Putum Tingting Blong Yu i Stap Long Ol Gudfala Samting We Ogenaesesen Blong Jeova i Givim

“Mifala i harem gud long ol gudgudfala samting ya blong haos blong yu.”​—OL SAM 65:4.

1, 2. (a) ?Tempol bambae i givhan long ol man blong God olsem wanem? (b) ?Wanem ol samting we Deved i rerem blong givhan long wok blong bildim tempol?

 DEVED i wan man Isrel we Hibru haf blong Baebol i tokbaot hem plante. Hem i wan man blong lukaot long sipsip, man blong plei miusik, hem i wan profet mo wan king. Deved i trastem Jeova God fulwan mo i frengud wetem Jeova. Samting ya i pulum hem blong wantem bildim wan haos blong God no wan tempol. Bambae haos ya i stap olsem stamba ples we ol man Isrel oli save go long hem blong mekem tru wosip. Deved i save se olgeta plan we oli stanemap long saed blong tempol ya mo ol wok insaed long hem bambae i givim glad mo blesing long ol man blong God. Taswe Deved i singsing se: “Olgeta man we yu yu stap jusumaot olgeta, mo yu stap tekem olgeta oli kam long tabu ples blong yu, oli save harem gud. Bambae mifala i harem gud long ol gudgudfala samting ya blong haos blong yu, bambae mifala i stap klosap nomo long yu long tabu haos ya blong yu.”​—Ol Sam 65:4.

² Jeova i no letem Deved i bildim haos blong hem. Hem i talem se pikinini blong Deved, hemia Solomon, bambae i mekem spesel wok ya. Be Deved i no komplen from we Jeova i jusum narafala man blong mekem spesel wok ya we hem i wantem tumas blong mekem. Long tingting blong Deved, wok blong bildim tempol i moa impoten i bitim man we i bildim. Hem i sapotem plan blong Jeova fulwan mo i givim ol plan blong haos ya long Solomon, olsem we Jeova i bin givim long hem. Mo tu, Deved i seraot plante taosen Livaet oli go long ol defdefren grup blong mekem wok, mo i givim plante gol mo silva blong oli yusum blong bildim tempol ya.​—1 Kronikel 17:1, 4, 11, 12; 23:3-6; 28:​11, 12; 29:1-5.

3. ?Wanem tingting we ol man blong God oli mas gat long saed blong ol plan blong trufala wosip?

³ Ol man Isrel we oli holemstrong long bilif, oli folem ol plan long saed blong trufala wosip long haos blong God. Yumi ol man blong Jeova tede, yumi tu yumi folem ol plan we ogenaesesen blong Jeova long wol ya i stanemap long saed blong wosip. Taem yumi mekem olsem, yumi soem sem tingting olsem Deved. Yumi no komplen, be yumi putum tingting blong yumi i stap long ol gudfala samting we ogenaesesen blong God i givim. ?Yu yu save  tingbaot plante gudfala samting we yumi mas gat tangkiu from? Bambae yumi tokbaot sam long olgeta.

Gat Tangkiu From Wok Blong Ol Man We Oli Lidim Yumi

4, 5. (a) ?Olsem wanem “slef ya we i stret mo waes” i mekem wok we God i putum long han blong hem? (b) ?Wanem tingting blong sam Witnes long saed blong ol save we oli kasem olsem kakae?

⁴ I stret nomo we yumi gat tangkiu from “slef ya we i stret mo waes” we Jisas Kraes i putumap blong lukaot long olting blong hem long wol ya. Grup blong ol Kristin ya we tabu spirit i makemaot olgeta, i lidim wok blong talemaot gud nius, i rerem ol miting blong wosip, mo i wokem ol buk long saed blong Baebol long bitim 400 lanwis. Plante milian man long wol oli gat bigfala tangkiu from save ya we oli kasem olsem kakae “long stret taem blong hem.” (Matiu 24:​45-47, NW ) I no gat risen blong komplen from.

