“Evri Man i Gat Basket Blong Hem Blong Karem”

“Bambae yumi evriwan i mas talemaot olgeta fasin blong yumi long fes blong God.”—ROM 14:12.

1. ?Olsem wanem trifala Hibru man i karem basket blong trifala?

 TRI yangfala Hibru man we trifala i stap long Babilonia oli fesem wan desisen we i save sevem laef blong trifala no i save givim ded. ?Bambae trifala i bodaon long wan bigfala aedol olsem loa blong kantri ya i talem se ol man oli mas mekem? ?Bambae trifala i talem ‘no’ mo kasem panis ya we oli sakem trifala long wan bigfala faea? Trifala ya, Sadrak, Mesak, mo Abednego, i no gat taem blong askem narafala wanem we trifala i mas mekem. Mo trifala i no nidim blong askem narafala tu. Wantaem nomo, trifala i talem se: “King . . . yu yu mas save se bambae mitrifala i no save mekem wosip long ol god blong yu, mo bambae mitrifala i no save bodaon long aedol ya we yu stanemap.” (Daniel 3:​1-18) Yes, trifala Hibru ya i karem prapa basket blong trifala.

2. ?Hu i tekem desisen we Paelat i mas tekem long saed blong Jisas Kraes? ?Hemia i min se hed gavman ya blong Rom i no gat fol from ded blong Jisas?

² Klosap sikis handred yia biaen, Ponjes Paelat we i hed gavman, i lesin long ol poen we oli talemaot agens long Jisas Kraes. Hem i skelemgud ol tok blong olgeta, nao hem i luksave se Jisas i no mekem wan samting we i mas ded from. Be ol man oli singaot strong se Jisas i mas ded. Paelat i traem blong jenisim tingting blong olgeta, be nogat. Nao hed gavman ya Paelat i soemaot se hem i no wantem karem basket blong hem, ale hem i folem tingting blong ol man. Hem i wasem han blong hem mo i talem se: “Bambae i no gat poen long mi from ded blong man ya, blad blong hem i no stap long mi.” Nao hem i letem Jisas i go long han blong olgeta we oli nilim hem long pos. Yes, Paelat i no wantem mekem prapa wok blong hem blong tekem desisen long saed blong Jisas Kraes. Hem i letem ol narafala oli mekem desisen blong hem. Nating se hem i wasem han blong hem hamas taem, hem i no save tekemaot fol we hem i gat from panis blong ded we Jisas i kasem.​—Matiu 27:​11-26; Luk 23:​13-25.

3. ?From wanem yumi no mas letem narafala i mekem desisen blong yumi?

³ ?Olsem wanem long yu? ?Taem yu mas mekem wan desisen, yu yu olsem trifala Hibru ya, no yu yu letem narafala i mekem desisen blong yu? I no isi blong mekem ol gudfala desisen. Blong jusgud yumi mas bigman long tingting blong yumi. Ol papa  mama oli mas mekem ol gudfala desisen blong ol smosmol pikinini blong olgeta. Mo i hadwok moa blong mekem desisen taem ol samting i fasfas mo i gat plante samting blong skelem. Be wok ya blong mekem ol desisen i no hevi bitim mak. Hem i no wan “trabol” no wan baden we narafala bigman long saed blong spirit i mas karem blong yumi. (Galesia 6:​1, 2) Defren olgeta, hem i wan wok we ‘yumi evriwan i mas [mekem] long fes blong God.’ (Rom 14:12) Baebol i talem se: “Evri man i gat basket blong hem blong karem.” (Galesia 6:​5, Nyutesteman wetem Ol Sam long Bislama) ?Oraet, olsem wanem yumi save mekem ol waes desisen? Fastaem, yumi mas luksave se yumi man nomo, mo yumi mas kasem save wanem samting yumi nidim blong givhan long yumi.

Wan Impoten Samting We Yumi Nidim

4. ?Stori blong faswan man mo woman i mas tijim yumi long wanem impoten samting long saed blong ol desisen?

