Yumi lavem Jehova tumas, mo from samting ya yumi givim laef blong yumi i go long hem nao yumi tekem baptaes. Yumi mekem promes blong obei oltaem long hem, mo yumi wantem tumas blong holemtaet promes ya. Be enemi blong yumi, Setan, i traem evri rod blong pulumaot yumi long Jehova. (Revelesen 12:17) Yumi mekem desisen finis blong obei long Jehova mo blong mekem wok blong hem. Sipos yumi jenisim tingting blong yumi, yumi save lusum laef blong yumi.

Bitim 2,600 yia bifo, king blong Babilon, Nebukadnesa, i stanemap wan bigfala pija we oli wokem long gol. Hem i putum wan strong tok se evriwan oli mas bodaon long bigfala pija ya. Man we i no wantem bodaon, king bambae i sakem hem i go long bigfala faea. Tri yangfala ya Sedrak, Mesak, mo Abednego, oli stap mekem wosip long Jehova, mo oli no wantem mekem Jehova i harem nogud. Ale, trifala i no obei long king, nao oli sakem trifala i go long bigfala faea. Trifala ya i rere blong ded bitim we oli no obei long God. Be Jehova i mekem wan merikel blong sevem trifala.—Daniel 3:1-27.

Yumi save tingbaot profet Daniel tu. Hem i stap prea long Jehova 3 taem long wan dei. Be hem i save se sipos oli faenemaot hem, bambae oli sakem hem i go long hol we i fulap long ol laeon. Nating se i olsem, hem i gohed nomo, i holemstrong long desisen blong hem blong wosipim tru God. From we hem i mekem olsem, Jehova i sevem hem, “i blokem ol laeon oli no kakae hem.”—Daniel 6:1-27.

Tede tu, ol man we oli givim laef blong olgeta i go long Jehova finis, oli holem promes ya. Yu traem tingbaot wan grup blong ol yangfala Witnes long Afrika. Long wan seremoni long skul, oli no wantem salut long flaeg blong kantri. Taswe, skul i wantem sakemaot olgeta. Biaen, minista blong edukesen i toktok wetem olgeta. Oli no fraet, be long kaen fasin, oli eksplenem from wanem oli no salut long flaeg. Stat long taem ya, i no moa gat wan man i traem pulum olgeta blong oli brekem loa blong Jehova.

Wan narafala man bakegen, nem blong Josef, hem tu i kasem trabol. Wantaem nomo, woman blong hem i ded. Ol famle blong Josef oli agri long plan we hem i mekem blong berem woman blong hem. Be ol famle blong woman blong hem oli no stap long trutok, ale oli wantem mekem sam kastom we God i no laekem. Josef i talem se: “Taem oli luk se mi no save jenisim tingting blong mi, oli traem blong fosem ol pikinini blong mi, be olgeta tu oli stanap strong.” Mo tu, ol famle ya oli mekem wan plan blong kam long haos blong mi blong wekap fulnaet wetem dedbodi. Be mi mi talem long olgeta se sipos oli strong blong mekem kastom ya, bambae oli no mekem long haos blong mi. Oli save gud se mi mo woman blong mi, mitufala i no bilif long samting ya. Afta we mifala i storian plante, oli go mekem kastom blong olgeta long narafala ples.

“Long hadtaem ya, mi askem strong long Jehova blong i givhan long mifala, blong mifala i no brekem loa blong hem. Jehova i harem prea blong mi, mo hem i givhan long mifala blong mifala i stanap strong.” Josef mo ol pikinini blong hem oli holemstrong desisen blong olgeta blong obei long Jehova, oli no jenisim tingting blong olgeta.

Long yia 32, wan woman we i no laen blong Isrel i kam askem long Jisas blong i ronemaot devel long gel blong hem. Woman ya i askem plante taem, be Jisas i no ansa. Hem i talem long ol disaepol blong hem se: “God i sanem mi blong mi kam long ol laen blong Isrel nomo. Olgeta ya oli olsem ol sipsip we oli lus.” Be woman ya i no stop, nao Jisas i talem long hem se: “I no stret blong man i tekem ol kakae blong pikinini blong hem, i sakem long ol dog.” Nao woman ya i soemaot se hem i gat strong bilif, i se: “Masta, i tru, be ol dog tu, oli save kakae ol hafkakae we i folfoldaon aninit long tebol blong masta blong olgeta.” Nao Jisas i jenisim tingting blong hem, mo i ronemaot devel long gel blong woman ya.—Matiu 15:21-28.