⁵ Blong plante yia, olfala woman ya Elfi we i wan Witnes blong Jeova, i bin ridim ol advaes blong Baebol we oli stap long ol buk blong slef ya. Ol tok ya oli leftemap tingting blong hem mo oli halpem hem bigwan. Samting ya i pusum Elfi blong raetem se: “?Bambae mi mekem wanem sipos i no gat ogenaesesen blong Jeova?” Peter mo Irmgard, tufala tu i Witnes blong Jeova longtaem finis. Irmgard i gat bigfala tangkiu from olgeta buk we “Jeova i givim tru long ogenaesesen blong hem we i lavem yumi mo i keagud long yumi.” Long ol buk ya, i gat sam we oli wokem speseli blong ol man we oli blaen mo olgeta we sora blong olgeta i fas.

6, 7. (a) ?Hu i lukaot long wok blong ol kongregesen raon long wol? (b) ?Wanem toktok we samfala oli talem long saed blong ogenaesesen blong Jeova long wol?

⁶ Wan haf blong “slef ya” i wok olsem Hed Kampani blong ol Witnes blong Jeova. Smol grup ya blong ol brata we tabu spirit i makemaot olgeta oli stap long hedkwota blong ol Witnes blong Jeova long Brooklyn, New York. Hed Kampani ya i stap putumap ol man blong Jeova we oli olfala long trutok blong oli wok long ol branj ofis we oli stap lukaot long ol 98,000 kongregesen raon long wol. Insaed long ol wanwan kongregesen ya, ol man we oli kasem ol mak we Baebol i putum, oli holem wok olsem elda mo man blong givhan. (1 Timoti 3:​1-9, 12, 13) Ol elda oli lidim kongregesen mo oli lukaot gud long ol sipsip we God i putum long han blong olgeta. !Hem i wan blesing blong stap olsem wan long ol sipsip ya mo harem gud long lav mo fasin joengud we i stap long “kampani blong ol brata”!​—1 Pita 2:​17, NW; 5:​2, 3.

⁷ Plante taem ol brata sista oli talem tangkiu from gudfala help long saed blong spirit we oli kasem long ol elda. Oli no traem lukaot mastik blong ol elda. Tingbaot Birgit. Hem i wan Kristin woman we i mared finis mo i gat bitim 30 yia blong hem. Taem hem i yangfala, hem i bin joen wetem sam rabis fren mo klosap hem i mekem bigfala sin. Be ol klia advaes blong Baebol we ol elda oli givim, mo help blong ol Kristin brata sista long kongregesen, i givhan long hem blong kamaot long trap ya. ?Wanem filing blong Birgit naoia? Hem i se: “Mi mi talem tangkiu tumas we mi stap yet long nambawan ogenaesesen blong Jeova.” Wan yangfala blong 17 yia, nem blong hem Andreas, i talem se: “I tru tumas se hemia ogenaesesen blong Jeova. Hem i beswan ogenaesesen long wol.” Yumi mas gat tangkiu from ol gudfala samting we ogenaesesen blong Jeova long wol ya i stap mekem.

Ol Man We Oli Lidim Yumi Oli No Stretgud Olgeta

8, 9. ?Wanem sam samting we ol man long taem blong Deved oli mekem, mo wanem fasin blong Deved long taem ya?

⁸ I tru, olgeta we oli gat wok blong lidim trufala wosip oli no stret olgeta. Olgeta evriwan oli mekem mastik, mo sam long olgeta oli gat sam slak fasin we oli wokhad longtaem finis blong traem stretem. ?Olsem wanem? ?Yumi mas harem nogud from samting ya? Nogat. Sam man we oli gat bigfala wok long Isrel bifo, olgeta tu oli bin mekem sam bigfala rong. Tingbaot King Sol. Taem Deved i wan yangfala, oli singaot hem blong i go plei miusik blong kwaetem tingting blong King Sol. Biaen, Sol i traem kilim Deved i ded mo Deved i mas ronwe.​—1 Samuel 16:​14-23; 18:​10-12; 19:18; 20:​32, 33; 22:​1-5.

