No Brekem Mared Blong Man Mo Woman We God i Joenem
No Brekem Mared Blong Man Mo Woman We God i Joenem
“From we God i joenem tufala [olsem wan bodi nomo], man i no mas brekem mared blong tufala.”—MATIU 19:6.
1, 2. ?From wanem i tru mo i stret folem Baebol se ol hasban mo waef oli mas fesem sam problem?
TINGBAOT se yu rere blong go long wan longfala trip long trak. ?Olsem wanem? ?Bambae yu kasem sam trabol long rod? !Yu krangke sipos yu ting se samting ya i no save hapen! Maet weta i kam nogud, ale yu mas ron sloslo mo lukaotgud. Maet trak i brokdaon mo yu no naf blong fiksimap, ale yu mas wet long saed blong rod mo lukaot help. ?From we yu kasem trabol olsem, bambae yu stat blong tingting se yu no sud kam long trip ya, mo se i moagud we yu lego trak blong yu i stap long saed blong rod mo yu ronwe long hem nomo? Bambae yu no save tingting olsemia. Taem yu mekem wan longfala trip, yu save finis se i mas gat sam problem, mo yu traem blong winim olgeta long waes fasin.
2 Sem samting i tru long saed blong mared. Man mo woman we i mared, tufala i save se bambae i mas gat sam problem. Tufala i krangke sipos tufala i ting se afta we tufala i mared laef bambae i hapi olwe nomo. Long 1 Korin 7:28 Baebol i talem klia se ol hasban mo waef bambae “oli gat trabol long laef blong olgeta.” ?From wanem i olsem? Blong talem stret, hemia from we ol hasban mo ol waef oli no stret gud olgeta, mo from we yumi stap long wan taem we ‘laef long wol ya i kam strong tumas.’ (2 Timoti 3:1; Rom 3:23) Taswe, nating se hasban mo waef i joengud mo tufala i traem folem tingting blong God oltaem, be sam samtaem tufala i mas fesem problem.
3. (a) ?Wanem tingting blong plante man blong wol long saed blong mared? (b) ?From wanem ol Kristin oli traehad blong mekem mared blong olgeta i stapgud?
3 Faswan tingting blong sam hasban mo waef we oli fesem problem, se bambae oli finisim mared blong olgeta. Long plante kantri, namba blong ol divos i stap kam antap bitim mak. Be ol trufala Kristin oli traem faenem rod blong winim ol problem i bitim we oli ronwe long olgeta. ?From wanem? From we long tingting blong olgeta, mared i wan tabu presen we i kamaot long Jeova. Long saed blong mared man mo woman, Jisas i talem se: “From we God i joenem tufala olsem, man i no mas brekem mared blong tufala.” (Matiu 19:6) I tru, i no isi oltaem blong folem tok ya blong Jisas. Plante taem, sam famle no sam narafala, wetem sam man blong givim advaes long saed blong mared tu, oli no tinghae long ol rul blong Baebol, ale oli givim advaes long hasban mo waef se tufala i mas seraot no divos, nating se risen blong tufala blong seraot i no laenap wetem Baebol. * Ol Kristin oli save se i moagud blong fiksimap trabol mo mekem mared i stap gud i bitim we oli hareap blong finisim. Tru ya, yumi mas gat strong tingting blong mekem ol samting long fasin we Jeova i wantem, i no folem advaes blong ol narafala.—Ol Proveb 14:12.
Winim Ol Trabol
4, 5. (a) ?Wanem ol trabol we ol mared man mo woman i mas winim? (b) ?From wanem ol rul blong Baebol oli wokgud taem i gat trabol insaed long mared?
4 I tru tumas se, sam samtaem olgeta mared man mo woman oli nidim blong luklukgud long mared blong olgeta. Plante taem, oli mas stretem sam smosmol samting we oli no agri long olgeta. Be long sam mared, i gat trabol we i bigwan moa, we i save spolem fandesen blong ol mared ya. Maet i gat sam taem we yutufala i mas askem help blong wan Kristin elda we i mared mo i bin pastru long plante traem. Be samting ya i no min se mared blong yutufala i nogud. Hemia i soemaot nomo se i impoten blong folemgud ol rul blong Baebol blong faenem rod blong stretem trabol.
