Tingting We Ol Narafala Oli Gat Long Saed Blong Yumi—?I Impoten?

KLOSAP evri man oli laekem se narafala i presem olgeta. Yumi glad long ol gudfala toktok we narafala i talem long yumi, samting ya i mekem yumi harem gud. Taem man i glad long yumi, samting ya i mekem yumi wantem kam gud moa long wanem we yumi stap mekem. Be long narasaed, yumi harem nogud taem yumi save se sam man oli no glad long yumi. Wan tok we i daonem yumi, i save spolem traehad blong yumi. Tingting we ol narafala oli gat long saed blong yumi i save gat paoa long tingting we yumi gat long yumi wan.

I rong olgeta blong sakemaot tingting we ol narafala oli gat long saed blong yumi. Yumi save kasem gud samting, taem yumi letem ol narafala oli jekemap ol fasin blong yumi. Taem tingting blong ol narafala long saed blong yumi i stanap long ol rul blong Baebol, samting ya i save givhan long yumi mo pusum yumi blong mekem samting we i stret. (1 Korin 10:​31-33) Be, plante taem, tingting blong ol man long pablik i no stret. Tingbaot rong tingting we ol jif pris mo ol narafala man oli gat long Jisas Kraes, taem ‘olgeta oli singaot bigwan se: ‘!Nilim hem long [pos]! !Nilim hem long [pos]!’ (Luk 23:​13, 21-25) Yumi mas sakemaot ol tingting we i kamaot from giaman stori, fasin jalus, no fasin blong jajem narafala wetem rong tingting. Taswe, yumi mas skelemgud ol samting mo rere blong harem tingting we narafala i wantem talem long yumi.

?Tingting Blong Hu i Moa Impoten?

Yumi wantem se olgeta we oli joen wetem yumi long trufala wosip oli glad long yumi. Hemia i minim ol famle blong yumi we oli bilif mo ol Kristin brata mo sista blong yumi. (Rom 15:2; Kolosi 3:​18-21) Lav mo respek we ol brata sista oli soem, mo ‘bilif blong olgeta we i save givhan long yumi, olsem we bilif blong yumi tu i save givhan long olgeta,’ hemia i impoten tumas long yumi. (Rom 1:​11, 12) Wetem ‘tingting we i stap daon, yumi mas luk ol narafala man olsem we oli gud moa long yumi.’ (Filipae 2:​2-4) Mo tu, yumi wantem se ‘ol man we oli stap lidim yumi’​—hemia ol elda insaed long kongregesen​—oli glad long yumi, mo yumi tinghae long samting ya.​—Hibrus 13:17.

Mo tu yumi wantem se, “ol man we oli no Kristin oli save talem se, ‘Man ya i wan gudfala man.’ ” (1 Timoti 3:7) !I gud tumas taem ol famle we oli no bilif, ol man we yumi wok wetem olgeta, mo ol man raonabaot long yumi oli gat respek long yumi! ?Olsem wanem? ?Fasin blong yumi i save gat paoa long laef blong ol man we yumi prij long olgeta, mekem se oli save lesin long mesej blong Kingdom? Yes. Taem ol man long komuniti oli save se yumi no mekem nogud long saed blong seks, fasin blong yumi i stretgud, yumi no giaman mo yumi no stil, samting ya i save givim ona long God. (1 Pita 2:12) Be, neva bambae yumi lego ol rul blong Baebol blong ol narafala oli tinghae long yumi; mo bambae yumi no mas gat fasin tu fes blong pulum olgeta blong oli laekem yumi. Yumi mas luksave se yumi no save mekem olgeta man evriwan oli glad. Jisas i talem se: “Sipos yufala i man blong wol ya, bambae ol man blong wol ya oli save lavem yufala, from we yufala i man blong wol ya. Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala.” (Jon 15:19) ?Olsem wanem? ?Yumi save mekem sam samting blong kasem respek blong ol man we oli agensem yumi?

Kasem Respek Blong Ol Man We Oli Agens

Jisas i givim woning se: “Bambae olgeta man oli no laekem yufala nating, oli agens long yufala, from we yufala i holem nem blong mi. Be man we i stanap strong gogo kasem en blong hem, bambae God i sevem hem.” (Matiu 10:22) Sam samtaem, ol man oli save talem sam nogud giaman tok blong agensem  yumi. Maet sam haeman long gavman oli talem se yumi stap “rebel agens” long gavman. Ol man blong agens maet oli tok aot agensem yumi, blong talem se yumi wan grup blong mekem trabol. (Ol Wok 28:22) Samtaem yumi save blokem ol giaman tok ya. ?Olsem wanem blong mekem samting ya? Hemia sipos yumi folem advaes blong aposol Pita we i se: “Sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta.” (1 Pita 3:15) Mo tu, yumi mas yusum ‘ol stret tok nomo, we ol man oli no save tok nogud long hem, nao bambae yumi save mekem ol enemi blong yumi oli sem, from we oli no save faenem rabis poen long yumi.’​—Taetas 2:8.

Taem yumi traehad blong karemaot doti we oli sakem long nem blong yumi, yumi no mas wari taem oli no mekem i stret long yumi. Jisas, Pikinini blong God we i stret gud olgeta, be ol man oli jajem hem se hem i tok nogud long nem blong God, hem i wan enemi blong gavman, mo i wok wetem ol rabis spirit. (Matiu 9:3; Mak 3:22; Jon 19:12) Aposol Pol tu, oli spolem nem blong hem long ol rabis tok. (1 Korin 4:13) Jisas mo Pol tugeta, tufala i no wari long ol giaman tok ya, be tufala i bisi nomo long wok we tufala i stap mekem. (Matiu 15:14) Tufala i save se neva bambae ol enemi blong tufala i save glad long tufala, from we “olgeta man blong wol ya oli stap long paoa blong Setan.” (1 Jon 5:19) Tede tu, yumi kasem ol semfala traem. Yumi no mas fraet taem ol man blong agens oli talem ol giaman stori long saed blong yumi.​—Matiu 5:11.

Tingting We God i Gat Long Saed Blong Yumi, Hemia i Moa Impoten

Ol man oli gat defdefren tingting long saed blong yumi, mo samting ya i dipen long wanem we oli bin harem long saed blong yumi no long tingting we i pusum olgeta. Sam man bambae oli presem mo ona long yumi, be sam narafala bambae oli agensem yumi mo no laekem yumi. Be, sipos yumi letem ol rul blong Baebol i lidim yumi, yumi gat risen blong glad mo gat pis.

Aposol Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:​16, 17) Taem yumi glad blong letem Tok blong God i lidim yumi long evri samting, Jeova God mo Pikinini blong hem, Jisas Kraes, tufala i save laekem yumi. Yes, tingting blong Jeova mo Pikinini blong hem nao, i moa impoten. Tingting we tufala i gat long saed blong yumi i save soemaot se yumi sas olsem wanem. Yumi save kasem laef we i no save finis, sipos God mo Jisas tufala i glad long yumi.​—Jon 5:27; Jemes 1:12.

[Tok blong makem poen pija long pej 30]

“Mi mi sem taem narafala i presem mi, be long hat blong mi, mi wantem samting ya.”​—WAN MAN INDIA WE I RAETEM OL NAESFALA TOK RABINDRANATH TAGORE

[Tok blong pija long pej 31]

Tingting blong ol Kristin brata sista blong yumi i impoten

[Foto Credit Line blong pija long pej 30]

Culver Pictures