?Bilif Blong Yu i Pulum Yu Blong Wok?

WAN kapten blong ol soldia i save se Jisas i gat paoa blong hilim wokman blong hem we haf bodi blong hem i ded. Be kapten ya i no wantem we Jisas i kam insaed long haos blong hem. Maet hem i mekem olsem from we hem i ting se hem i man nogud, no from we hem i wan hiten man. Ale, kapten ya i talem long sam olfala man Jiu, se oli karem toktok ya i go long Jisas: “Masta, mi mi no wan gudfala man. Mi no naf blong yu kam insaed long haos blong mi. Yu jes talem wan tok nomo, nao bambae hem i oraet bakegen.” Jisas i sapraes we kapten ya i bilif se hem i naf blong hilim sikman, nating se hem i stap farawe long sikman ya. From samting ya nao, Jisas i talem long ol man we oli stap biaen long hem, se: “Tru mi talem long yufala. Nating we ol laen blong Isrel, be mi mi no faenem wan long olgeta nating we bilif blong hem i strong olsem bilif blong man ya.”​—Matiu 8:​5-10; Luk 7:​1-10.

Stori ya i save halpem yumi blong tingbaot wan impoten samting long saed blong bilif. Trufala bilif i no wan samting we i stap long tingting nomo, be hem i gat wok i go wetem. Jemes, we i raetem wan buk long Baebol, i talem se: “Sipos bilif blong man i stanap hem wan, we i no gat ol gudfala wok i go wetem, bilif blong hem i ded nomo.” (Jemes 2:17) Yumi kasem save se hemia wan impoten samting, taem yumi tingbaot trufala stori blong samfala we bilif blong olgeta i kam slak, i no moa gat wok i go wetem.

Long 1513 B.K.T., ol man Isrel oli kam olsem nesen blong Jeova God taem oli mekem kontrak wetem hem long saed blong Loa. Moses i man ya we i tekem tok blong kontrak ya i go long ol man Isrel.  Hem i talemaot tok ya blong God long olgeta se: “Sipos yufala i obei long mi, mo yufala i holemgud promes ya . . . bambae [yufala] i tabu, yufala i man blong mi nomo.” (Eksodas 19:​3-6) Yes, Isrel i save stap olsem wan tabu nesen sipos hem i gohed oltaem blong obei long God.

Plante handred yia biaen, ol man Jiu oli kam ol man we oli tinghae tumas long fasin blong stadi long Loa, i bitim we oli traem folem bigfala tingting we i stap long ol loa ya. Man ya Alfred Edersheim, i raetem wan buk (The Life and Times of Jesus the Messiah) mo long wan haf blong hem, hem i raetem se: ‘Longtaem finis, [ol rabae, no tija blong Loa] we oli ol lida blong skul blong ol man Jiu, oli tekem desisen se fasin ya we man i stadi blong savegud Loa i moa impoten i bitim ol wok blong loa ya.’

I tru, long Isrel bifo, God i wantem se ol man Isrel oli mas tingting dip no stadi long ol loa blong God. God hem wan i talem long olgeta se: “Yufala i no mas fogetem ol tok ya we mi mi stap givim long yufala tede. Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.” (Dutronome 6:​6, 7) ?Be Jeova i talem se fasin ya blong stadi long saed blong Loa i moa impoten i winim wok no fasin blong folem Loa ya long laef? I gud yumi faenemaot ansa blong kwestin ya.

Stadi Blong Fulumap Hed

Ating ol man Isrel oli luk se i stret nomo blong tinghae long fasin blong stadi long Loa. Hemia from we, long wan kastom stori blong ol man Jiu, i gat wan toktok we oli talem se God hem wan i stap stadi long Loa tri aoa evri dei. Ale, yumi no sapraes we tingting blong ol man Jiu se, ‘Sipos God i stadi evri dei long Loa, ol man blong hem long wol ya tu oli mas mekem sem samting.’