⁹ Sam narafala man Isrel tu oli mekem nogud fasin. I gat Joab, we hem i komanda blong ami blong Deved. Hem i kilim i ded Abnere we i famle blong Sol. I gat Absalom tu, hem i mekem plan blong aotem papa blong hem Deved we i king, mo kam king long ples blong hem. Mo i gat Ahitofel, gudfala advaesa blong Deved we i lego Deved mo i joen wetem ol enemi blong hem. (2 Samuel 3:​22-30; 15:​1-17, 31; 16:​15, 21) Be Deved i no kam kros from ol samting ya, hem i no komplen, mo hem i no lego trufala wosip.  Defren olgeta, ol trabol ya i pulum Deved moa blong holemstrong long Jeova, mo blong holemtaet gudfala tingting we hem i gat taem hem i ronwe long Sol. Long taem ya, Deved i singsing se: “God, yu sore long mi. Plis yu sore long mi from we mi mi stap long bigfala trabol we i olsem hariken. Mi mi kam blong haed long yu, blong yu blokem mi mi stap gud olsem we pikinini blong faol i stap gud aninit long wing blong mama blong hem, nao bambae mi save stap gud gogo kasem we trabol ya i finis.”​—Ol Sam 57:1.

10, 11. ?Wanem i hapen long Gertrud taem hem i yangfala, mo hem i talem wanem long saed blong ol slak fasin blong ol Kristin brata sista?

¹⁰ Tede, sipos yumi ting se wan man long ogenaesesen blong God i stap mekem nogud fasin, i no nid blong komplen from. Jeova, ol enjel blong hem, mo ol man blong lukaot long ol sipsip long ol kongregesen, oli no save letem wan man nogud i stap insaed long Kristin kongregesen. Be yumi mas luksave tu se yumi no save ronwe long sin long wol ya, nating se hemia sin blong yumi wan no blong ol narafala man blong God.

¹¹ Gertrud i wan sista we i mekem wok blong Jeova longtaem finis. Taem hem i yangfala, samfala oli sakem ol giaman toktok long hem se hem i no rili wan woman blong talemaot Kingdom fultaem, be hem i stap giaman nomo. ?Gertrud i mekem wanem? ?Hem i komplen from nogud fasin ya we oli mekem long hem? Nogat. Long yia 2003, smoltaem bifo we hem i ded, hem i tingtingbak long ol 91 yia blong laef blong hem, mo i talem se: “Ol samting we oli hapen long mi, oli tijim mi se nomata wanem mastik we ol narafala oli mekem, Jeova i stap lidim bigfala wok blong hem, mo se hem i stap yusum yumi ol sinman nomo blong mekem wok ya.” Taem Gertrud i harem nogud long slak fasin blong sam man blong Jeova, hem i prea long Jeova long saed ya.

12. (a) ?Sam Kristin long faswan handred yia oli mekem wanem fasin we yumi no mas folem? (b) ?Yumi mas putum tingting blong yumi i stap strong long wanem samting?

¹² Ol Kristin we oli fasgud long Jeova mo oli strong gud long wok blong hem, olgeta tu oli no stretgud olgeta. Taswe, taem wan man we i gat wok insaed long kongregesen i mekem wan mastik, yumi mas gohed nomo blong mekem evri samting ‘long fasin we yumi no toktok smol biaen.’ (Filipae 2:​14, NW ) !I nogud yumi folem fasin blong samfala long Kristin kongregesen long faswan handred yia! Disaepol Jud i talem se long taem ya i gat sam long kongregesen we oli olsem ol giaman tija, “oli no gat respek long ol masta, mo oli tok nogud long olgeta we i gat haenem.” Mo ol man ya oli go moa, “oli stap toktok smol agens long narafala, oli stap komplen from laef blong olgeta.” (Jud 8, 16, NW ) Yumi no mas folem fasin blong ol man we oli stap tok smosmol agens long narafala mo komplen, be yumi mas putum tingting blong yumi i stap nomo long ol gudfala samting we ‘slef we i stret mo waes’ i givim long yumi. Yumi mas gat tangkiu from ol gudfala samting we ogenaesesen blong Jeova i stap givim, mo yumi mas gohed blong ‘mekem evri samting long fasin we yumi no toktok smol biaen.’

“!Tok Ya i Strong Tumas!”

13. ?Samfala oli mekem wanem taem oli harem sam tijing blong Jisas Kraes?

