Ol Bigfala Poen Long Buk Blong Jeremaea
Tok Blong Jeova i Wan Samting We i Laef
Ol Bigfala Poen Long Buk Blong Jeremaea
!BIGFALA trabol we Jeremaea i talemaot se bambae i kam i mas mekem ol man raonabaot long hem oli sek! Naesfala tempol we i bin stap olsem stamba ples blong wosip blong bitim 300 yia finis, bambae i bon evriwan. Taon blong Jerusalem mo kantri blong Juda bambae oli stap emti ples nomo mo ol man blong olgeta bambae oli go kalabus. Stori blong ol samting ya mo sam narafala jajmen bakegen i stap long buk blong Jeremaea we i namba tu longfala buk long Baebol. Mo tu, buk ya i talemaot ol samting we oli hapen long Jeremaea long ol 67 yia we hem i mekem wok olsem profet. Ol save long buk ya oli no folem prapa oda blong taem we ol samting oli bin hapen, be oli folem samting we Jeremaea i stap talemaot.
?From wanem yumi intres long buk blong Jeremaea? Ol profet tok long buk ya we oli kamtru finis oli save mekem bilif blong yumi i strong long Jeova se hem i Man blong mekem ol promes blong hem oli kamtru. (Aesea 55:10, 11) Wok we Jeremaea i mekem olsem wan profet mo tingting we ol man oli gat long mesej we hem i talemaot i sem mak long taem blong yumi. (1 Korin 10:11) Mo tu, buk ya i tokbaot olsem wanem Jeova i soemaot ol fasin blong hem long ol samting we hem i mekem wetem ol man blong hem. Ol fasin ya blong hem oli mas gat bigfala paoa long yumi.—Hibrus 4:12.
“I GAT TU SIN WE YUFALA I FOLDAON LONG HEM”
Jeremaea i kasem wok blong hem olsem wan profet long namba 13 yia rul blong Josaea we hem i king blong Juda. Hemia 40 yia bifo we Jerusalem i lus long 607 B.K.T. (Jeremaea 1:1, 2) Long ol 18 yia we i stap yet long rul blong Josaea, Jeremaea i talemaot long klia ples ol nogud fasin blong ol man Juda mo ol jajmen we Jeova bambae i mekem agensem kantri ya. Jeova i talem se: “Mi bambae mi spolem Jerusalem, mi mekem i kam hip blong ol ston nomo. Mo ol taon blong Juda, bambae mi mekem olgeta oli kam draeples, we bambae i no gat man i stap long hem.” (Jeremaea 9:11) ?From wanem? Jeova i ansa se, from we “i gat tu sin we [ol man blong mi oli] foldaon long hem.”—Jeremaea 2:13.
Mo tu, mesej ya i tokbaot se bambae Jeova i tekem ol man we oli tanem tingting blong olgeta, oli kambak long kantri blong olgeta bakegen. (Jeremaea 3:14-18; 12:14, 15; 16:14-21) Be ol man oli no glad nating long Jeremaea. “Lida blong ol gad long haos blong Hae God” i wipim Jeremaea mo i lokem leg blong hem long wan wud we i olsem bigfala hankaf, blong wan fulnaet.—Jeremaea 20:1-3.
Ansa Blong Sam Kwestin Long Saed Blong Baebol:
1:11, 12, futnot—?From wanem Jeova i yusum pija blong “han blong tri ya amon” blong tokbaot fasin blong hem blong mekem tok blong hem i kamtru? Tri ya amon i “wan long ol faswan tri blong gat flaoa long taem we hot taem i stap kam.” (Vas 11, futnot long NW ) I olsem we Jeova i stap girap eli mo i “sanem ol profet [blong hem]” blong oli givim woning long ol man blong hem long saed blong jajmen blong Hem. Mo, i olsem we Jeova i stap “lukluk” blong meksua se jajmen blong hem i kamtru.—Jeremaea 7:25.
2:10, 11—?Wanem i mekem se ol fasin blong ol man Isrel we oli no stap tru long Jeova i narakaen? Maet samtaem ol hiten man blong ol neson long wes blong taon ya Saepras, no Kitim, mo long is saed blong Kedara, oli karem ol god blong ol narafala neson oli kam joen long ol god blong olgeta be neva bifo i gat wan samting olsem i hapen. Ol man Isrel nomo oli lego Jeova, God ya we i laef mo oli leftemap ol aedol we oli no laef nating.
