1. ?Wanem samting we samfala oli lego? ?From wanem?

YUMI wanwan i glad nomo blong lego sam samting blong mekem samting we oli moa impoten. Ol papa mo mama oli yusum taem, mo mane, mo paoa blong olgeta blong givhan long ol pikinini blong olgeta. Sam yangfala we oli wantem winim praes long Olimpik Gem oli lego ol samting we oli mekem blong gat gud taem, blong oli tren plante aoa evri dei. Jisas tu i lego sam samting, blong hem i save mekem ol samting we oli moa impoten. Hem i no traem blong kasem plante sas samting, mo hem i no gat pikinini. Be hem i wok had blong mekem se gud nius blong Kingdom i goaot moa. (Mat. 4:17; Luk 9:58) Ol man blong hem oli mekem sem mak. Oli lego plante samting blong mekem wok blong talemaot Kingdom. Kingdom ya nao i moa impoten i bitim ol narafala samting long laef blong olgeta. (Mat. 4:​18-22; 19:27) Taswe yumi wanwan i mas tingting gud long kwestin ya: ‘?Wanem samting long laef blong mi we i moa impoten?’

2. (1) ?Wanem sam samting we ol tru Kristin evriwan oli mas lego olsem sakrefaes? (2) ?Antap long ol samting ya, samfala oli lego sam samting blong mekem wanem narafala wok?

² Ol tru Kristin evriwan oli mas lego sam samting olsem sakrefaes, sipos oli wantem fren gud wetem Jehova mo gohed blong fren wetem hem. Oli yusum taem mo paoa blong olgeta taem oli prea, oli ridim Baebol, oli mekem famle wosip, oli go long ol miting, mo oli prij. * (Jos. 1:8; Mat. 28:​19, 20; Hib. 10:​24, 25) Jehova i blesem had wok blong olgeta mo from samting ya wok blong prij i stap go hareap moa. Mo plante moa man oli stap kam long ‘hil ya we  haos blong Jehova i stap long hem,’ blong oli mekem wosip long hem. (Aes. 2:⁠2) Samfala oli lego sam samting blong mekem sam narafala wok tu. I gat wok long Betel, wok blong bildim ol Haos Kingdom mo Haos Asembli, mo blong mekem rere ol asembli. Mo i gat wok blong givhan long ol man long taem blong disasta. I tru, Jehova i no talem se yumi mas mekem ol narafala wok ya blong kasem laef, be oli impoten from we oli givhan long wok blong Kingdom.

3. (1) Taem yumi lego sam samting blong mekem wok blong Kingdom, ?yumi kasem wanem? (2) ?Wanem ol kwestin we yumi mas tingbaot?

³ Naoia, i bitim ol narafala taem bifo, i impoten we yumi mekem bes blong yumi, blong mekem wok blong Kingdom. !Yumi glad tumas taem yumi luk we plante brata mo sista oli rere blong lego sam samting olsem sakrefaes, blong oli mekem wok ya! (Ridim Ol Sam 54:⁠6.) Sipos yumi givim wetem gladhat olsem, bambae yumi kasem bigfala glad mo plante blesing, taem yumi stap wet blong Kingdom i kam. (Dut. 16:15; Wok 20:35) Taswe yumi wanwan, yumi mas lukluk gud long laef blong yumi, mo yumi mas tingbaot ol kwestin olsem: ‘?Mi mi save lego sam moa samting blong mekem wok blong Kingdom? ?Mi mi stap yusum taem, mo mane, mo paoa, mo save blong mi long wanem samting? Taem mi lego sam samting blong mekem wok blong God, ?mi mas lukaot se mi no lego wanem impoten samting?’ Naoia bambae yumi tokbaot ol sakrefaes olsem we ol man blong God oli mekem long taem bifo. Olsem nao, taem yumi lego sam samting olsem sakrefaes, bambae yumi kasem moa glad.

4. ?Wanem sam long ol sakrefaes we ol man Isrel bifo oli mekem?

⁴ Ol man Isrel oli mekem sakrefaes blong Jehova i fogivim ol sin blong olgeta. Oli mas mekem ol sakrefaes sipos oli wantem we Jehova i glad long olgeta. Sam long ol sakrefaes ya, loa i talem se oli mas mekem. Be sam sakrefaes, oli olsem presen nomo we oli givim long gladhat blong olgeta. (Lev. 23:​37, 38) Sam long ol sakrefaes we oli save mekem long gladhat blong olgeta, hemia sakrefaes ya we i blong bonem i bon evriwan, mo sakrefaes blong waen we oli givim i go long Jehova. Oli kafsaedem waen ya long olta mo ‘gudfala smel blong hem i mekem Jehova i glad tumas.’ (Nam. 15:10) Long taem blong Solomon, ol man oli givim fulap sakrefaes we oli olsem presen, taem oli openem haos blong God.​—2 Kron. 7:​4-6.

