Tok Blong Jeova i Wan Samting We i Laef

Ol Bigfala Poen Long Buk Blong Seken Samuel

?OLSEM wanem? ?Blong luksave hae rul blong Jeova, i min se yumi mas obei long fasin we i stretgud olgeta? ?Man we i holemstrong long God i mekem samting we i stret oltaem long ae blong hem? ?Trufala God i luk se wanem kaen man i “stret gud long fes blong hem”? (1 Samuel 13:14) Buk blong Seken Samuel long Baebol i givim ol gudfala ansa long ol kwestin ya.

Tufala we i raetem buk ya, hemia Gad mo Natan. Tufala ya i profet blong Isrel bifo we tufala i bin joengud wetem King Deved. * Tufala i finis blong raetem buk ya samwe long 1040 B.K.T., hemia klosap long en blong 40 yia ya we Deved i rul. Bigfala samting we buk ya i tokbaot, hemia Deved mo fasin fren blong hem wetem Jeova. Stori ya we i pulumgud tingting blong yumi, i tokbaot olsem wanem wan nesen, we i bin seraot from faet, i kam wan kingdom we ol man blong hem oli joengud aninit long rul blong wan king we i no fraet nating. Stori ya i holem intres blong yumi from we i soemaot gud ol dip filing blong ol man.

DEVED I KAM “STRONG MOA”

(2 Samuel 1:1–10:19)

Samting we Deved i mekem taem hem i harem we Sol mo Jonatan tufala i ded, i soemaot filing we hem i gat long tufala mo long Jeova. Long Hebron, oli putumap Deved blong i kam king long laen blong Juda. Oli putumap Isboset, pikinini boe blong Sol, blong i kam king long ol narafala laen blong Isrel. Deved i gohed blong kam “strong moa,” mo samwe seven yia haf biaen, hem i king long ful nesen blong Isrel.​—2 Samuel 5:10.

Deved i winim taon blong Jerusalem, i tekemaot long han blong laen blong ol man Jebus, mo i mekem taon ya i kam kaptel blong kingdom blong hem. Long faswan taem we hem i traem blong karem bokis blong kontrak i go long Jerusalem, bigfala trabol i kamaot. Be long namba tu taem, Deved i winim, nao hem i glad tumas we i danis from. Jeova i mekem kontrak wetem Deved from wan kingdom. God i gohed blong stap wetem Deved, nao Deved i winim ol enemi blong hem.

Ansa Blong Sam Kwestin Long Saed Blong Baebol:

2:​18​—?From wanem Baebol i singaot Joab mo tufala brata blong hem se trifala pikinini blong Jeruia, we i mama blong trifala? Long Hibru haf blong Baebol, plante taem oli folem laen blong wan man tru long papa blong hem. Be maet hasban blong Jeruia i ded taem hem i no olfala yet. Sipos no, maet oli luk se i no stret blong oli putum nem blong hem long Baebol. Maet oli makem nem blong Jeruia from we hem i sista no haf sista blong Deved. (1 Kronikel 2:​15, 16) Wan taem nomo Baebol i tokbaot papa blong trifala brata ya, hemia taem i talem ples we oli berem hem long Betlehem.​—2 Samuel 2:32.

3:​29 (NW)​—?Tok ya “wan man we i tanem stik blong wokem tred” i minim wanem? Kastom blong olgeta; hemia se ol woman nao oli wivim kaliko. Taswe, maet tok ya i tokbaot ol man we oli no  naf blong mekem wok olsem go faet, nao oli mas mekem ol wok we ol woman nomo oli stap mekem.

5:​1, 2​—?Deved i kam king long ful nesen blong Isrel hamas yia afta we oli kilim Isboset i ded? I luk olsem se Isboset i statem rul blong hem blong tu yia, smoltaem afta long ded blong Sol, hemia klosap long sem taem we Deved i kam king long Hebron. Deved i stap long Hebron mo i rulum Juda blong seven yia haf. Smoltaem afta we hem i kam king blong ful nesen blong Isrel, hem i mekem Jerusalem i kam kaptel. Taswe, klosap faef yia i pas afta long ded blong Isboset, nao Deved i jes kam king blong Isrel fulwan.​—2 Samuel 2:​3, 4, 8-11; 5:​4, 5.

