‘Olgeta We Oli Godaon Long Solwota Long Ol Sip’

AFSAED long haba blong Gloucester, long Massachusetts, Yunaeted Stet, i gat pija blong wan man i stap, we oli wokem long bras. Pija ya i soem wan man we i wantem stiarem sip blong hem blong i pastru long bigfala win. Pija blong man ya i stanap olsem memori blong plante taosen fisaman long Gloucester we oli bin ded long solwota. Long stamba blong pija ya i gat wan saen we ol toktok blong Ol Sam 107:​23, 24 i stap long hem, we i se: “Oli stap go olbaot long solwota, oli stap boskru long ol sip, blong kasem mane blong oli laef long hem. Olgeta ya oli stap luk ol samting we Hae God i mekem. Oli savegud ol bigbigfala wok ya blong hem we hem i stap mekem long solwota.”

I rili wan denja blong go huk long bigbigfala solwota blong Atlantik. Tede i gat samting olsem 30,000 man oli laef long Gloucester, be long ol yia we i pas samting olsem 5,368 man oli bin lusum laef blong olgeta long solwota taem oli go huk. Saen ya i talem se: “Sam man oli sek bigwan long ol strong notis win mo bigbigfala wef. Sam oli ded taem oli lego bigfala sip oli go long ol smol bot blong go kasem ol ples blong huk. Sam oli ded taem strong win i kafsaedem sip blong olgeta. Sam narafala oli ded taem ol stima we oli gokros long Atlantik i bangem olgeta.”

Saen ya i blong soem hadwok mo denja we ol fisaman ya oli fesem long plante handred yia we i pas. Tingbaot filing blong olgeta we oli no gat hop from we oli lusum ol man blong olgeta, ol papa, ol brata, mo ol pikinini boe blong olgeta. Be Jeova God i tingbaot ol wido, ol pikinini we oli no gat papa, mo olgeta we oli ded long solwota. Aposol Jon i tokbaot wanem bambae i kamtru long fiuja i se: “Olgeta man we oli ded long solwota, oli aot long solwota oli kam. Ded wetem Hom blong ol dedman tufala i no moa save holem olgeta.” (Revelesen 20:13) Long taem ya we ol man bambae oli laef bakegen, “olgeta man we oli ded long solwota “ bambae oli luk ol bigbigfala ‘wok ya we Hae God i mekem.’