Kristin Bilif i Kasem Plante Man Jiu Long Faswan Handred Yia

SAMWE long yia 49 K.T., * i gat wan impoten miting long Jerusalem. Trifala we “trifala i gat nem se trifala i hae lida” blong Kristin kongregesen long faswan handred yia​—hemia Jon, Pita, mo Jemes we i brata blong Jisas​—trifala i stap long miting ya. Baebol i tokbaot tu narafala we tufala i stap tu, hemia aposol Pol mo fren blong hem Banabas. Long miting ya, oli seraotem bigfala teritori we oli mas prij long hem, blong evriwan i gat haf blong olgeta. Pol i eksplenem se: “Trifala i kam sekhan long mi mo Banabas, blong soemaot we mitufala i sem mak nomo wetem olgeta. Nao mifala evriwan i agri blong seraot ol wok, we mitufala bambae i go prij long ol man we oli no laen blong Isrel, mo olgeta bambae oli go prij long ol laen blong Isrel.”​—Galesia 2:​1, 9. *

?Hemia i minim wanem? ?Oli seraotem teritori we oli mas prij long hem, se samfala oli prij long ol man Jiu mo ol proselaet, mo samfala oli prij long ol man we oli no laen blong Isrel? ?No oli makemaot ol ples we oli mas prij long hem long wan map? Blong faenem ansa long ol kwestin ya, yumi nidim save long saed blong Diaspora, hemia ol man Jiu we oli go stap olbaot long ol ples afsaed long Palestaen.

Ol Man Jiu Long Faswan Handred Yia

?Long faswan handred yia, hamas man Jiu oli stap long ol ples afsaed long Palestaen? Plante man we oli stadi long bisnes ya, oli agri wetem buk ya Atlas of the Jewish World, we i talem se: “I hadwok blong save hamas man Jiu stret oli stap afsaed long Palestaen. Be ol man we oli gat save oli ting se jes bifo long yia 70, i gat tu milian haf man Jiu long Judia, mo bitim fo milian man Jiu long ol narafala ples we gavman blong Rom i rul long olgeta . . . Ating wan long evri ten man we oli stap aninit long rul blong Rom oli man Jiu. Mo long ol ples we plante man Jiu oli go stap long olgeta, olsem ol bigfala taon long is, maet wan long evri fo man oli man Jiu.”

Bighaf blong ol man Jiu oli stap long ol ples long Is, olsem Siria, Esia Maena, Babilon, mo Ijip. Smolhaf oli stap long Yurop. Sam long ol faswan Kristin we yumi savegud nem blong olgeta, oli bin stap long ol ples afsaed long Palestaen. Sam long olgeta, i gat Banabas blong Saepras, Prisila mo Akwila blong Pontas we biaen tufala i go stap long Rom, i gat Apolos blong Aleksandria, mo Pol blong Tasas.​—Ol Wok 4:36; 18:​2, 24; 22:3.

Ol man Jiu ya oli no fogetem prapa ples blong olgeta. Evri yia oli sanem mane blong takis blong haos prea i go long Jerusalem. Hemia wan rod blong joen long wok mo wosip we i gohed long haos prea. Wan man blong hae save, nem blong hem John Barclay, i tokbaot takis ya, i se: “I gat plante pruf blong soem se ol man Jiu afsaed long Palestaen oli neva mestem blong sanem mane ya i go, wetem sam narafala mane we ol rijman oli givim.”

I gat wan narafala samting tu we i soem se ol man Jiu oli no fogetem prapa ples blong olgeta. Evri yia, plante taosen long olgeta oli wokbaot i go long Jerusalem blong mekem ol spesel lafet.  Stori long Ol Wok 2:​9-11 i soemaot samting ya. Hem i tokbaot lafet blong Pentekos long yia 33 K.T. Ol man Jiu we oli stap long lafet ya, oli kam long Patia, Media, Elam, Mesopotemia, Kapadosia, Pontas, Esia, Frijia, Pamfilia, Ijip, Libia, Rom, Krit, mo Arebia.

