Jeova i Trenem Ol Man Blong Lukaot Long Ol Sipsip Blong Hem

“Jeova hem wan i givim waes. Save mo fasin luksave, oli kamaot long maot blong hem.”​—OL PROVEB 2:​6, NW.

1, 2. ?From wanem ol man we oli baptaes oli traehad blong kasem moa wok long kongregesen?

 NICK i mekem wok blong elda seven yia finis. Nao hem i talem se: “Taem oli putumap mi olsem wan elda, mi glad we mi glad. Long tingting blong mi, blesing ya i givim janis long mi blong mekem moa long wok blong Jeova. Mi harem se mi mas soemaot bigfala tangkiu long hem from ol samting we hem i mekem blong mi. Mo tu, mi wantem yusum ful paoa blong mi blong halpem olgeta long kongregesen, mo blong givhan long olgeta long sem fasin we ol narafala elda oli bin givhan long mi.” Yes, Nick i glad. Be hem i wari lelebet tu. Hem i se: “Taem oli putumap mi, mi no gat 30 yia yet. Mi wari se mi no naf​—se mi sot long waes mo fasin luksave—​mo mi no save mekem gud wok ya blong lukaot long kongregesen.”

² Olgeta we Jeova i putumap blong oli lukaot long ol sipsip blong hem, oli gat plante risen blong glad. Aposol Pol i mekem ol elda long Efesas oli tingbaot wan risen. Hem i talem bakegen ol tok ya blong Jisas se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Taem wan man we i baptaes i mekem wok blong man blong givhan no elda, hemia janis blong givim moa presen long Jeova mo long kongregesen. Tingbaot ol man blong givhan. Oli wok wetem ol elda mo oli givhan long olgeta. Mo tu, oli lukaot long plante narafala impoten wok we i tekem plante aoa blong mekem. Lav we ol brata ya oli gat long God mo long ol narafala man, i pusum olgeta blong mekem ol impoten wok ya.​—Mak 12:​30, 31.

3. ?From wanem sam brata oli fraet blong traehad blong kasem wok long kongregesen?

³ ?Olsem wanem long Kristin man we i fraet blong traehad blong kam man blong givhan mo elda from we hem i harem se i no naf? Maet hem i olsem Nick, we i wari se hem i no save mekemgud wok ya blong lukaot long kongregesen. ?Olsem wanem long yu? ?Yu yu wan brata we i baptaes finis be yu gat filing ya se yu no naf? I stret nomo we yu wari long samting ya. Man blong lukaot long ol sipsip blong Jeova i mas talemaot long Hem ol fasin we hem i mekem long ol sipsip ya. Jisas i talem se: “Man we God i givim plante samting long hem, God i wantem blong man ya i mekem plante samting. Mo man we ol man oli putum plante samting long han blong hem, bambae oli save askem plante samting moa long hem bakegen.”​—Luk 12:48.

4. ?Olsem wanem Jeova i givhan long olgeta we hem i putumap blong oli lukaot long ol sipsip blong hem?

⁴ ?Olsem wanem? ?Jeova i ting se ol man blong givhan mo ol elda oli mas mekem ol hevi wok ya olgeta nomo? Nogat. Hem i givhan long olgeta, mo samting ya i mekem se oli naf blong mekem wok ya mo oli haremgud long hem tu. Olsem faswan stadi i tokbaot, Jeova i givim tabu spirit long olgeta, mo ol fasin we oli kamaot long spirit ya i givhan long olgeta blong lukaotgud long ol sipsip blong Hem. (Ol Wok 20:28; Galesia 5:​22, 23) Mo tu, Jeova i givim waes, save, mo fasin luksave long olgeta. (Ol Proveb 2:​6, NW ) ?Olsem wanem hem i mekem olsem? Bambae yumi tokbaot tri rod we Jeova i yusum blong trenem ol man we hem i putumap blong oli lukaot long ol sipsip blong hem.

Olgeta We Oli Elda Long Taem Finis Oli Trenem Ol Narafala

5. ?From wanem Pita mo Jon i mekemgud wok ya blong lukaot long ol sipsip blong God?

