Wan Kwestin

Long taem blong Pasova, i tabu blong ol man Jiu oli kakae eni samting “we i gat is long hem.” ?Be, taem Jisas i stanemap Memoriol blong tingbaot ded blong hem, from wanem hem i yusum waen, we wan samting olsem is i stap long hem?—Eksodas 12:20; Luk 22:7, 8, 14-20.

Lafet ya blong Pasova i blong tingbaot taem ya we ol man Isrel oli bin aot long Ijip. Oli stat blong mekem lafet ya long 1513 B.K.T. * Taem Jeova i stap talem long olgeta olsem wanem blong mekem lafet ya, hem i talem se: “Yufala i no mas kakae bred [“eni samting,” NW] we i gat is long hem. Long weples yufala i stap, bambae yufala i mas kakae bred ya nomo we i no gat is long hem.” (Eksodas 12:11, 20) Taem God i givim loa ya long saed blong is, hem i stap tokbaot kaen bred we oli mas kakae long taem blong Pasova. Hem i no talem wan toktok nating long saed blong waen.

Bigfala risen from wanem God i talem se oli no mas kakae is, hemia from we ol man Isrel oli stap hareap blong aot long Ijip. Eksodas 12:34 i talem se: “Nao olgeta oli tekem ol flaoa we oli miksimap finis be i no gat is long hem, oli fulumap long ol sospen blong olgeta, mo oli kavremap long kaliko, oli karem, oli go.” Taswe long ol yia biaen, taem oli stap kakae bred we i no gat is long hem long lafet blong Pasova, oli mekem ol pikinini mo smol bubu blong olgeta oli tingbaot taem ya.

Biaen, plante man oli stat blong tingbaot is olsem pija blong sin no wan samting we i no stret. Aposol Pol i tokbaot wan man long kongregesen we i mekem rabis fasin long saed blong seks, hem i se: “Yufala i save finis, se smol is nomo, be i save mekem olgeta flaoa i solap. Yufala i mas finis long sin, olsem we yufala i sakemaot ol olfala is, nao bambae yufala i olsem flaoa ya blong mekem bred blong Pasova, we i no gat is long hem. I tru, yufala i olsem bred ya blong Pasova we i no gat is long hem, mo Kraes i olsem smol sipsip blong yumi blong Pasova, we ol man oli kilim hem finis, nao yumi sef. From samting ya, i gud yumi joen blong mekem lafet ya. Be sipos yumi gat sin i stap yet long yumi, we yumi stap mekem ol fasin we i no stret, hemia i olsem olfala is ya, mo bambae yumi no save joen long lafet ya. Blong mekem lafet ya, yumi mas folem ol fasin we oli klin gud, mo oli tru, nao bambae yumi olsem bred we i no gat is long hem.” (1 Korin 5:6-8) Bred ya nomo we i no gat is long hem i stret blong yusum olsem pija blong bodi blong Jisas we i stretgud olgeta.—Hibrus 7:26.

Ol man Jiu oli stat blong yusum waen long Pasova long ol yia we oli kam biaen. Ating oli stat blong mekem samting ya afta long taem ya we oli fri long Babilon mo oli kambak long Juda. I no gat wan tok long Baebol we i soem se i no stret we oli yusum waen long Pasova. Taswe i stret nomo we Jisas i yusum waen taem hem i mekem kakae blong Pasova. Long taem bifo, fasin we wota blong grep i tanem blong kam waen, i defren long fasin blong bred we i solap. Blong mekem bred i solap, man i mas ademap is long hem. Be i no nidim blong ademap wan samting long wota blong grep blong mekem i kam waen. Ol samting we i nidim blong tanem wota blong grep i kam waen oli stap finis long frut ya grep. Long taem blong Pasova, man i no save faenem jus blong grep, from we evri jus blong grep we man i mekem oli kam waen finis. Ol grep oli rere blong man i pikimap long taem we ol lif oli folfoldaon long tri, hemia longtaem bifo long lafet blong Pasova we oli selebretem long taem we ol tri oli putum flaoa.

Taswe, fasin blong Jisas blong yusum waen long Memoriol i no agensem ol rul blong Pasova long saed blong is. Red waen we oli no ademap wan samting long hem olsem suga, narafala alkol, no lif blong givim tes, i stret blong yusum olsem pija blong blad blong Kraes we i “gud tumas.”—1 Pita 1:19.

[Futnot]