1, 2. ?From wanem God i mas lukaot gud long laen we pikinini blong woman i kamaot long hem?

FAS profet tok blong Baebol i impoten tumas, from we i givhan long yumi blong yumi kasem save olsem wanem stamba tingting blong God bambae i kamtru. Long garen blong Iden, God i mekem promes ya se: “Yu [Setan] mo woman ya, bambae yutufala i no laeklaekem yutufala, bambae yutufala i stap agens long yutufala. Ol pikinini we bambae oli kamaot biaen long yu, mo ol pikinini we bambae oli kamaot biaen long hem, bambae oli stap badfren long olgeta.” Bambae oli stap badfren gogo, ?wanem bambae i hapen? Jehova i talem long Setan se: ‘Pikinini blong hem [woman] bambae i smasem hed blong yu [Setan], mo yu bambae yu kakae leg blong hem.’ (Jen. 3:15) Setan mo woman ya tufala i agensem tufala strong, mo Setan i yusum olgeta paoa blong hem blong traem spolem pikinini blong woman.

² Man blong raetem Ol Sam i soemaot samting ya long prea blong hem, i se: “!Yu luk! Ol enemi blong yu oli girap oli agensem yu, olgeta ya we oli no laekem yu oli stap faet agens long yu. Mifala i man blong yu nomo we yu yu stap lukaot long mifala,  be oli stap mekem ol tokhaed blong spolem mifala, oli stap mekem ol plan agens long mifala long fasin blong haed. Oli talem se, ‘!Yufala i kam! !Yumi go flatem olgeta ya! !Yumi spolemgud ples blong olgeta! !Bambae nem ya Isrel i lus olgeta!’” (Sam 83:2-4) Setan i wantem tumas blong spolem mo finisim laen we pikinini blong woman bambae i kamaot long hem. Blong lukaot gud long pikinini ya mo blong mekem se Kingdom blong Mesaea i karem blesing i kam long ol man, Jehova i mekem sam narafala kontrak bakegen.

3, 4. (1) ?Wetaem kontrak blong Loa i stanap? ?Mo ol man Isrel oli talem se bambae oli mekem wanem? (2) ?Loa ya i lukaot gud long wanem?

³ Ol laen blong Ebraham we oli kamaot long Aesak mo Jekob oli kam plante we plante, nao Jehova i mekem olgeta oli kam neson blong Isrel. God i mekem wan spesel kontrak wetem neson ya, hemia kontrak blong Loa, mo hem i yusum Moses blong tekem kontrak ya i kamtru long olgeta. Jehova i givim Loa long olgeta, mo olgeta oli talem se bambae oli obei long Loa ya. Baebol i talem se Moses “i tekem buk ya blong promes blong Hae God we hem i raetemdaon finis ol tok ya we Hae God i talem, mo i ridimaot ol tok ya long ol man. Mo olgeta oli talem se, ‘Bambae mifala i obei long Hae God, mifala i mekem evri samting we hem i talem.’ Nao hem i tekem blad ya [blong ol buluk we oli kilim olsem sakrefaes] we i stap long besin, i saksakem i go long ol man, mo i talem long olgeta se, ‘Promes ya we Hae God i mekem wetem yumi taem hem i givim ol tok ya long yumi, blad ya nao i mekem i stanap.’”—Eks. 24:3-8.

⁴ Long yia 1513 bifo Kraes, kontrak blong Loa i stanap. Taem Jehova i mekem kontrak ya wetem neson blong Isrel, hem i jusumaot neson ya i blong hem. Hem i Jaj blong olgeta, i givim ol loa long olgeta, mo i King blong olgeta. (Aes. 33:22) Loa i talem long ol man Isrel se oli no mas mared long olgeta we oli wosipim ol narafala god, mo i talem tu se oli no mas mekem wosip long ol god ya. Taswe, Loa ya i lukaot gud long laen blong Ebraham, blong i stap klin long fes blong God.—Eks. 20:4-6; 34:12-16.

5. (1) ?Kontrak blong Loa i openem rod blong wanem samting? (2) ?From wanem God i sakemaot neson blong Isrel?

⁵ Kontrak blong Loa i talem se bambae i gat sam man we oli mekem wok olsem pris long Isrel. Ol pris ya oli pija blong wan narafala grup blong pris we bambae i givhan moa long ol man long fiuja. (Hibrus 7:11; 10:1) Yes, kontrak blong Loa i openem rod blong neson blong Isrel i save kam wan ‘tabu neson blong ol king mo pris.’ Be sipos oli wantem kasem nambawan blesing ya, oli mas obei long ol loa blong Jehova. (Ridim Eksodas 19:5, 6.) Sore tumas, ol man Isrel oli no obei. Oli no wantem luksave Mesaea, we hem nao i impoten pikinini long laen blong Ebraham. Oli girap, oli sakemaot Jisas, mo from samting ya, God i sakemaot olgeta.

6. ?Loa i mekem wanem wok?