3:11-22; 11:10-12, 17—?From wanem Jeremaea i tokbaot kingdom blong ol ten laen blong Isrel long not, nating se Sameria i foldaon finis long yia 740 B.K.T.? Hemia from we, taem Jeova i spolem Jerusalem long yia 607 B.K.T., hem i stap soemaot jajmen blong hem we i go long ful neson blong Isrel, i no long Juda nomo. (Esikel 9:9, 10) Jeova i intres long fulwan neson blong Isrel mo hem i soemaot samting ya long Jerusalem we hem i olsem pija blong ful neson blong Isrel, taswe ol mesej we profet blong God i talemaot i tokbaot ol ten laen ya tu.
4:3, 4—?Wanem mining blong tok ya we Jeova i talem long vas ya? Ol man Jiu we oli no stap tru long Jeova oli nidim blong brebrekem mo klinim graon blong olgeta we i minim hat blong olgeta, blong i sofsof mo i klin. Oli mas karemaot “skin” (NW) we i kavremap hat blong olgeta, i min se oli mas sakemaot ol doti tingting mo filing we maet i stap pusum olgeta blong mekem ol nogud samting. (Jeremaea 9:25, 26; Ol Wok 7:51) Hemia i min se oli mas jenisim laef blong olgeta—oli mas lego ol nogud fasin blong olgeta mo mekem samting we God i glad long hem.
4:10; 15:18—?Olsem wanem Jeova i trikim ol man blong hem we oli rebel agensem hem? Long taem blong Jeremaea, i gat ol profet we oli stap “talemaot ol giaman toktok nomo.” (Jeremaea 5:31; 20:6; 23:16, 17, 25-28, 32) Jeova i letem olgeta oli talemaot ol tok blong olgeta we biaen oli no kamtru.
16:16—?I minim wanem se Jeova i ‘sanem tok i go long ol man blong pulum fis’ mo “ol man blong lukaot mit long bus”? Maet i stap tokbaot se Jeova bambae i sanem ol enemi blong hem blong lukaotem ol man Jiu we oli no stap tru long hem blong oli kasem jajmen blong hem. Sipos yumi skelem wetem Jeremaea 16:15, maet i minim tu we Jeova i stap lukaotem ol man Isrel we oli tanem tingting blong olgeta.
20:7—?Olsem wanem Jeova i yusum paoa blong hem blong winim Jeremaea mo i trikim hem? Taem Jeremaea i talemaot ol jajmen blong Jeova, ol man oli no glad long hem, oli no wantem lesin long hem, mo oli agensem hem. From samting ya, maet Jeremaea i harem olsem se hem i no gat paoa blong gohed. Be Jeova i yusum paoa blong hem blong winim ol filing ya we Jeremaea i gat mo i givim paoa long Jeremaea blong gohed long wok blong hem. Taswe Jeova i trikim Jeremaea taem hem i yusum hem blong mekem samting we hem wan i ting se hem i no naf blong mekem.
Ol Lesen Blong Yumi:
1:8. Samtaem Jeova i sevem ol man blong hem long fasin agens—maet i stanemap ol jaj we oli gat gudfala tingting, i putumap ol man blong gavman we oli gat hed blong oli tekem ples blong olgeta we oli agens, no maet hem i givim paoa long ol man blong hem blong oli save stanap strong.—1 Korin 10:13.
2:13, 18. Ol man Isrel we oli no stap tru long Jeova oli mekem tu nogud samting. Oli lego Jeova, we hem i stamba blong ol blesing, ol advaes, mo we i save protektem olgeta. Taem oli mekem ol kontrak wetem ami blong Ijip mo Asiria i olsem we oli stap wokem prapa tang wota blong olgeta. Long taem blong yumi, sipos yumi lego trufala God nao yumi folem tingting blong man mo ol politik blong wol ya, i olsem we yumi lukluk i go long wan ‘tang we i brok’ mo yumi gowe long “springwota, we i save givim laef,” hemia Jeova.
6:16. Jeova i givim advaes long ol man blong hem we oli rebel blong oli stop smoltaem, oli skelem olgeta wanwan, mo oli kambak long “ol rod ya we i blong bifo” we ol bubu blong olgeta i bin strong blong folem. I gud we sam samtaem yumi tu yumi skelemgud yumi wan blong luk sipos yumi rili stap wokbaot long rod we Jeova i wantem se yumi wokbaot long hem.
7:1-15. Taem ol man Jiu oli trastem tempol, olsem we hem i save givim gudlak, samting ya i no sevem olgeta. Yumi mas wokbaot wetem bilif, be i no from samting we yumi luk wetem prapa ae blong yumi.—2 Korin 5:7.
