Stap Tru Long Kraes We i King Blong Yumi

“Olfala ya i putumap man ya i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem.”​—DANIEL 7:14.

1, 2. ?Olsem wanem yumi save se Kraes i no rul fulwan long Kingdom stat long 33 K.T.?

 ?HU MAN we i ded blong sevem ol man we hem i rul long olgeta, mo i laef bakegen blong kam king? ?Hu king we i laef long wol ya long fasin we i pulum ol man we oli stap aninit long rul blong hem blong trastem hem mo stap tru long hem, nao biaen i go rul long heven? I gat wan man nomo we i mekem samting ya mo i save mekem moa bakegen, hemia Jisas Kraes. (Luk 1:​32, 33) Kraes i ded, i laef bakegen, mo i go antap long heven. Smoltaem biaen, long lafet blong Pentekos long yia 33 K.T., God “i putumap Kraes blong i hed blong [“kongregesen,” NW ].” (Efesas 1:​20-22; Ol Wok 2:​32-36) Ale Kraes i stat rul, be hem i no rul fulwan long taem ya. Fastaem hem i rul long ol Kristin we tabu spirit i makemaot olgeta, hemia Isrel long saed blong spirit, no “Isrel blong God.”​—Galesia 6:​16, NW; Kolosi 1:13.

² Klosap 30 yia afta long Pentekos long 33 K.T., aposol Pol i talem se Kraes i no rul fulwan long Kingdom yet. Hem i talem se Kraes i “sidaon long raet saed blong God, mo i stap wet long ples ya, gogo God bambae i mekem ol enemi blong hem oli stap aninit long paoa blong hem.” (Hibrus 10:​12, 13) Klosap long en blong faswan handred yia K.T., olfala aposol Jon i luk wan vison blong Jeova, King blong heven mo wol. Jeova i stap putumap Kraes Jisas olsem King blong niufala Kingdom long heven. (Revelesen 11:15; 12:​1-5) Tede, yumi luk plante pruf blong soemaot se Kraes i stat rul long yia 1914, olsem Mesaea King long heven. *

3. (a) ?Stat long 1914, wanem niufala samting i joen wetem gud nius blong Kingdom? (b) ?Wanem ol kwestin we yumi mas tingting dip long olgeta?

³ Yes, stat long 1914, i gat wan nambawan niufala samting we i joen wetem gud nius blong Kingdom. Stat long taem ya, Kraes i mekem wok blong King long Kingdom blong God long heven, nating se hem i rul “long medel blong ol enemi blong [hem].” (Ol Sam 110:​1, 2, NW; Matiu 24:14; Revelesen 12:​7-12) Mo tu, long olgeta ples blong wol, ol man we oli stap tru long King ya, oli glad blong obei long hem. Taswe oli stap joen fulwan long wan wok blong tijim ol man long Baebol. Wok ya i bigwan moa naoia i bitim ol narafala taem bifo. (Daniel 7:​13, 14; Matiu 28:18) ‘Ol man blong Kingdom,’ no ol Kristin we tabu spirit i makemaot olgeta, oli “man blong karem tok blong Kraes” no ambasada blong Kraes. Bigfala grup blong “ol narafala sipsip” blong Kraes, i givhan long olgeta. Bigfala grup ya, i wok long nem blong Kingdom blong God olsem mesenja, be i no olsem ambasada. (Matiu 13:38; 2 Korin 5:20; Jon 10:16) Nating se i olsem, yumi wanwan i mas skelemgud sipos yumi rili luksave hae posisen mo paoa we Kraes i gat. ?Olsem wanem? ?Yu yu stap tru long hem, we i no gat wan samting nating i save pulumaot yu long hem? ?Olsem wanem yumi save stap tru long wan King we i stap rul long heven? Fastaem, bambae yumi tokbaot from wanem yumi mas stap tru long Kraes.

King We Fasin Blong Hem i Pulum Yumi Blong Stap Tru

4. ?Taem Jisas i stap long wol, olsem wanem hem i soemaot samting we bambae hem i mekem taem hem i kam King?