⁵ Taem tufala aposol ya Pita mo Jon i stanap fored  long Kaonsel ya Sanhedrin, ol jaj blong kot ya we oli gat fulap waes blong wol oli ting se tufala “i no gat nem, mo tufala i no skul gud.” Tufala i save rid mo raet, be i tru se tufala i no bin stadi mo kasem trening long han blong ol rabae no tija blong Loa. Nating se i olsem, Pita mo Jon mo ol narafala disaepol oli soemaot se oli save tijimgud ol man. Ol tok blong olgeta i tajem hat blong plante man mo i pulum ol man ya blong oli bilif. ?Olsem wanem ol man we oli no gat nem mo oli no skulgud oli save kam ol nambawan tija? Afta we ol memba blong Kaonsel oli lesin long ol tok blong Pita mo Jon, “oli save we tufala i bin stap wokbaot wetem Jisas.” (Ol Wok 4:​1-4, 13) I tru, tufala ya i kasem tabu spirit. (Ol Wok 1:8) Be antap long samting ya, i klia nomo se Jisas i bin trenem tufala, mo ol jaj tu we oli no save wan samting long saed blong spirit, oli luksave samting ya. Taem Jisas i stap wetem ol aposol blong hem long wol ya, hem i tijim olgeta olsem wanem blong faenem ol man we oli olsem sipsip blong God, mo tu, olsem wanem blong lukaot long ol sipsip ya taem oli joen long kongregesen.​—Matiu 11:29; 20:​24-28; 1 Pita 5:4.

6. ?Olsem wanem Jisas mo Pol i soemaot rod blong trenem ol narafala?

⁶ Afta we Jisas i laef bakegen long ded, hem i gohed blong trenem ol man we hem i putumap blong oli lukaot long ol sipsip blong God. (Revelesen 1:1; 2:1–3:22) Tingbaot Pol. Jisas hem wan i jusum Pol mo i lidim trening blong hem. (Ol Wok 22:​6-10) Pol i tinghae long trening we hem i kasem mo i tijim ol narafala elda long ol samting we hem i lanem. (Ol Wok 20:​17-35) Wan long olgeta we Pol i spenem plante taem mo paoa blong hem blong halpem, hemia Timoti. Pol i trenem Timoti blong kam wan “prapa man blong wok” blong God we i ‘no gat sem long wok blong hem.’ (2 Timoti 2:15) Pol mo Timoti i kam besfren. Bifo finis, Pol i bin tokbaot Timoti se: “Hem i wok wetem mi long ol wok blong gud nius blong Kraes, olsem we pikinini i stap wok wetem papa blong hem.” (Filipae 2:22) Pol i no traem mekem Timoti no eni narafala man i kam wan disaepol blong hem. Long defren fasin, hem i pulum ol Kristin brata blong hem blong oli ‘folem fasin blong hem, olsem we hem i stap folem fasin blong Kraes.’​—1 Korin 11:1.

7, 8. (a) ?Wanem stori i soemaot gudfala frut we i kamaot taem ol elda oli folem fasin blong Jisas mo Pol? (b) ?Wetaem ol elda oli mas stat blong trenem ol brata blong oli save kam man blong givhan mo elda?

⁷ Ol elda we oli bin mekem wok ya longtaem finis, oli folem fasin blong Jisas mo Pol. Oli trenem ol brata we oli baptaes finis, mo i gat gudfala frut i kamaot olsem i kamaot long wok blong Jisas mo Pol. Tingbaot wan brata we nem blong hem Chad. Hem i gruap long wan famle we papa i no stap long trutok. Be i no longtaem i pas, oli putumap Chad i kam wan elda. Hem i se: “Long ol yia we oli pas, ol brata we oli elda longtaem finis oli givhan long mi blong gru long saed blong spirit. Ol elda ya oli intres bigwan long mi from we papa blong mi i no stap long trutok, ale oli kam olsem ol papa blong mi long saed blong spirit. Oli tekem taem blong trenem mi long wok blong prij, mo biaen, i gat wan elda we i trenem mi blong lukaotgud long ol wok we mi kasem long kongregesen.”