Ol bigman blong haos prea long Jerusalem oli raetem leta oltaem long ol man Jiu afsaed long Palestaen. I gat save i stap blong soemaot se Gamaliel, we Ol Wok 5:34 i talem se hem i tija blong Loa, i sanem ol leta i go long Babilon mo sam narafala ples blong wol. Samwe long yia 59 K.T., taem aposol Pol i kam long Rom olsem wan presina, “ol haeman blong ol laen blong Isrel” oli talem long hem se: “Mifala i no kasem sam leta blong olgeta long Judia, blong tokbaot yu. Mo i no gat sam brata blong yumi we oli aot longwe, we oli karem nius i kam, no we oli stap talem sam tok agens long yu.” Hemia i soemaot se ol man Jiu we oli stap olbaot long ol defdefren ples oli sanem ol leta mo ripot oltaem i go long Rom.​—Ol Wok 28:​17, 21.

Ol man Jiu ya oli yusum Baebol ya Septuagint, hemia Oltesteman long Hibru we oli tanem i go long Grik lanwis. Wan buk i talem se: “I luk olsem se olgeta man Jiu we oli stap afsaed long Palestaen oli akseptem mo ridim LXX [Septuagint] olsem Baebol blong olgeta no ‘tabu hanraet.’ ” Ol faswan Kristin tu oli yusum Baebol ya plante long wok blong olgeta blong tijim ol narafala.

Hed kampani blong ol Kristin long Jerusalem i save ol samting ya. Gud nius i kasem finis ol man Jiu long Siria mo ol ples we oli stap longwe moa, wetem Damaskes mo Antiok. (Ol Wok 9:​19, 20; 11:19; 15:​23, 41; Galesia 1:21) Olgeta we oli stap long miting ya long yia 49 K.T., i luk olsem se oli stap mekem plan blong ol wok we bambae i kamaot biaen. Naoia bambae yumi luk sam vas blong Baebol we oli tokbaot olsem wanem gud nius i goaot long ol man Jiu mo ol proselaet.

Ol Trip Blong Pol Mo Ol Man Jiu Afsaed Long Palestaen

Wok we aposol Pol i kasem, hemia blong “talemaot nem blong [Jisas Kraes] long ol man we oli no laen blong Isrel, mo long ol king, mo long ol laen blong Isrel tu.” * (Ol Wok 9:15) Afta long miting ya long Jerusalem, Pol i traehad blong faenem ol man Jiu long evri ples we hem i go long hem. (Lukluk bokis long pej 14.) Hemia i soemaot se long miting ya, ating oli bin makemaot long map nomo ol defdefren teritori we bambae oli wok long hem. Tufala misinari ya, Pol mo Banabas, tufala i prij i go long ol ples long wes, mo ol narafala oli prij long ol man Jiu long prapa ples blong olgeta mo long ol narafala ples long Is.

Taem Pol mo ol fren blong hem oli aot long Antiok long Siria blong mekem seken misinari trip blong olgeta, tabu spirit i pulum olgeta oli go long wes, ale oli pastru long Esia Maena, mo biaen, oli go long Troas long not. Oli aot long ples ya oli go long Masedonia, from we oli haremsave se “God i singaot [olgeta], blong talemaot gud nius blong Jisas long ol man [Masedonia].” Biaen, oli stanemap kongregesen blong ol Kristin long sam narafala taon long Yurop, wetem Atens mo Korin tu.​—Ol Wok 15:​40, 41; 16:​6-10; 17:1–18:18.

Samwe long yia 56 K.T., taem Pol i finisim namba tri misinari trip blong hem, hem i gat plan blong go longwe moa long wes, blong faenem plante moa Jiu, folem wok we oli bin givim long hem long miting ya long Jerusalem. Hem i raetem se: “Mi mi wantem tumas blong talemaot gud nius ya long yufala tu, long Rom,” mo bakegen: “Bambae mi pas long ples blong yufala blong go long Spen.” (Rom 1:15; 15:​24, 28) ?Be olsem wanem long bigfala namba blong ol man Jiu long ol ples long Is?

Ol Man Jiu Long Is

Long faswan handred yia, Ijip nao i ples we plante moa man Jiu afsaed long Palestaen oli stap long hem, antap moa, taon ya Aleksandria we i kaptel blong Ijip. Taon ya i ples blong big bisnes mo i stamba blong kalja blong ol man Ijip. I gat plante handred taosen man Jiu long taon ya, mo i gat plante haos prea blong ol man Jiu tu. Philo, we hem i man Jiu blong Aleksandria, i talem se long taem ya, ating i gat bitim wan milian man  Jiu long Ijip. Mo i gat plante moa bakegen long nekis kantri, Libia, long taon ya Saerin mo ol ples raonabaot.

