Mi mi bon long 1956 wetem wan sik we nem blong hem, spina bifida. Sik ya i kamaot taem ol smosmol string we oli joenem bren blong man wetem ol narafala haf blong bodi, oli no fas gud blong kam wan bigfala string nomo. Ol smosmol string ya oli stap aninit long bigfala bun blong baksaed. Sik ya i mekem se i hadwok blong mi wokbaot, mo i statem ol narafala sik.

Smoltaem bifo we mi bon, papa mo mama blong mi, tufala i stat stadi Baebol wetem tu misinari blong ol Witnes blong Jehova. Taem mi smol, mi stap long taon ya Usakos long Namibia, mo i gat wanwan pablisa nomo long taon ya, mo oli stap longlongwe. Taswe, mi mo famle blong mi, mifala i storian nomo long ol haf we oli stap long program blong ol miting. Taem mi gat seven yia, oli katem mi blong mekem wan rod blong mi save pispis. Mo taem mi gat 14 yia, mi kasem sik blong faol. Sekendri skul i stap longwe tumas long ples blong mi, mo mi nidim we papa mo mama tufala i lukaot long mi oltaem, from samting ya mi no save finisim skul blong mi.

Nating se i olsem, mi mekem desisen blong fren moa wetem Jehova. Plante long ol buk blong yumi oli no kamaot yet long lanwis blong mi, hemia lanwis Afrikaans.Taswe mi lanem Inglis, blong mi save stadi long ol buk blong yumi. Biaen mi kam pablisa, mo mi tekem baptaes taem mi gat 19 yia. Be blong fo yia, mi siksik plante mo mi harem nogud long filing blong mi. Antap long hemia, mi fraet blong prij long taon from we evri man oli savsave gud olgeta.

Taem mi gat 20 yia, mifala i muvaot long Namibia mo mifala i go stap long Saot Afrika. Mo long ples ya, hem i faswan taem blong mi we mi joen long wan kongregesen. !Hemia i gud tumas! Be mi mas go long hospital bakegen blong oli katem mi, be naoia, oli katem mi blong mekem wan rod, blong mi save gobus.

Sam taem biaen, mi harem wan tok we eria elda i givim long saed blong wok blong paenia. Samting we hem i talem i tajem hat blong mi. Mi save se helt blong mi i nogud, be mi bin luk olsem wanem Jehova i stap givhan long mi blong gotru long ol hadtaem. Taswe mi fulumap pepa blong kam fultaem paenia. Be ol elda oli no agri blong mi kam wan paenia from helt blong mi.

Nating se i olsem, mi traehad blong mekem samting we mi naf blong mekem long wok blong prij. Mama blong mi mo ol narafala pablisa oli givhan long mi, ale blong bitim sikis manis, mi kasem aoa we wan paenia i stap kasem. Hemia i soemaot long ol elda se mi mi gat strong tingting blong kam paenia, mo se mi save mekem wok ya nating se helt blong mi i nogud. Ale mi fulumap pepa ya bakegen, mo naoia oli agri long hem, mekem se long namba 1 Septemba 1988, mi kam wan fultaem paenia.

Taem mi mekem wok blong paenia, oltaem mi haremsave we Jehova i stap givhan long mi. Bitim we mi stap tingting long sik blong mi, mi tijim trutok long ol narafala, mo hemia i protektem mi, i tijim mi, mo i halpem mi blong mi fren gud moa wetem Jehova. Mi mi givhan finis long plante man blong oli givim laef blong olgeta long Jehova mo oli baptaes, mo hemia i mekem mi mi glad we mi glad.

Sik blong mi i nogud yet. Be ‘evri dei [Jehova] i stap karem ol hevi samting blong mi.’ (Sam 68:19) !Hem i no mekem nomo se mi save laef wetem sik blong mi, be hem i mekem se mi harem gud blong stap laef!