Oli Talemaot Gud Nius Long Olgeta We Sora i Fas

“!OLI mekem yufala i haremgud long saed blong spirit!” Hemia nao wanem we daerekta blong wan haos blong ol olfala we oli ritae long Navalcarnero, Madrid, long Spen, i talem, taem ol Witnes blong Jeova oli go long haos ya. ?Wanem samting i pusum hem blong talem olsem?

Sam long ol olfala we oli stap long Rosas del Camino, sora blong olgeta i fas. Be, from we ol Witnes oli traehad blong lanem Saen Lanwis blong Spen, oli naf blong storian wetem olgeta ya we sora i fas. Daerekta ya i talem gudfala toktok long ol Witnes from we oli spenem taem blong olgeta blong tijim ol save blong Baebol long ol man we oli nidim, mo oli no askem mane from. Hem i luk gudfala frut we i kamaot from tijing blong gud nius blong Kingdom, long ol man we oli stap long ples ya. Mo olgeta we oli stap long haos ya​—speseli olgeta we sora i fas no olgeta we oli no save lukluk gud​—oli glad bigwan taem ol Witnes oli kam storian wetem olgeta.

Eulogio, wan long olgeta we i stap long ples ya, we i blaen mo sora blong hem i fas, hem i stap stadi Baebol wetem ol Witnes blong Jeova. Wan dei taem hem i stap mekem stadi blong hem, wan narafala olfala i kam mo i givim wan smol pepa long Witnes we i stap mekem stadi blong Eulogio. Long pepa ya oli raetem ol naesfala toktok blong soemaot tangkiu from samting we ol Witnes oli bin mekem. Taetel blong smol toktok ya hemia se “Blong Kam Wan Witnes.” Wan haf blong toktok ya i rid olsem se: “Ol Witnes oli folem wan fasin blong laef we i gat mining, mo oli glad blong kasem waes long Jeova. Oli go oltaem long haos blong ol man from we oli trastem Jeova.”

Yes, plante Witnes raon long wol oli trastem Jeova, taswe oli lanem saen lanwis blong toktok wetem ol man we sora i fas long kantri blong olgeta. Long rod ya, oli save serem gudfala hop we i stap long Baebol blong leftemap tingting blong olgeta ya.