⁴ Bifo we bifo olgeta, faswan man mo woman i tekem wan desisen we i mekem bigfala trabol i kamaot. Tufala i jusum blong kakae frut blong tri ya we i olsem wan saen blong ol save we i gud mo ol save we i nogud. (Jenesis 2:​16, 17) ?Wanem i pusum tufala blong tekem desisen ya? Baebol i talem se: “Woman ya i luk we tri ya i gud tumas, mo frut blong hem tu i gud blong kakae, mo hem i wantem tumas blong kasem waes ya we frut ya i save givim long hem. Nao from samting ya, hem i tekem sam frut blong tri ya, i kakae, mo i givim long man blong hem, mo man blong hem tu i kakae.” (Jenesis 3:6) Iv i tekem desisen blong kakae frut ya from we hem i stap tingbaot hem wan nomo. Adam i folem hem. Ale tufala i mekem se ‘ol man oli stap ded mo oli mekem sin.’ (Rom 5:12) Stori ya blong Adam mo Iv i mas tijim yumi long wan impoten samting long saed blong yumi ol man: Sipos yumi no letem God i lidim yumi, i isi nomo blong yumi mekem ol nogud desisen.

5. ?Olsem wanem Jeova i stap lidim yumi? ?Mo yumi mas mekem wanem blong kasem help blong hem?

⁵ !Yumi glad tumas we Jeova God i givim advaes blong lidim yumi! Baebol i talem se: “Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’ ” (Aesea 30:21) Jeova i stap toktok long yumi tru long Tok blong hem, Baebol. Yumi mas stadi Baebol mo kasem stret save blong hem. Blong mekem ol gudfala desisen, yumi mas tekem “strong kakae [we] i blong olgeta we oli kam bigman finis.” Mo tu, yumi “stap traehad longtaem finis, nao [yumi] naf blong jusumaot wanem fasin i gud mo wanem fasin i nogud.” (Hibrus 5:14) Yumi save kam naf blong jusumaot ol gudfala fasin sipos yumi mekem wanem we yumi lanem long Tok blong God i wok long laef blong yumi.

6. ?Olsem wanem blong gat wan tingting we i lidim yumi blong haremsave se yumi mekem i stret no yumi mekem i no stret?

⁶ Yumi bon wetem wan impoten samting we i save givhan long yumi blong mekem ol gudfala desisen, hemia fasin ya blong haremsave samting we i stret mo samting we i no stret. Fasin ya i save mekem se tingting blong yumi i jajem yumi, ‘samtaem yumi harem long tingting blong yumi se yumi mekem i stret, mo samtaem yumi harem se yumi mekem i no stret.’ (Rom 2:​14, 15) Be blong tingting blong yumi i mekemgud wok ya, hem i mas gat save, hemia stret save long Tok blong God. Mo tu, tingting blong yumi i mas wekemap yumi no stikim yumi. Yumi trenem tingting blong yumi blong mekem olsem taem yumi folem Tok blong God. Sipos yumi no gat stret save long tingting blong yumi, ol samting olsem ol kastom mo fasin blong ol manples blong yumi bambae oli gat paoa long tingting blong yumi. Ples we yumi laef long hem, mo tingting blong ol narafala man, hemia tu i save lidim yumi i gorong. ?Wanem bambae i hapen sipos tingting blong yumi i stikim yumi bakegen mo bakegen be yumi no lesin, yumi gohed nomo blong mekem samting we i agensem ol rul blong God? Sloslo, i save kam olsem we ‘Setan i bonem mak blong hem long tingting blong yumi.’ Yes, tingting blong yumi i kam olsem skin we faea i bonem nao taem i kamgud bakegen skin ya i ded, i no moa soa taem yumi stikim. (1 Timoti 4:2) Be tingting we yumi trenem folem Tok blong God i defren. Yumi save trastem tingting olsem blong lidimgud yumi.

7. ?Wanem impoten samting we yumi nidim blong mekem ol waes desisen?

⁷ Ale, impoten samting we yumi nidim blong karem prapa basket blong yumi mo mekem ol waes desisen, hemia stret save blong Baebol. Mo tu, yumi mas naf blong mekem ol save ya i wok long laef blong yumi. Taem yumi mas tekem wan desisen, i nogud yumi hareap tumas we yumi no kasem olgeta save we yumi nidim. I moagud yumi tekem taem blong lukaot ol rul blong Baebol fastaem, mo yusum tingting blong yumi blong folem ol rul ya long desisen blong yumi. Nating se yumi mas tekem wan desisen  kwiktaem olsem Sadrak, Mesak, mo Abednego, be sipos yumi gat stret save long Tok blong God mo yumi bin trenem tingting blong yumi blong lidim yumi folem save ya, ale yumi rere finis blong tekem desisen ya. Sipos yumi traehad moa blong kam bigman long saed blong spirit, samting ya i save mekem se yumi kamgud moa blong mekem ol desisen. Blong luksave samting ya, bambae yumi tokbaot tu desisen we yumi evriwan i fesem long laef blong yumi.