Sam man Jiu long ol ples ya oli kam Kristin. Baebol i tokbaot ‘Apolos we i bon long Aleksandria,’ ‘sam we oli man Saepras mo Saerin,’ mo “Lusias we i man Saerin.” Olgeta ya oli stap long kongregesen blong Antiok long Siria. (Ol Wok 2:10; 11:​19, 20; 13:1; 18:24) Baebol i talem samting ya nomo long saed blong wok blong ol faswan Kristin long Ijip mo ol ples raonabaot, mo i tokbaot Kristin man ya Filip tu we i prij long wan haeman blong Itiopia.​—Ol Wok 8:​26-39.

Plante man Jiu oli stap long Babilon, mo sam bakegen long ol kantri klosap, olsem Patia, Media, mo Elam. Wan man blong raetem histri i talem se, “i gat sam man Jiu oli stap long olgeta ples raonabaot long Taegris Reva mo Yufretes Reva, stat long Amenia i go long Big Bei Blong Pesia, mo i go long notis go kasem Kaspian Si, mo i go long is go kasem Media.” Encyclopaedia Judaica i talem se maet bitim 800,000 man Jiu oli stap long ol ples ya. Man Jiu ya Josephus we i raetem histri long faswan handred yia, i talem se plante taosen Jiu oli aot long Babilonia oli wokbaot i go long Jerusalem evri yia blong mekem ol spesel lafet blong olgeta.

?Olsem wanem? ?Samfala blong Babilonia we oli mekem trip ya i go long Jerusalem, hemia sam long olgeta we oli baptaes long Pentekos long yia 33 K.T.? Yumi no save, be Baebol i talem se samfala we oli harem tok blong aposol Pita long dei ya oli blong Mesopotemia. (Ol Wok 2:9) Yumi save se aposol Pita i bin stap long Babilon samwe long yia 62-64 K.T. Long ples ya, hem i raetem faswan leta blong hem mo maet seken leta blong hem tu. (1 Pita 5:13) I klia se Babilon wetem bigfala namba blong ol Jiu we oli stap long ples ya, hemia haf blong teritori we Pita, Jon, mo Jemes i kasem long miting ya we Pol i tokbaot long leta blong hem long ol Kristin long Galesia.

Kongregesen Long Jerusalem Mo Ol Man Jiu Long Ol Narafala Ples

Jemes, we hem tu i stap long miting ya, hem i wan elda long kongregesen blong Jerusalem. (Ol Wok 12:​12, 17; 15:13; Galesia 1:​18, 19) Hem i stap long Pentekos tu long yia 33 K.T., mo i luk wetem prapa ae blong hem olsem wanem plante taosen Jiu we oli kam long ol narafala ples oli bilif  long gud nius mo tekem baptaes.​—Ol Wok 1:14; 2:​1, 41.

Long taem ya mo long ol yia biaen, plante taosen Jiu oli kam long Jerusalem evri yia blong mekem ol lafet. Long ol taem olsem, ol man oli fasfas long taon ya, mo plante we oli kam long ol narafala ples oli mas slip long ol vilej raonabaot no long ol haos tapolen nomo. Long taem ya, oli gat janis blong luk ol fren blong olgeta bakegen. Encyclopaedia Judaica i talem se antap long samting ya, oli go long haos prea blong mekem wosip mo givim sakrefaes, mo blong stadi long Tora.

Yumi save se Jemes mo sam narafala blong kongregesen long Jerusalem oli mas tekem janis long taem ya blong prij long ol Jiu we oli kam long ol narafala ples. Afta we ol man blong agens oli stonem Steven i ded, ‘oli stap mekem i strong tumas long ol man blong kongregesen long Jerusalem.’ Ating long taem ya, ol aposol we oli prij oli lukaotgud. (Ol Wok 8:1) Baebol i talem se, strong tingting blong prij we ol Kristin ya oli soemaot bifo mo afta we Steven i ded, i mekem se namba blong olgeta i kam antap bigwan.​—Ol Wok 5:42; 8:4; 9:31.

?Yumi Lanem Wanem?