Fasin ya i gohed gogo, long faswan handred yia K.T., * fasin blong ol rabae blong jekemap evri smosmol haf blong Loa mo blong traem putum mining long evri tok blong Loa ya, i go bitim mak olgeta. Fasin ya i twistim tingting blong olgeta. Taswe, Jisas i talem se: “Ol tija blong Loa mo ol Farisi . . . oli talem ol samting, be oli no mekem olsem we  oli talem. Oli stap putum ol hevi samting long solda blong ol man, we i had blong ol man oli karem, be olgeta oli no save mekem wan samting nating blong givhan long ol man, blong oli karem ol hevi samting ya.” (Matiu 23:​2-4) Ol lida ya blong skul oli putum plante plante smosmol rul long evri samting, mo oli mekem se loa i kam olsem wan hevi samting long solda blong ol man. Be ol lida ya oli gat tu fes nomo, from we oli faenem eskius blong mekem se olgeta wanwan oli no nidim blong folem ol rul ya. Antap long hemia, ol lida ya we oli spenem plante aoa blong stadi long loa, oli “tanem baksaed long ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes.”​—Matiu 23:​16-24.

!I narakaen nomo blong luk se taem we ol tija blong loa mo ol Farisi oli stap traehad blong kam stret man folem Loa ya, be semtaem oli stap brekem Loa ya bakegen! Plante handred yia i pas we oli stap mekem bigfala toktok blong faenemaot mining blong ol wod mo mining blong ol smosmol samting long Loa ya, be fasin ya i no mekem we oli kam klosap moa long God. Frut we i kamaot se oli gowe long God, sem mak olsem ol man ya we aposol Pol i talem se oli gowe long God, from we oli stap lesin long ‘ol toktok we i no blong ona long God,’ “ol krangke toktok,” mo ‘ol toktok we oli giaman nomo.’ (1 Timoti 6:​20, 21) Be i gat wan narafala problem i kamaot from fasin blong olgeta blong lukaotem save long evri smosmol samting. Oli no gat bilif we i pusum olgeta blong mekem ol gudfala wok.

Hed i Fulap Long Save, Be i No Gat Bilif Long Hat

!Tru ya, tingting blong ol lida blong skul blong ol man Jiu, i defren olgeta long tingting blong God! Smoltaem bifo we ol man Isrel oli go long Promes Lan, Moses i talem long olgeta se: “Yufala i mas lukaot gud blong obei long olgeta loa ya we mi mi givim long yufala tede. Oltaem yufala i mas tijim ol loa ya long ol pikinini blong yufala, blong tingting blong olgeta i save stap strong blong obei long olgeta tok ya blong Hae God.” (Dutronome 32:46) I klia se, ol man blong God oli mas man blong stadi gud long Loa, be i no hemia nomo. Oli mas man we oli mekem Loa ya i wok long laef blong olgeta tu.

Be, bakegen mo bakegen, nesen blong Isrel i brekem loa blong Jeova. Oli no mekem ol wok ya we oli gud mo stret. Oli “no trastem [Jeova], mo oli no obei long ol tok blong hem tu.” (Dutronome 9:23; Jajes 2:​15, 16; 2 Kronikel 24:​18, 19; Jeremaea 25:​4-7) Ale laswan samting we ol man Jiu oli mekem we i soemaot fulwan se oli lego bilif, hemia taem oli sakemaot Jisas, oli no wantem luksave se hem i Mesaea. (Jon 19:​14-16) From samting ya, Jeova God i sakemaot Isrel, mo i jusumaot ol man blong hem long ol narafala nesen.​—Ol Wok 13:46.

!Yumi mas lukaotgud se yumi no foldaon long semfala trap ya, nao yumi ting se yumi save wosipim God wetem hed we i fulap long save, be yumi no gat bilif! Taswe taem yumi stadi Baebol, yumi no jes fulumap hed blong yumi. Yumi mas putum stret save ya i go long hat blong yumi, nao bambae i gat gudfala frut i kamaot long laef blong yumi. Tingbaot sipos yu ridim plante buk long saed blong wokem garen, be yu neva planem wan sid. Hemia yu westem taem nomo. I tru se yu kasem save olsem wanem blong wokem garen, be bambae yu neva karem wan kakae long garen blong yu. Long sem fasin, ol man we oli stadi Baebol blong lanem wanem we God i wantem olgeta blong mekem, oli mas letem ol sid blong trutok ya i kasem hat blong olgeta. Long ples ya nao, ol sid ya bambae oli save gru, mo oli save karem frut long laef blong olgeta, taem oli mekem wok we i folem save ya.​—Matiu 13:​3-9, 19-21.

