Wan Kwestin

?Olsem wanem? ?Wan Kristin i no mas dring ol dring mo kakae ol kakae we i gat kafein insaed long olgeta?

Baebol i no blokem wan Kristin blong i kakae no i dring ol samting we oli gat kafein insaed long olgeta olsem kofe, sam kaen ti, joklet mo limonad. Be, Baebol i givim sam rul we i save halpem yumi blong mekem ol waes desisen. I gud yumi tokbaot from wanem sam man oli no wantem kakae no dring ol samting we oli gat kafein insaed long olgeta.

Wan stamba risen hemia se samfala oli tingbaot kafein olsem wan drag we i save gat paoa long fasin blong man. Man i save kam slef blong kafein. Wan buk blong ol man blong wokem meresin i talem se: “Man we i stap tekem tumas kafein blong plante yia, bodi blong hem i lan long kafein, i wantem kafein oltaem mo i dipen long hem. Taem hem i stop blong tekem kafein, hed blong hem bambae i soa, hem i harem nogud, hem i no save stap kwaet from i kroskros plante, hem i wari tumas, mo hed blong hem i raon.” Oli raetem kafein tu long lis blong olgeta drag we oli mekem man i sik taem man i stop blong tekem. Lis ya i stap long buk ya Diagnostic and Statistical Manual of Mental Disorders. Yes, i klia se maet sam Kristin oli no wantem dring no kakae ol kakae we i gat kafein insaed long olgeta from we oli no wantem kam slef blong samting ya mo oli wantem blokem samting we olgeta nomo i wantem.—Galesia 5:23.

Samfala oli talem se kafein i save spolem helt blong man mo i save spolem helt blong wan bebi we i stap yet insaed long bel. Ol Kristin oli mas lavem God ‘long olgeta laef blong olgeta,’ taswe oli no mekem eni samting we i save sotem laef blong olgeta. Mo tu, from we oli kasem oda ya blong lavem ol man raonabaot long olgeta, oli stap longwe long ol samting we i save spolem wan pikinini we i stap long bel.—Luk 10:25-27.

?I stret blong tingtinggud sipos kafein i save givhan no spolem bodi? I no evri man oli agri se kafein i save mekem plante sik olsem oli kamaot. Sam man blong stadi oli talem se kofe i mekem i gud long bodi blong man. Long 2006, magasin ya Time i talem se: “Fastaem ol stadi oli bin soemaot [se kafein] i save mekem man i gat kansa long basket blong pispis, i gat hae blad presa mo i save givim sam narafala sik bakegen. Be, ol stadi we man i mekem i no longtaem oli agensem bighaf blong ol tingting ya mo oli talem se i gat gudfala frut i kamaot sipos man i tekem kafein. Oli talem se kafein i save blokem ol samting we oli save spolem leva, i save blokem sik blong Pakinson, sik blong suga, sik blong Alzheimer, ston i gru insaed long bel, tingting i foldaon mo maet sam narafala kaen kansa.” Wan magasin i tokbaot fasin blong yusum kafein se: “I klia se yumi no mas bitim mak taem yumi yusum kafein.”

Wanwan Kristin i mas mekem desisen blong hem we i stanap long ol save ya we oli jes kamaot long saed blong kafein mo we i stanap tu long ol rul blong Baebol long saed ya. Eksampol, maet wan Kristin mama we i gat bel i jusum blong no dring ol dring we i gat kafein insaed long olgeta from hem i tingbaot se samting ya i save spolem pikinini blong hem long bel. Sipos wan Kristin i luk se hem i stap sik from we hem i stap tekem oltaem ol dring no kakae we i gat kafein insaed long olgeta, maet hem i mas stop smoltaem blong tekem ol kakae no dring ya. (2 Pita 1:5, 6) Ol narafala Kristin oli mas respektem desisen blong hem be oli no mas fosem hem blong folem tingting blong olgeta long saed ya.

Nomata wanem desisen we yu mekem long saed blong ol dring no kakae we i gat kafein insaed long olgeta, i gud blong tingbaot oltaem ol tok blong Pol se: “Long olgeta samting we yufala i kakae, mo we yufala i dring, mo long olgeta fasin blong yufala, oltaem yufala i mas leftemap nem blong God.”—1 Korin 10:31.