Rao i Stat Bitwin Saens Mo Jos

OLFALA man ya blong stadi long ol sta i gat 70 yia finis, mo bambae hem i ded i no longtaem. Hem i stap slip long bed blong hem, mo i stap traehad blong ridim wan buk we hem i bin raetem, we naoia hem i rere blong prentem. Yumi no sua sipos olfala man ya i save, no nogat, be buk ya bambae i jenisim bigwan tingting blong ol man long saed blong yunivas. * Mo tu, buk ya i statem wan bigfala rao insaed long Krisendom, * wan rao we i stap karem nogud frut yet long taem blong yumi.

Olfala man ya we i wan Katolik blong Polan, nem blong hem se Nicolaus Copernicus. Mo samting ya i hapen long yia 1543. Buk blong Copernicus, On the Revolutions of the Heavenly Spheres, i talem se ol planet oli stap goraon long san, be oli no stap goraon long wol. Long buk blong Copernicus, wantaem nomo hem i jenisim bilif ya we i had tumas blong kasem save long hem, se ol planet oli stap goraon long wol. Tingting blong Copernicus i defren olgeta, mo i moa isi blong kasem save long hem tu: ol planet oli stap goraon long san.

Fastaem, ol man oli no luksave se tingting ya bambae i mekem wan bigfala rao i kamaot. Wan risen, hemia se Copernicus i talemaot tingting blong hem long sam man nomo. Mo tu nating se Katolik Jos i bilif we ol planet oli stap goraon long wol, be i luk olsem se long taem ya, jos ya i rere blong akseptem sam niufala tingting blong saens. Pop hem wan i pulum Copernicus blong prentem buk blong hem. Be man we i prentem buk ya i fraet, taswe long fastok blong buk blong Copernicus, man ya i talem se bilif ya we ol planet oli stap goraon long san i wan tingting we i stanap long matematik, be i no min se hem i wan trutok blong ol saentis we oli stadi long ol sta.

Rao i Kam Bigwan

Biaen, Galileo Galilei (1564-1642) i joen long rao ya tu. Hem i wan man Itali we i stadi long ol sta, long matematik, mo long ol bigfala paoa raonabaot long yumi olsem laet mo hot, mo hem tu i wan Katolik. Galileo i yusum ol niufala glas we oli bigbigwan blong lukluk ol sta long skae, nao hem i luk sam samting we ol man oli neva luk bifo. Ol samting we hem i luk oli pulum hem blong bilif se tingting blong Copernicus i tru. Mo tu, Galileo i luk sam mak long san we tede yumi kolem se sunspots. Samting ya i agensem wan narafala bilif we ol waes man blong wol mo ol man blong jos oli tinghae long hem, hemia se san i no save jenis mo i no save lusum paoa.

 Be Galileo i no olsem Copernicus, hem i talemaot tingting blong hem long olgeta man, hem i no fraet nating. Mo hem i mekem samting ya long wan taem we i denja tumas blong agensem ol tijing blong jos. Long taem ya, Katolik Jos i tok agensem tingting blong Copernicus finis, i talem se hem i rong olgeta. Taswe, taem Galileo i talem se ol planet wetem wol tu oli stap goraon long san, mo se bilif ya i laenap wetem Baebol, wantaem nomo Katolik Jos i talem se hem i agensem tijing blong jos. *

Galileo i go long Rom blong traem pruvum bilif blong hem, be hem i no win. Long 1616, Katolik Jos i givim oda long hem se hem i mas stop blong talemaot tingting blong Copernicus. Blong sam taem, Galileo i stap kwaet. Be long 1632, hem i prentem wan narafala buk we i sapotem tingting blong Copernicus. Long 1633, Inkwisisin * i panisim Galileo se hem i mas kalabus go kasem we hem i ded. Be from we hem i olfala finis oli jenisim panis ya, mo hem i stap long wan haos we ol gad oli wajemgud hem.

Plante man oli ting se rao ya bitwin Galileo mo Katolik jos i mekem se saens i winim jos, mo hemia i min se saens i winim Baebol tu. Be bambae yumi luk long nekis haf se ol man we oli tingting olsem oli no lukluk olgeta saed blong bisnes ya.

[Ol Futnot]

[Tok blong pija long pej 3]

Copernicus

[Credit Line]

Taken from Giordano Bruno and Galilei (German edition)

[Tok blong pija long pej 3]

Galileo i traem pruvum bilif blong hem long fored blong Inkwisisin long Rom

[Credit Line]

From the book The Historian’s History of the World, Vol. IX, 1904

[Foto Credit line blong pija long pej 3]

Background: Chart depicting Copernicus’ concept of the solar system