1. ?From wanem Jehova mo Jisas tufala i lavlavem tufala?

JISAS i talem se: “Mi lavem Papa blong mi.” (Jon 14:31) Mo hem i talem bakegen se: “Papa blong mi, hem i lavem mi tumas.” (Jon 5:20) Bifo we Jisas i kam long wol, hem i wok wetem Jehova long heven blong plante milian yia. (Prov. 8:30, NW) Long taem ya, Jisas i lanem plante gudgudfala fasin blong Jehova, mo tufala i lavlavem tufala moa.

2. (1) ?Sipos yumi wantem se Jehova i lavem yumi, yumi mas mekem wanem? (2) ?Bambae yumi ansa long wanem kwestin?

² Man blong raetem Sam i singsing se: “Hae God. Mi mi lavem yu, mo yu yu paoa blong mi.” (Sam 18:1) Yumi mas gat sem tingting olsem man blong raetem Sam. God i promes se sipos yumi obei long hem, bambae hem i lavem yumi. (Ridim Dutronome 7:12, 13.) Be yumi no save luk God, taswe ?yumi save lavem hem olsem wanem? ?I minim wanem se yumi lavem Jehova? ?From wanem yumi mas lavem hem? ?Mo olsem wanem yumi save pruvum se yumi lavem hem?

3, 4. ?Yumi save lavem Jehova from wanem?

³ “God, hem i Spirit,” taswe yumi no save luk hem. (Jon 4:24) Nating se i olsem, yumi save lavem hem, mo Baebol i talem se yumi mas lavem hem. Bifo, Moses i talem long ol man Isrel se: ‘Yufala i mas lavem Jehova long olgeta tingting blong yufala, mo long olgeta laef blong yufala, mo long olgeta paoa blong yufala.’—Dut. 6:5.

⁴ ?Yumi save lavem Jehova from wanem? From we hem i mekem yumi blong yumi wantem wosipim hem, mo blong yumi naf blong lavem ol narafala. Taem yumi save Jehova moa, bambae yumi lavem hem moa, ale samting ya i mekem yumi glad. Hemia nao mining blong tok blong Jisas taem hem i talem se: “Olgeta we oli stap lukaot God from we oli no gat paoa blong hem long laef blong olgeta, oli save harem gud, from we God i King blong olgeta.” (Mat. 5:3) Wan buk (Man Does Not Stand Alone) i talem se: “Yumi sapraes blong luk se oltaem ol man oli lukaot God mo oli wantem blong bilif long hem.” Yes, plante man oli kasem save se yumi ol man, yumi bon wetem nid ya blong save God.

5. ?Yumi save faenem God?

⁵ ?Olsem wanem? ?Yumi save faenem God? Yes, God i wantem se yumi fren wetem hem. Aposol Pol i soemaot samting ya, taem hem i prij long ol man Atens. Plante long olgeta oli ting se oli mas go long wan haos blong prea, blong wosipim woman god ya Atena. Be Pol i talem se oli save faenem ‘God we i mekem wol ya, mo olgeta samting we oli stap long hem.’ Pol i eksplenem se God “i no save stap long ol haos blong prea.” Ol man we oli lukaot God, oli save faenem hem, nomata se oli stap long weples. Biaen, Pol i talem se God “i no stap longwe long yumi nating.” (Wok 17:24-27) Yes, ol man oli save faenem God. Bitim 7 milian Witnes blong Jehova oli “faenem hem,” mo oli lavem hem tumas.

6. ?Wanem loa “i hae moa, mo i nambawan blong folem”?

⁶ Taem yumi lavem Jehova, lav ya i mas kamaot long hat blong yumi. Taem wan Farisi i askem long Jisas, se: “Tija. ?Wanem loa blong God we i hae moa long ol narafala loa, i winim olgeta evriwan?” Jisas i talem klia long hem se: “‘Yu mas lavem Hae God [“Jehova,” NW] we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem.”—Mat. 22:34-38.

7. ?I minim wanem blong lavem God wetem (1) “olgeta hat” blong yumi? (2) “olgeta laef” blong yumi? (3) “olgeta tingting” blong yumi?