5 Jeova i wokem ol man mo woman mo hem i putumap plan ya se man mo woman i mared. Taswe, hem i savegud bitim ol narafala man olsem wanem blong gat wan gudfala mared. Be kwestin i stap se: ?Bambae yumi lesin long advaes long Tok blong hem mo obei long advaes ya? Sipos yumi lesin mo obei, bambae yumi kasem gudfala frut. Jeova i talem long ol man blong hem long taem bifo se: “Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.” (Aesea 48:18) Sipos yumi folem ol advaes we Baebol i givim, yumi save gat wan gudfala mared. Fastaem, bambae yumi tokbaot advaes we Baebol i givim long ol hasban.
“Gohed Blong Lavem Ol Woman Blong Yufala”
6. ?Baebol i givim wanem advaes long ol hasban?
6 Leta we aposol Pol i raetem i go long ol Kristin long Efesas i givim klia advaes long ol hasban. Pol i talem se: “Yufala ol man we i mared, yufala i mas [“gohed blong,” NW ] lavem ol woman blong yufala, olsem we Kraes i lavem [“kongregesen,” NW ]. Taswe hem i letem laef blong hem, blong sevem [kongregesen] ya. Long sem fasin, man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo. Taem man i stap lukaot gud long woman blong hem, i olsem we hem i stap lukaot gud long bodi blong hem nomo. I no gat man we i wantem spolem bodi blong hem. Man i stap kakae gud blong mekem bodi blong hem i strong, mo i stap lukaot gud long bodi blong hem, olsem we Kraes i stap lukaot gud long [kongregesen]. Mo bakegen, i blong yufala wanwan. Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo.”—Efesas 5:25, 28, 29, 33.
7. (a) ?Wanem bigfala fasin we Kristin mared i mas stanap long hem? (b) ?Olsem wanem ol Kristin hasban oli gohed blong lavem ol woman blong olgeta?
7 Pol i no tokbaot evri problem we i save kamaot long mared. Be hem i go stret long stamba samting we i save stretem ol problem taem hem i tokbaot nambawan fasin we Kristin mared i mas stanap long hem—hemia lav. Long ol vas antap, Pol i tokbaot lav fo taem. Makem tu we Pol i talem long ol hasban se: ‘Gohed blong lavem ol woman blong yufala.’ Ating Pol i luksave se i isi blong foldaon long wan man no woman mo lavem hem fastaem, be i no isi blong gohed olwe blong lavem hem. Hemia i tru moa long ‘ol las dei ya’ (NW), from we plante man oli “tingbaot olgeta nomo” mo oli ‘mekem i strong tumas long ol narafala.’ (2 Timoti 3:1-3) Ol nogud fasin ya oli stap spolem plante mared tede. Be hasban we i lavem woman blong hem bambae i no letem fasin blong ol man blong wol blong tingbaot olgeta nomo i gat paoa long tingting mo fasin blong hem.—Rom 12:2.
?Olsem Wanem Blong Givim Ol Samting We Waef Blong Yu i Nidim?
8, 9. ?Olsem wanem Kristin hasban i save givim ol samting we woman blong hem i nidim?
8 ?Sipos yu yu wan Kristin hasban, olsem wanem yu save blokem fasin ya blong tingbaot yu wan nomo mo soemaot trufala lav long woman blong yu? Long ol tok we Pol i raetem long ol Kristin long Efesas, hem i makemaot tu wok we yu mas mekem: Yu mas givim ol samting we woman blong yu i nidim, mo yu mas lukaotgud long hem, olsem we yu lukaotgud long bodi blong yu. ?Olsem wanem yu save givim ol samting we woman blong yu i nidim? Wan rod, hemia blong givim ol samting we bodi blong hem i nidim blong i stap strong. Pol i talem long Timoti se: “Man we i no wantem lukaot long olgeta famle blong hem, mo antap long hem, hem i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.”—1 Timoti 5:8.