15:16, 17. Yumi save winim tingting we i foldaon olsem Jeremaea. Yumi save mekem olsem taem yumi haremgud long stadi wanwan we yumi mekem, taem yumi leftemap nem blong Jeova long wok blong prij, mo taem yumi no joen wetem ol rabis fren.
17:1, 2. Ol sin blong ol man Juda i mekem Jeova i no glad long ol sakrefaes blong olgeta. Sipos ol fasin blong yumi i no klin, Jeova i no save akseptem ol sakrefaes we yumi mekem blong presem hem.
17:5-8. Yumi save trastem ol man mo ol ogenaesesen blong wol ya sipos oli mekem wok we i no agensem wil blong God mo ol stamba rul blong hem. Be taem ol man oli stap talem se bambae oli putum pis mo seftaem, i waes we yumi trastem Jeova nomo. —Ol Sam 146:3.
20:8-11. Yumi no mas letem fasin blong ol man blong ting nating long gud nius, mo fasin agens oli spolem tingting blong wok strong long wok blong talemaot Kingdom.—Jemes 5:10, 11.
“SIPOS YUFALA I WANTEM LAEF, I GUD YUFALA I STAP ANINIT LONG PAOA BLONG KING”
Jeremaea i talemaot jajmen agens long ol fo laswan king blong Juda mo ol giaman profet, ol rabis man blong lukaot long sipsip mo ol pris we oli gat ol fasin we oli no stret. Jeova i tokbaot ol man blong hem we oli stap tru long hem se oli olsem ol gudfala frut blong figtri, hem i talem se: “Bambae mi lukaot long olgeta long wan gudfala fasin.” (Jeremaea 24:5, 6, NW ) Trifala profet tok long japta 25 i tokbaot ol jajmen we ol narafala japta bambae oli tokbaot.
Ol pris mo ol profet oli mekem plan blong kilim Jeremaea i ded. Mesej we Jeremaea i talemaot hemia se oli mas stap aninit long king blong Babilon. Jeremaea i talem long King Jedekia se: “Sipos yufala i wantem laef, i gud yufala i letem yufala i stap aninit long paoa blong king blong Babilonia.” (Jeremaea 27:12) Be, ‘ol man ya blong mi [ol man Isrel] we mi mi bin ronemaot olgeta, mi bambae mi tekem olgeta i kambak bakegen.’ (Jeremaea 31:10) From wan gudfala risen, Jeova i mekem wan promes long ol man long laen blong Rekab. King i putum Jeremaea long “kalabus nomo long yad blong haos blong [king], we ol gad oli stap long hem.” (Jeremaea 37:21) Oli spolem Jerusalem mo oli tekem plante man oli go kalabus. Jeremaea mo sekretari blong hem, Baruk, oli sam long olgeta ya we oli stap long Jerusalem. Nating se Jeremaea i talemaot woning finis se bambae oli no mekem olsem, olgeta ya we oli fraet oli girap oli go long Ijip. Japta 46 kasem 51 i tokbaot mesej we Jeremaea i talemaot long saed blong ol neson.
Ansa Blong Sam Kwestin Long Saed Blong Baebol:
22:30—?Olsem wanem? ?Panis ya i blokem raet we Jisas Kraes i gat blong tekem ples blong King Deved? (Matiu 1:1, 11) No, i no blokem. Panis ya i blokem ol man we oli kamaot long laen blong Jehoeakin nomo se bambae oli no save ‘kam king, mo rul long Juda olsem King Deved.’ Jisas i king mo i rul long heven be i no long Juda.
23:33, NW—?Wanem ya “baden blong Jeova”? Long taem blong Jeremaea, impoten mesej ya we profet ya i talemaot long saed blong Jerusalem se bambae hem i lus, i kam olsem wan baden blong ol man ples blong hem. Mo tu, ol man we oli no wantem lesin, oli olsem wan baden long Jeova mo Jeova bambae i sakemaot olgeta. Sem mak, mesej blong Baebol se Krisendom bambae i lus i no longtaem, i wan baden long ol man blong Krisendom, mo ol man we oli no tinghevi long mesej ya, oli olsem wan baden long Jeova.
31:33—?Olsem wanem God i raetemdaon loa blong hem long hat blong ol man? Taem wan man i laekem tumas ol loa blong God, we i wantem tumas blong mekem ol samting we Jeova i wantem, hemia i olsem we God i raetem loa blong hem long hat blong man ya.