“Yufala i Mas Mekem Ol Samting We Tok Ya i Talem”

Aposol Pol i talem se “ol man oli stap bilif long God, taem oli harem gud nius ya.” (Rom 10:17) I stret nomo se afta we yumi harem Tok blong God, yumi mas soem bilif long Pikinini blong hem, Jisas Kraes. Samting ya nao i givim hop long yumi blong kasem laef we i no save finis. Yes, i klia se i no naf blong talem nomo se, ‘Mi mi bilif long God mo Kraes.’ Yumi mas mekem samting tu.

Jisas i talem long ol man blong hem, se oli mas gat bilif ya we i save pusum olgeta blong wok. Hem i se: “Taem yufala i karem plante frut long laef blong yufala, samting ya i save leftemap nem blong Papa blong mi, mo long fasin ya yufala i kam man blong mi.” (Jon 15:8) Biaen, haf brata blong Jisas, we nem blong hem Jemes, i raetem se: “I nogud yufala i stap . . . lesin long tok ya blong God, be yufala i no mekem. Yufala i mas mekem ol samting we tok ya i talem.” (Jemes 1:22) ?Be olsem wanem bambae yumi save samting we yumi mas mekem? Ol toktok  mo fasin blong Jisas oli soemaot wanem we yumi mas mekem blong bambae God i glad long yumi.

Taem Jisas i stap long wol, hem i wokhad long ol wok blong Kingdom, mo blong leftemap nem blong Papa blong hem. (Jon 17:​4-8) ?Hem i mekem wanem? Ating plante man oli tingbaot ol merikel we Jisas i mekem blong hilim sikman mo man we i handikap. Be Gospel blong Matiu i talemaot klia, wanem stamba wok we hem i mekem: “Jisas i stap wokbaot long olgeta ples long Galili, i stap tijim ol man insaed long ol haos blong prea blong olgeta. Hem i stap talemaot gud nius ya we God i stap kam King blong olgeta man long wol.” Jisas i no toktok nomo long ol wanwan fren no man raonabaot long hem, no long man we maet hem i mitim long taon we i stap long hem. Nogat. Hem i wokhad, i faenem plante defren rod blong go long olgeta man “long olgeta ples long Galili.”​—Matiu 4:​23, 24; 9:35.

Jisas i talem long ol disaepol blong hem tu, blong oli mekem wok ya blong pulum ol man oli kam disaepol. Hem i givim nambawan eksampol blong oli folem. (1 Pita 2:21) Jisas i talem long ol disaepol blong hem we oli holemstrong long bilif se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.”​—Matiu 28:​19, 20.

I no wan isi samting blong mekem wok blong prij. Jisas hem wan i talem se: “Yufala i go, be yufala i mas save. Mi mi sanem yufala i go, olsem ol smol sipsip we oli go long medel blong ol wael dog.” (Luk 10:3) Wan fasin blong yumi man, hemia se taem yumi kasem kil no trabol, kwiktaem nomo yumi lego samting we yumi stap mekem, from we yumi no wantem harem nogud mo yumi no wantem we tingting blong yumi i hevi. Hemia samting we i hapen long naet we ol lida blong skul mo ol soldia oli kam holem Jisas. Ol aposol oli ronwe from we fraet i winim olgeta. Biaen, long semfala naet ya, Pita i talem tri taem se hem i no save Jisas.​—Matiu 26:​56, 69-75.

Maet bambae yu sapraes blong harem se aposol Pol tu i mas traehad bigwan blong i save talemaot gud nius. Hem i raet i go long kongregesen blong Tesalonaeka i se: ‘God blong yumi i mekem tingting blong mifala i strong blong kam talemaot gud nius blong hem long yufala, long fes blong plante man we oli agens long tok ya.’​—1 Tesalonaeka 2:​1, 2.

Pol mo ol narafala aposol oli naf blong winim fraet we oli gat blong talemaot Kingdom blong God long ol narafala, mo yu tu yu save mekem olsem. Wan impoten samting we i save halpem yu blong winim fraet, hemia blong trastem Jeova. Sipos yumi bilif fulwan long Jeova, bilif ya bambae i pusum yumi blong mekem wok, mo bambae yumi naf blong mekem wanem we God i wantem.​—Ol Wok 4:​17-20; 5:​18, 27-29.

Bambae i Gat Praes From Wok We Yu Mekem

Jeova i savegud ol traehad we yumi mekem long wok blong hem. Hem i save sipos yumi sik no sipos yumi taed. Hem i save wanem we yumi fraet long hem. Taem yumi gat wari long saed blong mane, no taem bodi blong yumi i slak, no yumi harem nogud long filing blong yumi, Jeova i save olgeta samting ya.​—2 Kronikel 16:9; 1 Pita 3:12.