8:2​—?Ol man Isrel oli kilim hamas man Moab oli ded afta we oli faet? Maet oli no bin kaontem ol man blong faenem stret namba blong ol man we oli kilim olgeta oli ded, be oli mekem oli slip laen long graon blong makem laen blong olgeta. I luk olsem se Deved i mekem ol man Moab oli ledaon long laen kloklosap long olgeta long graon, nao hem i yusum wan string no wan rop blong makem longfala blong laen ya. Oli makem tri laen, tu laen oli kilim i ded, be oli no kilim i ded namba tri laen, hemia i min se oli kilim tu man long evri tri man Moab i ded.

Ol Lesen Blong Yumi:

2:1; 5:​19, 23. Bifo we Deved i go stap long Hebron, mo bifo we hem i go mekem faet agens long ol enemi blong hem, hem i askem rod long Jeova. Yumi tu, yumi mas lukaot ol advaes blong Jeova blong i lidim yumi, bifo we yumi tekem ol desisen we oli save mekem i gud no i nogud long yumi long saed blong spirit.

3:​26-30. Fasin blong givimbak i mekem trabol i kamaot.​—Rom 12:​17-19.

3:​31-34; 4:​9-12. Deved i soemaot gudfala eksampol taem hem i no givimbak mo i no agensem narafala.

5:12. Yumi neva mas fogetem se Jeova i tijim yumi long ol rod blong hem, mo se hem i openem rod blong yumi save frengud wetem hem.

6:​1-7. Deved i wantem mekem wan gudfala samting, be hem i brekem loa blong God taem hem i putum Bokis blong Kontrak antap long wan kat we buluk i pulum. Trabol i kamaot from. (Eksodas 25:​13, 14; Namba 4:​15, 19; 7:​7-9) Taem Usaha i holemtaet Bokis ya, hemia i soemaot se, nating we man i mekem samting wetem gudfala tingting, be hemia i no save jenisim loa we God i askem yumi blong folem.

6:​8, 9. Long wan taem blong trabol, fastaem Deved i harem nogud tumas, mo biaen hem i fraet​—maet hem i talem se trabol ya i fol blong Jeova. Taem yumi no wantem folem ol loa blong Jeova nao trabol i kamaot from, yumi mas lukaotgud se yumi no putum fol i go long Jeova.

7:​18, 22, 23, 26. Tingting daon we Deved i gat, fasin blong hem blong wosip long Jeova nomo, mo blong wantem presem nem blong Jeova, oli ol gudfala fasin we yumi mas folem.

8:2. Wan profet tok we i bin kamaot samwe 400 yia bifo, i kamtru. (Namba 24:17) Tok blong Jeova i kamtru oltaem.

9:​1, 6, 7. Deved i holemtaet promes we hem i mekem. Yumi tu yumi mas traehad blong holemtaet ol promes blong yumi.

JEOVA I LETEM TRABOL I KAM LONG MAN WE HEM I JUSUMAOT

(2 Samuel 11:1–20:26)

Jeova i talem long Deved se: “Bambae mi mekem we wan man long famle blong yu nomo bambae i mekem wan bigfala trabol i kam kasem yu. Bambae yu yu luk samting ya, long taem ya we bambae mi tekemaot ol woman blong yu, mi givim olgeta oli go long wan narafala man. Bambae hem i slip wetem olgeta long delaet, long klia ples nomo.” (2 Samuel 12:11) ?From wanem Jeova i talem tok ya? Hemia from sin we Deved i mekem wetem Batseba. Jeova i fogivim Deved from we hem i tanem tingting blong hem, be Deved i no save ronwe long ol trabol we i kamaot from sin ya.

Fastaem, pikinini ya we Batseba i bonem, i ded. Biaen, Amnon i repem haf sista blong hem, hemia Tamara, yangfala gel blong Deved we i no save man yet. Absalom we i stret brata blong Tamara, i wantem givimbak long Amnon nao i kilim hem i ded. Absalom i girap i mekem plan agens long stret papa blong hem, mo i putumap hem wan i kam king long Hebron. Samting ya i mekem se Deved i mas ronwe i go long Jerusalem. Absalom i slip wetem ol ten narafala woman blong papa blong hem we hem i livim olgeta oli stap blong oli lukaot long haos blong hem. Deved i kasem bak rul blong hem  nomo afta we Absalom i ded. Seba, wan man long laen blong Benjamin, i mekem wan rebelian i kamaot mo rebelian ya i stop nomo taem oli kilim Seba i ded.