9 Be hasban i mas givim sam moa samting antap long kakae, klos, mo haos. ?From wanem? From we, maet hasban i mekemgud wok ya blong givim ol samting we woman blong hem i nidim long saed blong bodi, be hem i no givim samting we woman i nidim blong haremgud long filing blong hem mo blong stap strong long saed blong bilif. I impoten tumas we hem i mekem tufala laswan wok ya. I tru, plante Kristin man oli bisi long ol wok long kongregesen. Be taem wan man i gat bigfala wok long kongregesen, hemia i no givim raet long hem blong sakemaot wok we God i givim long hem olsem hed blong famle. (1 Timoti 3:5, 12) Sam yia i pas, Wajtaoa i tokbaot poen ya i se: “ ‘Man blong lukaot long sipsip i mas mekem wok ya long haos blong hem fastaem.’ Tok ya i laenap wetem samting we Baebol i talem. Sipos wan elda i no lukaotgud long famle blong hem, hem i save lusum wok blong elda.” * I klia se, man i no save sakemaot wok ya blong givim ol samting we woman blong hem i nidim—long saed blong bodi, long filing blong hem, mo impoten moa, blong i stap strong long saed blong bilif.
?Lukaot Gud Long Waef Blong Yu i Minim Wanem?
10. ?Olsem wanem hasban i save lukaot gud long waef blong hem?
10 Sipos yu lukaot gud long woman blong yu, yu no letem wan samting i spolem hem, hemia from we yu yu lavem hem. I gat plante rod blong lukaot gud long hem. Faswan se, yu mas spenem taem wetem hem. Sipos yu no spenem taem wetem woman blong yu, lav blong hem i save kam kolkol. Yu mas tingbaot tu se samting we woman blong yu i nidim long saed blong taem blong yu mo fasin blong mekem samting tugeta, maet i no sem mak long samting we yu yu ting se hem i nidim. I no naf blong talem se yu lavem woman blong yu mo bambae yu lukaot gud long hem. Hem i mas harem se yu lavem hem mo yu stap lukaot gud long hem. Pol i raetem se: “I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu.” (1 Korin 10:24) Hasban, sipos yu lavem woman blong yu, bambae yu meksua se yu kasem save wanem samting we hem i rili nidim.—Filipae 2:4.
11. ?Fasin we hasban i mekem long woman blong hem, i save gat paoa olsem wanem long fasin fren blong hem wetem God mo insaed long kongregesen?
11 Wan narafala rod blong soemaot se yu yu stap lukaot gud long woman blong yu, hemia taem yu yu kaen long hem long ol toktok mo fasin blong yu. (Ol Proveb 12:18) Long leta we Pol i raetem long ol Kristin long Kolosi, hem i se: “Yufala ol man we i mared, yufala i mas lavem ol woman blong yufala. Yufala i no mas mekem i strong long olgeta, oltaem yufala i mas mekem i gud long olgeta.” (Kolosi 3:19) Wan buk i talem narafala rod blong tanem las tok blong Pol, hemia se “yu no mas mekem long hem olsem we hem i haosgel nomo,” no “yu no mas mekem hem i kam slef blong yu.” Hasban we i mekem i strong tumas long woman blong hem—long haos no long fored blong ol man—hem i no stap lukaot gud long woman blong hem. Sipos hem i strong tumas long woman blong hem, hem i save spolem fasin fren blong hem wan wetem God. Aposol Pita i talem long ol hasban se: “Yufala i mas tingbaotgud ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala, mo from we promes blong God i stap wantaem long man mo woman we tufala i mared, se long gladhat blong hem, bambae hem i givim laef long tufala. Yufala i mas mekem olsem blong bambae i no gat samting we i save blokem ol prea blong yufala.” *—1 Pita 3:7.
12. ?Wan Kristin hasban i save lanem wanem from fasin we Jisas i mekem long Kristin kongregesen?
