WOK blong talemaot gud nius hem i moa impoten long ol narafala wok long wol tede. Hem i wan blesing blong yumi mekem wok long nem blong Jehova blong tijim ol man. Nating se i olsem, samtaem i no isi long ol paenia mo ol pablisa blong oli gat strong tingting blong mekem wok ya. ?From wanem?

Sam pablisa oli no storian plante, taem oli prij long ol haos wanwan, from we plante man oli no stap long haos. Mo taem i gat ol man long haos, maet ol man ya oli no intres blong lesin long mesej blong Kingdom, mo samtaem oli kros long yumi. Sam narafala pablisa oli gat bigfala teritori we plante man oli lesin, be oli fraet se bambae oli no save prij long evri man long teritori ya. Samfala tingting blong olgeta i foldaon from we oli prij plante yia finis, be en i no kam yet.

Taem yumi prij bambae i gat sam samting we oli traem yumi, we oli save mekem tingting blong yumi i foldaon. Yumi laef long wan wol we i stap long “paoa blong Setan,” taswe i sua se bambae i had long yumi blong talemaot gud nius.—1 Jon 5:19.

Nating se wanem kaen samting i traem yu long wok blong prij, be yu save sua se Jehova bambae i givhan long yu blong winim ol traem ya. ?Be yu save mekem wanem blong gat strong tingting blong mekem moa long wok blong prij? I gud yumi tokbaot sam rod.

Evri yia i gat plante man we oli tekem baptaes blong kam olsem ol Witnes blong Jehova. Sipos yu yu wan we yu jes baptaes, yu save lanem plante gudfala samting long olgeta we oli prij plante yia finis. Mo sipos yu yu prij blong plante yia finis, ?yu yu save givhan blong trenem ol niuwan? Taem yu mekem olsem, bambae yu glad bigwan.

Jisas i save se ol disaepol blong hem oli nidim we hem i givhan long olgeta blong oli kam ol gudfala tija, mo hem i soemaot long olgeta olsem wanem blong prij. (Luk 8:1) Tede, ol niuwan oli nidim sem trening blong mekem se oli save kam ol gudfala tija.

Yumi no mas gat tingting ya se taem wan niufala pablisa i go prij, bambae hem i jes lanem olsem  wanem blong tijim man. Wan niufala pablisa i nidim wan gudfala tija we i kaen mo i gat lav. Wan pablisa we i gat gudhan i save tijim wan niufala pablisa, olsem wanem blong (1) rerem mo lanem ol fastok we hem i save yusum blong prij, (2) storian wetem ol man, (3) seremaot magasin, (4) visitim ol man we oli intres, (5) statem wan Baebol stadi. Wan niufala pablisa i save kam wan gudfala tija, sipos hem i lukluk mo i folem ol samting we wan pablisa we i gat gudhan, i tijim long hem. (Luk 6:40) Mo niufala pablisa ya bambae i no fraet, from we hem i save se i gat wan man we i stap we i save givhan long hem. Mo tu, taem yumi talem ol gudfala toktok mo yumi givim sam advaes long wan niufala pablisa, hemia i save givhan bigwan long hem.—Prija 4:9, 10.

Taem yumi prij, yumi traehad blong toktok wetem ol man blong haos. Be samtaem, beswan storian we yumi gat taem yumi prij, hemia taem yumi storian wetem pablisa we i prij wetem yumi. I gud blong tingbaot se taem Jisas i sanem ol disaepol blong hem blong oli go prij, hem i sanem olgeta oli go “tutu.” (Luk 10:1) Olsem nao, oli save lefleftemap tingting blong olgeta taem oli prij. Taem yumi wok wetem ol brata mo sista long wok blong prij, hemia wan nambawan janis we yumi gat blong mekem ‘bilif blong olgeta i givhan long yumi, olsem we bilif blong yumi tu i save givhan long olgeta.’—Rom 1:12.

?Wanem sam samting we maet yu save tokbaot? ?Maet wan long yutufala i gat wan gudfala stori we i jes hapen i no longtaem, we i save leftemap tingting blong narawan? ?Yu yu lanem wan gudfala poen long taem blong famle wosip blong yu no long prapa stadi blong yu? ?I gat wan tok long miting we i leftemap tingting blong yu? Samtaem maet yu wok wetem wan pablisa we yu no save gud hem. Long taem olsem, maet yu save askem olsem wanem hem i kam long trutok. ?Wanem i mekem se hem i luksave se hemia ogenaesesen blong Jehova? ?Wanem ol wok we hem i kasem no ol ekspiriens we hem i gat? Maet yu save tokbaot sam ekspiriens blong yu. Nating se wanem samting i kamaot long wok blong prij, be taem yu wok wetem narafala, hemia wan nambawan janis blong yumi “givgivhan long yumi.”—1 Tesalonaeka 5:11.

Yumi mas kamgud moa long fasin blong mekem prapa stadi blong yumi. Olsem nao yumi save gohed blong gat strong tingting blong prij. “Slef we i stret mo waes” i givim plante save long ol defren topik we yumi save stadi long hem.(Matiu 24:45, NW) I gud yumi tokbaot wan eksampol blong wan topik blong stadi long hem: ?From wanem wok blong prij i impoten tumas? Yu save luk sam gudfala risen long bokis  ya, “ ?From Wanem Yu Mas Gat Strong Tingting Blong Prij?”