⁴ Yumi stap tru long Kraes from we yumi gat bigfala tangkiu long ol samting we hem i mekem mo long ol nambawan fasin blong hem. (1 Pita 1:8)  Taem Jisas i stap long wol olsem Man we God i makemaot finis blong kam King, hem i soemaot long smol fasin samting we bambae hem i mekem taem God i putumap hem blong rul long fulwol. Hem i givim kakae long ol man we oli hanggri. Hem i mekem sikman i kamgud, i mekem blaen man i save lukluk, i mekem man we leg blong hem i nogud i save wokbaot gud, i openem sora blong man we sora blong hem i fas, mo i mekem man we i no save toktok, i toktok. Mo tu, hem i mekem sam man we oli ded oli laef bakegen. (Matiu 15:​30, 31; Luk 7:​11-16; Jon 6:​5-13) Taem yumi gat save long saed blong laef blong Jisas long wol ya, yumi kasem save long ol fasin we bambae hem i mekem long ol man we bambae hem i rul long olgeta. Long olgeta fasin ya, nambawan fasin blong hem, hemia lav we i stanap long fasin blong tingbaot narafala fastaem. (Mak 1:​40-45) Long saed ya, Napoléon Bonaparte i talem se: “Mi, mo Alexander, mo Sisa, mo Charlemagne, mifala i wokem ol kingdom blong mifala. ?Wanem i mekem se plante man oli stap aninit long rul blong mifala? Mifala i fosem ol man nomo. Be man ya Jisas Kraes, hem wan nomo i stanemap kingdom blong hem long lav, mo tede plante milian man oli rere blong ded from hem.”

5. ?From wanem plante man oli laekem Jisas?

⁵ Jisas i wan kwaet man we tingting blong hem i stap daon. Taswe, ol man we oli harem nogud from ol wari mo trabol long laef blong olgeta oli haremgud long ol tijing blong Jisas. Hem i leftemap tingting blong olgeta mo i soem kaen fasin long olgeta. (Matiu 11:​28-30) Ol pikinini oli no fraet long hem. Ol man we oli gat tingting daon mo fasin luksave, oli glad tumas blong kam disaepol blong hem. (Matiu 4:​18-22; Mak 10:​13-16) From we Jisas i tingbaot narafala mo i gat respek, ol woman we oli onagud long God oli stap tru long hem. Plante woman oli givim taem, paoa, mo plante samting blong olgeta blong lukaot long Jisas, taem hem i mekem wok blong God long wol ya.​—Luk 8:​1-3.

6. ?Wanem filing blong Jisas we i kamaot klia taem Lasaros i ded?

⁶ Long taem ya we Lasaros, gudfala fren blong Jisas, i ded, Jisas i soemaot dip filing blong hem. Hem i luk we Meri mo Mata i harem nogud, ale hem tu i harem nogud, i pulum win strong, mo “i krae.” Hem i “harem nogud tumas” long hat blong hem mo hem i sore tumas, nating we hem i save se smoltaem biaen nomo, bambae i mekem Lasaros i laef bakegen. Ale, lav mo sore i pulum Jisas blong yusum paoa we God i givim long hem, nao hem i singaot Lasaros blong i girap bakegen.​—Jon 11:​11-15, 33-35, 38-44.

7. ?From wanem i stret nomo we yumi stap tru long Jisas? (Lukluk bokis long pej 31.)

⁷ Taem yumi tingbaot olsem wanem Jisas i strong long saed blong stret fasin mo olsem wanem hem i no laekem nating fasin tu fes mo rabis fasin, yumi gat bigfala respek long hem. Tu taem hem i tekem strong aksin blong klinim haos prea mo sakemaot ol griri bisnesman we oli stap mekem maket long ples ya. (Matiu 21:​12, 13; Jon 2:​14-17) Taem Jisas i stap long wol, hem i fesem plante trabol mo traem tu. Samting ya i mekem se hem i kasem save long ol trabol mo wari we yumi gat. (Hibrus 5:​7-9) Mo tu, Jisas i save se i olsem wanem taem narafala i no laekem hem nating mo taem narafala i jajem hem long fasin we i no stret. (Jon 5:​15-18; 11:​53, 54; 18:38–19:16) Jisas i no fraet blong ded long fasin we i nogud olgeta, blong mekem samting we Papa blong hem i wantem mo blong givim laef we i no save finis long ol man we hem i rul long olgeta. (Jon 3:16) ?Olsem wanem? ?Ol fasin ya blong Kraes oli pulum yu blong stap tru long hem mo gohed blong mekem wok blong hem? (Hibrus 13:8; Revelesen 5:​6-10) ?Be yumi mas mekem wanem blong stap aninit long rul blong King ya Kraes?

Kam Naf Blong Stap Aninit Long Rul Blong Hem

8. ?Ol man we oli wantem stap aninit long rul blong Kraes oli mas gat wanem?