5. ?Jehova i talem se olgeta we oli pua oli save givim wanem sakrefaes?

⁵ Jehova i kasem save se olgeta man evriwan oli no save givim sakrefaes we i sem mak. Taswe, hem i talem long olgeta se man i save givim sakrefaes we hem i naf nomo blong givim. Folem loa blong Jehova, taem oli givim anamol olsem sakrefaes, blad blong anamol ya i mas ron. Ol sakrefaes ya oli “olsem sado nomo blong ol gudgudfala samting” we Pikinini blong hem Jisas, bambae i mekem i kamtru. (Hib. 10:​1-4) Be Jehova i no strong bitim mak. Sipos wan man i no gat sipsip no nani blong mekem sakrefaes from we hem i pua, hem i save givim wan sotleg nomo i go long God. Jehova i glad nomo long sakrefaes ya. Taswe,  olgeta we oli pua, olgeta tu oli save mekem sakrefaes mo kasem glad from. (Lev. 1:​3, 10, 14; 5:⁠7) Nating se oli mekem sakrefaes long wanem anamol, be i gat tu samting we oli mas tingbaot, sipos oli wantem we Jehova bambae i glad long sakrefaes ya we oli givim long gladhat.

6. ?Wanem tufala samting we ol man Isrel oli mas tingbaot taem oli givim sakrefaes long gladhat blong olgeta? ?From wanem oli mas tinghevi long tufala samting ya?

⁶ Fas samting se, taem wan man Isrel i mekem sakrefaes, hem i mas givim samting we i beswan. Jehova i talem se sipos oli wantem se hem i glad long sakrefaes blong olgeta, ol anamol we oli givim oli no mas sik, no oli no mas gat wan samting i rong long bodi blong olgeta. (Lev. 22:​18, 20) Seken samting, se man we i givim sakrefaes i mas klin long fes blong God. Sipos wan man i doti long fes blong God, hem i mas mekem wan narafala sakrefaes fastaem, hemia sakrefaes blong tekemaot sin blong hem, no sakrefaes blong stretem sin ya mo kam klin bakegen long fes blong God. Afta nomo, hem i save mekem sakrefaes ya we hem i givim long gladhat blong hem. (Lev. 5:​5, 6, 15) Ol man Isrel oli mas tinghevi long samting ya. Jehova i talem se sipos wan man i givim sakrefaes long gladhat blong hem be hem i no klin long fes blong Jehova, hem i mas kasem panis. (Lev. 7:​20, 21) Be sipos man we i givim sakrefaes i klin long fes blong God, mo anamol we hem i givim i no gat samting i rong long hem, man ya i save glad we i glad from we hem i givim wan gudfala presen.​—Ridim 1 Kronikel 29:⁠9.

7, 8. (1) Olgeta we oli lego sam samting from we oli wantem mekem wok blong Kingdom, ?oli harem olsem wanem? (2) ?Wanem sam samting we yumi gat we yumi save givim olsem sakrefaes i go long Jehova?

⁷ Tede tu, plante brata mo sista oli glad nomo blong yusum taem blong olgeta blong mekem wok blong Jehova. Jehova i glad tumas long samting ya, mo olgeta tu oli glad. Wan brata we i givhan blong bildim ol Haos Kingdom, mo i givhan tu long olgeta we oli kasem trabol from ol disasta, i talem se i no gat tok blong eksplenem glad we hem i kasem from ol wok ya. Hem i talem se: “Taem yu givhan blong bildim wan niufala Haos Kingdom no yu halpem ol man long taem blong disasta, ol brata mo sista oli talem ol gudfala tok mo oli glad tumas. Long taem ya yu harem gud tumas long ol hadwok blong yu.”

⁸ Bifo finis i kam, ogenaesesen blong Jehova i stap lukaot rod blong mekem wok blong Jehova i go moa. Long yia 1904, Brata C. T. Russell i talem se, yumi mas traem bes blong yumi blong yusum taem, mo paoa, mo mane blong yumi long rod we i leftemap nem blong Jehova. Taem yumi givim presen i go  long Jehova, yumi kasem plante blesing. Be yumi mas rere blong lego sam samting. (2 Saml. 24:​21-24) ?Olsem wanem? ?Yu save yusum gud ol samting we yu yu gat, blong givim sakrefaes i go long Jehova?