Tru ya, ol faswan Kristin oli rili traehad blong faenem ol man Jiu long evri ples. Long semtaem, Pol mo sam narafala oli prij long ol man we oli no laen blong Isrel long ol ples long Yurop. Oli obeigud long laswan tok we Jisas i talem long ol man blong hem, se oli mas go pulum “ol man long olgeta ples long wol” blong oli kam man blong hem.​—Matiu 28:​19, 20.

Eksampol blong olgeta i tijim yumi se i impoten blong prij folem wan plan, nao Jeova bambae i givim spirit blong hem blong halpem yumi. Mo tu, yumi luk se i moagud blong lukaot olgeta we oli gat respek long Tok blong God, antap moa long ol ples we i no gat plante Witnes blong Jeova long hem. ?Olsem wanem? ?Sam ples we kongregesen blong yu i prij long olgeta oli karem moa frut i bitim ol narafala ples? Sipos yes, maet i gud blong prij plante long ol ples ya. ?I gat sam spesel taem we ol man ples blong yu oli joen wanples? Ating ol taem ya oli gudfala taem blong tekem janis blong prij long olgeta, no prij long rod.

Yumi haremgud blong ridim ol stori blong Baebol long saed blong wok blong ol faswan Kristin. Be i gud tu blong lukaot moa save long saed blong ol samting we i hapen raonabaot long taem ya, mo long saed blong ol ples we oli prij long olgeta. Wan gudfala samting we yumi save yusum blong kasem moa save, hemia smol buk ya “See the Good Land,” we i gat plante map mo pija long hem.

[Ol Futnot]

[Bokis blong pija long pej 14]

APOSOL POL I TINGBAOT OL MAN JIU LONG OL NARAFALA PLES

BIFO LONG MITING LONG JERUSALEM LONG 49 K.T.

Ol Wok 9:​19, 20 Damaskes — ‘hem i stat go insaed long ol haos

blong prea blong ol laen blong

Isrel, i stap talemaot Jisas ya’

Ol Wok 9:29 Jerusalem — “hem i stap toktok wetem ol laen

blong Isrel ya we oli stap yusum

lanwis blong ol man Gris”

Ol Wok 13:5 Salamis, Saepras — “i stap talemaot tok blong God,

insaed long ol haos blong prea

blong ol laen blong Isrel”

Ol Wok 13:14 Antiok long Pisidia — “oli go insaed long haos

blong prea”

Ol Wok 14:1 Ikoniam — “i go insaed long haos blong prea

blong ol laen blong Isrel”

AFTA LONG MITING LONG JERUSALEM LONG 49 K.T.

Ol Wok 16:14 Filipae — “Lidia, . . . oltaem hem i stap

mekem wosip long God”

Ol Wok 17:1 Tesalonaeka — “i gat wan haos blong prea blong

ol laen blong Isrel i stap”

Ol Wok 17:10 Berea — “haos blong prea blong ol laen

blong Isrel”

Ol Wok 17:17 Atens — ‘stap mekem plante toktok insaed long

haos blong prea blong ol laen blong Isrel’

Ol Wok 18:4 Korin — “stap mekem plante toktok insaed

long haos blong prea”

Ol Wok 18:19 Efesas — ‘i go insaed long haos blong prea

blong ol laen blong Isrel, mo i mekem

plante toktok’

Ol Wok 19:8 Efesas — “long tri manis hem i stap go insaed

long haos blong prea blong ol laen

blong Isrel, i stap talemaot gud nius,

we tingting blong hem i no seksek”

Ol Wok 28:17 Rom — “i singaot ol haeman blong ol laen blong

Isrel, blong oli kam long wan miting”

[Map blong pija long pej 15]

(Lukluk niuspepa)

Olgeta we oli harem gud nius long Pentekos long yia 33 K.T., oli kamaot long ol ples ya

ILIRIKAM

ITALI

Rom

MASEDONIA

GRIS

Atens

KRIT

Saerin

LIBIA

BITINIA

GALESIA

ESIA

FRIJIA

PAMFILIA

SAEPRAS

IJIP

ITIOPIA

PONTAS

KAPADOSIA

SILISIA

MESOPOTEMIA

SIRIA

SAMERIA

Jerusalem

JUDIA

MEDIA

Babilon

ELAM

AREBIA

PATIA

Mediterenian Si

Blak Si

Red Si

Big Bei Blong Pesia