Taem Jisas i jenisim tingting blong hem, hem i soemaot fasin blong Jehova. Yu traem tingbaot  taem ya we ol man Isrel oli girap, oli mekem wosip long wan buluk we oli wokem long gol. Jehova i wantem kilim olgeta i ded from we oli brekem loa blong hem. Be Moses i askem strong long Jehova blong i no kilim olgeta i ded, nao Jehova i jenisim tingting blong hem.—Eksodas 32:7-14.

Aposol Pol tu i gat fasin olsem Jehova mo Jisas, hem i rere blong jenisim tingting blong hem. Long fas misinari trip blong hem, Mak i lego hem. From samting ya, Pol i no moa wantem tekem Mak i go wetem hem bakegen long ol narafala trip. Be biaen, Pol i luksave se Mak i kam bigman finis long tingting blong hem, mo hem i save givhan blong mekem wok. Taswe Pol i talem long Timoti se: “I gud taem yu kam, yu tekem Mak i kam wetem yu, from we hem i save givhan long mi long ol wok blong mi.”—2 Timoti 4:11.

?Yumi lanem wanem? Yumi lanem se, nating we Jehova i stret gud olgeta, be hem i rere blong jenisim tingting blong hem. Hemia from we hem i gat sore mo longfala tingting, mo hem i lavem ol man. Be yumi, yumi no stret gud olgeta, mo plante taem tingting blong yumi i no stret. Taswe, yumi nidim moa blong jenisim tingting blong yumi. Maet yumi gat nogud tingting long narafala, be taem yumi kasem save long samting we i stap hapen long laef blong hem, yumi jenisim tingting blong yumi.

Samtaem, yumi save jenisim tingting blong yumi long ol mak we yumi wantem kasem long wok blong God. Maet yumi stap stadi Baebol mo yumi go long ol miting, be yumi no tingbaot yet blong baptaes. Maet yumi naf blong mekem wok blong paenia, be yumi neva stat. Maet wan brata i no wantem kam wan man blong givhan no wan elda long kongregesen. (1 Timoti 3:1) ?Yu yu gat tingting olsem? I gud yu jenisim tingting blong yu. Jehova i wantem se yu kasem ol wok ya. Mo hem i wantem se yu yu glad blong mekem wok blong hem mo blong givhan long ol narafala.

 Ella, we i wok long Betel long Afrika, i talem se: “Taem mi jes kam long Betel, mi no save se bambae mi stap longtaem no nogat. Mi wantem mekem wok blong Jehova wetem fulhat blong mi, be mi no wantem lego ol famle blong mi. !Fastaem, mi harem nogud tumas blong stap longwe long olgeta! Be sista we i serem rum wetem mi, i leftemap tingting blong mi, nao mi mekem desisen blong stap. Afta we mi stap 10 yia long Betel, mi harem se mi wantem stap longtaem moa blong givhan long ol brata mo sista.”

Samtaem yumi mas jenisim tingting blong yumi. Yu traem tingbaot Ken, we i jalus long brata blong hem mo “i kros tumas.” God i luksave se Ken bambae i mekem wan nogud samting, nao hem i givim woning long Ken, se: “Sin blong yu i olsem wan wael anamol we i stap klosap long doa, i rere blong kakae yu.” Be Ken i no lesin long woning ya. Hem i no wantem jenisim tingting mo fasin blong hem. !Nao hem i girap i kilim brata blong hem i ded!—Jenesis 4:2-8.

Mo tu, yumi save tingbaot King Usia. Fastaem, hem i obei gud long Jehova mo i fren gud wetem hem. Be afta, hem i kam praod, nao i girap i mekem samting we ol pris nomo oli gat raet blong mekem. Hem i bonem insens long tempol. Ol pris oli givim woning long hem, be hem i “kros tumas.” Hem i no lesin long tok blong olgeta mo i no jenisim tingting blong hem. Taswe Jehova i panisim Usia wetem wan rabis sik blong skin.—2 Kronikel 26:3-5, 16-20.

I gat sam man long taem blong yumi tu we oli luksave se oli mas jenisim tingting blong olgeta. Joachim i baptaes long yia 1955, be long yia 1978, kongregesen i putumaot hem. Bitim 20 yia afta, hem i jes tanem tingting blong hem mo i kambak long trutok. Taem wan elda i askem long Joachim from wanem hem i wet longtaem olsem, hem i talem se: “Mi mi kros mo mi praod. Naoia, mi mi sore we mi wet longtaem tumas olsem. Taem mi stap yet afsaed, mi save se ol Witnes blong Jehova nomo oli tijim trutok.”

Sam samtaem, yumi tu yumi mas jenisim desisen mo fasin blong yumi. Taem yumi mekem olsem, Jehova i glad long yumi.—Ol Sam 34:8.