12 Yu no mas ting se woman blong yu bambae i gohed blong lavem yu nomata wanem fasin yu yu mekem long hem. Yu mas gohed blong talem mo soem oltaem se yu lavem hem. Fasin we Jisas i mekem long Kristin kongregesen i givim eksampol long ol Kristin hasban. Jisas i no strong, hem i kaen, mo i fogivim ol man blong hem, nating se plante taem oli mekem fasin we i no stret. From samting ya, Jisas i save talem long ol narafala se: “Yufala i kam long mi, . . . from we mi mi wan kwaet man, mo tingting blong mi i stap daon . . . bambae yufala i save faenem pis long laef blong yufala.” (Matiu 11:28, 29) Kristin hasban i mas folem Jisas mo mekem sem fasin long woman blong hem olsem we Jisas i bin mekem long kongregesen. Wan man we i rili lukaot gud long woman blong hem mo i soemaot samting ya long ol toktok mo fasin blong hem, bambae hem i mekem woman blong hem i haremgud tumas mo i gat pis long laef blong hem.
Ol Waef We Oli Folem Ol Rul Blong Baebol
13. ?Wanem ol rul blong Baebol we oli save givhan long ol waef?
13 I gat plante rul blong Baebol we oli save givhan long ol waef tu. Efesas 5:22-24, 33 i talem se: “Yufala ol woman we i mared. Yufala i mas [“obei,” NW ] long ol man blong yufala, olsem we yufala i stap [obei] long Masta blong yumi, from we man i hed blong woman blong hem, olsem we Kraes i hed blong [“kongregesen,” NW ]. Kraes i sevem [kongregesen] ya finis, we [kongregesen] ya i bodi blong hem. From samting ya, ol woman oli mas [obei] long ol man blong olgeta, long evri samting, olsem we [kongregesen] i stap [obei] long Kraes. . . . Woman i mas ona gud long man blong hem.”
14. ?From wanem rul blong Baebol se woman i mas obei long man blong hem i no daonem ol woman?
14 Yu luk olsem wanem Pol i makemgud fasin obei mo ona. Hem i talem long ol waef se oli mas obei long ol man blong olgeta. Hemia i folem stret oda we God i putumap. Evri laef samting long heven mo long wol i mas obei long wan narafala. Jisas tu i mas obei long Jeova God. (1 Korin 11:3) I tru tu se, sipos hasban i hed blong woman blong hem long fasin we i stret, bambae i mekem i isi long woman blong hem blong obei long hem.
15. ?Baebol i talem wanem advaes long ol waef?
15 Pol i talem tu se woman i mas “ona gud long man blong hem.” Kristin waef i mas wan ‘kwaet woman we fasin blong hem i stret gud.’ Hem i no mas mekemhed mo girap agensem hasban blong hem, mo hem i no mas folem prapa tingting blong hem nomo. (1 Pita 3:4) Waef we i onagud long God i wok had blong mekem i gud long famle blong hem mo i karem ona i kam long man blong hem we i hed blong hem. (Taetas 2:4, 5) Hem i traehad blong toktok gud oltaem long saed blong hasban blong hem. Olsem nao, hem i pulum ol narafala blong gat respek mo ona long man blong hem. Woman olsem i wokhad tu blong mekem se ol desisen blong man blong hem oli karem gudfala frut.—Ol Proveb 14:1.
16. ?Wanem samting we ol Kristin waef oli save lanem from fasin blong Sera mo Rebeka?
16 Sipos waef i wan kwaet woman mo fasin blong hem i stret gud, hemia i no min se hem i no gat sam tingting blong hem, no ol tingting blong hem oli nating nomo. Ol woman blong bifo we oli onagud long God, olsem Sera mo Rebeka, oli talemaot ol samting we oli wari long hem long man blong olgeta. Mo Baebol i soemaot se Jeova i agri long fasin blong olgeta. (Jenesis 21:8-12; 27:46–28:4) Ol Kristin waef tu oli save talemaot filing blong olgeta long man blong olgeta. Be oli mas mekem olsem wetem respek, i no long fasin we i daonem man blong olgeta. Sipos oli mekem long gudfala fasin, ating bambae oli luk we toktok blong olgeta i gat moa paoa long hasban blong olgeta mo hasban bambae i glad moa long toktok blong olgeta.
