Tinghae Long Ol Tabu Miting Blong Yumi
Tinghae Long Ol Tabu Miting Blong Yumi
“Bambae mi mi tekem yufala i kam long hil ya Saeon, we i tabu, i ples blong mi. Bambae mi mekem yufala i glad long haos blong mi, . . . ples blong prea.”—AESEA 56:7.
1. ?Baebol i talem wanem we i mas pulum yumi blong tinghae long ol miting blong yumi?
JEOVA i hivimap ol man blong hem, hemia ol tabu Kristin mo ol fren blong olgeta, blong oli wosipim hem long ‘hil blong hem we i tabu.’ Hem i mekem olgeta oli glad long ‘haos blong hem we i ples blong prea.’ Hemia haos blong God long saed blong spirit, we i “haos blong prea blong olgeta man blong evri kantri long wol.” (Aesea 56:7; Mak 11:17) Ol samting we Jeova i mekem blong hivimap ol man blong hem, oli soem se wosip we yumi mekem i go long Hem i wan samting we i tabu, i klin, i hae moa long ol narafala samting. Taem yumi tinghae long ol miting we yumi mekem blong stadi mo blong wosipim God, yumi soemaot se yumi gat tingting blong Jeova long ol samting we oli tabu.
2. ?Wanem i soemaot se Jeova i tingbaot ples we hem i jusum blong ol man oli mekem wosip long hem, se i tabu? ?Olsem wanem Jisas i soemaot se hem i gat sem tingting?
2 Long Isrel bifo, Jeova i jusum Haos Tapolen olsem ples we ol man oli mas yusum blong mekem wosip long hem. Mo oli mas tinghae long Haos Tapolen ya olsem wan samting we i tabu. Oli mas kafsaedem oel i go long Haos Tapolen mo ol samting insaed long hem, wetem ol samting we oli yusum blong mekem wosip. Long fasin ya, oli “mekem ol samting ya oli tabu we i tabu,” oli blong God nomo. (Eksodas 30:26-29) I gat tu rum long Haos Tapolen, fas rum oli talem se “Rum we i Tabu,” mo seken rum oli talem se “Rum we i Tabu we i Tabu.” (Hibrus 9:2, 3) Taem oli wokem haos blong God long Jerusalem, oli no moa yusum Haos Tapolen. Jerusalem i kam “taon ya we i tabu,” from we hem i stamba ples blong wosip blong Jeova. (Nehemaea 11:1; Matiu 27:53, NW ) Taem Jisas i stap mekem wok blong God long wol, hem i tinghae long haos blong Jeova. Hem i kros long ol man we oli yusum yad blong haos blong God blong mekem maket, mo ol man we oli pastru long yad ya olsem sotkat taem oli stap wokbaot i go samples.—Mak 11:15, 16.
3. ?Wanem i soemaot se ol asembli blong ol man Isrel oli tabu?
3 Oltaem ol man Isrel oli joen wanples blong mekem wosip long Jeova mo blong harem Loa blong hem we ol lida blong olgeta oli ridimaot. Baebol i kolem sam dei blong ol lafet blong olgeta, se ol tabu miting no ol asembli we oli tinghevi long olgeta. Tok ya i soemaot se ol miting ya oli tabu. (Levitikas 23:2, 3, 36, 37) Long wan asembli long taem blong Esra mo Nehemaea, ol Livaet oli ‘talemaot mining blong Loa i go long olgeta man.’ Be ‘taem ol man oli harem ol tok ya, hem i stikimgud olgeta, mo oli harem nogud, oli krae.’ Nao ol Livaet oli “talem long olgeta se, ‘Yufala i no krae, yufala i no harem nogud, from we dei ya i dei blong God [“i tabu,” NW].’ ” Ale ol man Isrel oli gohed long lafet ya blong wokem ol wansaed haos, we i blong seven dei, mo “olgeta evriwan oli harem gud, oli glad tumas. Mo i stat long fas dei blong lafet ya i go kasem las dei blong hem, evri dei, pris ya i stap ridimaot buk blong Loa ya i go long olgeta man. Lafet ya, olgeta oli wokem seven dei, mo long namba eit dei blong hem, oli mekem [“wan asembli we oli tinghevi long hem,” NW ] blong klosem, olsem we buk ya i talem.” (Nehemaea 8:7-11, 17, 18) Tru ya, ol lafet ya oli rili tabu, mo ol man oli mas lesingud mo tinghae long olgeta.