¹³ Olsem yumi luk finis, i gat sam long faswan handred yia we oli bin tok smosmol agensem olgeta we oli gat wok insaed long kongregesen. Be i gat sam narafala we oli tok smosmol agensem ol tijing blong Jisas. Long Jon 6:​48-69, yumi ridim tok blong Jisas se: ‘Man we i kakae mit blong mi mo i dring blad blong mi, hem i gat laef we i no save finis.’ Taem ol man blong Jisas oli harem tok ya, “plante [long olgeta] . . . oli talem se, ‘!Man! !Tok ya i strong tumas! ?Hu i save harem tok olsem?’ ” Jisas i save finis se “ol man blong hem oli stap toktok agens long tok ya blong hem.” Mo “biaen long tok ya plante . . . oli  gowe long hem, oli no moa biaen long hem.” Be i no olgeta disaepol evriwan we oli tok smosmol agensem tijing ya blong Jisas. Taem Jisas i askem long ol 12 aposol blong hem se, “?Olsem wanem long yufala? ?Yufala tu i wantem gowe long mi?” aposol Pita i ansa se: “Masta. ?Bambae mifala i save go long hu? Yu nomo yu gat ol tok blong laef ya we i no save finis. Mo mifala i bilif finis long yu. Mifala i save finis we yu yu Tabu Man blong God.”

14, 15. (a) ?From wanem samfala oli harem nogud long sam tijing we oli kasem? (b) ?Yumi lanem wanem long stori blong man ya we nem blong hem Emanuel?

¹⁴ Long taem blong yumi, wanwan man blong God oli bin harem nogud long wan Kristin tijing we oli kasem, nao oli tok smosmol agensem ogenaesesen blong Jeova long wol ya. ?From wanem samting ya i hapen? Plante taem, oli tok smosmol olsem from we oli no kasem save long rod we God i stap yusum. Jeova i stap soemaot trutok sloslo nomo long ol man blong hem. From samting ya, samtaem i mas gat sam jenis long save blong yumi long Baebol. Bighaf blong ol man blong Jeova oli glad tumas long ol jenis ya. Be samfala we oli ‘ting se oli stret bitim mak’ oli kam kros taem i gat sam niufala save i kamaot. (Prija 7:​16, NW ) Maet flas tingting i pusum olgeta blong kam kros, no maet oli foldaon long trap ya blong wantem folem prapa tingting blong olgeta nomo. Nomata wanem samting i stamba blong fasin blong olgeta, be taem yumi tok smosmol agensem ogenaesesen blong Jeova, yumi stap long denja, from we fasin ya i save pulum yumi blong gobak bakegen long wol ya mo ol fasin blong hem.

¹⁵ Tingbaot wan Witnes we nem blong hem Emanuel. Hem i faenem poen long sam samting we hem i ridim long ol buk blong ‘slef we i stret mo waes.’ (Matiu 24:​45, NW ) Nao hem i no moa ridim ol buk ya, mo biaen ol elda oli talemaot long kongregesen se hem i no moa wantem stap olsem wan Witnes blong Jeova. Be smoltaem biaen, Emanuel i luksave se hem i rong, mo se ol tijing blong ogenaesesen blong Jeova oli stret nomo. Ale hem i go luk ol Witnes, hem i talemaot mastik blong hem, mo kongregesen i tekembak hem olsem wan Witnes blong Jeova. Naoia hem i wan hapi man bakegen.

16. ?Wanem i save givhan long yumi blong stretem tingting blong yumi long saed blong sam Kristin tijing we maet yumi no ting se oli stret olgeta?

¹⁶ Maet yumi wantem tok smosmol from wan tijing blong ol man blong Jeova we yumi ting se i no stret olgeta. Be yumi no mas hareap blong tok agens. Ating i no longtaem bambae ‘slef we i stret mo waes’ i save givim sam moa save long ol buk blong hem we i givim ansa long ol kwestin blong yumi, nao tingting blong yumi i save kam klia long saed blong tijing ya. I waes blong askem long ol Kristin elda tu blong oli givhan long yumi. (Jud 22, 23) Yumi mas prea, stadi yumi wan, mo joen wetem ol Kristin brata sista we oli lukaot save blong God oltaem. Ol samting ya bambae oli givhan long yumi blong kliarem eni samting we i mekem se yumi no sua fulwan long bilif blong yumi. Mo bambae oli givhan long yumi tu blong gat bigfala tangkiu from ol trutok blong Baebol we oli mekem bilif blong yumi i strong gud mo we yumi lanem tru long rod we Jeova i stap yusum blong sanem toktok blong hem i kam long yumi.