⁸ Olsem stori blong Chad i soemaot, ol elda we oli gat fasin luksave oli stat trenem ol brata longtaem bifo we oli naf blong kasem wok ya blong man blong givhan mo elda. ?From wanem ol elda oli mekem olsem? From we Baebol i talem se ol man blong givhan mo ol elda oli mas kasem ol hae mak long saed blong fasin mo bilif, bifo we oli statem wok ya. Yes, oli ‘mas traem olgeta fastaem’ blong luk sipos oli naf blong mekem wok ya.​—1 Timoti 3:​1-10.

9. ?Wanem wok we ol brata we oli elda longtaem finis oli mas mekem, mo from wanem?

⁹ Sipos oli mas traem ol brata ya, i stret we oli trenem olgeta fastaem. Tingbaot ol studen long skul we tija i givim wan strong eksam long olgeta. ?Be sipos tija ya i no bin trenem ol studen ya nating, yu ting se bambae oli pasem eksam ya? Ating nogat. Oli nidim trening. Be ol gudfala tija oli no trenem ol studen blong oli pasem eksam blong olgeta nomo. Oli trenem olgeta blong oli naf blong yusum ol save we oli kasem. Sem mak long ol elda. Oli givim spesel trening long ol brata we oli baptaes blong oli save wokem ol fasin we oli nidim blong kam man blong givhan mo elda. Be oli no trenem olgeta blong oli save kasem nem ya nomo. Oli trenem olgeta blong oli save lukaotgud long ol sipsip blong God. (2 Timoti 2:2) I tru, ol brata we  oli baptaes olgeta tu oli mas traehad. Oli mas wok had blong kasem ol fasin we i mekem se oli naf blong kam man blong givhan mo elda. (Taetas 1:​5-9) Be sipos ol brata we oli elda longtaem finis oli glad blong trenem ol brata ya we oli stap traehad blong kasem wok long kongregesen, oli save givhan long olgeta blong oli gohed kwik moa.

10, 11. ?Olsem wanem ol elda oli save trenem ol brata blong oli mekem moa wok?

¹⁰ ?Wanem samting we ol elda oli save mekem blong trenem ol brata blong lukaot long kongregesen? Faswan samting se, oli save soem intres long ol brata long kongregesen. Oli save wok wetem olgeta oltaem long wok blong prij mo givhan long olgeta blong kamgud moa blong “tijim ol man long trutok blong God long fasin we i stret gud.” (2 Timoti 2:15) Ol elda oli storian long ol brata ya long saed blong bigfala glad we oli save kasem taem oli mekem wok blong ol narafala. Oli save tokbaot olsem wanem olgeta wan oli haremgud taem oli putum ol mak long saed blong spirit mo oli kasem ol mak ya. Mo tu, oli save givim advaes long kaen fasin, olsem wanem brata i save kamgud moa blong ‘soemaot fasin we ol sipsip blong God oli save folem.’​—1 Pita 5:​3, 5.

¹¹ Taem wan brata i kam man blong givhan, ol elda we oli waes oli gohed blong trenem hem. Bruce, we i wan elda blong klosap 50 yia, i talem se: “Mi faenem se i gud blong sidaon wetem brata we i jes kam man blong givhan, mo tokbaot bakegen ol advaes we slef we i stret mo waes i givim. Mo tu, mi ridim ol tok long hem long saed blong stret wok we bambae hem i mekem. Biaen, mi laekem blong mekem wok ya wetem hem gogo hem i savegud ol wok we hem i mas mekem.” Taem wan man blong givhan i stat kamgud long wok blong hem, oli save trenem hem long wok blong lukaot long ol sipsip blong God. Bruce i gohed se: “Taem mi tekem wan man blong givhan i go wetem mi blong leftemap tingting blong wan brata no famle, mi givhan long hem blong jusum sam vas we oli stret blong leftemap tingting mo givhan long brata ya no famle ya. I impoten we man blong givhan i lanem blong yusum Baebol long fasin we i tajem hat blong ol man blong God, sipos hem i wantem kam wan gudfala man blong lukaot long sipsip.”​—Hibrus 4:12; 5:14.

