1, 2. Long dei we Jisas i laef bakegen, ?hem i mekem wanem long ol disaepol?

TU DISAEPOL blong Jisas tufala i stap wokbaot i go long wan vilej we i stap 11 kilometa afsaed long Jerusalem. Tufala i harem nogud tumas from we Jisas i ded. Tufala i no save yet se Jisas i laef bakegen. Nao wantaem nomo, Jisas i kamtru long tufala, mo i stap wokbaot wetem tufala. “Nao Jisas i stat long buk blong Moses, mo i gotru long ol tok blong ol profet, i talemaotgud long tufala, olgeta tok blong Baebol we oli bin raetem blong tokbaot hem.” (Luk 24:13-15, 27) Tufala i harem gud tumas, from we Jisas i “stap talemaot” mo eksplenem klia ol tok blong Baebol.—Luk 24:32.

² Long sem dei, tufala i gobak long Jerusalem. Taem tufala i faenem ol aposol, tufala i talemaot samting we i hapen. Oli stap stori yet, be Jisas i kamtru long olgeta. Ol aposol oli fraet tumas nao oli taltalem long olgeta se, ‘?I tru se Jisas ya?’ Baebol i talem samting we Jisas i mekem blong oli kam strong bakegen, i se: “Hem i openem tingting blong olgeta blong oli kasem gud mining blong ol tok blong Baebol.”—Luk 24:45, NW.

3. ?Wanem i save mekem tingting blong yumi i foldaon? ?Wanem i save givhan long yumi blong yumi stap glad?

 ³ Samtaem yumi tu yumi harem nogud olsem ol disaepol ya. Nating se yumi bisi long wok blong Jehova, be tingting blong yumi i save foldaon taem ol man oli no intres long gud nius. (1 Korin 15:58) Maet ol Baebol stadi blong yumi oli no stap gohed gud. Maet sam long olgeta oli no moa wantem stadi. ?Wanem i save givhan long yumi blong yumi stap glad long wok blong prij? Yumi mas kasem gud mining blong ol parabol blong Jisas. Naoia bambae yumi tokbaot 3 long olgeta.

4. ?Wanem mining blong parabol ya?

⁴ Ridim Mak 4:26-29. ?Wanem mining blong parabol ya? Man we i planem sid, hem i minim ol man blong prij. Sid i minim gud nius blong Kingdom we oli talemaot long ol gudfala man. Man we i planem sid i mekem sem mak olsem ol narafala man, ‘long naet, hem i slip, mo long dei, hem i stap wokbaot.’ Afta we hem i planem sid, taem i mas pas blong sid ya i karem kakae. Sloslo, “sid ya i gru, i stap kam bigwan,” ‘graon nomo i mekem i gru.’ Long sem fasin, i tekem taem blong man i kam fren blong Jehova. Sloslo, hem i kam klosap long Jehova, nao i givim laef blong hem i go long Jehova mo i baptaes. Hemia i olsem we sid “i gat frut blong hem.”

5. ?Jisas i wantem tijim ol man long wanem?

⁵ ?Jisas i wantem tijim ol man long wanem? Jisas i wantem soemaot se Jehova nao i stap mekem trutok i gru long hat blong “olgeta we oli stret blong kasem laef.” (Ol Wok 13:48, NW; 1 Korin 3:7) Yumi planem sid, yumi putum wota long hem, be yumi no save fosem sid ya blong i gru, mo yumi no save mekem se i gru hareap. Olsem man long parabol ya, yumi no save se sid ya i stap gru olsem wanem. Taem yumi mekem ol wok blong yumi evri dei, yumi no luksave se sid blong Kingdom i stap gru long hat blong man. Be afta we taem i pas, sid ya i karem frut nao wan niufala disaepol i joenem yumi long wok blong karem kakae long garen.—Jon 4:36-38.

6. ?Yumi lanem wanem samting long parabol ya?

⁶ ?Yumi lanem wanem? Fas samting, yumi no save fosem ol Baebol stadi  blong oli gohed gud long trutok. Nating se yumi mekem evri samting we yumi naf blong mekem blong givhan long olgeta, yumi neva mas fosem olgeta blong oli baptaes. Yumi mas mekem tingting blong yumi i stap daon, mo luksave se ol man wanwan oli mas mekem desisen ya blong givim laef blong olgeta i go long God. Man i mas mekem desisen ya from we hem i lavem Jehova tumas. Long taem ya nomo, Jehova i save glad long desisen blong hem.—Ol Sam 51:12; 54:6; 110:3.

7, 8. (1) ?Wanem tufala samting bakegen we yumi lanem long parabol ya? Yu talem wan stori. (2) ?Parabol ya i soemaot wanem long saed blong Jehova mo Jisas?

