Ol Stori Blong Baebol—?Oli Stret Olsem Wanem?

CHAIM HERZOG i bin presiden long Isrel. Mordechai Gichon i ritae long wok blong hem finis be hem i holem yet hae nem blong hem olsem tija blong yunivesiti blong Tel Aviv long saed blong wok blong digim graon blong faenem ol samting blong bifo. Tufala man ya i talem tok ya we i stap insaed long buk ya Battles of the Bible i se:

“Ol stori we oli eksplenem ol faet blong Baebol . . . oli no ol stori we ol man oli save mekemap long tingting blong olgeta nomo. Nogat. Yumi kasem save samting ya taem yumi ridim Jajes japta 6 kasem 8 we i tokbaot faet we Gideon i mekem agensem ol man Midian mo ol nesen raonabaot long olgeta, nao yumi skelem wetem Faet blong Trojan we man ya Homer i tokbaot long buk blong hem, Iliad. Stori blong Homer yumi save talem se, i save hapen long eni ples nomo we i stap klosap long solwota mo we i no longwe tumas long taon . . . Be yu no save mekem samting ya long stori blong Baebol long saed blong faet blong Gideon. Ol haf blong stori ya we oli eksplenem samting we ol man Gideon oli mekem mo we oli fesem long taem blong faet ya, wetem ol aksin we tufala saed blong faet ya oli mekem bitwin olgeta​—long wan ples we i bigwan olsem sikisti kilometa—​i soemaot se hemia wan trufala faet, from we yu no save mekem semfala faet ya long wan narafala ples bakegen . . . Yumi mas agri nomo se wanem we Baebol i talem blong tokbaot ol samting we oli hapen long ol faet bifo, oli tru nomo.”

Maet yu wantem lanem moa long saed blong faet blong Gideon. Blong mekem olsem, yu save yusum map ya we i stap long pej 18 mo 19 long buklet ya “See the Good Land.” * Stori ya i stat taem “ol man Midian mo Amalek mo ol man blong draeples saed i go long is oli joen wanples mo oli kamkros long Jodan Reva, mo oli putumap ol haos tapolen blong olgeta long bigfala level ples ya Jisrehel we i stap daon long medel blong ol hil.” Gideon i singaot ol man blong ol narafala laen tu oli kam givhan long hem. Faet ya i stat klosap long springwota ya blong Harod i go kasem hil ya More mo i go kasem levelples blong Jodan Reva. Taem Gideon i ronem ol enemi blong hem oli gokros long Jodan Reva finis, hem i winim olgeta.​—Jajes 6:33–8:12.

Map we i stap insaed long buklet ya “See the Good Land” i soemaot plante ples we Baebol i tokbaot mo i givhan long yumi blong kasem save tu se graon long ples ya i olsem wanem. Wan narafala map (long pej 15) i soemaot ol ples we ol wanwan laen blong Isrel oli stap long hem. Tufala map ya oli save halpem yu blong luksave olsem wanem ol stori blong Baebol oli stret nomo.

Hemia wan tok we Profesa Yohanan Aharoni, we i ded finis, i bin talem se: “Ol stori blong Baebol oli joen plante wetem save long saed blong ol kantri we Baebol i tokbaot. Samting ya i mekem se wan man i no save kasem save long ol stori ya sipos hem i no gat save long saed blong kantri ya mo ol ples blong hem.”

[Futnot]

[Foto Credit Line blong pija long pej 32]

Background map: Based on maps copyrighted by Pictorial Archive (Near Eastern History) Est. and Survey of Israel