9. Long Luk 10:​2-4, ?Jisas i givim wanem advaes we yumi save folem blong yusum gud taem blong yumi?

⁹ Taem. I tekem plante taem mo paoa blong mekem ol wok olsem, tanem ol buk mo printim olgeta, wokem ol haos wosip, mekem plan blong ol asembli, givhan long taem blong disasta, mo plante narafala wok bakegen. Yumi gat 24 aoa nomo long wan dei, yumi no save ademap moa. Jisas i givim wan advaes we i save givhan long yumi, blong yumi yusum gud taem blong yumi. Taem hem i sanem ol disaepol blong hem oli go prij, hem i talem long olgeta se oli “no spel long rod blong stori long ol man.” (Luk 10:​2-4) ?From wanem Jisas i talem olsem? Long taem blong Jisas ol man oli no mekem olsem yumi blong talem halo long narafala, we maet yumi sekhan nomo no yumi benem hed blong yumi. Be olgeta ya oli holholem olgeta, oli bodaon, mo samtaem oli bodaon go kasem graon. I tekem taem blong mekem ol samting ya. Jisas i no stap tijim ol man blong hem blong oli kam raf. Nogat. Hem i stap givhan long olgeta blong oli kasem save se oli no gat plante taem. From samting ya, oli mas yusum gud smol taem ya blong mekem ol samting we oli moa impoten. (Efes. 5:16) ?Olsem wanem? ?Yu tu yu save folem advaes ya, blong yu gat moa taem blong mekem wok blong Kingdom?

10, 11. (1) ?Ol presen mane we yumi givim, oli yusum olsem wanem? (2) ?Fas Korin 16:​1, 2 i talem wanem advaes we i save givhan long yumi?

¹⁰ Mane. Blong mekem wok blong Kingdom i gohed long fulwol, i nidim mane. Evri yia, ogenaesesen blong Jehova i spenem plante milian vatu blong lukaot long ol eria elda, mo ol spesel paenia, mo ol misinari. Stat long 1999 kam kasem tede, ol Witnes oli bildim bitim 24,500 Haos Kingdom long ol kantri we oli sot long plante samting. Be oli mas bildim klosap 6,400 Haos Kingdom yet. Evri manis oli printim 100 milian Wajtaoa mo Wekap! Olgeta wok ya oli stanap long presen mane nomo we yumi givim.

¹¹ Tabu spirit i pulum aposol Pol blong raetemdaon wan advaes we yumi save folem sipos yumi wantem givim presen mane. (Ridim 1 Korin 16:​1, 2.) Pol i talem long ol brata long Korin, se long stat blong wik nomo, evriwan oli mas putumgud sam mane i stap olsem presen mane blong sapotem wok blong God. Be oli no mas wet kasem en blong wik. Tede, plante brata mo sista oli mekem olsem ol Kristin ya long Korin. Oli mekem gud plan long mane blong olgeta, olsem nao, oli save givim samting we oli naf blong givim. (Luk 21:​1-4; Wok 4:​32-35) Jehova i tinghevi long ol brata mo sista we oli givim presen olsem long gladhat blong olgeta.

12, 13. ?From wanem samfala oli no yusum paoa mo save blong olgeta moa, long wok blong Jehova? ?Jehova i save givhan long olgeta olsem wanem?

¹² Paoa mo save. Taem yumi yusum paoa mo save blong yumi blong mekem wok blong Kingdom, Jehova i givhan long yumi. Hem i promes blong givhan long yumi taem yumi taed. (Aes. 40:​29-31) ?Yu yu harem se yu no gat naf save blong givhan long ol wok blong Kingdom? ?Yu ting se hemia i blong olgeta nomo we oli gat gudhan long ol wok ya? Yu no mas tingting olsem. Jehova i save givhan long wan man blong i kam gud moa long wan wok, olsem we hem i mekem long Bejalehel mo Oholiab.​—Eks. 31:​1-6.

¹³ Jehova i wantem we yumi no letem wan samting i blokem yumi blong mekem bes blong yumi. (Prov. 3:27) Taem ol man Isrel oli stap bildim bakegen haos tempol long Jerusalem, Jehova i talem long olgeta se oli mas  putum tingting blong olgeta i stap fulwan long wok ya. (Hag. 1:​2-5) Jehova i talem olsem from we oli stap letem ol narafala samting oli pulum tingting blong olgeta, nao oli fogetem samting we i moa impoten. Yumi tu, yumi mas lukluk bakegen long laef blong yumi, mo yumi traem ansa long ol kwestin ya: ‘?Wok blong Jehova i moa impoten long laef blong mi? ?Mi mi tingting gud long laef blong mi, blong luk sipos mi save joen moa long ol wok blong Kingdom long ol las dei ya?’

