GUY HOLLIS PIERCE i wan memba blong Hed Kampani blong ol Witnes blong Jehova. Long Tusde 18 Maj 2014, laef blong hem long wol ya i finis. Hem i gat 79 yia. Hem i wan brata blong Kraes, taswe hem i girap bakegen mo i go long heven blong kasem praes blong hem.—Hibrus 2:10-12; 1 Pita 3:18.

Guy Pierce i bon long namba 6 Novemba 1934 long Auburn, California, long Amerika. Hem i baptaes long yia 1955. Long yia 1977, hem i mared long Penny, mo tufala i gat pikinini. Guy Pierce i olsem wan papa long plante narafala man. Long yia 1982, hem mo Penny tufala i joen long wok blong paenia. Long yia 1986, hem i mekem wok blong eria elda long Amerika, mo hem i gohed 11 yia.

Long yia 1997, Guy mo Penny Pierce tufala i go wok long Betel long Amerika. Brata Pierce i wok long Seves Dipatmen, mo long yia 1998, oli putumap hem i kam man blong givhan long Komiti We i Lukaot Long Olgeta Long Betel. Long namba 2 Oktoba 1999, long bigfala miting we oli mekem evri yia long Amerika, oli talemaot se Guy i kam wan memba blong Hed Kampani. Long ol yia we oli jes pas, hem i wok wetem Komiti We i Lukaot Long Olgeta Long Betel, mo Komiti Blong Raetem Ol Buk, mo Komiti We i Lukaot Long Wok Blong Printim Ol Buk, mo Komiti Blong Ol Kodineta.

Brata Pierce i smael oltaem mo i gat gudfala fasin blong mekem man i laf. Nating se ol man oli gat defdefren kastom mo oli kamaot long ol defdefren kaen laef, be oli no fraet blong joen wetem hem. Hem i lavem ol man, tingting blong hem i stap daon, hem i obei gud long ol loa blong God, mo hem i bilif fulwan long Jehova. Ol samting ya oli mekem se ol man oli laekem hem tumas. Guy Pierce i talem oltaem se, bambae Jehova i neva mestem blong mekem promes blong hem i kamtru, olsem we san i neva mestem blong girap evri dei. Mo hem i wantem se ol man long olgeta ples long wol oli save samting ya.

Brata Pierce i wok strong long wok blong Jehova. Hem i stat long eli moning mo plante taem hem i wok kasem let long naet. Hem i stap go long olgeta ples long wol blong leftemap tingting blong ol Kristin brata mo sista. Mo hem i rere oltaem blong givhan long olgeta we oli nidim help mo advaes blong hem. Plante brata mo sista oli tingbaot we hem i kaen tumas mo i fren gud wetem olgeta, mo oli tingbaot yet ol gudfala advaes blong Baebol we hem i givim long olgeta plante yia finis.

Woman blong Brata Pierce, ol sikis pikinini blong hem, ol smol bubu blong hem, ol namba tu smol bubu blong hem, wetem ol Kristin brata mo sista we oli olsem pikinini blong hem, evriwan oli harem nogud blong lusum gudfala brata mo fren blong olgeta. Long Sarede 22 Maj 2014, long Betel long Brooklyn, Mark Sanderson, we i wan memba blong Hed Kampani, i givim tok blong berem Brata Pierce. Mo tu, hem i tokbaot laef long heven we Brata Pierce i putum tingting blong hem i stap strong long hem, mo hem i ridim tok blong Jisas se: ‘Long haos blong Papa blong mi, i gat plante rum i stap. Mo from we mi go blong mekemrere ples blong yufala bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem. Ples ya we bambae mi mi go long hem, yufala i save finis rod blong hem.’—Jon 14:2-4.

Yumi harem nogud tumas we Brata Pierce i no moa stap. Be yumi glad se hem i “save finis rod blong hem” blong go stap olwe long “rum” antap long heven.