Yumi evriwan i wantem save ansa blong kwestin ya. Antap moa olgeta we man no woman blong olgeta i ded. Yes, olgeta oli wantem tumas blong joen bakegen wetem man no woman blong olgeta, we bambae oli laef bakegen long niufala wol. Wan brata we waef blong hem i ded finis, i talem se: “Mi mo woman blong mi i wantem se mared blong mitufala i stap olwe. Mitufala i gat strong tingting blong mekem wosip long Jehova, mo stap olsem hasban mo waef blong olwe. Kam kasem tede, tingting blong mi i no jenis.” ?Olsem wanem? ?I gat sam gudfala risen we yumi save talem, blong pruvum se olgeta we bambae oli laef bakegen, oli save mared? Ansa blong hem se, yumi no save.

Plante yia finis, ol buk blong yumi oli talem se ol tok ya blong Jisas long saed blong laef bakegen, mo mared, maet i minim ol man we bambae oli laef bakegen mo stap long wol ya. Mo tu, oli talem se olgeta ya oli no save mared. * (Mat. 22:29, 30; Mak 12:24, 25; Luk 20:34-36) Blong talem stret, i no gat wan stret ansa. Yumi no save, maet Jisas i minim olgeta we oli laef bakegen mo stap long heven. Taswe, i gud yumi lukluk bakegen ol toktok ya blong Jisas.

Yu traem ridim stori ya bakegen. (Ridim Luk 20:27-33.) Ol Sadusi oli no bilif se ol dedman bambae oli laef bakegen, ale oli traem blong trikim Jisas, blong faenem poen long hem. Oli askem kwestin long saed blong laef bakegen, mo fasin ya we man i mared long woman blong brata blong hem we i ded finis. * Jisas i ansa long olgeta se: “Long wol ya, ol man mo woman, oli save mared. Be long niufala wol ya we bambae i kam, olgeta ya we God i glad blong mekem olgeta oli laef bakegen, mo blong tekem olgeta oli go insaed long niufala wol ya, olgeta ya bambae oli no moa save mared. Olgeta oli no save ded bakegen, bambae oli sem mak nomo wetem ol enjel. Oli pikinini blong God, from we hem i mekem olgeta oli laef bakegen.”—Luk 20:34-36.

?From wanem ol buk blong yumi oli talem se ol tok ya blong Jisas, i minim ol man we bambae oli laef bakegen long wol ya? From tu risen. Faswan, taem ol Sadusi oli askem kwestin long Jisas, maet long tingting blong olgeta, oli stap tingbaot wan taem we ol man bambae oli laef bakegen long wol ya. Ale oli ting se Jisas bambae i givim wan ansa olsem. Nambatu, hemia from we Jisas i tokbaot Ebraham, Aesak, mo Jekob long en blong ansa we hem i givim. Trifala ya, bambae oli laef bakegen long wol.—Luk 20:37, 38.

Be i luk olsem se taem Jisas i ansa long ol Sadusi, hem i stap tingbaot olgeta we bambae oli laef bakegen long heven. ?Yumi save samting ya olsem wanem? Hemia from tu toktok we Jisas i talem. I gud yumi lukluk bakegen.

Faswan toktok se: ‘Olgeta ya we God i glad blong mekem olgeta oli laef bakegen.’ Baebol ya New World Translation i tanem vas ya se: ‘Olgeta we God i luk se oli naf blong kasem laef bakegen long ded.’ Yes, ol tabu Kristin nomo we God i luk se ‘oli naf blong rul long Kingdom blong God.’ (2 Tes. 1:5, 11, NW) Olgeta ya oli bilif long ransom mo God i luk olgeta se oli stret man finis bifo we oli ded. (Rom 5:1, 18; 8:1) Baebol i talem se olgeta ya oli stap harem gud mo oli tabu, mo oli stret blong go laef long heven. (Rev. 20:5, 6, NW) Be ol man we bambae oli laef bakegen long wol ya, hemia ol stret man wetem “olgeta we oli  no stret” tu. (Wok 24:15) ?Olsem wanem? ?Yu ting se “olgeta we oli no stret,” God i luk olgeta se oli naf blong rul long Kingdom?

