?Olsem Wanem Blong Bos Long Ol Filing?

?SAMTAEM ol filing we i no stret oli bos long laef blong yu? ?Yu yu isi blong kam kros, tingting i foldaon, no harem nogud? ?Yu yu tingting tumas long ol wari blong laef? ?Wanem samting i save givhan?

Fasin blong man i blong soemaot ol defdefren filing taem wan samting i hapen. Taem man i save olsem wanem blong bos long ol filing, samting ya i save mekem hem i intres moa long laef. Baebol i talem se “nating se man i waes, fasin blong daonem hem oltaem i save pusum hem blong mekem ol krangke samting.” (Prija 7:​7, NW ) Olgeta man oli harem nogud long wol ya we i fulap long raf fasin mo aksiden. Be Baebol i talem tu se: “I gud yumi stap glad long ol samting ya we yumi stap hadwok long hem.” (Prija 3:22) Blong harem gud long laef, yumi mas lanem blong wokem ol filing we oli gud. ?Olsem wanem yumi save wokem ol gudfala filing mo karemaot ol filing we i nogud?

Yumi save mekem sam samting we oli save givhan long yumi blong daonem ol nogud filing blong oli no kam strong tumas long yumi. Eksampol, taem yumi wari long sam samting we yumi no save bos long hem, i gud blong jenisim wanem we yumi stap mekem no i gud yumi go sam ples, bitim we yumi stap wari long samting ya. Yumi save go wokbaot, lesin long naes miusik, mekem eksasaes, no givhan long narafala we i gat nid. Ol samting ya i save mekem yumi harem gud mo yumi glad.​—Ol Wok 20:35.

Be rod blong karemaot tingting we i no stret hemia nao blong trastem God we i Wokem olgeta samting. Sipos tingting ya i stap, i no gowe, yumi mas ‘putum ol trabol blong [yumi] long God’ tru long prea. (1 Pita 5:​6, 7) Baebol i talem long yumi se: ‘Jeova i klosap long ol man we tingting blong olgeta i kam nogud . . . Man we i stret i save harem nogud long plante trabol, be Hae God i save tekemaot hem long olgeta trabol ya.’ (Ol Sam 34:​18, 19) ?Olsem wanem yumi save sua se God i save ‘tingbaot yumi mo sevem yumi’? (Ol Sam 40:17) Yumi save mekem olsemia, taem yumi stadi Baebol mo tingting dip long ol nambawan stori we oli soemaot olsem wanem God i kea mo i rili wantem we ol man blong hem oli stap gud.