova oli traehad blong faenem olgeta man mo prij long olgeta