Narafala toktok se: “Olgeta oli no save ded bakegen.” Sam narafala Baebol oli tanem tok ya se, “ded i no moa save winim olgeta,” mo “ded i no moa gat paoa long olgeta.” Ol tabu Kristin we oli stanap strong long bilif blong olgeta gogo kasem we oli ded, God i mekem olgeta oli laef bakegen blong go stap long heven. Hem i mekem we laef blong olgeta bambae i stap olwe, i no save finis samtaem. (1 Kor. 15:53, 54) Olgeta ya we oli go laef long heven, oli no moa save ded samtaem. *

?Yumi lanem wanem folem ol save we yumi tokbaot? Yumi lanem se, ating ol tok ya blong Jisas se, ol man we bambae oli laef bakegen oli no save mared, i minim olgeta we oli laef bakegen mo go stap long heven. Sipos i olsem, ol tok ya blong Jisas oli givhan long yumi blong faenemaot sam samting long saed blong olgeta we bambae oli go laef long heven. Hemia se, bambae oli no save mared, bambae oli no save ded, mo oli kam olsem ol enjel long heven. Be nao i gat sam kwestin blong tingbaot.

Faswan kwestin se, sipos ol Sadusi oli stap tingbaot laef bakegen long wol ya, ?from wanem taem Jisas i ansa long olgeta, hem i tokbaot laef bakegen long heven? Sam samtaem, taem ol enemi blong Jisas oli askem kwestin long hem, hem i no ansa long olgeta folem samting we oli stap tingbaot. Eksampol, i gat sam lida blong ol man Isrel we oli askem long Jisas blong i mekem wan saen long olgeta. Ale, Jisas i talem long olgeta se: “Sipos yufala i brekemdaon haos ya blong God, bambae long tri dei, mi mi stanemap bakegen.” Jisas i save se ol man ya oli stap tingbaot prapa haos blong God, “be haos ya blong God we Jisas i stap tokbaot, hemia bodi blong hem.” (Jon 2:18-21) Long sem fasin, maet Jisas i harem se i no nid blong ansa long ol Sadusi ya we oli gat tu fes, from we olgeta oli no bilif long laef bakegen, mo oli no bilif se i gat ol enjel. (Prov. 23:9; Mat. 7:6; Wok 23:8) Taswe, maet ansa we Jisas i givim long ol Sadusi ya, i blong givhan long ol disaepol blong hem, we oli stap wetem hem long taem ya, blong oli kasem save se laef bakegen long heven i olsem wanem. From we ol disaepol blong hem tu bambae oli go laef long heven.

Namba tu kwestin se, ?from wanem long lastok blong Jisas, hem i tokbaot Ebraham, Aesak mo Jekob, we trifala ya, oli blong laef bakegen long wol ya? (Ridim Matiu 22:31, 32.) Makem se bifo we Jisas i tokbaot Ebraham, Aesak mo Jekob, hem i tokbaot “fasin ya we man i laef bakegen.” Maet Jisas i talem tok ya blong jenisim storian blong hem, blong tokbaot laef bakegen long wol ya. Ale, from we Jisas i save se ol Sadusi oli folem loa we Moses i raetem, hem i yusum ol tok we God i talem long Moses, long taem we faea i laet olbaot long wan smol tri. Hem i yusum ol tok ya blong pruvum long ol Sadusi se, laef bakegen long wol ya, hem i wan haf blong stamba tingting blong God we i mas kamtru.—Eks. 3:1-6.

Namba tri kwestin se, sipos tok we Jisas i talem i minim ol man we bambae oli laef bakegen long heven, ?hemia i min se olgeta we bambae oli laef bakegen long wol, oli save mared? Baebol i no givim wan stret ansa long kwestin ya. Be sipos i tru se Jisas i stap tokbaot ol man we bambae oli laef bakegen long heven, ale tok we hem i talem long ol Sadusi, i no save givhan long yumi blong save sipos olgeta we bambae oli laef bakegen long niufala wol, oli save mared, no nogat.

Be samting we yumi save gud se, Baebol i talem se promes blong mared i finis taem wan long tufala i ded. Taswe, sipos man no woman blong yu i ded finis, yu no mas ting se i rong blong yu mared bakegen. Hemia desisen blong yu wan nomo. Yumi no mas tok nogud long wan man no wan woman we i wantem mared bakegen.—Rom 7:2, 3; 1 Kor. 7:39.

I tru, maet yumi askem plante kwestin, from we yumi wantem save se laef long niufala wol bambae i olsem wanem. Be i nogud yumi talemaot prapa tingting blong yumi. Yumi mas wet nomo blong luk ol promes ya oli kamtru. Be yumi sua se ol man we oli obei long Jehova bambae oli glad. Jehova bambae i blesem olgeta, mo bambae i givim evri samting long olgeta, blong mekem oli harem gud long laef blong olgeta.—Sam 145:16.