⁷ ?Jisas i minim wanem taem hem i talem se yumi mas lavem Jehova wetem olgeta hat, olgeta laef, mo olgeta tingting blong yumi? “Olgeta hat” i minim olgeta samting we oli joen wetem ol filing blong yumi mo ol samting we yumi wantem. “Olgeta laef” i minim olgeta fasin we oli soemaot se yumi hu, wetem evri samting we yumi mekem long laef blong yumi. Mo “olgeta tingting” i minim fasin blong yumi blong tingting mo ol samting we yumi tingbaot. Yes, Jisas i soemaot se yumi mas lavem Jehova wetem olgeta laef blong yumi, mo olgeta samting we yumi gat.

8. ?Olsem wanem yumi soemaot se yumi lavem God?

⁸ Yumi soemaot se yumi lavem God wetem olgeta hat, laef, mo tingting blong yumi, taem yumi stadi oltaem long Baebol, yumi mekem evri samting we hem i wantem, mo yumi wok strong blong talemaot gud nius blong Kingdom. (Mat. 24:14; Rom 12:1, 2) Taem yumi mekem ol samting ya, bambae yumi fren moa wetem hem. (Jem. 4:8) Yumi no save tokbaot evri samting we oli pulum yumi blong lavem Jehova. Be i gud yumi tokbaot sam long olgeta.

9. ?From wanem yu yu lavem Jehova?

⁹ Jehova i mekem yumi mo hem i givim evri samting we yumi nidim. Pol i talem se: “From we yumi joen long God nomo, yumi gat laef, yumi stap wokbaot, mo yumi stap mekem evri samting.” (Wok 17:28) Jehova i mekem wol ya i naes tumas, blong yumi stap  long hem. (Sam 115:16) Mo tu, hem i givim kakae mo ol narafala samting we yumi nidim blong stap laef. Taswe, Pol i talem long ol man Listra se oli no mas wosipim ol giaman god, be oli mas wosipim Jehova, “God ya nomo we i laef, i stap we i stap.” Pol i tokbaot fasin blong God, i se: “Oltaem hem i stap soemaot fasin blong hem long ol gudfala wok we hem i stap mekem. Hem i stap mekem ren i foldaon, mo i stap mekem ol garen oli gat kakae long stret taem blong olgeta. Hem i stap givim kakae long yufala, mo hem i stap mekem yufala i harem gud.” (Wok 14:15-17) Yes, Jehova i givim evri samting we yumi nidim. !Hemia wan gudfala risen blong yumi lavem God ya we i mekem yumi!—Pri. 12:1.

10. ?Yu yu wantem talem wanem long Jehova from rod we hem i mekem blong tekemaot sin mo ded?

¹⁰ Jehova bambae i tekemaot sin mo ded we yumi kasem long Adam. (Rom 5:12) Baebol i talem se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) Sipos yumi tanem tingting blong yumi mo yumi bilif long sakrefaes blong Jisas, God bambae i fogivim ol sin blong yumi. Yumi talem bigfala tangkiu long Jehova, from we hem i lavem yumi tumas nao i sanem pikinini blong hem, blong hem i ded blong sevem yumi.—Jon 3:16.

11, 12. ?Promes blong laef bakegen, i leftemap tingting blong yumi olsem wanem?

¹¹ Jehova i promes long yumi blong yumi laef olwe. (Rom 15:13) Promes ya blong God i givhan long yumi blong yumi stanap strong, taem yumi kasem trabol. God i promes se ol tabu Kristin bambae oli laef olwe long heven. (Rev. 2:10) Mo ol narafala man blong God, bambae oli laef olwe long Paradaes long wol. (Luk 23:43) ?Taem yumi tingbaot ol promes ya, yumi harem olsem wanem? Yumi glad tumas, yumi gat pis long tingting blong yumi, mo yumi lavem God ya we i givim “evri samting we oli gud mo evri presen we oli nambawan.”—Jem. 1:17.

¹² Jehova i promes blong mekem ol dedman oli laef bakegen. (Wok 24:15) Yumi harem nogud tumas taem wan famle no wan fren blong yumi i ded. Be from we yumi save promes ya blong laef bakegen, yumi no ‘stap harem nogud olsem ol man we tingting blong olgeta i no stap long God.’ (1 Tes. 4:13) Jehova God i wantem tumas blong mekem ol dedman oli laef bakegen, speseli olgeta we oli holemstrong long hem. (Job 14:15) !Yu traem tingbaot bigfala glad we bambae i kamaot, taem yumi luk ol pikinini oli joen bakegen wetem papa mo mama blong olgeta, mo ol fren oli luk olgeta bakegen! Yumi lavem Jehova tumas from nambawan promes ya.