Ol Miting Blong Yumi Oli Tabu
4, 5. ?Wanem sam samting long saed blong ol miting we oli soem se oli tabu?
4 Tede i no gat wan tabu taon long wol we i blong Jeova, wetem wan spesel haos long hem blong mekem wosip long Jeova. Nating se i olsem, yumi no mas fogetem se ol miting we yumi mekem blong wosipim Jeova oli tabu. Tri taem evri wik, yumi joen wanples blong ridim Baebol mo blong stadi long hem. Long ol miting ya oli “eksplenem” (NW ) Baebol, mo “oli stap talemaot mining blong hem” olsem long taem blong Nehemaea. (Nehemaea 8:8) Yumi openem mo klosem olgeta miting blong yumi wetem prea. Mo long bighaf blong ol miting ya, yumi singsing blong presem Jeova. (Ol Sam 26:12) Yes, ol miting blong kongregesen oli haf blong wosip blong yumi. Taswe yumi mas lesingud wetem tingting we i soem ona mo respek.
5 Jeova i blesem ol man blong hem taem oli joen wanples blong wosipim hem, stadi long Tok blong hem, mo haremgud long kampani blong ol narafala Kristin. Sipos hem i taem blong miting, yumi save se ‘promes blong Jeova blong givim wan gudfala samting long ol man blong hem’ bambae i kamtru long miting ya. (Ol Sam 133:1, 3) Sipos yumi go long miting ya mo yumi lesingud long ol Tok blong God we i kamaot, bambae yumi kasem gudfala samting ya we Jeova i promes blong givim. Mo tu, Jisas i talem se: “Long weples we tu no tri man oli joen wanples long nem blong mi, mi mi stap wetem olgeta.” Taem yumi ridim ol vas bifo long hemia, yumi luksave se oli stap tokbaot ol miting blong ol Kristin elda blong stretem bigfala trabol we i save kamaot bitwin sam man blong God. Be tingting we i stap long vas ya, yumi save joenem wetem olgeta miting blong kongregesen. (Matiu 18:20) Ale, sipos, tru long tabu spirit, Kraes i stap long ol miting we ol Kristin oli mekem long nem blong hem, hemia i mas mekem yumi tinghae long ol miting ya olsem ol samting we oli tabu.
6. ?Yumi save talem wanem long saed blong ol ples we yumi yusum blong mekem miting, nating se bigfala miting no smol?
6 I tru, Jeova i no save stap long ol haos we ol man nomo oli wokem. Nating se i olsem, Haos Kingdom i ples blong trufala wosip. (Ol Wok 7:48; 17:24) Yumi joen wanples long Haos Kingdom blong stadi long Tok blong Jeova, prea long hem, mo singsing blong presem hem. Sem mak long ol Haos Asembli blong yumi. Ol bigbigfala haos mo stadium we yumi rentem blong mekem ol asembli, oli kam ol ples blong wosip taem yumi yusum olgeta blong mekem ol tabu asembli. Olgeta miting we yumi mekem blong wosip, nating se oli big no oli smol, be i stret we yumi tinghae long olgeta. Mo ol fasin blong yumi mo ol samting we yumi mekem oli mas soemaot tingting ya.
Ol Fasin We Oli Soem Se Yumi Tinghae Long Ol Miting
7. ?Yumi save mekem wanem blong soem se yumi tinghae long ol miting?