14, 15. (1) Yu talem wan gudfala stori blong ol brata we oli stap long wan kantri we i pua. (2) ?Yumi mas glad blong mekem wanem?

¹⁴ Plante man oli stap long ples we laef i had, no we oli sot long plante samting. Ogenaesesen blong Jehova i wokem sam rod blong givhan long ol brata blong yumi we oli laef long ol ples olsem. (2 Kor. 8:14) Be ol brata we oli pua tu oli glad blong givim samting. Taem ol brata mo sista oli wantem givim samting long gladhat blong olgeta, nating se oli pua nomo, hemia i mekem Jehova i glad tumas.​—2 Kor. 9:⁠7.

¹⁵ Yu traem tingbaot ol brata mo sista blong wan kantri we i pua long Afrika. Oli makemaot wan smol haf blong garen blong olgeta, nao oli salem ol kakae we oli planem long smol haf ya, mo mane blong hem oli givim olsem presen mane. Long sem kantri yet, oli mekem plan blong bildim wan Haos Kingdom. Ol brata mo sista oli wantem givhan long wok ya. Be taem blong wokem Haos Kingdom ya i foldaon stret long taem blong planem garen. ?Olsem wanem? ?Ol brata mo sista ya oli givhan yet? Yes. Oli givhan blong bildim Haos Kingdom long fuldei, ale long sapa, oli go planem garen. !Tru ya, ol brata mo sista ya oli gat gudfala fasin! Oli givim taem mo paoa mo mane blong olgeta blong sapotem wok blong God. Oli olsem ol brata long Masedonia bifo. Olgeta tu oli “puaman tru,” be oli stap askem strong long Pol blong olgeta tu oli save givim smol mane long ol narafala Kristin. (2 Kor. 8:​1-4) I gud yumi tu yumi mekem sem mak. Olsemia, yumi soemaot long Jehova se yumi glad long ol blesing we hem i givim long yumi.​—Ridim Dutronome 16:⁠17.

16. ?Yumi mas mekem wanem blong Jehova i glad long sakrefaes we yumi givim long hem?

¹⁶ Ol man Isrel oli mas givim sakrefaes we Jehova i glad long hem. Tede tu, wok we yumi mekem long gladhat blong yumi, Jehova i mas glad long hem. Fas wok blong yumi, hemia blong lukaot long prapa famle blong yumi mo blong mekem ol samting we i joen wetem wosip blong yumi. I no stret we yumi givim taem, mo paoa, mo mane blong yumi long Jehova, nao yumi no lukaot long famle blong yumi long saed blong bodi mo wosip. (Ridim 2 Korin 8:12.) Antap long hemia, yumi wanwan i mas gohed blong fren gud moa wetem Jehova. (1 Kor. 9:​26, 27) Sipos yu stap mekem samting we Baebol i talem long laef blong yu, sakrefaes we yu givim long Jehova bambae i karem bigfala glad i kam long yu. Mo bambae ‘Jehova i glad’ tu long sakrefaes ya.

17, 18. ?Yu yu wantem talem wanem long olgeta we oli mekem ol sakrefaes blong givhan long wok blong Kingdom? ?Yumi evriwan i mas mekem wanem?

¹⁷ Plante brata mo sista oli givim taem mo mane mo paoa blong olgeta blong givhan long wok blong Kingdom. (Fil. 2:17) Yumi talem bigfala tangkiu long olgeta we oli stap wok long gladhat blong olgeta olsem. Yumi talem tangkiu tu long ol woman mo pikinini blong ol brata we oli stap lidim wok blong Kingdom. Olgeta ya oli glad blong lego sam samting we olgeta nomo oli wantem, blong sapotem papa blong olgeta.

¹⁸ I gat plante wok blong mekem blong givhan long wok blong Kingdom. I gud yumi evriwan i tokbaot samting ya long Jehova mo yumi tingting gud long hem. Nao bambae yumi luksave wanem we yumi naf blong mekem, blong yumi save joen moa long ol wok blong Kingdom. Sipos yumi mekem ol sakrefaes olsem, bambae yumi kasem plante blesing naoia, mo bambae yumi kasem plante moa long “niufala wol.”​—Mak 10:​28-30.