13. ?Olsem wanem yumi save se God i stap tingbaot yumi?

¹³ Jehova i stap tingbaot yumi. (Ridim Ol Sam 34:6, 18, 19; 1 Pita 5:6, 7.) Tede, yumi harem se yumi sef from we yumi save se Jehova i rere oltaem blong givhan long ol man we oli holemstrong long hem. (Sam 79:13) Be yu traem tingbaot ol gudgudfala samting we Jehova bambae i mekem long fiuja, blong givhan long yumi. Jisas we i King long Kingdom blong God, bambae i tekemaot ol man we oli stap faet, mo oli stap spolem ol narafala, mo oli stap mekem ol rabis fasin long wol. Afta, bambae ol man blong God oli save harem gud long pis mo oli gat plante samting. (Sam 72:7, 12-14, 16) Taem yumi tingting dip long ol promes ya, hemia i pulum yumi blong yumi lavem Jehova long olgeta hat, laef, paoa, mo tingting blong yumi.—Luk 10:27.

14. ?Jehova i givim wanem nambawan blesing long yumi?

¹⁴ Jehova i givim nambawan blesing blong yumi kam ol Witnes blong hem. (Aes. 43:10-12) Yumi lavem God from we hem i givim janis long yumi blong yumi sapotem Kingdom blong hem, mo blong yumi givhan long ol man, blong oli bilif long ol promes blong hem. Yumi bilif long gud nius mo yumi no fraet blong talemaot gud nius ya. ?From wanem? From we hem i kamaot long Baebol, mo ol promes blong God oli kamtru oltaem.  (Ridim Josua 21:45; 23:14.) Yes, i gat plante risen blong yumi lavem Jehova. ?Be olsem wanem yumi save pruvum se yumi lavem Jehova?

15. ?Taem yumi stadi mo yumi folem Baebol, hemia i givhan long yumi olsem wanem?

¹⁵ Yumi stadi oltaem long Baebol mo yumi folem tok blong hem. Sipos yumi mekem olsem, yumi stap soemaot se yumi lavem Jehova mo yumi wantem se tok blong hem i lidim yumi. (Sam 119:105) Sipos yumi harem nogud, ol tok blong Baebol oli save leftemap tingting blong yumi. Hemia sam long ol tok ya: “Yu [God] yu no save tanem baksaed long man we i tanem tingting blong hem mo i putum hem i stap daon.” “Yu [God] yu holem mi mi stap gud, from we oltaem yu yu lavem mi tumas. Taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.” (Sam 51:17; 94:18, 19) Jehova mo Jisas, tufala i sore long olgeta man we oli stap harem nogud. (Aes. 49:13; Mat. 15:32) Taem yumi stadi long Baebol, yumi kasem save se God i stap tingbaot yumi, ale yumi lavem hem moa.

16. ?Sipos yumi prea oltaem, olsem wanem yumi save lavem God moa?

¹⁶ Yumi prea oltaem. Taem yumi prea long God mo yumi luk se hem i ansa long ol prea blong yumi, yumi lavem hem moa. (Sam 65:2) Traem tingbaot. Yumi luksave se hem i no letem wan samting i traem yumi, we i strong tumas long yumi. (1 Kor. 10:13) Mo sipos yumi wari mo yumi askem strong long Jehova blong hem i givhan long yumi, bambae ‘hem i givim pis’ blong hem long yumi. (Fil. 4:6, 7) Mo tu, samtaem yumi save prea long tingting blong yumi nomo, olsem Nehemaea bifo, ale biaen yumi luksave se Jehova i ansa long yumi. (Neh. 2:1-6) Yes, sipos yumi “prea oltaem” mo yumi luk se Jehova i stap ansa long yumi, bambae yumi lavem hem moa. Mo taem sam samting oli traem bilif blong yumi, bambae yumi trastem Jehova se hem i save givhan long yumi.—Rom 12:12.

17. ?Sipos yumi lavem Jehova, bambae yumi tingbaot ol miting olsem wanem?