Taem yu tingting gud long ol poen we oli stap long bokis ya, hemia bambae i pulum yu blong yu gohed blong prij wetem strong tingting. Taem yu mekem stadi blong yu wan, i gud yu traem raetemdaon sam narafala risen we oli kamaot long Baebol, we oli sapotem tingting ya blong prij wetem strong tingting. Biaen yu tingting dip long ol risen ya. Samting ya bambae i givhan long yu blong yu gat strong tingting blong prij.

Oltaem ogenaesesen blong Jehova i givim ol rod we yumi save folem blong kamgud moa long wok blong prij. Eksampol, yumi prij long ol haos wanwan, mo tu, yu save prij long leta, long telefon, long ol pablik ples, mo yu save tekem janis blong prij. Mo tu, maet yumi save mekem plan blong prij long ol ples we maet i gat sam Witnes nomo long ples ya, no maet i no gat Witnes nating.

?Yu yu glad blong lanem wan niufala samting? Plante we oli traem blong folem ol rod ya, oli harem gud tumas mo oli karem gudfala frut. Yu traem luk ol trifala eksampol ya.

Wan sista nem blong hem April, i traem folem wan haf long Kingdom Wok we i tokbaot olsem wanem blong statem wan Baebol stadi. Hem i askem tri man we hem i wok wetem olgeta blong oli stadi Baebol. Sista ya i sapraes mo i glad tumas taem trifala ya oli agri blong stadi Baebol wetem hem, mo tu oli stat blong kam long ol miting blong kongregesen.

Yumi kasem advaes tu blong faenem ol man we maet oli intres blong ridim wan haf long magasin blong yumi. Wan eria elda long Amerika, i jusum blong seremaot wan haf long Wekap! we i tokbaot ol wil blong trak. Hem i soem haf ya long ol bos blong  kampani we oli stap salem ol wil blong trak. Biaen, hem mo woman blong hem tufala i go long bitim 100 ofis blong ol dokta, mo tufala i soem haf ya “Understanding Your Doctor.” Eria elda ya i talem se, visit we tufala i mekem i givhan long ol man blong oli save ol buk blong yumi, mo wok we yumi stap mekem. Taem tufala i savegud ol man long teritori blong tufala, hemia i mekem se tufala i gat janis blong visitim plante man.

Wan sista nem blong hem Judy, i raetem wan leta i go long hedkwota long Amerika, mo i talem tangkiu from ol advaes we oli leftemap tingting blong yumi blong prij long telefon. Hem i talem se, mama blong hem i gat 86 yia mo hem i gat plante problem blong helt. Be, oltaem hem i prij long ol man long telefon. Gudfala frut i kamaot se, naoia hem i statem wan Baebol stadi wetem wan woman we i gat 92 yia.

Ol haf we oli kamaot long ol buk blong yumi oli rili wok gud. !Yu traem mekem samting we ol haf ya oli tokbaot! Ol haf ya oli save givhan long yu blong holemtaet glad we yu gat long wok blong prij, mo bambae yu gat strong tingting blong gohed blong prij.

?Wanem i mekem se yumi glad taem yumi prij? I no hamas buk we yumi givimaot, i no hamas Baebol stadi we yumi gat, i no hamas man we yumi pulum olgeta i kam long trutok. Yu traem tingbaot Noa. ?I gat hamas man bakegen we Noa i givhan long olgeta wetem ol famle blong hem, blong oli kam man blong Jehova? Nating se i olsem wanem, Noa i wan gudfala prija. Samting we i moa impoten hemia se, yumi gat strong tingting blong mekem wok blong Jehova. —1 Korin 4:2.

Plante pablisa oli luksave se, oli mas putum sam mak we oli naf blong kasem, blong oli save harem gud long wok blong prij. ?Wanem sam long ol mak ya? I gat sam gudfala tingting oli stap long bokis ya, “ Putum Ol Mak We Yu Naf Blong Kasem.”

Yu askem Jehova blong i blesem wok we yu mekem, mo i givhan long yu blong luksave se wok ya i impoten. Taem yu kasem ol mak we yu putum, bambae yu harem gud tumas. From we yu save se yu traem bes blong yu, blong talemaot gud nius.

I tru se samtaem i no isi blong talemaot gud nius. Be i gat sam samting we yu save mekem, blong yu gat strong tingting blong gohed blong prij. Hemia, taem yu storian mo leftemap tingting blong narafala we i wok wetem yu, taem yu mekem gud prapa stadi blong yu oltaem, yu folem ol advaes we slef we i stret mo waes i talem, mo yu putum ol mak we yu naf blong kasem. I impoten moa blong tingbaot se Jehova God i givim blesing ya long yu, blong talemaot gud nius, olsem wan Witnes blong hem. (Aesea 43:10) !Yes, bambae yu harem gud tumas taem yu gohed blong gat strong tingting blong prij!