Ansa Blong Sam Kwestin Long Saed Blong Baebol:

14:​7 (NW)​—?“Faea blong jakol blong mi” i pija blong wanem? Tok ya faea blong jakol we i bon smosmol, i blong soemaot wan pikinini we i laef i stap.

19:29​—?From wanem Deved i ansa olsem long tok blong Mefiboset? Taem Deved i harem stori blong Mefiboset, hem i kasem save se hem i rong taem hem i bilivim evri tok blong Jiba. (2 Samuel 16:​1-4; 19:​24-28) I klia nomo se samting ya i mekem Deved i kros, mo hem i no moa wantem harem sam narafala samting moa long saed blong bisnes ya.

Ol Lesen Blong Yumi:

11:​2-15. Ol trufala stori we oli tokbaot ol sin blong Deved, oli pruvum se Baebol hem i rili Tok blong God.

11:​16-27. Taem yumi mekem wan bigfala sin, yumi no mas traem blong haedem sin ya olsem Deved i bin mekem. Yumi mas talemaot sin blong yumi long Jeova, mo yumi mas go luk ol elda long kongregesen blong oli givhan long yumi.​—Ol Proveb 28:13; Jemes 5:​13-16.

12:​1-14. Natan i soemaot wan gudfala eksampol long ol elda long kongregesen. Olgeta oli stap blong givhan long olgeta we oli foldaon long sin, blong oli kambak long stret rod. Ol elda oli mas gat gudhan blong mekem wok ya.

12:​15-23. Deved i kasem save from wanem hem i kasem trabol, mo hemia i givhan long hem blong i mekem fasin we i stret taem trabol ya i kasem hem.

15:12; 16:​15, 21, 23. Taem man ya we i gat gudhan blong givim advaes, Ahitofel, i luksave se bambae Absalom i sidaon long jea blong king, flas tingting mo fasin griri i lidim hem blong tanem baksaed long King Deved. Taem yumi gat hed be yumi no gat tingting daon mo fasin blong stap tru, yumi save foldaon long trap ya.

19:​24, 30. Mefiboset i gat trufala tangkiu long Deved from lav mo kaen fasin blong hem. Hem i agri nomo long desisen we king i mekem long saed blong Jiba. Tangkiu we yumi gat long Jeova mo ogenaesesen blong hem i mas pusum yumi blong obei.

20:​21, 22. Taem wan man i waes, hem i save blokem trabol we i naf blong spolem fulap man wantaem.​—Prija 9:​14, 15.

YUMI FOLDAON “I GO LONG HAN BLONG JEOVA”

(2 Samuel 21:1–24:25)

Kakae i sot blong tri fulyia long Isrel from rong we Sol i bin mekem taem hem i kilim i ded plante man Gibeon. (Josua 9:15) Blong stretem rong ya, ol man Gibeon oli askem seven pikinini blong Sol blong oli save kilim olgeta i ded. Deved i givim ol seven man ya oli go long ol man Gibeon, nao ren i foldaon mo drae taem i stop. Fo lariken man Filistia oli “foldaon i go long han blong Deved wetem ol man  blong hem,” mo oli kilim fofala i ded.​—2 Samuel 21:​22, NW.

Deved i mekem wan bigfala sin taem hem i givim oda long ol man blong hem blong oli mekem wan samting we oli no gat raet blong mekem, hemia wan sensas blong kaontem olgeta man Isrel. Biaen, hem i tanem tingting blong hem from sin ya, mo i jusum blong foldaon “i go long han blong Jeova,” mo akseptem panis we Jeova i givim long hem. (2 Samuel 24:​14, NW ) Frut we i kamaot, hemia se 70,000 man oli ded from wan rabis sik. Deved i folem oda blong Jeova, nao rabis sik ya i stop.

Ansa Blong Sam Kwestin Long Saed Blong Baebol

21:​8​—?From wanem vas ya i talem se Mikal, gel blong Sol, i gat faef pikinini boe, be 2 Samuel 6:23 i talem se hem i no bonem wan pikinini nating gogo hem i ded? Plante man oli agri long tingting ya se ol faef pikinini ya oli blong sista blong Mikal, nem blong hem Merab, we hem i mared long Adriel. I luk olsem se Merab i ded taem hem i no olfala yet, mo Mikal we i no gat pikinini, i lukaot long ol boe ya.