12. ?Olsem wanem ol brata we oli elda longtaem finis oli save trenem ol niufala elda?

¹² Taem wan brata i kam wan elda, i gud tumas sipos hem i kasem moa trening yet. Nick we yumi ridim tok blong hem antap, i talem se: “Trening we mi mi kasem long tu elda we tufala i olfala finis, i givhan long mi bigwan. Klosap oltaem tufala brata ya i save olsem wanem blong stretem wan bisnes. Tufala i lesin long mi wetem longfala tingting mo tufala i tingbaot wanem we mi talem, nating se maet tufala i no agri. Mi mi lanem plante samting taem mi wajem fasin blong tufala, we tufala i gat tingting daon mo soem respek long ol brata mo sista long kongregesen. Tufala elda ya i makemgud long tingting blong mi se mi mas gat gudhan blong yusum Baebol blong stretem ol problem mo blong leftemap tingting blong ol brata mo sista.”

Tok Blong God i Trenem Olgeta

13. (a) ?Wan brata we i wantem kam wan gudfala man blong lukaot long ol sipsip blong God, hem i nidim wanem? (b) ?From wanem Jisas i talem se: “Ol tok ya we mi stap tijim ol man long hem, oli no blong mi nomo”?

¹³ Tru ya, olgeta loa, rul, mo eksampol we ol elda oli nidim blong kam ‘waes long olgeta samting, mo savegud ol rod blong mekem ol gudfala wok,’ oli stap long Tok blong God, Baebol. (2 Timoti 3:​16, 17) Maet wan brata i bin skulgud, be samting we bambae i mekem hem i kam wan gudfala man blong lukaot long ol sipsip blong God, hemia save we hem i gat long Baebol mo olsem wanem hem i folem save ya long laef blong hem. Tingbaot Jisas. Jisas i gat moa save, waes, mo fasin luksave i bitim olgeta narafala man blong lukaot long ol sipsip blong God long wol ya. Be taem Jisas i tijim ol sipsip blong Jeova, hem i neva dipen long prapa waes blong hem. Hem i se: “Ol tok ya we mi  stap tijim ol man long hem, oli no blong mi nomo, oli kamaot long God we i sanem mi mi kam.” ?From wanem Jisas i leftemap Papa blong hem long heven? Hem i talem se: “Man we i stap talem ol tok we i kamaot long hem nomo, hem i stap traem pulum ol man blong oli leftemap nem blong hem nomo.”​—Jon 7:​16, 18.

14. ?Ol elda oli mekem wanem blong no pulum narafala blong leftemap olgeta?

¹⁴ Ol elda we oli stap tru long God, oli no traem pulum ol narafala blong leftemap olgeta. Taem oli givim advaes no talem tok blong leftemap tingting blong narafala, oli no talemaot waes blong olgeta, be oli yusum Tok blong God. Oli save se wok blong wan man blong lukaot long sipsip, i blong halpem ol sipsip blong kasem “tingting blong Kraes,” i no tingting blong ol elda. (1 Korin 2:​14-16) Olsem nao, tingbaot sipos wan elda i stap givhan long wan brata mo sista we tufala i gat trabol long mared blong tufala. ?Olsem wanem sipos hem i yusum prapa ekspiriens blong hem blong givim advaes long tufala, i bitim we hem i yusum ol rul blong Baebol mo save we ‘slef we i stret mo waes’ i givimaot? (Matiu 24:​45, NW ) Sipos hem i mekem olsem, maet ol kastom blong ples blong hem i gat paoa long advaes we hem i givim, no maet hem i no givim gudfala advaes from we save blong hem i smol nomo. I tru, sam kastom oli gud nomo, mo maet elda ya i gat plante save long saed blong laef tu. Be ol elda oli givhan moa long ol sipsip taem oli pulum olgeta blong lesin long voes blong Jisas mo ol tok blong Jeova, i bitim we oli lesin long tingting blong man mo folem ol kastom blong ples blong olgeta.​—Ol Sam 12:6; Ol Proveb 3:​5, 6.