32:10-15—?From wanem oli mas raetem tu pepa blong semfala kontrak nomo? Pepa we i stap open i blong ol man oli save ridim sipos oli nidim. Narafala pepa we oli fasem i blong yusum olsem pruf blong soem se hemia we i open i stret. Jeremaea i soem wan nambawan eksampol long yumi olsem wanem yumi save folem rod ya we i laenap wetem loa taem yumi stap mekem bisnes wetem wan famle no wan brata no sista blong yumi.
33:23, 24, NW—?Hu ya “tufala famle” we vas ya i tokbaot? Faswan hemia famle blong king we i kamaot long laen blong King Deved, mo narawan hemia famle blong pris we i kamaot long laen blong Eron. Taem oli spolem Jerusalem mo tempol blong Jeova, i klia se Jeova i sakemaot tufala famle ya mo hem i no moa gat wan kingdom long wol ya mo i no moa stanemap wosip blong hem bakegen long ples ya.
46:22—?From wanem noes blong ol man Ijip i olsem noes blong wan snek? Maet i minim smol noes we wan snek i mekem taem hem i ronwe, no maet tok ya i blong tokbaot taem ya we ol man Ijip oli sem bigwan from we oli bin lus long faet. Tok ya i blong soemaot tu long ol man Ijip se woman god blong olgeta hemia Uatchit, we i olsem wan snek, bambae i no save protektem olgeta, nating se ol Fero blong Ijip oli stap putum pija blong snek ya long hat blong olgeta.
Ol Lesen Blong Yumi:
21:8, 9; 38:19. Jes bifo we Jerusalem i lus, Jeova i letem ol man Jerusalem we oli no wantem tanem tingting blong olgeta blong oli jus sipos oli wantem laef no ded, nating se i stret nomo we olgeta ya oli ded. Yes, “oltaem hem i gat sore long man.”—2 Samuel 24:14; Ol Sam 119:156.
31:34. Jeova i no stap tingbaot bakegen ol sin blong ol man we hem i fogivim olgeta finis. Taswe long fiuja, bambae hem i no save tekem aksen agensem ol man we hem i fogivim olgeta finis. !Hemia wan gudfala samting blong tingbaot long saed blong Jeova!
38:7-13; 39:15-18. Jeova i no fogetem ol gudfala wok we yumi mekem, olsem wok ya blong ‘givhan long ol Kristin man’ no ol tabu brata blong Kraes.—Hibrus 6:10.
45:4, 5. Sem mak olsem ol las dei long taem blong Juda, tede yumi laef long “ol las dei” blong rabis fasin blong wol ya, taswe i no taem blong yumi lukaot blong gat “gudfala laef” olsem maet blong gat plante mane, haenem, no blong hivimap plante samting long saed blong bodi we yumi ting se bambae i mekem yumi sef.—2 Timoti 3:1, NW; 1 Jon 2:17.
“OLI BREKEM BIGFALA STONWOL BLONG TAON YA”
Hemia yia 607 B.K.T. Jedekia i stap king blong 11 yia nao. King Nebukadnesa blong Babilon i raonem Jerusalem blong bitim 18 manis finis. Long namba naentin yia blong rul blong Nebukadnesa, long namba faef manis mo long namba seven dei blong manis ya, Nebusaradan we i komanda blong ol soldia blong king ‘i kam’ long Jerusalem. (2 King 25:8) Ating taem hem i stap long kamp blong olgeta afsaed long stonwol blong Jerusalem, Nebusaradan i luklukgud olsem wanem blong go insaed long taon. Hem i mekemgud ol plan blong olgeta. Tri dei biaen, long namba ten dei blong manis ya, hem i ‘kam insaed’ long Jerusalem. Mo “oli brekem bigfala stonwol blong taon ya.”—Jeremaea 52:7, 12.
Jeremaea i tokbaot evri samting long saed blong Jerusalem taem hem i lus. Hemia nao from wanem nekiswan buk blong Baebol hemia Ol Krae, bambae i tokbaot ol man we oli stap Krae from Jerusalem.
[Tok blong pija long pej 16]
Long ol tok blong Jeremaea, hem i talemaot ol jajmen blong Jeova agensem Jerusalem
[Tok blong pija long pej 17]
?Olsem wanem Jeova i ‘yusum paoa blong hem blong winim Jeremaea’?
[Tok blong pija long pej 18]
“Olgeta ya we ol enemi oli kam tekemaot olgeta oli go wok slef long Babilonia, mi mi luk se olgeta oli olsem ol gudfala frut ya.”—Jeremaea 24:5