?Yumi Jusum Blong Kampani Wetem Hu?

8, 9. (a) ?Wanem ol rul blong Baebol we oli soemaot se yumi no mas jusum ol fren we oli no stret? (b) ?Ol fren we oli no stret i minim nomo ol man we oli no folem ol gudfala fasin? Eksplenem.

⁸ Aposol Pol i raetem se: “Yufala i no go krangke. . . . Ol stret man nomo, be ol fren blong olgeta we oli no stret, oli save spolem fasin blong olgeta.” (1 Korin 15:33) Jisas Kraes i talem long ol disaepol blong hem se: “Yufala i no man blong wol ya.” (Jon 15:19) Taem yumi kasem save long tufala rul ya, kwiktaem nomo yumi luksave se i nogud blong kampani wetem ol man we oli slip olbaot, oli stilim man no woman blong narafala, oli man blong stil, oli dring lusum hed, no oli mekem sam narafala nogud fasin. (1 Korin 6:​9, 10) Be taem yumi gohed blong kasem save long trutok blong Baebol, yumi luksave se i nogud tu blong spenem taem blong lukluk ol semkaen man ya long ol vidio kaset, long televisen, long kompiuta, no long ol buk we yumi ridim. Hemia i olsem we yumi stap kampani wetem olgeta. Sem mak long ol man we yumi save toktok wetem olgeta long ol web saet long Intenet. “Oli haedem prapa fasin blong olgeta” mo oli save spolem yumi.​—Ol Sam 26:​4, NW.

⁹ ?Olsem wanem long ol man we oli gat wan klin laef be oli no bilif long trufala God? ?I oraet blong yumi kampani wetem olgeta? Baebol i talem se: “Olgeta man blong wol ya oli stap long paoa blong Setan.” (1 Jon 5:19) Sloslo yumi luksave se ol fren we oli no stret i no minim nomo ol man we oli agri wetem rabis fasin no we oli mekem rabis fasin, nogat. Taswe, yumi waes sipos yumi fren nomo wetem olgeta we oli lavem Jeova.

10. ?Wanem i save givhan long yumi blong mekem ol stret desisen long saed blong ol man blong wol we yumi mas joen wetem olgeta?

¹⁰ Be yumi no save stap longwe long evri man long wol, mo Baebol i no talem se yumi mas mekem olsemia. (Jon 17:15) Taem yumi joen long Kristin wok blong prij, mo taem yumi go long skul mo long wok, yumi joen wetem ol man blong wol. Wan Witnes we i mared wetem wan man we i no Witnes, ating hem i mitim plante moa man blong wol i bitim ol narafala Witnes. Be sipos yumi bin trenem tingting blong yumi blong jusumaot wanem fasin i stret mo wanem fasin i no stret, yumi luksave se fasin blong joen wetem ol man blong wol long wok, skul, no long wok blong prij, i no sem mak long fasin blong mekem fren wetem ol man blong wol. (Jemes 4:4) From samting ya, yumi save tekem desisen se: ?Bambae yumi joen long samting we ol yangfala long skul oli mekem tugeta afta we skul i finis, olsem spot no danis, no nogat? ?Mo bambae yumi joen wetem ol man we oli wok wetem yumi long ol lafet mo kakae we oli mekem tugeta, no nogat?

Wok We Yumi Jusum

11. ?Wanem faswan samting we yumi mas tingbaot taem yumi jusum wan wok?

¹¹ Taem yumi folem ol rul blong Baebol long laef blong yumi olsem wan bigman long saed blong spirit, samting ya i halpem yumi blong mekem ol stret desisen long saed blong wok blong winim mane blong ‘lukaot long famle blong yumi.’ (1 Timoti 5:8) Faswan samting blong tingbaot, hemia wanem kaen wok yumi mekem. I no stret nating blong tekem wan wok we i agensem ol loa blong Baebol. Taswe, ol trufala Kristin oli no save tekem wan wok we oli mas mekem wosip long ol aedol, oli mas stil, oli mas yusum blad long fasin we i no stret, no oli mas mekem wan narafala fasin we i agensem Baebol. Sipos bos blong yumi i askem long yumi blong giaman no blong trikim narafala, yumi no save mekem.​—Ol Wok 15:29; Revelesen 21:8.

