!Ol Merikel We Yu Yu Bin Luk!

TOK ya “merikel” i gat wan narafala mining blong hem se, “wan samting no wan wok we i bigfala tumas no i narakaen olgeta.” Yumi evriwan yumi luk finis wan kaen merikel olsemia, wan merikel we i no kamaot long paoa blong God.

Ol man oli kasem plante moa save long ol loa we oli lidim ol samting raonabaot long yumi, taswe naoia oli naf blong mekem sam samting we, bifo, oli no save mekem. Eksampol, wan handred yia bifo, bighaf blong ol man oli no tingbaot ol samting we yumi save mekem wetem ol kompiuta, televisin, ol niufala save we ol saentis oli folem blong sanem ol roket i go long skae, mo ol narafala samting we yumi yusum tede.

Sam man blong saens oli agri se oli gat smol save nomo long saed blong ol bigbigfala samting we God i wokem, taswe oli no moa save talem stret se wan bigfala samting i no save hapen nating. Oli jes talem nomo se ‘ating’ wan bigfala samting i  save hapen. Olsem nao, oli letem doa i open blong ol “merikel” we saens i save mekem long fiuja.

Sipos yumi folem faswan mining blong tok ya “merikel,” se wan samting we i kamaot “long wan paoa we i bitim paoa blong man,” be yumi evriwan yumi save talem se yumi luk sam merikel finis. Eksampol, yumi luk san, mun, mo ol sta. Olgeta ya oli kamaot “long wan paoa we i bitim paoa blong man,” oli kamaot long paoa blong God we i Wokem olgeta samting. Antap long samting ya, ?hu man i save eksplenem gud olsem wanem bodi blong yumi i wok? ?No olsem wanem bren blong yumi i wok? ?No olsem wanem wan smol bebi i save gru insaed long bel blong mama blong hem? Buk ya The Body Machine i talem se: “Bodi blong man i obei long ol stamba nev we oli lidim hem mo oli bos long hem, olsem wan mesin we i save filim ol smosmol samting mo i olsem wan enjin we i muf mo i wok hem wan, i no nidim wan man blong mekem hem i wok, mo bren blong hem i wok olsem wan kompiuta we i save mekem ol kopi blong hem wan bakegen​—bodi blong man i wan nambawan samting, wan samting we God i wokem, we i dip tumas blong yumi kasem save long hem.” God ya we i wokem “bodi blong man” i wokem wan merikel, we yumi sapraes long hem yet. I gat sam narafala merikel tu we yu luk finis, be maet yu no tingbaot olgeta olsem ol merikel.

?Yumi Save Talem Se Wan Buk i Wan Merikel?

Ol man oli seremaot moa Baebol i bitim ol narafala buk long wol. ?Yu yu ting se Baebol i wan merikel? ?Yumi save talem se hem i kamaot long wan “paoa we i bitim paoa blong man”? I tru, ol man nomo oli raetem Baebol, be oli talem se oli talemaot tingting blong God, oli no talem prapa tingting blong olgeta. (2 Samuel 23:1, 2; 2 Pita 1:20, 21) Tingbaot samting ya. Samwe 40 defren man oli bin raetem Baebol long bitim 1,600 yia. Oli mekem ol defdefren wok, sam blong olgeta oli lukaot long sipsip, samfala oli soldia, man blong pulum fis, man blong wok long gavman, dokta, pris, mo king. Nating se i olsem, ol tok blong olgeta oli laenapgud, oli givim hop long ol man, oli tru mo oli stret.

Ol Witnes blong Jeova oli stadigud long Baebol, taswe oli no ting se hem i “tok blong man nomo,” be oli luk Baebol olsem “tok blong God stret.” (1 Tesalonaeka 2:13) Long ol yia we oli pas, ol buk blong ol Witnes blong Jeova oli eksplenem olsem wanem olgeta vas blong Baebol oli joengud tugeta, mo oli laenap wetem stamba tingting blong Baebol, nating se sam man oli ting se sam vas oli agensem sam narafala vas. Samting ya i pruvum we Baebol i kamaot long God. *

I no gat wan narafala buk we ol man oli traehad blong spolem olsem Baebol. Be hem i stap yet, mo ful Baebol no sam haf blong hem oli stap long bitim 2,000 defren lanwis. Kam kasem tede, ol man oli no save spolem buk ya mo oli no save jenisim ol tok blong hem. Samting ya i pruvum we God i sapotem hem. !Baebol i wan merikel stret!

Wan Merikel “We i Laef, Mo i Stap Wok”

Ol merikel blong bifo​—hilim sik man mo mekem ded man i laef bakegen—​oli finis finis. Be yumi sua se long niufala wol we God i promes, ol merikel olsemia bambae oli hapen bakegen long ful wol. Ol merikel ya bambae oli mekem ol man oli haremgud blong olwe, mo samting ya i bitim ol samting we yumi naf blong kasem save long hem tede.

Tede, Baebol, we hem i wan merikel finis, i gat paoa blong pulum ol man blong jenisim fasin blong laef blong olgeta blong i kam gud moa, mo  yumi save talem se samting ya tu i olsem wan merikel. (Lukluk wan eksampol long bokis ya “Paoa Blong Tok Blong God,” long pej 8.) Hibrus 4:12 i talem se: “Tok blong God i wan samting we i laef, mo i stap wok, mo i sap we i sap i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.” Yes, Baebol i mekem wan bigfala wok finis blong jenisim laef blong bitim 6 milian man long fulwol, i givim wan mining long laef blong olgeta, mo wan nambawan hop long fiuja.

?Yu yu wantem stadi long Baebol, blong hem i save mekem wan merikel long laef blong yu tu?