‘Slef We i Stret Mo Waes’ i Givim Trening

15. ?Wanem wok we Jisas i givim long “slef ya we i stret mo waes”? ?Olsem wanem grup ya we i olsem slef i save mekem bigfala wok ya?

¹⁵ Ol man blong lukaot long ol sipsip blong God olsem aposol Pita, Jon, mo Pol, oli blong grup ya we Jisas i kolem “slef ya we i stret mo waes.” Olgeta long grup ya, oli brata blong Jisas long wol ya, we tabu spirit i makemaot olgeta blong oli gat hop blong rul wetem Kraes long heven. (Revelesen 5:​9, 10) Long ol las dei blong wol ya, namba blong ol brata ya blong Kraes we oli stap yet long wol ya i godaon bigwan. Be wok we Jisas i givim long olgeta blong talemaot gud nius blong Kingdom bifo we en i kam, hem i kasem moa ples i bitim ol narafala taem bifo. !Grup ya we i olsem slef i mekem bigfala wok! ?Olsem wanem? Oli trenem “ol  narafala sipsip” blong givhan long olgeta long wok blong prij mo blong tijim ol narafala. (Jon 10:16; Matiu 24:14; 25:40) Tede, grup ya blong ol narafala sipsip oli mekem bighaf blong wok ya.

16. ?Olsem wanem grup ya we i olsem slef i trenem ol man blong givhan mo ol elda?

¹⁶ ?Olsem wanem slef i givim trening ya? Long faswan handred yia, ol memba blong grup ya oli kasem raet blong trenem mo putumap ol man blong lukaot long ol kongregesen, mo biaen, ol man ya oli trenem ol sipsip. (1 Korin 4:17) Sem mak tede. Hed Kampani, no smol grup blong ol elda we tabu spirit i makemaot olgeta mo oli wok long nem blong slef ya, i givim raet long ol brata we oli wok long nem blong olgeta blong oli putumap ol man blong givhan mo ol elda long ol kongregesen long olgeta ples blong wol. Mo tu, Hed Kampani i mekem ol skul blong trenem ol memba blong ol Branj Komiti, ol seket mo distrik elda, wetem ol elda mo ol man blong givhan long ol kongregesen, blong oli save givim beswan kea long ol sipsip. Antap long hemia, ol leta, ol haf blong Wajtaoa, mo ol narafala buk olsem Organized to Do Jehovah’s Will, i givim advaes long olgeta. *

17. (a) ?Olsem wanem Jisas i soem se hem i trastem grup ya we i olsem slef? (b) ?Olsem wanem ol man blong lukaot long ol sipsip blong God oli soem se oli trastem slef ya?

¹⁷ Jisas i soem se hem i trastem gud grup ya we i olsem slef taem hem i putumap olgeta blong lukaot long “olgeta samting blong hem,” hemia olgeta samting long saed blong spirit we hem i intres long olgeta long wol ya. (Matiu 24:47) Ol elda tu oli soem se oli trastem slef ya taem oli folem advaes we oli kasem long Hed Kampani. Yes, taem ol elda oli trenem ol narafala, taem oli letem Tok blong God i trenem olgeta, mo taem oli folem trening we slef i givim long olgeta, oli mekem se ol sipsip blong God oli gat pis mo oli joengud. !Yumi talem tangkiu tumas long Jeova from we hem i trenem ol man ya we oli rili lavem ol wanwan memba blong Kristin kongregesen!

[Futnot]

?Bambae Yu Yu Ansa Olsem Wanem?

• ?Olsem wanem ol man blong lukaot long ol sipsip blong God oli trenem ol narafala?

• ?From wanem ol elda oli no tijim ol narafala folem prapa tingting blong olgeta?

• ?Olsem wanem ol elda oli soem se oli trastem grup we i olsem slef, mo from wanem oli trastem olgeta?

[Kwestin]

[Tok blong pija long pej 25]

Ol Kristin elda oli trenem ol yangfala man long kongregesen

[Tok blong pija long pej 26]

“Slef ya we i stret mo waes” i givim plante trening long ol elda