12, 13. ?Wanem sam narafala samting we yumi mas tingbaot taem yumi jusum wan wok?

¹² Maet kaen wok we yumi jusum i no agensem ol loa blong Baebol. Be taem yumi kasem moa save long trutok mo yumi kam naf blong jusumaot wanem fasin i stret mo wanem fasin i no stret, yumi luksave se i gat sam narafala samting tu we yumi mas skelem. ?Olsem wanem sipos wok blong yumi i joen wetem samting we i no stret folem Baebol, olsem, maet yumi mekem wok blong ansarem telefon, be hemia long wan kasino? Mo tu, yumi mas tingbaot ples we wok blong yumi i stap long hem mo hu i pem yumi. Tingbaot: ?Sipos wan Kristin brata i gat prapa bisnes blong hem blong pentem ol haos, bambae hem i tekem wan wok blong pentem wan jos blong Krisendom? Sipos hem i mekem olsem, i olsem we hem i agri long giaman skul ya.​—2 Korin 6:​14-16.

 ¹³ ?Be sipos yumi wok blong wan bos, nao bos ya i saenem kontrak blong pentem wan jos, bambae yu mekem wok ya? I gat sam samting bakegen we yu mas tingbaot: ?Bambae hem i putum yu blong yu bos long wok ya, no bambae yu yu wan wokman nomo? ?Yu nomo bambae yu mekem wok ya, no bambae i gat ol narafala wokman tu? Tingbaot wok ya blong karem ol leta blong postofis oli go long haos blong ol man. Wok ya i stret nomo. ?Be olsem wanem sipos yu mas karem ol leta oli go long wan ples we oli yusum blong mekem samting we i agens long loa blong God? Rul we i stap long Matiu 5:45 i save givhan long yu blong mekem desisen ya. Narafala samting we yu mas tingbaot: ?Sipos yu gohed blong mekem wok ya evri dei, bambae tingting blong yu i trabol from? (Hibrus 13:18) Tru ya, blong karem prapa basket blong yu mo tekem gudfala desisen long wok we yu jusum, yu mas lanem blong luksave wanem fasin i stret mo wanem fasin i no stret mo yu mas trenem tingting blong yu blong lidim yu long rod we i stret.

‘Long Olgeta Samting We Yu Mekem, Tingbaot Hem’

14. ?Nomata wanem desisen yumi mekem, i gud we oltaem yumi tingbaot wanem?

¹⁴ ?Olsem wanem long ol narafala desisen, olsem jus we yumi mekem long saed blong edukesen, mo long saed blong meresin mo tritmen we yumi save akseptem? Nomata wanem desisen yumi mekem, yumi mas lukaot ol rul blong Baebol long saed ya, mo biaen yumi mas yusum tingting blong yumi blong mekem ol rul ya oli wok long desisen ya. Solomon we i king blong Isrel bifo, i talem ol waes tok ya se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”​—Ol Proveb 3:5, 6.

15. ?Ol faswan Kristin oli tijim yumi long wanem samting long saed blong ol desisen?

¹⁵ Plante taem, jus we yumi mekem i save mekem i gud no i nogud long narafala. Yumi mas tingbaot samting ya tu. Olsem nao, Loa blong Moses i putum tabu long sam kaen kakae. Be ol Kristin long faswan handred yia oli no moa stap aninit long Loa ya. Taswe oli gat raet blong kakae samting we Loa i bin talem se i no klin, sipos i no gat wan narafala risen we i mekem se i rong. Be traem ridim tok blong aposol Pol long saed blong mit we maet samfala oli bin givim olsem sakrefaes long wan giaman god. Hem i se: “Sipos mit i save spolem brata no sista blong mi, bambae mi mi no moa save kakae mit bakegen samtaem. Mi no wantem mekem wan samting nating, we i save mekem wan narafala Kristin i foldaon long sin.” (1 Korin 8:​11-13) Pol i pulum ol faswan Kristin blong tingbaot ol narafala mo blong no mekem wan samting we tingting blong ol narafala i save trabol from, mo we oli save foldaon from. Yumi tu, yumi no mas mekem we narafala i “save trabol” mo foldaon from desisen blong yumi.​—1 Korin 10:​29, 32.