⁸ Traem skelem samting ya: Sipos yu yu wantem kam sitisen blong narafala kantri, i gat ol rul we yu mas folem. Olgeta we oli wantem kam sitisen oli mas gat gudfala fasin mo gud helt. Long sem fasin, ol man we oli wantem stap aninit long rul blong Kraes oli mas gat ol gudfala fasin mo oli mas strong long saed blong spirit.​—1 Korin 6:​9-11; Galesia 5:​19-23.

9. ?Olsem wanem yumi soem se yumi stap tru long Kraes?

⁹ Mo tu, Jisas Kraes i talem se ol man we oli stap aninit long rul blong hem oli mas stap tru long hem mo long Kingdom blong hem. Oli soemaot se oli stap tru taem oli folem ol tijing blong hem, hemia ol tok we hem i talemaot taem hem i stap long wol olsem Man we God i makemaot blong kam King. Olsem nao, ol man ya oli putum ol samting long saed blong Kingdom mo ol samting we God i wantem, oli stap long fasples long laef blong olgeta i bitim we oli wari tumas long ol samting blong laef. (Matiu 6:​31-34)  Oli traehad blong folem ol fasin blong Kraes, mo oli gohed blong folem ol fasin ya taem oli kasem trabol mo traem tu. (1 Pita 2:​21-23) Antap long samting ya, ol man we oli stap aninit long rul blong Kraes oli tekem faswan step blong mekem i gud long narafala. Long rod ya tu, oli folem fasin blong Kraes.​—Matiu 7:12; Jon 13:​3-17.

10. ?Olsem wanem yumi save stap tru long Kraes insaed (a) long famle (b) long kongregesen?

¹⁰ Ol man blong Jisas oli soem se oli stap tru long hem taem oli folem ol fasin blong hem insaed long famle blong olgeta. Olsem nao, ol hasban oli soem se oli stap tru long King blong olgeta long heven taem oli mekem long woman blong olgeta mo ol pikinini blong olgeta olsem we Kraes i mekem long ol man blong hem. (Efesas 5:​25, 28-30; 6:4; 1 Pita 3:7) Ol waef oli soem se oli stap tru long Kraes taem oli gat klin tingting mo klin fasin mo oli ‘kwaet woman we oli gat pis long laef blong olgeta.’ (1 Pita 3:​1-4; Efesas 5:​22-24) Ol pikinini oli stap tru long Kraes taem oli folem eksampol blong hem blong obei. Taem Jisas i yangfala, hem i obei long papa mama blong hem, nating se tufala i sinman. (Luk 2:​51, 52; Efesas 6:1) Ol man we oli stap aninit long rul blong Kraes oli stap tru long hem taem oli traehad blong folem fasin blong hem blong ‘gat sore, mo blong lavem narafala olsem we oli wan brata nomo,’ mo taem oli ‘mekem i gud long narafala.’ Oli traehad blong kam olsem Kraes, we ‘tingting blong hem i stap daon, i no givimbak long man we i mekem i nogud long hem, mo i no tok nogud long man we i tok nogud long hem.’​—1 Pita 3:​8, 9; 1 Korin 11:1.

Oli Obei Long Loa Blong Kraes

11. ?Wanem ol loa we ol man blong stap aninit long rul blong Kraes oli obei long olgeta?

¹¹ Ol man we oli wantem kam sitisen blong narafala kantri oli mas obei long ol loa blong kantri ya. Long sem fasin, ol man we oli stap aninit long rul blong Kraes oli obei long “loa blong Kraes.” Blong mekem olsem, oli stretem laef blong olgeta blong mekem i laenap wetem olgeta tok mo tijing blong Jisas. (Galesia 6:2) Antap moa, oli folem ‘loa ya we i stamba blong ol narafala loa,’ hemia lav. (Jemes 2:8) ?Wanem i joen wetem ol loa ya?

12, 13. ?Olsem wanem yumi obei long “loa blong Kraes”?