[Futnot]

[Bokis/Foto blong pija long pej 7]

?HEM I DED FINIS NO I LAEF YET?

Folem Jon 19:​33, 34, Jisas i ded finis taem “wan long ol soldia i sperem saed blong Jisas long spia blong hem. Nao blad mo wota i kamaot wantaem, i ron i godaon.” Be ol tok long Matiu 27:​49, 50 long sam Baebol oli givim tingting se Jisas i laef yet taem samting ya i hapen. ?From wanem tufala vas ya i defdefren?

Aninit long Loa blong Moses, sipos oli kilim wan rabis man i ded mo oli hangem bodi blong hem long wan wud, i tabu blong letem bodi ya i hang wan ful naet. (Dutronome 21:22, 23) Taswe, long taem blong Jisas, sipos oli hangem wan man olsem i laef yet long en blong dei, oli brekem leg blong hem, blong man ya i ded kwiktaem. Taem ol leg blong man ya oli brok, hem i no moa save stretem bodi blong hem, blong mekem se hem i save pulum win. Hemia nao samting we ol soldia oli mekem long tufala man we oli hang long wud long tufala saed blong Jisas. Be oli no brekem tufala leg blong Jisas, taswe i luk olsem se ol soldia oli ting se Jisas i ded. Soldia ya we i sperem saed blong Jisas, maet hem i wantem meksua se Jisas i ded. Maet hem i ting se sipos Jisas i no rili ded, nao biaen hem i stat pulum win bakegen, bambae ol man oli save talem se hem i laef bakegen.

Long sam Baebol, Matiu 27:​49, 50 i talem wan narafala samting. Vas ya i talem se: “Wan narafala man i tekem wan spia mo hem i sperem saed blong Jisas, nao blad mo wota i kamaot. Nao Jisas i singaot bigwan, mo hem i ded.” Be ol tok ya long italik oli no stap long ol olfala hanraet blong Baebol. Plante man blong hae save oli ting se ol tok ya oli kamaot long buk blong Jon, be oli putum olgeta long rong ples long Matiu. Taswe, plante Baebol oli makem ol tok ya, oli putum braket raon long olgeta, oli ademap wan futnot, no oli karemaot ol tok ya.

Long Grik Baebol blong Westcott mo Hort, we mifala i yusum plante blong tanem New World Translation, oli putum tu braket raon long ol tok ya. Oli talem se “i gat plante risen blong bilif se ol man blong mekem kopi blong Baebol oli bin ademap” ol tok ya.

Taswe, i klia we ol tok blong Jon 19:​33, 34 oli tru nomo, se Jisas i ded finis taem soldia blong Rom i sperem saed blong hem.

 [Bokis/Foto blong pija long pej 8]

PAOA BLONG TOK BLONG GOD

Taem Detlef i yang yet, hem i harem nogud from we papa mama blong hem i divos. Ale, Detlef i stat tekem drag, i dring tumas, mo hem i lesin long miusik ya heavy metal, wan rok miusik we i gat wan strong bit. * Hem i joen wetem ol skinhead, hemia wan grup blong ol stronghed yangfala we oli sevemaot hea blong olgeta mo oli raf tumas. Kwiktaem nomo, Detlef i kasem trabol wetem ol polis from we hem i raf tumas.

Long 1992, long wan restorong long not is blong Jemani, 60 skinhead oli faet agensem samwe 35 punker, hemia wan narafala grup blong ol stronghed yangfala we oli laekem ol rok miusik, oli pentem hea blong olgeta, mo oli werem plante jen. Wan long ol punker, Thomas, i kasem plante tumas kil mo hem i ded from. Sam lida blong faet ya, wetem Detlef tu, oli pas long kot. Plante niuspepa mo televisin oli tokbaot kot kes ya mo panis we oli kasem, hemia se oli kalabus.

Smol taem afta we Detlef i aot long kalabus, wan Witnes blong Jeova i givim wan smol pepa long hem. Taetel blong pepa ya se “?From Wanem Laef i Fulap Tumas Long Trabol?” Wantaem nomo, Detlef i luksave se hemia i trutok, mo hem i stat blong stadi Baebol wetem ol Witnes. Samting ya i jenisim laef blong hem. Stat long 1996 kam kasem tede, hem i wan Witnes blong Jeova we i mekem wok blong God wetem strong tingting.

Siegried tu i wan punker bifo, mo hem i wan gudfala fren blong Thomas, yangfala man ya we i ded long faet. Biaen, Siegfried i kam wan Witnes tu, mo tede hem i wan elda long wan kongregesen. Taem Siegfried i go blong givim wan tok long kongregesen blong Detlef (sam samtaem mama blong Thomas i go long ol miting long kongregesen ya tu), Detlef i singaotem hem blong i kam kakae long haos blong hem. Sipos tufala i bin stap long semfala ples samwe ten yia bifo, bambae tufala i faet from we tufala i no laekem nating tufala. Be tede, tufala i lavlavem tufala olsem se tufala i brata nomo.

Detlef mo Siegfried, tufala i stap wet long taem ya we bambae tufala i save welkamem Thomas, taem hem i laef bakegen long paradaes long wol. Detlef i talem se: “Taem mi tingbaot samting ya mi krae nomo. Mi mi harem nogud tumas from samting ya we mi bin mekem.” Tufala i wantem halpem Thomas, olsem oli halpem ol narafala man tede, blong oli save Jeova mo oli haremgud long hop we i kamaot long Baebol.

!Yu luk! !Hemia nao paoa blong Tok blong God!

[Futnot]

[Tok blong pija long pej 6]

Bodi blong man i wan nambawan wok we God i wokem

[Credit line]

Anatomy Improved and Illustrated, London, 1723, Bernardino Genga