⁷ Seken samting we yumi lanem, se tingting blong yumi i no mas foldaon taem yumi luk se Baebol stadi blong yumi i no gohed gud. Yumi mas mekem tingting blong yumi i longfala. (Jemes 5:7, 8) Sipos yumi mekem bes blong yumi blong givhan long wan stadi, be sid blong trutok i no gru long hat blong hem, hemia i no min se yumi wan rabis tija. Jehova i stap mekem sid blong trutok i gru long hat blong ol man nomo we tingting blong olgeta i stap daon, mo oli rere blong jenisim fasin blong olgeta. (Matiu 13:23) Taswe, yumi no mas ting se sipos yumi givhan long plante man blong oli kam long trutok, wok blong yumi i gud moa. Jehova i no makem wok blong yumi from namba blong ol man we yumi pulum olgeta oli kam long trutok. Long defren fasin, hem i tingbaot we yumi stap wok strong, mo hem i glad long samting ya.—Ridim Luk 10:17-20; 1 Korin 3:8.

⁸ Namba tri samting, yumi no save luk ol jenis we oli stap hapen long hat blong man. Yu tingbaot wan man wetem woman blong hem we tufala i stadi wetem wan misinari. Tufala i talem long misinari ya se tufala i wantem kam pablisa. Be hem i talem long tufala se fastaem tufala i mas lego fasin blong smok. Hem i sek taem tufala i talem se tufala i lego plante manis finis. Tufala i luksave se sipos tufala i smok haed, Jehova i save luk, mo hem i no laekem nating man we i gat tu fes. Taswe, tufala i harem se i moagud blong smok long fored blong misinari i bitim we tufala i haedem. Ale, tufala i mekem desisen blong stop. Misinari ya i no save nating long bigfala jenis ya we tufala i mekem. Be sloslo tufala i lavem Jehova, nao samting ya i givhan long tufala blong tufala i mekem gudfala desisen.

9. ?Wanem mining blong parabol ya?

⁹ Ridim Matiu 13:47-50. ?Wanem mining blong parabol ya? Jisas i tokbaot wan man we i sakem net long solwota, hemia i minim wok blong talemaot gud nius blong Kingdom. Man ya i pulum “ol naranarafala fis” long net ya,  hemia i min se wok blong prij i stap pulum plante milian defdefren kaen man long olgeta ples long wol. (Aesea 60:5) Yumi luk samting ya long ol asembli blong yumi evri yia mo long Memoriol. Sam long ol man ya oli olsem “ol gudfala fis,” mo oli joen long Kristin kongregesen. Be sam long olgeta oli olsem “ol rabis fis,” nao Jehova i no wantem olgeta.

10. ?Jisas i wantem tijim ol man long wanem?

¹⁰ ?Jisas i wantem tijim ol man long wanem? Taem man blong sakem net i seraotem ol fis, hemia i no minim jajmen we bambae i kamaot long taem blong bigfala trabol. Be Jisas i wantem soemaot samting we yumi luk se i stap hapen long ol las dei ya. Plante man oli laekem gud nius blong Kingdom, be i no olgeta evriwan we oli wantem kam man blong Jehova. Plante we oli stadi Baebol mo oli kam long miting, oli no wantem givim laef blong olgeta i go long Jehova. (1 King 18:21) Samfala oli kam long miting fastaem, be afta oli lego. Sam yangfala we oli gruap long trutok, oli no lanem blong lavem Jehova. Jisas i talem se evri man i mas mekem prapa desisen blong hem. Sipos yumi mekem gudfala desisen, Jehova bambae i luk yumi olsem “ol gudgudfala samting” we hem i wantem.—Hagae 2:7.

11, 12. (1) ?Yumi lanem wanem long parabol ya? (2) ?Parabol ya i soemaot wanem long saed blong Jehova mo Jisas?

¹¹ ?Yumi lanem wanem? Yumi no mas harem nogud tumas sipos wan Baebol stadi no wan pikinini blong yumi i no wantem mekem wok blong Jehova. Maet yumi mekem evri samting we yumi naf blong mekem blong tijim hem. Be wan man i no kam fren blong Jehova from we hem i stadi Baebol nomo no from we hem i gruap long trutok. Hem i mas wantem blong obei long Jehova. Sipos no, hem i no save kam wan man blong hem.

¹² ?Olsem wanem? ?Hemia i min se olgeta we oli lego trutok bambae oli no moa save kambak long kongregesen? ?Olgeta we oli no givim laef blong olgeta long Jehova yet, bambae oli no moa gat janis? Si, olgeta ya oli gat janis yet blong kam fren blong Jehova  bifo we bigfala trabol i stat. Jehova i stap singaot olgeta se: ‘Sipos yufala i kambak long mi, mi mi save kambak long yufala.’ (Malakae 3:7) Jisas i soemaot samting ya long parabol blong boe we i lusum rod.—Ridim Luk 15:11-32.

13. ?Wanem mining blong parabol ya?