¹² Ol man we oli stap aninit long rul blong Kraes oli sinman yet mo oli save mestem. (Rom 3:23) Taswe, oli mas traehad oltaem blong ‘lavem ol brata blong olgeta long fasin we i stret gud.’ Olsem nao, oli ‘lavlavem olgeta long olgeta tingting blong olgeta, long fasin we i no save jenis.’ (1 Pita 1:22) Sipos ‘wan Kristin i gat sam poen agens long narawan,’ tufala i ‘givgivhan long tufala mo fofogivim tufala.’ Long rod ya, oli stap tru long Kraes mo oli folem loa blong hem. Taem oli obei long loa ya, oli naf blong fogetem ol mastik blong narafala, mo blong lukaot ol gudfala fasin long narafala we i save pulum olgeta blong lavem hem. Ating yu yu glad tumas taem yu stap wetem olgeta we oli obei mo stap tru long King blong yumi we i gat lav, nao olgeta tu oli soem lav ya we i save “joenemgud olgeta samting, blong oli kam wan.”​—Kolosi 3:​13, 14.

¹³ Jisas i eksplenem se lav we hem i gat i bigwan moa i bitim lav we oltaem ol man oli stap soemaot.  (Jon 13:​34, 35) Sipos yumi laekem ol man we oli laekem yumi nomo, yumi “no mekem wan samting we i gud moa i winim ol narafala man.” Olsemia, yumi no lavem narafala fulwan, be lav blong yumi i hafhaf nomo. Jisas i talem se yumi mas folem fasin blong Papa blong hem blong lavem ol man. Yumi save mekem olsem sipos yumi soem lav we i stanap long stret fasin long ol man, mo long ol enemi blong yumi tu we oli no laekem yumi nating mo oli agensem yumi. (Matiu 5:​46-48) Mo tu, lav ya i mekem se olgeta we oli stap aninit long rul blong Kingdom oli gohed oltaem long bigfala wok blong olgeta. ?Wanem wok ya?

Fasin Blong Yumi Blong Stap Tru i Kasem Traem

14. ?From wanem wok blong prij i impoten tumas?

¹⁴ Ol man we oli stap aninit long rul blong Kingdom blong God oli gat wan impoten wok blong mekem, hemia blong “witnes long ol man long saed blong kingdom blong God.” (Ol Wok 28:​23, NW ) I impoten blong mekem wok ya from we Kingdom blong Mesaea nao bambae i pruvum se hae rul blong Jeova long heven mo wol i beswan. (1 Korin 15:​24-28) Taem yumi talemaot gud nius, ol man oli kasem janis blong kam aninit long rul blong Kingdom blong God. Mo tu, Kraes we i King i jajem ol man from samting we oli mekem taem oli harem gud nius ya. (Matiu 24:14; 2 Tesalonaeka 1:​6-10) Taswe, bigfala rod blong soemaot se yumi stap tru long Kraes, i blong obei long tok blong hem se yumi mas talemaot Kingdom long ol narafala.​—Matiu 28:​18-20.

15. ?From wanem fasin blong ol Kristin blong stap tru long Kraes i kasem traem?

¹⁵ Setan bambae i mekem evri samting we hem i naf blong mekem blong agensem wok blong prij. Mo ol haeman blong wol ya oli no luksave paoa we God i givim long Kraes. (Ol Sam 2:​1-3, 6-8) Taswe, Jisas i givim woning long ol disaepol blong hem se: “I no gat man blong wok we i hae moa long masta blong hem. Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:20) From samting ya, ol man we oli folem Kraes oli luk se oli stap mekem wan faet long saed blong spirit, we i traem fasin blong olgeta blong stap tru long Kraes.​—2 Korin 10:​3-5; Efesas 6:​10-12.

16. ?Olsem wanem ol man we oli stap aninit long Kingdom oli ‘givimbak long God, samting we i blong God’?

¹⁶ Ol man we oli stap aninit long Kingdom blong God oli stap tru long King blong olgeta long heven, mo long semtaem oli respektem ol haeman we oli rul long wol ya. (Taetas 3:​1, 2) Jisas i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Mak 12:​13-17) Taswe, ol man we oli stap aninit long rul blong Kraes oli obei long ol loa blong gavman sipos ol loa ya oli no agensem loa blong God. (Rom 13:​1-7) Be taem hae kot blong ol man Jiu i agensem loa blong God nao i talem long ol disaepol blong Jisas blong oli no moa prij, ol disaepol ya oli talem klia mo wetem respek se oli mas ‘obei long God fastaem, oli no save obei long man’ nomo.​—Ol Wok 1:8; 5:​27-32, NW.

17. ?From wanem yumi no fraet taem yumi fesem ol samting we oli traem fasin blong yumi blong stap tru?