Holem Wan Gudfala Tingting

17, 18. ?Bitim we yumi tok smosmol from sam samting, i moagud we yumi gat wanem fasin? ?From wanem i moagud olsem?

¹⁷ I tru, yumi no stretgud olgeta, taswe i isi nomo blong yumi mekem sin. Maet i isi tu blong komplen from sam samting we yumi no nidim blong toktok from. (Jenesis 8:21; Rom 5:12) Be sipos yumi tok smosmol oltaem from sam samting we yumi no agri long olgeta, yumi stap long denja blong spolem fasin fren blong yumi wetem Jeova God. Taswe, yumi mas blokem enikaen tingting we i pulum yumi blong komplen.

¹⁸ Bitim we yumi tok smosmol from sam samting long kongregesen, i moagud we yumi holem wan gudfala tingting mo folem wan program we i mekem se yumi stap bisi mo glad oltaem, yumi onagud long God, yumi no mekem i strong tumas long narafala mo long yumi wan, mo yumi stap strong long saed blong bilif. (1 Korin 15:58; Taetas 2:​1-5) Jeova i stap lidim evri samting long ogenaesesen blong hem, mo Jisas i savegud evri samting we i stap hapen long ol wanwan kongregesen, olsem we hem i bin save long faswan handred yia. (Revelesen 1:​10, 11) Yumi mas gat longfala tingting mo wet long God mo long Kraes we hem i Hed blong kongregesen. Tufala i save yusum ol elda we oli gat wok blong lukaot long kongregesen, blong oli stretem ol bisnes we i gat nid blong stretem.​—Ol Sam 43:5; Kolosi 1:18; Taetas 1:5.

19. ?Go kasem taem ya we Kingdom i rul fulwan long ol man, yumi mas putum tingting blong yumi i stap strong long wanem?

 ¹⁹ I no longtaem, bambae ol rabis samting blong wol ya i finis, mo Kingdom blong Mesaea bambae i rul fulwan long ol man. !Go kasem taem ya, i impoten tumas we yumi wanwan i holem wan gudfala tingting! Samting ya bambae i givhan long yumi blong lukaot ol gudfala fasin blong ol Kristin brata sista blong yumi, i bitim we yumi traem faenem poen long olgeta. Sipos yumi lukluk nomo long ol gudfala fasin blong olgeta, bambae yumi kasem glad. Olsem nao, bambae yumi no harem nogud mo yumi no kam slak from we yumi stap komplen oltaem, be bambae yumi glad mo yumi kam strong moa long saed blong bilif.

20. ?Wan gudfala tingting bambae i givhan long yumi blong haremgud long wanem blesing?

²⁰ Sipos yumi holem wan gudfala tingting, samting ya bambae i givhan long yumi blong tingbaot ol blesing we yumi stap kasem long ogenaesesen blong Jeova long wol. Ogenaesesen ya, hem wan nomo long fulwol we i stap tru long Hae King blong heven mo wol. ?Taem yu tingbaot samting ya, hemia i mekem wanem long yu? ?Wanem tingting blong yu long blesing we yu yu gat blong mekem wosip long Jeova, God ya we hem wan nomo i trufala God? I gud we tingting blong yu i olsem tingting blong Deved taem hem i singsing se: “Yu [Jeova] yu stap ansa long ol prea blong mifala. Olgeta man long evri ples bambae oli mas kam long yu. Olgeta man we yu yu stap jusumaot olgeta, mo yu stap tekem olgeta oli kam long tabu ples blong yu, oli save harem gud. Bambae mifala i harem gud long ol gudgudfala samting ya blong haos blong yu.”​—Ol Sam 65:​2, 4

?Yu Yu Tingbaot?

• ?From wanem yumi mas gat tangkiu from ol man we oli lidim kongregesen?

• ?Taem wan brata we i gat wok insaed long kongregesen i mekem wan mastik, yumi mas mekem wanem?

• ?Wanem tingting we yumi mas gat taem wan jenis i kamaot long saed blong save we yumi gat finis long Baebol?

• ?Wanem i save givhan long wan Kristin blong stretem tingting blong hem long saed blong wan tijing we maet hem i ting se i no stret olgeta?

[Kwestin]

[Tok blong pija long pej 9]

Ol elda long kongregesen oli glad blong givhan long ol Kristin brata sista blong oli kam strong moa long bilif