21:​9, 10​—Ol man Gibeon oli kilim i ded tu boe blong Rispaha mo faef bubu blong Sol. ?Hamas dei Rispaha i stap lukaotgud long dedbodi blong olgeta? Oli hangem ol seven man ya long “taem we bale i raep, stret long taem we ol man oli stat blong tekem kakae blong hem i kam”​—hemia Maj no Eprel. Oli lego ol dedbodi blong olgeta oli stap antap long wan hil. Rispaha i lukaot long ol dedbodi ya long dei mo long naet, gogo kasem we Jeova i stopem drae taem blong soemaot se kros blong hem i godaon. Bigfala ren i jes foldaon afta we taem blong tekem kakae long garen i finis, hemia long Oktoba. Taswe maet Rispaha i lukaot long ol dedbodi ya blong faef no sikis manis. Biaen, Deved i mekem ol man oli berem bun blong ol dedman ya.

24:1​—?From wanem Deved i mekem wan bigfala sin taem hem i kaontem ol man? Folem Loa, i no tabu blong mekem sensas. (Namba 1:​1-3; 26:​1-4) Baebol i no talem from wanem Deved i wantem kaontem ol man. Be 1 Kronikel 21:1 i soemaot se Setan nao i pusum hem blong mekem olsem. Nating se i olsem wanem, be Joab, komanda blong ol soldia blong Deved, i save se Deved i rong taem hem i wantem kaontem ol man, nao hem i toktok blong traem blokem Deved.

Ol Lesen Blong Yumi:

22:​2-51. !Singsing blong Deved i naes tumas taem hem i tokbaot Jeova se hem i trufala God, mo se i stret nomo we yumi trastem hem fulwan!

23:​15-17. Deved i gat bigfala respek long loa we God i givim long saed blong laef mo blad, mekem se long taem ya, hem i no wantem mekem wan samting we i luk olsem se bambae i agensem loa ya. Yumi mas wokem sem fasin olsem long saed blong olgeta loa blong God.

24:10. Tingting blong Deved we hem i trenemgud folem loa blong God, i pusum hem blong tanem tingting blong hem from sin blong hem. ?Olsem wanem? ?Tingting blong yumi we yumi trenem folem Baebol, i wokgud olsem?

24:14. Deved i savegud se Jeova i gat moa sore i bitim ol man. ?Olsem wanem long yumi? ?Yumi gat sem tingting?

24:17. Deved i harem nogud from we sin blong hem i mekem se ful nesen blong Isrel i kasem trabol. Wan man we i tanem tingting blong hem from sin blong hem, i mas harem nogud from we hem i sakem doti long nem blong kongregesen.

Yumi Save Kam ‘Stret Gud Long Fes Blong God’

Namba tu king blong Isrel i pruvum se hem i wan ‘man we i stret gud long fes blong Jeova.’ (1 Samuel 13:14) Deved i neva tok agensem ol stret rul blong Jeova, mo hem i no lego God blong folem prapa rod blong hem nomo. Evri taem we Deved i mekem rong, hem i luksave sin blong hem, i agri blong Jeova i stretem hem, mo i stretem ol fasin blong hem. Deved i wan man we i holemstrong long Jeova. Yumi waes sipos yumi mekem olsem hem, antap moa taem yumi mekem sin.

Stori blong laef blong Deved i soemaot klia se, blong luksave raet blong Jeova blong rul long yumi, yumi mas agri long ol rul we hem i putumap long saed blong fasin we i stret mo fasin we i no stret, mo yumi mas traehad blong folem ol rul ya olsem ol man blong holemstrong long Jeova. Yumi save kasem mak ya. !Yumi gat bigfala tangkiu from ol tijing we yumi kasem long buk blong Seken Samuel! Ol tok ya we God i pulum ol man blong raetem long buk ya blong Baebol, oli laef mo oli gat paoa.​—Hibrus 4:12.

[Futnot]

[Tok blong pija long pej 16]

Oltaem Deved i tingbaot hu i putumap hem i kam king, nao samting ya i givhan long hem blong holem tingting daon

[Tok blong pija long pej 18]

“Bambae mi mekem we wan man long famle blong yu nomo bambae i mekem wan bigfala trabol i kam kasem yu”

Batseba

Tamara

Amnon