¹⁷ I tru, ol man we oli stap aninit long rul blong Kraes oli mas gat fasin no fraet, blong oli save stap tru long King blong olgeta taem ol narafala oli agensem olgeta. Nating se i olsem, Jisas i talem se: “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud. Yufala i mas harem gud yufala i glad, from we i gat bigfala pei blong yufala i stap long heven.” (Matiu 5:​11, 12) Ol faswan man we oli folem Kraes oli luksave se tok ya i tru. Taem ol man oli wipim olgeta from we oli gohed blong talemaot Kingdom, oli harem gud tumas “from we God i luk olgeta olsem we oli naf blong kasem sem long fes blong ol man, from nem blong Jisas. Mo evri dei, long haos blong God, mo insaed long ol haos blong ol man, oli stap tijim ol man, mo oli stap talemaot gud nius ya blong Jisas, se hem i Mesaea.” (Ol Wok 5:​41, 42) I gud tumas we yu yu stap soemaot semfala tingting blong stap tru long Kraes, taem yu kasem hadtaem, sik, taem wan  fren no famle blong yu i ded, mo taem ol man oli agensem yu.​—Rom 5:​3-5; Hibrus 13:6.

18. ?Tok we Jisas i talem long Ponjes Paelat i soemaot wanem?

¹⁸ Taem Jisas i stap yet long wol olsem Man we God i makemaot blong i kam King, hem i talem long Ponjes Paelat we i hed gavman blong Rom se: “Mi mi no king olsem ol king blong wol ya. Sipos mi king olsem ol king blong wol ya, bambae ol man blong mi oli save faet blong blokem olgeta ya we oli wantem putum mi long han blong ol lida ya blong ol laen blong Isrel, be mi mi no king olsem.” (Jon 18:36) Taswe, ol man we oli stap aninit long Kingdom blong heven, oli no yusum ol tul blong faet agensem narafala man, mo oli no tekem saed long ol faet blong ol man. Oli stap tru long ‘Prins blong Pis,’ mo oli no joen nating long ol bisnes blong wol we i mekem ol man oli seraot.​—Aesea 2:​2-4; 9:​6, 7.

Stap Tru Mo Kasem Pei We i No Save Finis

19. ?From wanem ol man we oli stap aninit long rul blong Kraes oli bilif strong se fiuja bambae i gud?

¹⁹ Ol man we oli stap tru long Kraes, “King blong olgeta king,” oli gat strong tingting se bambae fiuja blong olgeta i gud. Oli wet wetem glad blong luk we klosap nao, King ya bambae i girap, i soemaot bigfala paoa we hem i kasem long heven. (Revelesen 19:11–20:3; Matiu 24:30) Smol grup blong ol tabu ‘man blong kingdom’ we oli stap yet long wol, oli stap tru long Kraes, mo long semtaem oli wet wetem glad blong kasem nambawan blesing blong rul wetem Kraes long heven. (Matiu 13:38; Luk 12:32) “Ol narafala sipsip” we oli stap tru long Kraes, oli wet blong harem gudfala tok we King ya bambae i talem long olgeta, se: “Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam, we hem i king long hem [Paradaes long wol aninit long Kingdom].” (Jon 10:16; Matiu 25:34) From samting ya, i gud we olgeta man we oli stap aninit long rul blong Kingdom oli gat strong tingting blong stap tru long Kraes we i King, mo blong gohed blong mekem wok blong hem.

[Futnot]

?Yu Yu Save Eksplenem?

• ?From wanem i stret nomo we yumi stap tru long Kraes?

• ?Olsem wanem ol man we oli stap aninit long rul blong Kraes oli soem se oli stap tru long hem?

• ?From wanem yumi wantem stap tru long Kraes we i King blong yumi

[Kwestin]

[Bokis blong pija long pej 31]

SAM MOA NAMBAWAN FASIN BLONG KRAES

Mekem i sem mak long olgeta man​—Jon 4:​7-30.

Sore​—Matiu 9:​35-38; 12:​18-21; Mak 6:​30-34.

Lav we i stanap long fasin blong tingbaot narafala fastaem—Jon 13:1; 15:​12-15.

Stap tru long God​—Matiu 4:​1-11; 28:20; Mak 11:​15-18.

Kasem save long filing blong narafala​—Mak 7:​32-35; Luk 7:​11-15; Hibrus 4:​15, 16.

No mekem i strong tumas long narafala​—Matiu 15:​21-28.

[Tok blong pija long pej 29]

Taem yumi lavem ol narafala, yumi folem “loa blong Kraes” mo stap tru long hem

[Tok blong pija long pej 31]

?Ol fasin blong Kraes oli pulum yu blong stap tru long hem?