“Wan Long Ol Beswan Dei Long Laef Blong Mi”

WAN ogenaesesen we nem blong hem Beyondblue, we gavman blong Ostrelia i fandem, i talem se: “Tingting we i foldaon olgeta hem i wan trabol we i kamaot plante taem moa, mo maet i wan long ol bigfala problem long saed blong tingting, we i kasem ol yangfala.” Ol man we oli stadi long saed ya, oli faenemaot se evri yia raonabaot 100,000 yangfala long Ostrelia oli safa from tingting we i foldaon olgeta.

Ol yangfala Kristin tu oli safa from tingting we i foldaon olgeta. Be, bilif we plante blong ol yangfala ya oli gat long Jeova i givhan long olgeta blong winim ol nogud filing mo kasem gudfala frut long yangtaem blong olgeta. Taem oli mekem olsem, fasin blong olgeta i gat paoa long laef blong ol narafala. ?Olsem wanem?

Tingbaot stori blong gel ya Claire we i gat 18 yia. Hem mo mama blong hem i joen long wan kongregesen blong ol Witnes blong Jeova long Melbourne. Taem papa blong Claire i ronwe long famle, tingting blong Claire i foldaon olgeta. Be bilif blong hem i strong long Jeova, Papa blong hem long heven. Wan dei, Lydia we i wan dokta, i kam long haos blong Claire blong jekap long mama blong Claire we i sik. Afta, dokta ya i glad blong karem Claire i go long stoa. Taem tufala i stap go, hem i askem long Claire sipos hem i gat wan boefren. Claire i eksplenem se, olsem wan Witnes blong Jeova hem i no stap fren olbaot wetem ol boe jes blong pleplei nomo. Dokta i sapraes long tok we Claire i talem. Ale, Claire i talem long dokta ya olsem wanem Baebol i givhan long hem blong mekem ol stret desisen long laef. Biaen, Claire i glad blong givim wan buk long saed blong Baebol we i givhan bigwan long hem wan. Buk ya Ol Kwestin We Ol Yangfala Oli Askem​—Ol Ansa We Oli Wok Gud.

Tri dei afta we Lydia i kasem buk ya, hem i telefon i go long mama blong Claire blong talem se hem i laekem buk ya tumas. Ale, hem i askem sikis moa buk blong givim long ol man we oli wok wetem hem. Taem Claire i kam blong givim ol buk long dokta ya, dokta i talemaot se hem i sapraes long bilif blong Claire. Taem Claire i askem sipos dokta ya i wantem stadi Baebol, dokta i agri.

Blong sam manis, Claire i mekem stadi wetem dokta ya taem hem i spel long medel dei. Nao Lydia i askem long Claire sipos hem i save givim wan tok long saed blong tingting we i foldaon olgeta long wan semina blong olgeta. Claire i agri, nating se hem i fraet smol. Bitim 60 man oli kam long semina ya. Fo dokta we oli stadi long tingting blong man, oli givim tok long miting ya. Biaen, i taem nao blong Claire i givim tok blong hem. Hem i leftemap poen ya se i impoten blong ol yangfala oli wokem wan gudfala fasin fren wetem God. Hem i eksplenem se God i kea bigwan long ol yangfala mo Hem i halpem olgeta we oli lukluk i go long hem blong kasem paoa. Mo tu, Claire i talemaot se i no longtaem bambae Jeova i finisim olkaen sik blong bodi mo blong tingting tu. (Aesea 33:24) ?Wanem frut i kamaot from gudfala witnes ya?

Claire i talem se: “Afta long miting ya, plante oli kam long mi blong talem se oli glad blong harem wan yangfala i tokbaot God olsem. Mi givimaot 23 kopi long buk ya Ol Kwestin We Ol Yangfala Oli Askem. Tri gel we i kam long mitng ya oli givim telefon namba blong olgeta long mi. Naoia wan long ol gel ya i stadi Baebol. Hemia wan long ol beswan dei long laef blong mi.”