Lukaot Waes Blong God

16. ?Olsem wanem prea i save givhan long yumi long ol desisen?

¹⁶ Samting we yumi nidim tumas blong givhan long yumi blong mekem ol desisen, hemia prea. Disaepol Jemes i talem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.” (Jemes 1:5) Wetem ful tras long Jeova, yumi save prea mo askem hem blong givim waes we yumi nidim blong mekem gudfala desisen. Taem yumi talemaot long trufala God ol wari blong yumi mo askem hem blong lidim yumi, tabu spirit i save halpem yumi blong kasem save gud long ol vas we yumi stap ridim, mo i save mekem se yumi tingbaot sam moa vas we yumi mestem.

17. ?Olsem wanem narafala i save halpem yumi long saed blong ol desisen?

¹⁷ ?Olsem wanem? ?Ol narafala oli save givhan long yumi blong tekem desisen? Yes, Jeova i save givhan long yumi tru long samfala we oli bigman long saed blong spirit insaed long kongregesen. (Efesas 4:​11, 12) I stret nomo we yumi toktok wetem olgeta, antap moa sipos desisen we yumi mas tekem i hevi tumas. Olgeta we oli gat bigfala fasin luksave mo oli bin fesem plante samting long laef blong olgeta, oli save talem sam moa rul blong Baebol we oli laenap wetem desisen blong yumi. Oli save halpem yumi blong ‘luksave wanem fasin i stret gud olgeta blong yumi save jusumaot.’ (Filipae 1:​9, 10) Be i gat wan woning we yumi mas lesin long hem: Yumi mas lukaot blong no letem narafala i mekem desisen blong yumi. Hemia basket blong yumi we yumi mas karem.

 ?I Gat Gud Frut Oltaem?

18. ?I gat gudfala frut oltaem from gudfala desisen?

¹⁸ ?Taem yumi tekem ol desisen we oli stanap long ol rul blong Baebol mo oli no mekem tingting blong yumi i trabol, i gat gud frut i kamaot oltaem? Yes, be maet i no kamaot kwik. Fastaem, maet desisen blong yumi i mekem se yumi fesem hadtaem. Sadrak, Mesak, mo Abednego, trifala i save se maet trifala i mas ded from desisen ya blong no bodaon long bigfala aedol ya. (Daniel 3:​16-19) Ol aposol tu, taem oli talem long kot blong ol man Jiu se oli mas obei long God i bitim we oli obei long man, kot i givim oda blong ol soldia oli wipim olgeta bifo we oli letem olgeta oli gofri. (Ol Wok 5:​27-29, 40) Mo tu, ‘samting we yumi no tingbaot i save kamaot long yumi enitaem nomo’ mo i save mekem se desisen blong yumi i karem frut we i defren. (Prija 9:​11, NW ) Be sipos yumi kasem trabol afta we yumi mekem wan gudfala desisen, yumi save sua se Jeova bambae i halpem yumi blong stanap strong mo biaen bambae hem i blesem yumi.​—2 Korin 4:7.

19. ?Olsem wanem blong no fraet blong karem basket blong yumi mo tekem ol desisen?

¹⁹ Ale, taem yumi mekem desisen, yumi mas lukaot ol rul blong Baebol long saed ya mo yumi mas yusum tingting blong yumi blong folem ol rul ya long desisen blong yumi. !Yumi talem tangkiu tumas long Jeova from help we hem i givim tru long tabu spirit blong hem mo tru long olgeta long kongregesen we oli bigman long saed blong spirit! Yumi mas yusum ol samting ya we hem i givim blong halpem mo lidim yumi, mo yumi no mas fraet blong karem basket blong yumi blong tekem ol waes desisen.

?Yu Yu Lanem Wanem?

• ?Wanem faswan impoten samting we yumi nidim blong mekem ol gudfala desisen?

• ?Taem yumi kam bigman moa long saed blong spirit, olsem wanem samting ya i save givhan long yumi blong jusum ol gudfala fren?

• ?Taem yumi tekem desisen long saed blong wok, wanem sam samting we yumi mas skelem?

• ?Wanem help we yumi save kasem blong mekem desisen?

[Kwestin]