¹⁷ Yumi go oltaem long ol miting mo ol asembli. (Hib. 10:24, 25) Ol man Isrel oli hivap wanples blong lesin mo kasem save moa  long Jehova. Olsemia, oli save wosipim hem wetem dip respek mo oli save obei long Loa blong hem. (Dut. 31:12) Sipos i tru se yumi lavem Jehova, bambae yumi go oltaem long ol miting. (Ridim 1 Jon 5:3.) Yumi mas mekem evri samting we yumi naf blong mekem, blong yumi go long olgeta miting. Yumi no mas letem wan samting i blokem yumi, nao yumi no moa lavem Jehova olsem fastaem.—Rev. 2:4.

18. ?Yumi lavem God, taswe yumi mekem wanem?

¹⁸ Yumi gohed oltaem blong talemaot “trutok” long ol man. (Gal. 2:5) Yumi lavem God, taswe yumi wantem talemaot Kingdom blong God long ol man. Long Amagedon, Jisas bambae i faet “blong leftemap trutok.” (Sam 45:4, NW; Rev. 16:14, 16) Yumi glad tumas blong givhan long ol man blong oli kasem save long lav blong God mo long niufala wol we hem i promes blong mekem.—Mat. 28:19, 20.

19. ?From wanem yumi mas tinghae long ol elda long kongregesen?

¹⁹ Yumi tinghae long ol elda long kongregesen. (Wok 20:28) Oltaem Jehova i mekem ol samting blong givhan long yumi, taswe hem i putumap ol Kristin elda blong oli lukaot long yumi. Ol elda oli ‘olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.’ (Aes. 32:1, 2) !Yumi harem gud tumas blong stap long wan sefples we i drae, taem i gat strong win mo bigfala ren! Mo taem san i strong tumas, yumi harem gud blong go haed long sed blong wan bigfala ston. Long sem fasin, ol elda oli givhan long yumi mo oli leftemap tingting blong yumi, blong yumi gohed blong mekem wok blong Jehova, nomata se i gat hadtaem. ?From wanem yumi mas obei long olgeta? From we yumi tinghae long ol man ya we oli olsem ‘presen,’ mo yumi lavem Jehova, mo Jisas we hem i hed blong kongregesen.—Efes. 4:8; 5:23; Hib. 13:17.

20. ?Sipos yu lavem God, bambae yu mekem wanem?

²⁰ Jehova i givim wan ‘loa we i stret olgeta.’ Loa ya i talem evri samting we Jehova i wantem se yumi mekem. (Ridim Jemes 1:22-25.) Sipos yu wantem fren gud wetem Jehova, yu mas mekem sam moa samting i bitim we yu lesin nomo long hem. (Sam 19:7-11) Yu mas mekem ol samting we yu lanem i wok long laef blong yu. Sipos yu lavem Jehova tumas, bambae yu traehad blong talemaot hem long ol narafala mo bambae yu ansa long ol miting.

21. ?Prea we yu mekem wetem fulhat i olsem wanem samting?

²¹ Yumi prea long Jehova oltaem from we yumi lavem hem. Long Isrel bifo, ol pris oli mas bonem insens evri dei, blong smok blong hem i go long Jehova. King Deved i talem se ol prea blong hem oli olsem smok blong insens, taem hem i singsing se: “Plis yu letem prea blong mi i kam long yu olsem smok blong insens we man i bonem i kam long yu. Taem mi leftemap han blong mi blong prea long yu, plis yu glad long mi olsem we yu glad long ol sakrefaes ya we pris i stap bonem long sapa.” (Sam 141:2; Eks. 30:7, 8) Jehova i lesin long ol prea blong Deved. Sipos yumi prea long Jehova wetem tingting daon, mo wetem fulhat blong yumi, mo yumi talem tangkiu long hem, ol prea blong yumi bambae oli kam olsem smok blong insens mo Jehova bambae i glad long yumi.—Rev. 5:8.

22. ?Long nekis stadi bambae yumi lanem wanem?

²² Jisas i talem se yumi mas lavem God. Mo hem i talem tu se yumi mas lavem ol man we oli stap raonabaot long yumi. (Mat. 22:37-39) Sipos yumi lavem Jehova mo ol stret rul blong hem, bambae yumi lavem ol man raonabaot long yumi. Long nekis stadi, bambae yumi lanem moa long saed ya.