¹³ ?Wanem mining blong parabol ya? Papa ya we i sore long boe blong hem i minim Papa blong yumi long heven, Jehova, we i lavem yumi. Boe ya we i spolem mane blong hem i minim ol man we oli lego Kristin kongregesen. Oli lego Jehova mo oli go joen long wol blong Setan, we i olsem ‘wan narafala kantri longwe.’ (Efesas 4:18; Kolosi 1:21) Afta we taem i pas, sam long olgeta oli luksave se oli mekem wan bigfala mastik, nao oli kambak long Jehova. Oli mas traehad, be sipos tingting blong olgeta i stap daon mo oli rili sore from samting we oli bin mekem, Jehova bambae i fogivim olgeta mo i glad blong tekembak olgeta.—Aesea 44:22; 1 Pita 2:25.

14. ?Jisas i wantem tijim ol man long wanem?

¹⁴ ?Jisas i wantem tijim ol man long wanem? Jehova i wantem tumas se olgeta we oli lego hem oli kambak. Long parabol ya, tingting blong papa i stap strong se maet wan dei boe blong hem i kambak. Taem boe blong hem i “stap longwe yet,” i stap wokbaot i kam, hem i resis i go blong mitim hem. Hem i soemaot long boe blong hem se hem i glad blong tekembak hem. Parabol ya i mas pulum olgeta we oli lego Jehova blong oli kambak naoia nomo. Ating oli no moa fren wetem hem, maet oli sem, mo oli harem se i had tumas blong kambak. Be sipos oli traehad, bambae i no blong nating nomo. Taem oli kambak, Jehova mo Jisas mo olgeta enjel bambae oli glad we oli glad.—Luk 15:7.

15, 16. (1) ?Yumi lanem wanem long parabol ya? Yu talem sam stori. (2) ?Parabol ya i soemaot wanem long saed blong Jehova mo Jisas?

 ¹⁵ ?Yumi lanem wanem? Yumi mas folem eksampol blong Jehova blong lavem ol man. Taem wan man i kambak long kongregesen, yumi no mas mekem olsem we yumi “stret bitim mak” nao yumi no wantem joen wetem hem. Sipos yumi mekem olsem, bambae yumi tu yumi no moa fren gud wetem Jehova. (Prija 7:16, NW) Yumi lanem tu se yumi mas tingbaot man we i lego kongregesen olsem “wan sipsip we i lus” mo i save kambak. (Ol Sam 119:176) Sipos yumi faenem wan man we i lego kongregesen finis, ?bambae yumi mekem wanem? Sipos yumi haremsave parabol ya blong Jisas mo yumi lanem samting from, bambae yumi talemaot kwiktaem long ol elda blong oli save givhan long hem.

¹⁶ Olgeta we oli kambak long kongregesen, oli glad tumas we Jehova i sore long olgeta mo we kongregesen i lavem olgeta mo i givhan long olgeta. Wan brata we kongregesen i putumaot hem 25 yia bifo, i talem se: “Stat long taem we kongregesen i tekembak mi, Jehova i stap mekem mi mi harem gud moa evri dei. (Ol Wok 3:19) !Evriwan long kongregesen oli lavem mi mo oli wantem givhan long mi! Naoia mi gat wan nambawan famle long trutok.” Wan yangfala sista we i bin stap afsaed long kongregesen 5 yia, i talem se: “I no gat tok blong eksplenem olsem wanem mi mi harem gud, taem mi luk stret we ol brata mo sista oli lavem mi olsem Jisas i talem. !I no gat wan samting we i gud moa i bitim we yumi stap insaed long ogenaesesen blong Jehova!”

17, 18. (1) ?Yumi lanem wanem long trifala parabol ya? (2) ?I gud yu mekem wanem?

¹⁷ Ale, i gud yumi tingting bak long samting we yumi lanem long trifala parabol ya. Fas samting, yumi no save fosem wan Baebol stadi blong i gohed gud long trutok. Yumi livim bisnes ya long han blong Jehova. Seken samting, yumi no mas ting se olgeta evriwan we oli stadi mo kam long miting, bambae oli wantem mekem wok blong Jehova. Namba tri samting, yumi mas gat strong tingting se olgeta we oli lego Jehova oli save kambak. Taem oli kambak, yumi mas joen gud wetem olgeta, mo yumi soemaot se yumi lavem olgeta olsem we Jehova i lavem olgeta.

¹⁸ Yumi evriwan i mas gohed blong kasem save, haremsave, mo kam waes. Taem yu ridim ol parabol blong Jisas, i gud yu askem se: ‘?Wanem mining blong parabol ya? ?Parabol ya i tijim mi long wanem? ?Mi mi save mekem wanem folem parabol ya? ?Parabol ya i soemaot wanem long saed blong Jehova mo Jisas?’ Taem yumi faenem ansa blong ol kwestin ya, yumi kasem gud mining blong ol tok blong Jisas.