 ⁶ Neson blong Isrel i no kam wan tabu neson blong ol king mo pris, from we hem i no obei long God. Be samting ya i no min se Loa i no mekem wok blong hem. Loa i lukaot gud long laen blong Ebraham, mo i givhan long ol man blong oli luksave Mesaea. Taem Jisas i kam long wol mo oli luksave hem olsem Mesaea, Loa ya i mekem wok blong hem finis. Baebol i talem se: “Kraes i finisimgud olgeta wok blong Loa.” (Rom 10:4) Taswe, ?hu bambae i gat janis blong kam wan tabu neson blong ol king mo pris? Jehova i mekem wan narafala kontrak blong stanemap wan niufala neson.

7. ?Jeremaea i talemaot wanem tok blong Jehova?

⁷ Longtaem bifo we kontrak blong Loa i finis, profet Jeremaea i talemaot tok blong Jehova, se bambae Jehova i mekem wan “niufala promes” no kontrak wetem neson blong Isrel. (Ridim Jeremaea 31:31-33.) Kontrak ya bambae i defren long kontrak blong Loa. Folem niufala kontrak ya, taem man i askem long God blong i fogivim sin blong hem, bambae hem i no moa nidim blong givim anamol olsem sakrefaes. ?From wanem?

8, 9. (1) ?Blad blong Jisas i mekem wanem? (2) ?Olgeta long niufala kontrak oli gat wanem janis? (Yu luk pija long stat blong stadi.)

⁸ Plante handred yia afta, long namba 14 Nisan long yia 33, Jisas i stanemap wan niufala lafet, hemia Kakae blong Masta. Jisas i tokbaot kap waen long ol 11 aposol blong hem, i se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap.” (Luk 22:20) Matiu i talemaot tok blong Jisas se: “Hemia blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.”—Mat. 26:27, 28.

⁹ Blad blong Jisas i mekem niufala kontrak i stanap. Blad ya i ron wan taem nomo, mo i mekem se Jehova i save fogivim sin blong man blong olwe. Jisas i no stap insaed long niufala kontrak from we hem i no gat sin, taswe God i no nid blong fogivim hem. Be God bambae i yusum sakrefaes blong Jisas blong mekem i gud long olgeta man. Mo tu, hem i save yusum tabu spirit blong makemaot sam man mo adoptem olgeta oli kam ‘ol pikinini blong hem.’ (Ridim Rom 8:14-17.) Jehova i save luk olgeta olsem hem i luk Pikinini blong hem Jisas, we i no gat sin. Bambae oli “joen long Kraes” blong rul long heven.  Bambae oli gat janis tu blong kasem samting we neson blong Isrel bifo i lusum, hemia blesing ya blong kam wan ‘tabu neson blong ol king mo pris.’ Aposol Pita i tokbaot olgeta se: “Yufala i ‘wan laen we God i jusumaot, wan kampani blong pris mo king, wan tabu neson, ol man we oli blong God nomo, blong yufala i save talemaot ol gudfala fasin’ blong hemia we i singaot yufala i aot long tudak, i kam long nambawan laet blong hem.” (1 Pita 2:9, NW) !I klia nomo se niufala kontrak ya i impoten tumas! Kontrak ya i mekem se sam disaepol blong Jisas oli save joen long laen blong Ebraham.

10. ?Wetaem niufala kontrak i stanap? ?From wanem hem i no save stanap bifo long taem ya?

¹⁰ Niufala kontrak i no stanap long taem ya we Jisas i mekem Kakae blong Masta. ?From wanem? From we Jisas i mas gobak long heven fastaem, blong givim sakrefaes blong hem i go long God. Mo tu, tabu spirit i mas makemaot olgeta we bambae oli go long heven blong “joen long Kraes.” Taswe, long lafet blong Pentekos long yia 33, taem ol disaepol blong Jisas oli kasem tabu spirit, hemia nao taem we niufala kontrak i stanap.

11. ?Niufala kontrak i mekem wanem, blong ol man Isrel mo ol man blong narafala laen oli gat janis blong rul long Kingdom? ?I gat hamas man we oli joen long niufala kontrak?

¹¹ Taem Jehova i talem long Jeremaea se bambae hem i mekem wan niufala kontrak wetem ol man Isrel, hem i soemaot se kontrak blong Loa bambae i finis. Taem niufala kontrak i stanap, kontrak blong Loa i finis. (Hib. 8:13) Niufala kontrak i mekem se ol man Isrel mo ol man blong narafala laen we oli no sakomsaes, olgeta evriwan oli gat janis blong rul long Kingdom blong God. Hemia from we  tabu spirit i mekem se oli sakomsaes long hat blong olgeta, i no long bodi olsem Loa i talem. (Rom 2:29) Niufala kontrak ya i mekem se God i putum loa blong hem long tingting mo hat blong olgeta. (Hib. 8:10) I gat 144,000 tabu Kristin we oli joen long niufala kontrak. Olgeta ya nao oli niufala neson ya we Baebol i kolem “Isrel blong God.”—Gal. 6:16; Rev. 14:1, 4.

12. ?Niufala kontrak i defren olsem wanem long kontrak blong Loa?