7 I gat sam fasin we oli soemaot klia se yumi tinghae long ol miting. Wan fasin, i blong stap long Haos Kingdom taem kongregesen i singim ol singsing blong Kingdom. Plante long ol singsing ya oli olsem prea nomo, mo yumi mas singim olgeta long fasin we i soem ona mo respek. Aposol Pol i talem tok blong Sam 22 long saed blong Jisas, i se: “God. Mi bambae mi talemaot long ol brata mo sista blong mi ol samting ya we yu bin mekem. Bambae mi mi [“singsing blong,” NW ] presem yu long fes blong olgeta.” (Hibrus 2:12) Taswe yumi mas sidaon rere bifo we jeaman i talemaot singsing. Mo taem yumi singsing, yumi mas tingting dip long mining blong ol tok blong hem. I gud sipos yumi singsing wetem sem filing olsem man blong raetem Sam ya, we i talem se: “Olgeta. !Yumi presem Hae God! Bambae mi mi stanap long fes blong olgeta man blong hem, mi talem tangkiu long hem long olgeta tingting blong mi.” (Ol Sam 111:1) Yes, janis ya blong singsing blong presem Jeova i mas pulum yumi blong kam eli long miting mo blong stap go kasem en blong hem.
8. ?Wanem tok blong Baebol we i soem se yumi mas lesingud wetem bigfala respek long ol prea long miting?
8 Wan narafala samting we i mekem se ol miting oli givim paoa long yumi, hemia prea we brata i mekem wetem fulhat blong hem, long bihaf blong yumi evriwan we i stap long miting ya. Long wan miting we ol Kristin long faswan handred yia oli mekem long Jerusalem, “olgeta evriwan oli joen [“long wan tingting nomo,” NW ]” blong prea long God. From samting ya, nating we ol man oli stap ronem mo kilim olgeta, be oli gohed blong “talemaot tok blong God we oli no fraet nating.” (Ol Wok 4:24-31) ?Olsem wanem? ?Taem oli stap prea, yu ting se i gat wan long olgeta we i letem tingting blong hem i flae i go long narafala ples? Nogat. Oli joen “long wan tingting nomo” blong prea. Ol prea we yumi mekem long ol miting blong yumi, oli soemaot filing blong yumi evriwan we i stap long miting ya. I stret we yumi lesingud long olgeta wetem bigfala respek.
9. ?Olsem wanem klos mo fasin blong yumi oli save soem se yumi gat respek mo tinghae long ol tabu miting blong yumi?
9 Klos blong yumi tu i save soemaot sipos yumi tinghae long ol miting olsem ol samting we oli tabu. Klos mo hea blong yumi oli save givhan bigwan blong mekem se i gat ona mo respek i stap long ol miting. Aposol Pol i givim advaes ya se: “Long evri ples, mi wantem we olgeta man oli mas ona long God, mo oli mas leftemap han blong olgeta blong prea long hem, we oli no stap kros, mo oli no stap raorao. Mo mi wantem se ol woman oli putum klos blong olgeta we i stret nomo, i no blong pulum ae blong man, mo i no blong flas. Bambae oli no mas mekem hea blong olgeta i flas tumas, mo oli no mas putum ol flas samting we oli wokem long gol mo perel, mo ol dres ya we praes blong olgeta i antap tumas, blong mekem ol man oli glad long olgeta. Olgeta oli mas mekem ol gudgudfala wok, from we hemia i prapa fasin blong ol woman we oli stap talem se oli lavem God.” (1 Timoti 2:8-10) Taem yumi mekem ol bigfala asembli long ol stadium, yumi save werem klos we i stret long weta. Be klos ya i mas soem yet se yumi gat respek mo yumi tinghae long asembli ya. Mo tu, sipos yumi gat respek, yumi no save kakae taem program blong asembli i stap gohed, mo yumi no save kakae jinggam tu. Klos mo fasin blong yumi long ol miting mo asembli oli save givim ona long Jeova God, long wosip blong hem, mo long ol Kristin brata sista we oli joen wetem yumi blong wosip.
Fasin We i Stret Long Ol Man Blong God
10. ?Olsem wanem aposol Pol i soemaot se i mas gat gudfala fasin long ol Kristin miting?
10 Long 1 Korin japta 14, yumi faenem waes advaes blong aposol Pol long saed blong ol Kristin miting. Long en blong japta ya, hem i talem se: “Yufala i mas mekem olgeta samting long fasin we i stret gud, we ol man oli glad long hem.” (1 Korin 14:40) Ol miting oli wan impoten haf blong wok blong Kristin kongregesen. Taswe, evriwan we oli joen long ol miting oli mas gat gudfala fasin, we i stret long ol man blong Jeova.