Laef Folem Promes Blong Yu
17, 18. ?Ol hasban mo waef oli save mekem wanem blong blokem ol traehad blong Setan blong spolem mared blong olgeta?
17 Ol mared man mo woman oli mekem wan promes we oli mas holem gogo laef blong olgeta i finis. From samting ya, hasban mo waef tugeta i mas rili wantem we mared blong tufala i stapgud. Sipos tufala i no save toktok klia mo stret tugeta, ol problem oli save kam moa nogud gogo oli bigwan tumas. Long plante mared, taem problem i kamaot, hasban mo waef i no moa toktok tugeta, ale tufala i stap kros nomo long tufala. Samfala oli lukaot wan rod blong aot long mared blong olgeta, maet oli stat fren wetem wan narafala bakegen. Jisas i givim woning se: “Man we i luk wan woman, nao i wantem hem tumas, i olsem we hem i slip wetem woman ya finis.”—Matiu 5:28.
18 Aposol Pol i givim advaes long olgeta Kristin, wetem ol Kristin we oli mared tu, se: “ ‘Sipos yufala i kros, yufala i no letem we kros ya i lidim yufala, blong yufala i mekem sin.’ Mo yufala i no stap kros, gogo kasem san i godaon. Yufala i mas no givim janis long Setan.” (Efesas 4:26, 27) Bigfala enemi blong yumi, Setan, i save yusum ol smosmol trabol bitwin ol Kristin blong winim olgeta. !Yu no mas letem hem i winim yu! Taem wan problem i kamaot, lukaot save blong Baebol blong faenemaot tingting blong Jeova, mo ridim ol buk we oli soemaot advaes blong Baebol. Long fasin we i kwaet mo i klia, yutufala i mas tokbaot defdefren tingting we yutufala i gat. I no naf we yu save nomo ol rul blong Jeova. Yu mas naf blong mekem olgeta oli wok mo folem olgeta. (Jemes 1:22-25) Long saed blong mared, yutufala i mas gat strong tingting se bambae yutufala tugeta i gohed blong wokbaot wetem God, mo yutufala i no mas letem wan man no wan samting i brekem mared blong yutufala we God i joenem.—Maeka 6:8.
[Ol Futnot]
^ Lukluk bokis ya “Divos mo Fasin Blong Seraot” long Wekap! we ol Witnes blong Jeova oli wokem, Februari 8, 2002, pej 10 (Franis/Inglis).
^ Lukluk Wajtaoa, Mei 15, 1989, pej 12 (Franis/Inglis).
^ Blong wan man i kasem wok long Kristin kongregesen, hem i no mas “wan man blong faet”—i min se wan man blong kilim narafala no spolem narafala wetem ol nogud tok. Taswe Wajtaoa blong Jun 1, 1991, pej 11, i talem olsem: “Sipos [man] i mared, mo hem i gat gudfala fasin wetem ol narafala man, be hem i strong tumas wetem famle blong hem, hem i no save gat wok long kongregesen.”—1 Timoti 3:2-5, 12, NW.
?Yu Yu Save Tingbaot?
• ?From wanem ol Kristin tu oli save gat problem long mared blong olgeta?
• ?Olsem wanem hasban i save givim ol samting we waef blong hem i nidim mo lukaot gud long hem?
• ?Waef i save mekem wanem blong soemaot se hem i onagud long man blong hem?
• ?Olsem wanem ol hasban mo waef oli save mekem tingting blong olgeta i strong moa blong holem promes blong mared?
[Kwestin]
[Tok blong pija long pej 21]
Man we i stap lukaot gud long waef blong hem i mekem woman ya i haremgud mo i gat pis long laef blong hem
[Tok blong pija long pej 23]
Ol Kristin waef oli talemaot filing blong olgeta wetem respek