¹² ?Niufala kontrak i defren olsem wanem long kontrak blong Loa? Hem i defren long plante fasin. Faswan se, Jehova i mekem kontrak blong Loa wetem prapa neson blong Isrel, be hem i mekem niufala kontrak wetem Isrel blong God we tabu spirit i makemaot. Mo tu, Moses i tekem kontrak blong Loa i kamtru, be Jisas i tekem niufala kontrak i kamtru. Mo tu, blad blong anamol i mekem kontrak blong Loa i stanap, be blad blong Jisas i mekem niufala kontrak i stanap. Mo tu, folem kontrak blong Loa, Moses i lida blong neson blong Isrel. Be folem niufala kontrak, Jisas we i Hed blong kongregesen, hem i Lida blong olgeta we oli stap long kontrak ya.—Efes. 1:22.

13, 14. (1) ?Niufala kontrak i joen olsem wanem long Kingdom? (2) ?Wanem i givim raet long ol tabu Kristin ya blong oli wok olsem ol king mo pris wetem Kraes long heven?

¹³ ?Niufala kontrak i joen olsem wanem long Kingdom? Kontrak ya i mekem wan tabu neson i stanap we i gat janis blong kam ol king mo ol pris long Kingdom long heven. Neson ya i joen long laen blong Ebraham. (Gal. 3:29) Taswe niufala kontrak i soemaot klia se promes we God i mekem wetem Ebraham bambae i kamtru.

¹⁴ Ale, niufala kontrak i stanemap niufala neson ya Isrel blong God, mo i mekem se oli save go long heven blong “joen long Kraes.” ?Be wanem i givim raet long ol tabu Kristin ya blong oli wok olsem ol king mo pris wetem Kraes long heven? Wan narafala kontrak i givim raet ya long olgeta.

15. ?Jisas i mekem wanem kontrak wetem 11 aposol blong hem?

¹⁵ Afta we Jisas i stanemap Kakae blong Masta, hem i mekem kontrak blong Kingdom wetem 11 aposol blong hem. (Ridim Luk 22:28-30.) Jehova i no joen long kontrak ya olsem we i joen long ol narafala kontrak. Hemia wan kontrak we Jisas nomo i mekem wetem ol man we tabu spirit i makemaot olgeta. Taem Jisas i talem se, “olsem we Papa blong mi i putumap mi [“i mekem kontrak wetem mi,” NW],” ating hem i stap tokbaot kontrak we Jehova i mekem wetem hem, blong i kam wan ‘pris olsem Melkisedek’ blong olwe.—Hib. 5:5, 6.

16. ?Kontrak blong Kingdom i givim raet long ol tabu Kristin blong oli mekem wanem?

¹⁶ Ol 11 gudfala aposol oli no lego Jisas long ol hadtaem we hem i kasem. Kontrak blong Kingdom i wan promes se ol aposol ya bambae oli rul olsem king mo mekem wok blong pris wetem Jisas long heven. Be i no 11 aposol ya nomo we bambae oli kasem blesing ya. Jisas i kamtru long aposol Jon long vison, mo i talem se: “Mi mi win long faet blong mi finis, nao mi stap sidaon wetem Papa blong mi blong joen long hem long hae nem blong hem. Mo long sem fasin, bambae mi mi givim raet long man we bambae i win long faet, blong i kam sidaon wetem mi, blong joen long mi long hae nem blong mi.” (Rev. 3:21) Taswe, hem i mekem kontrak blong Kingdom wetem ol 144,000 tabu Kristin. (Rev. 5:9, 10; 7:4) Kontrak ya  i givim raet long ol tabu Kristin ya blong oli rul wetem Jisas long heven. Hemia i sem mak long wan woman we oli jusum hem blong i mared long wan king. Afta we tufala i mared, woman ya i gat raet blong joen wetem king ya blong rul. Baebol i tokbaot ol tabu Kristin se oli “woman” blong Kraes, oli olsem ‘wan yang gel we i klin’ we bambae i mared long Kraes.—Rev. 19:7, 8; 21:9; 2 Kor. 11:2.

17, 18. (1) Yu tokbaot 6 kontrak we oli joen wetem Kingdom. (2) ?Yumi save bilif strong se Kingdom bambae i mekem wanem?

¹⁷ Long tufala stadi ya, yumi tokbaot ol kontrak we oli joen wetem Kingdom. (Yu luk haf ya, “God i Stap Mekem Stamba Tingting Blong Hem i Kamtru.”) Ol promes blong Kingdom oli mas kamtru from we oli stanap long ol kontrak ya. Yumi save bilif strong se God bambae i yusum Kingdom blong Mesaea blong mekem stamba tingting blong hem i kamtru long ol man mo long wol ya.—Rev. 11:15.

¹⁸ Yumi save se Kingdom nomo i naf blong stretem ol problem long wol. Mo yumi save gud se Kingdom ya bambae i karem blesing blong olwe long ol man. !Ale, yumi mas strong blong talemaot nambawan trutok ya!—Mat. 24:14.