11, 12. (a) ?Wanem samting we yumi mas makem long tingting blong ol pikinini we oli kam long ol miting? (b) ?Olsem wanem ol pikinini oli save talemaot bilif blong olgeta long ol miting?
11 Ol Kristin papa mama oli mas tijim ol pikinini blong olgeta blong oli gat gudfala fasin long ol miting. Oli mas eksplenem long pikinini se Haos Kingdom mo ples blong Buk Stadi, i no ples blong pleplei. Ol ples ya oli blong mekem wosip long Jeova mo blong stadi long Tok blong hem. Waes King Solomon i raetem se: “Taem yu go long haos blong God, yu mas tingting gud long fasin we yu stap mekem. I moa gud yu go long ples ya blong lanem samting.” (Prija 5:1) Moses i talem long ol man Isrel se olgeta evriwan oli mas joen wanples, ol bigman wetem “ol pikinini” tu. Hem i se: “Yufala i mas singaot olgeta . . . oli kam wanples, . . . blong olgeta evriwan oli save harem tok ya, mo blong oli save lanem fasin ya blong ona long Hae God, mo blong oli save obei long olgeta toktok blong hem oltaem. Nao long fasin ya, ol pikinini ya blong yufala wetem olgeta we bambae oli kamaot biaen long yufala, bambae oli save harem Loa ya, nao oltaem, . . . bambae oli save lanem fasin ya blong obei long Hae God.”—Dutronome 31:12, 13.
12 Sem mak tede, ol yangfala blong yumi oli kam long miting wetem papa mama blong olgeta blong oli harem ol tok blong God mo blong oli lanem blong obei long hem. Taem ol pikinini oli naf blong lesingud mo kasem save long ol stamba tijing blong Baebol, oli save givim ol smosmol ansa blong “talemaot” bilif blong olgeta. (Rom 10:10) Maet wan smol pikinini i talem sam wod nomo blong ansa long wan kwestin we hem i kasem save long hem. Fastaem, maet hem i ridim ansa blong hem. Sloslo, bambae hem i kam naf blong talem ansa long prapa tok blong hem. Bambae hem i haremgud blong mekem olsem, mo samting ya bambae i givhan long hem blong gohed. Ol olfala tu oli glad tumas blong harem ol tok blong ol yangfala we i soem bilif mo i kamaot long hat blong olgeta. I klia se ol papa mama tu oli mas givim ansa long ol miting. Long rod ya, oli soem eksampol long ol pikinini blong olgeta. I gud sipos pikinini i save gat prapa Baebol blong hem, wetem singbuk, mo buk we yumi stadi long hem. Pikinini i mas lanem blong lukaotgud long ol buk ya. Olgeta samting ya bambae i makem long tingting blong hem se ol miting oli tabu.
13. ?Yumi wantem se man we i kam long miting blong fastaem, i mekem wanem?
13 I tru, yumi no wantem se ol miting blong yumi oli kam olsem ol sevis long ol jos blong Krisendom. Sam long olgeta oli no gat filing nating, oli kolkol. Long sam narawan, ol man oli singaot bitim mak, olsem wan grup blong plei rok miusik. Yumi wantem se i gat lav mo fasin fren long ol miting blong yumi long Haos Kingdom. Be yumi no mas bitim mak mo mekem se miting i kam olsem wan klab blong wol. Yumi joen wanples blong mekem wosip long Jeova, ale ol miting blong yumi oli mas soemaot respek mo ona we i stret. Taem man i kam long miting blong fastaem, yumi wantem se save we hem i harem mo fasin blong yumi mo ol pikinini blong yumi, bambae i pulum hem blong talem se: “Tru, God i stap long medel blong yufala long ples ya.”—1 Korin 14:25.
Wan Haf Blong Wosip Blong Yumi We Bambae i Stap Olwe
14, 15. (a) ?Olsem wanem yumi save ‘lukaotgud long haos blong God’? (b) ?Olsem wanem Aesea 66:23 i stap kamtru tede?