!Jeova i glad we i glad tumas taem hem i luk se bilif blong yumi i pusum yumi blong mekem wok blong hem, nomata wanem slak fasin no hadtaem we yumi gat! Filing we Jeova i gat long ol man blong hem we oli holemstrong long bilif, i no jes wan filing nomo, hem i gat promes blong hem tu i stap. Tabu spirit i pusum aposol Pol blong raetem se: “God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”​—Hibrus 6:10.

Yu yu save trastem ol tok ya we Baebol i talem long saed blong Jeova, se hem i wan God we ‘fasin blong hem i gud tumas, mo i stret olwe nomo, hem i God blong yu, mo hem i tru. Oltaem, tingting blong hem bambae i stap strong long yu.’ Mo hem i wan God we i stap “mekem i gud long olgeta we oli stap traem faenem hem.” (Dutronome 32:4; Hibrus 11:6) Wan woman long California, long Amerika, i tingtingbak i se: “Papa blong mi i bin mekem wok blong paenia ten yia, bifo we mifala ol pikinini i bon. Mi glad blong lesin long ol stori we hem i talem, blong soemaot se Jeova i halpem hem oltaem long wok blong prij. Plante taem, hem i yusum laswan  smol mane we hem i gat blong pem bensin blong trak blong go prij. Mo taem hem i kamhom long wok blong prij, plante taem hem i sek we i gat wan smol presen kakae i stap long doa blong haos blong hem.”

Jeova hem i givhan long yumi long saed blong bodi, be i no hemia nomo. “Hem i Papa blong yumi we i gat sore, hem i God we i stamba blong fasin blong givhan,” mo hem i halpem yumi taem yumi harem nogud, no taem yumi no moa gat paoa long saed blong spirit. (2 Korin 1:3) Wan Witnes we i kasem plante bigfala traem long ol yia we oli pas, i talem se: “Taem yu save se Jeova i stap mo yu save lukluk i go long hem blong i halpem yu, samting ya i mekem yu yu harem gud. Hem i givim janis long yu blong trastem Jeova, mo blong luk olsem wanem hem i save halpem yu.” Sipos yu gat tingting daon mo yu prea long God we i “stap ansa long ol prea,” yu save sua se bambae hem i tingbaot ol nid blong yu.​—Ol Sam 65:2.

Ol blesing mo ol gudgudfala samting we ol man oli kasem taem oli mekem wok long garen long saed blong spirit, oli plante we oli plante. (Matiu 9:​37, 38) Plante brata sista oli faenem se taem oli joen long wok blong prij, samting ya i givhan long bodi blong olgeta. Samting ya i save hapen long yu tu. Be samting we i moa impoten se, wok blong prij i save halpem yu blong frengud wetem God.​—Jemes 2:23.

Gohed Blong Mekem Samting We i Gud

Yumi mestem bigwan sipos yumi ting se Jeova i harem nogud taem wan long yumi i no save joen plante long wok blong prij from we hem i sik no from we hem i kam olfala. Yumi mestem bigwan tu sipos yumi ting olsem long saed blong olgeta we bodi blong olgeta i no strong, no oli gat bigfala wok blong mekem insaed long famle, no sam narafala risen bakegen.

Tingbaot aposol Pol. Hem i gat wan problem no maet wan sik we i stap mekem hem i slak, mo ‘tri taem hem i askem long Masta blong yumi blong i tekemaot’ samting ya. Jeova i no hilim Pol blong mekem se bambae hem i save mekem wok we i bigwan moa, nogat. Hem i talem long Pol se: “Mi mi save givhan long yu long gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” (2 Korin 12:​7-10) Taswe yu mas sua fulwan se nomata wanem hadtaem we yu stap gotru long hem, Papa blong yu long heven i glad long wanem wok we yu yu stap mekem blong hem.​—Hibrus 13:​15, 16.

God ya we i wokem yumi mo we i lavem yumi, i neva askem yumi blong mekem samting we yumi no naf blong mekem. Hem i askem nomo se, yumi mas gat bilif ya we i save pusum yumi blong mekem wok.

[Futnot]

[Tok blong pija long pej 26]

?I naf blong stadi long Loa?

[Tok blong pija long pej 29]

Bilif blong yumi i mas gat wok i go wetem