Maet yu save sam man no woman we i divos. Hemia from we plante man oli stap divos. Sam man blong stadi oli faenemaot se long Polan, ol man mo woman we oli gat 30 yia, mo we oli mared 3 yia kasem 6 yia, oli divos. Be samting ya i hapen long plante narafala man tu.

Wan ogenaesesen long Spen (Institute for Family Policy) i talem se: “Ol ripot oli soemaot se [long Yurop], haf blong ol man mo woman oli divos.” Sem samting i hapen long ol bigfala kantri.

?From wanem ol man oli stap divos? Long Is Yurop, wan woman we i stap givim advaes long saed blong mared, i talem se: “Divos i soemaot se i bin gat trabol long mared finis. Man mo woman, tufala i no moa fren gud mo tufala i seraot. Ale, tufala i harem nogud bigwan. Afta long divos, plante taem man no woman i kros, i sore tumas taem hem i tingtingbak long mared blong hem, i harem nogud bitim mak, tingting blong hem i foldaon bigwan, mo hem i sem we i sem.” Samtaem, hem i harem se hem i wantem kilim hem wan i ded. Woman ya i talem se: “Afta we jaj i talemaot long kot se mared blong tufala i finis, man no woman i harem se laef blong hem i blong nating nomo, ale maet hem i tingting se: ‘?Mi mi hu? ?Mi mi laef blong wanem?’”

Eva i tingbaot samting we i hapen long hem sam yia bifo, mo hem i talem se: “Afta we mi divos, ol man we oli stap klosap long haos blong mi mo ol fren blong mi long wok, oli singaot mi se ‘woman we i divos.’ Samting ya i mekem mi sem we mi sem. Mo mi kros tumas. Mi mas lukaot long tufala pikinini blong mi, mo mi mas mekem wok blong mama mo wok blong papa long semtaem.” * Adam i mekem wok blong elda 12 yia finis, hem i talem se: “Plante taem, mi no moa gat gudfala tingting long mi wan, ale mi kros we mi kros, mo mi no wantem joen nating wetem ol narafala.”

Samfala we oli divos, oli wari tumas long laef blong olgeta long fiuja, ale oli traehad blong harem gud bakegen. Maet oli ting se ol narafala man oli no intres long olgeta. Mo tu, oli mas jenisim fasin blong laef blong olgeta, mo oli mas lanem blong stretem ol problem blong olgeta.

Stanley i talem se: “Taem mi mo woman blong mi, mitufala i divos, hem i no wantem se mi luk tufala smol gel blong mi. Samting ya i mekem mi harem olsem se i no gat man i tingbaot mi, mo se Jehova i lego mi finis. Mi no moa wantem laef. Be  biaen, mi kasem save se tingting blong mi i no stret.” Wanda tu i divos, mo hem i harem nogud taem hem i tingbaot se laef blong hem bambae i olsem wanem. Hem i talem se: “Mi harem olsem se ol man, mo ol brata sista tu, bambae oli no wantem save long mi mo ol pikinini blong mi. Be naoia, mi luksave se taem mi stap traehad blong tijim ol pikinini blong mi blong oli wosipim Jehova, ol brata mo sista oli givhan bigwan long mi.”

Tok blong ol man ya i soemaot se sam man oli harem nogud bigwan afta we oli divos. Oli ting se oli nogud, oli nating nomo, mo se i no stret blong ol narafala oli tingbaot olgeta. Mo tu, maet oli toktok blong spolem ol narafala. Ale, maet oli ting se ol brata mo sista oli no lavem olgeta mo oli no kaen long olgeta. Be eksampol blong Stanley mo Wanda i soemaot se olgeta we oli bin tingting olsem, oli save luksave afta se ol brata mo sista oli kea long olgeta. Yes, ol Kristin oli givhan bigwan, nating sipos long stat, man no woman we i divos i no luksave samting ya.

Nomata se yumi traehad blong givhan long wan brata no sista we i divos, be samtaem hem i harem nogud bitim mak from we hem i harem se hem i no gat fren. Wan sista i talem se nating we hem i divos 8 yia finis, be samtaem hem i harem yet se ol narafala oli no lavem hem, mo hem i harem nogud. Long taem olsem, hem i wantem stap hem wan nomo, blong i krae.

I tru se olgeta we oli divos oli harem nogud mo oli no wantem joen wetem ol narafala. Be i impoten tumas we wan brata no sista we i divos, i no stap hem wan nomo. (Prov. 18:1) Long sem taem, hem i mas lukaot se hem i no go oltaem long wan brata no sista, blong i leftemap tingting blong hem. Sipos hem i mekem olsem, bambae hem i save gat filing we i no stret long brata no sista ya.

Taem ol brata mo sista we oli divos oli harem se oli no gat fren, no oli harem se ol narafala oli no wantem olgeta, no oli wari long fiuja, yumi mas traem blong kasem save long tingting blong olgeta, mo yumi mas givhan long olgeta. Sipos yumi mekem olsem, yumi stap folem fasin blong Jehova. (Sam 55:22; 1 Pita 5:6, 7) Yumi save se bambae oli glad long evri samting we yumi mekem blong givhan long olgeta, olsem ol fren oli stap mekem.—Prov. 17:17; 18:24.