Wan Kwestin

?From wanem i no rong we Jekob i mekem olsem se hem nao i Esao, olsem we Jenesis 27:18, 19 i tokbaot?

Ating yu save gud stori ya. Taem we Aesak i kam olfala, hem i talem long Esao blong go lukaot wan mit blong hem i save kakae. Hem i se: “Yu kukum olsem we mi mi laekem, we tes blong hem i gud we i gud, nao yu tekem i kam long mi. Bambae mi kakae, mo biaen, bambae mi blesem yu, we hemia bambae i lastok blong mi long yu.” Taem Rebeka i harem we hasban blong hem i talem olsem, hem i mekemrere wan gudfala kakae, nao hem i talem long Jekob se: “Bambae yu yu save go givim mit ya long [papa blong yu], blong bambae hem i blesem yu long las tok ya blong hem.” Nao Jekob i werem klos blong Esao mo i putum skin blong tufala nani ya long nek mo han blong hem, nao hem i karem kakae ya i go long papa blong hem. Taem Aesak i askem hem se: “?Yu hu ya?” Jekob i talem se: “Mi Esao, mi fasbon blong yu.” Aesak i bilivim hem mo i blesem hem.—Jenesis 27:1-29.

Baebol i no givim olgeta save long yumi, from wanem Rebeka mo Jekob tufala i mekem olsem, be hem i soem se hemia i no wan plan we tufala i gat longtaem finis. I gud blong makem se Tok blong God i no agensem Rebeka mo Jekob taem tufala i mekem plan blong trikim Aesak, be Baebol i no talem tu se fasin ya i stret. Nating se i olsem, Baebol i givhan long yumi blong kasem moa save from wanem oli mekem olsem.

Faswan samting, hemia se Jekob nao i gat raet blong kasem blesing blong papa blong hem, i no Esao. Smoltaem bifo long samting ya, Esao i hanggri tumas, nao i givim evri raet blong hem olsem fasbon i go long Jekob blong Jekob i save givim kakae long hem. Esao “i no tinghevi nating long raet” we hem i gat olsem fasbon. (Jenesis 25:29-34) Taswe taem Jekob i kam long papa blong hem blong kasem blesing ya, hem i stap tekem samting we hem nomo i gat raet blong kasem.

Namba tu samting, taem Aesak i kasem nius se hem i bin blesem Jekob, hem i no jenisim samting ya. Ating hem i tingbaot bakegen samting we Jeova i talem long Rebeka taem we tufala pikinini i no bon yet, se: ‘Fasbon bambae i stap wok blong sekenbon.’ (Jenesis 25:23) Yumi makem tu se taem Jekob i rere blong go long Haran, Aesak i ademap moa blesing long hem bitim fastaem.—Jenesis 28:1-4.

Laswan samting we i gud yumi tingbaot, hemia se Jeova i save ol samting we i hapen mo i intres long hem. Blesing we Aesak i givim long Jekob, i mekem oli holemtaet promes we Jeova i mekem wetem Ebraham. (Jenesis 12:2, 3) Sipos Jeova i no wantem se Jekob bambae i kasem ol blesing ya, bambae hem i blokem rod ya. Defren olgeta, Jeova i talem long Jekob se: “Bambae mi mi yusum yu wetem olgeta ya we bambae oli kamaot biaen long yu blong blesem ol man blong olgeta narafala kantri long wol.”—Jenesis 28:10-15.