14 Olsem yumi tokbaot finis, Jeova i stap hivimap ol man blong hem mo i mekem olgeta oli glad long ‘haos blong hem we i ples blong prea,’ hemia haos blong hem long saed blong spirit. (Aesea 56:7) Gudfala man blong God, Nehemaea, i talem long ol man Isrel se oli save soem respek long haos blong God sipos oli givim presen mane blong sapotem haos ya. Hem i se: “Bambae [yufala] i lukaot gud long haos blong [God].” (Nehemaea 10:39) Mo taem Jeova i singaot yumi blong wosipim hem long ‘haos blong hem we i ples blong prea,’ yumi mas lukaotgud tu blong no mestem janis ya.
15 Profet Aesea i soemaot se yumi mas joen oltaem blong mekem wosip. Hem i talemaot tok blong God se: “Oltaem nomo, long Lafet blong Niumun, mo long Sabat dei, bambae i gat ol man blong olgeta kantri long wol oli kam mekem wosip long mi.” (Aesea 66:23) Hemia i stap hapen tede. Evri wik mo evri manis, yes oltaem, ol Kristin we oli givim laef blong olgeta i go long Jeova finis, oli kam wanples blong wosipim hem. Oli mekem olsem taem oli kam long ol Kristin miting mo taem oli go prij. ?Olsem wanem? ?Yu yu wan long olgeta ya we oltaem nomo ‘oli kam mekem wosip long Jeova’?
16. ?From wanem fasin blong go long miting i mas stap olsem wan samting we yumi mekem oltaem long laef blong yumi?
16 Aesea 66:23 bambae i kamtru fulwan long niufala wol we Jeova i promes blong mekem. Long taem ya, “ol man blong olgeta kantri” bambae oli kam wanples evri wik mo evri manis “blong mekem wosip” long Jeova, gogo i no save finis. Long niufala wol, fasin blong joen wanples blong mekem wosip long Jeova bambae i stap olwe long laef blong yumi. Taswe, naoia, fasin blong go long ol tabu miting blong yumi i mas stap olsem wan samting we yumi mekem oltaem long laef blong yumi.
17. ?From wanem yumi nidim moa ol miting, taem yumi luk se ‘Dei blong jajem olgeta man i kam klosap finis’?
17 Taem en blong wol ya i stap kam klosap moa, tingting blong yumi i mas strong moa blong joen long ol Kristin miting blong mekem wosip. From we ol miting ya oli tabu, yumi no letem wok we yumi mekem blong winim vatu, mo homwok blong skul, mo ol klas afta skul, oli blokem yumi blong yumi no joen evri taem long miting wetem ol Kristin brata sista blong yumi. Yumi nidim paoa ya we yumi kasem taem yumi joen wetem olgeta. Long ol miting blong kongregesen, yumi gat janis blong savegud ol narafala mo leftemap tingting blong olgeta. Yumi givgivhan long yumi blong kam “strong blong lavem ol man, mo blong mekem ol gudfala fasin.” Yumi mas joen wanples moa, taem yumi luk se “Dei ya we Masta blong yumi bambae i jajem olgeta man long hem, hem i kam klosap finis.” (Hibrus 10:24, 25) From samting ya, oltaem yumi mas soem se yumi tinghae long ol tabu miting blong yumi. Yumi mas go evri taem long miting, yumi mas werem klos we i stret, mo yumi mas mekem gudfala fasin long ol miting. Olsem nao, bambae yumi soemaot se yumi gat tingting blong Jeova long ol samting we oli tabu.
Tingtingbak
• ?Wanem i soemaot se yumi mas tingbaot ol miting blong ol man blong Jeova olsem samting we i tabu?
• ?Wanem sam samting long saed blong ol miting we i soemaot se oli tabu?
• ?Olsem wanem ol pikinini oli soem se oli gat respek mo oli tinghae long ol miting?
• ?From wanem, fasin blong go long miting i mas kam wan samting we yumi mekem oltaem long laef blong yumi?
[Kwestin]
[Tok blong pija long pej 28]
Nomata weples yumi mekem miting blong wosipim Jeova, ol miting oli tabu
[Tok blong pija long pej 31]
Ol pikinini blong yumi oli joen long miting blong harem tok blong God mo blong lanem blong obei long hem